¿Alkye tten jaku tzalaja aj tjaw tuʼjina Tyol Dios ex tuʼn tetz tiʼna tbʼanel xnaqʼtzbʼil toj? Ximana kyiʼj qeju jweʼ onbʼil aju o tzʼonin kyiʼj nimku xjal aʼyeju in che uʼjin tiʼj Tyol Dios.

Jyoʼnktza jun tbʼanel lugar. Qa mintiʼxix jun tiʼ in qʼajt, qa at spikʼun ex qa at kyqʼiqʼ, a jlu kʼonil tiʼja tuʼn tok tqʼoʼn twiʼya tiʼjju in jaw tuʼjina.

Tenx tbʼanel t-ximbʼetza aj tjaw tuʼjina. Jun oyaj Tyol Dios tuʼn Qtat toj kyaʼj. Tuʼn tonin Tyol Dios tiʼja aj tjaw tuʼjina, tenx t-ximbʼetza ik tzeʼn jun tal kʼwaʼl taj tuʼn tel tnikʼ tiʼj ttat. Qʼimetza alkyexku t-ximbʼetza nya bʼaʼn tiʼj Tyol Dios ex qʼonxa ambʼil te Dios tuʼn ttzaj xnaqʼtzaʼna tuʼn (Salmo 25:4).

Naʼna Dios naʼmxtoq t-xi tzyet tuʼn tuʼjina. T-ximbʼetz Dios tkuʼx toj Xjan Uʼj, tuʼntzunju qaj tuʼn qtzaj tonin tuʼntzun tel qnikʼ tiʼj. In tzaj ttziyen qa tzul tqʼoʼn xewbʼaj xjan kye qeju in xi kyqanin te (Lucas 11:13). Aju xewbʼaj xjan lu jaku tzʼonin tiʼja tuʼn tel tnikʼa tiʼj tiʼ t-ximbʼetz Dios. Ex aj tbʼet ambʼil kʼelel tnikʼa tiʼj «t-ximbʼetz Dios, aju mlay tzʼel qnikʼ tiʼj» (1 Corintios 2:10).

Uʼjinktza tuʼn tel tnikʼa tiʼj. Nya oʼkx tuʼn tjaw tuʼjina. Akux in kubʼ tuʼjina, ximana tiʼj. Xjelinkuya: «¿Tiʼ tbʼanel tmod xjal kubʼ tyekʼun aju in yolin txʼolbʼabʼil lu tiʼj? ¿Tzeʼn jaku kubʼ nqʼoʼne toj xnaqʼtzbʼil aju in nel nnikʼe tiʼj?».

Ximana tiʼ xnaqʼtzbʼil in tzaj tqʼoʼn teya. Tuʼn ttzalaja tiʼjju in jaw tuʼjina toj Tyol Dios, qʼonka tilil tuʼn tel tnikʼa tiʼj alkye tten jaku tzʼonin tiʼja toj tanqʼibʼila. Jaku kubʼ t-ximana tuʼn tel mas tnikʼa tiʼj Dios, tuʼn toka te tbʼanel xjal, tbʼanel chmilbʼaj, tbʼanel xuʼjilbʼaj, ex junjuntl tiʼchaq. Yajxitl, jaku jaw tjyoʼna junjun xnaqʼtzbʼil toj Tyol Dios aju jaku tzʼonin tiʼja tuʼn tbʼant aju ma kubʼ t-ximana. *

Aʼyeju jweʼ onbʼil lu jaku che onin tiʼja tuʼn t-xi tzyet tuʼna, pero ¿tzeʼn jaku tzʼok te mas tbʼanel aju in kubʼ tuʼjina toj Tyol Dios? Toj juntl xnaqʼtzbʼil tzul qʼoʼn junjuntl onbʼil.