1. Maske a Jehová at mas nim toklen, ¿tiʼ txokbʼil o txi tqʼoʼn kye xjal?

ATE Jehová mas nim toklen tibʼaj tkyaqil. A kubʼ bʼinchante tkyaqilju at, ex mintiʼ bʼajsbʼil tiʼj tnabʼil ex tipumal. Tqʼama Job jlu tiʼj Jehová: «Bʼaʼn wuʼne tkyaqil in bʼant tuʼna, ex misikyer jun mlaywit bʼant tuʼna» (Job 42:2). Jaku bʼant noq tiʼxku tuʼn Jehová aju otoq kubʼ t-ximen ex nya il tiʼj tuʼn t-xi onit. Noqtzun tuʼnj, in kubʼ tyekʼun Jehová tkʼujlabʼil kyiʼj txqantl aj t-xi tqʼoʼn txokbʼil kye tuʼn kyaqʼunan junx tukʼil.

2. ¿Alkye tbʼanel aqʼuntl xi tqʼoʼn Jehová te Jesús?

² Kubʼ tbʼinchaʼn Jehová aju Tkʼwaʼl, a Jesús, tej naʼmxtoq tkubʼ tbʼinchaʼn txqantl tiʼchaq. Yajxitl, xi tqʼoʼn Jehová ambʼil te Tkʼwaʼl tuʼn tonin tiʼj tuʼn tkubʼ bʼinchet tkyaqil tiʼchaq (Juan 1:1-3, 18). Kubʼ ttzʼibʼin apóstol Pablo jlu tiʼj Jesús: «Noq tuʼn Crist o tbʼincha Dios tkyaqil, tkyaqilju at tuj kyaʼj ex tkyaqilju at twitz txʼotxʼ, tkyaqilju qʼanchaʼl ex tkyaqilju mintiʼ qʼanchaʼl,  kyukʼix qe kawbʼil, kyukʼix qeju in che kawin, kyukʼix qe nejenel, kyukʼix qeju at kyoklen; tkyaqil o bʼant noq tuʼn Crist, tkyaqil o bʼant tuʼn tajbʼen te» (Colosenses 1:15-17). Ikju, xi tqʼoʼn Jehová jun tbʼanel aqʼuntl te Tkʼwaʼl ex tuʼn t-xi tqʼamaʼn aju taqʼun kye txqantl. ¡Jun tbʼanel oklenj jlu!

3. ¿Tiʼ txokbʼil xi tqʼoʼn Jehová te Adán, ex tiquʼn?

³ Ax ikx, xi tqʼoʼn Jehová txokbʼil kye xjal tuʼn kyaqʼunan junx tukʼil. Jun techel, xi tqʼoʼn ambʼil te Adán tuʼn tok tqʼoʼn kybʼi qe jil, moqa txkup (Génesis 2:19, 20). ¡Noqpe ximana tiʼj tzalajbʼil kubʼ tnaʼn Adán tiʼj taqʼun! Kubʼ ten Adán ximel tiʼj alkye tten che keʼyin txkup ex aju in bʼant kyuʼn, ex iktzun tten jaw tjyoʼn kybʼi. A Jehová kubʼ bʼinchante tkyaqil txkup ex jakutoq tzʼok tqʼoʼn kybʼi. Noqtzun tuʼnj, kubʼ tyekʼun tkʼujlabʼil tiʼj Adán ex xi tqʼoʼn ambʼil te tuʼn tok tqʼoʼn kybʼi txkup. Ax ikx, xi tqʼoʼn Jehová juntl aqʼuntl te Adán tuʼn toktoq Txʼotxʼ tuʼn te jun tbʼanel najbʼil (Génesis 1:27, 28). Atzunte Adán kubʼ t-ximen tuʼn miʼn taqʼunan mastl tukʼil Jehová, tuʼn jlu, tzaj nim nya bʼaʼn tiʼj ex kyiʼj qe tiyjil, moqa tyajil (Génesis 3:17-19, 23).

4. ¿Alkye tten e onin txqantl xjal tuʼn tjapun twiʼ t-ximbʼetz Jehová?

⁴ Yajxitl, xi tqʼoʼn Jehová txokbʼil kye txqantl xjal tuʼn kyaqʼunan tukʼil. Ik tzeʼn te Noé bʼaj tbʼinchaʼn jun ark tuʼn tkyaj anqʼin kyukʼil qe toj tja tej ttzaj Nim Jbʼal. Etz tiʼn Moisés qe aj Israel toj tnam Egipto. E okx tiʼn Josué qe aj Israel toj Txʼotxʼ otoq tzaj Tziyen kye. Kubʼ tbʼinchaʼn Salomón tja Dios toj tnam Jerusalén. Ok María te ttxuʼ Jesús. Aqeju tmajen Jehová tzʼaqlixix lu ex junjuntl o che aqʼunan junx tukʼil tuʼn tjapun twiʼ t-ximbʼetz.

5. a) ¿Alkye aqʼuntl jaku bʼant quʼn qkyaqilx? b) ¿Ilpe tiʼj tuʼn qonin tiʼj Jehová tuʼn tbʼant aqʼuntl lu? (Qʼonka twitza tiʼj tnejel tilbʼilal).

⁵ Toj ambʼil jaʼlo, in txokin Jehová qiʼj tuʼn tbʼant tkyaqil quʼn tuʼn qonin tiʼj Tkawbʼil. At nim tten tzeʼn jaku qo ajbʼen te Jehová. Nya qkyaqil jaku qo ajbʼen te toj junx tten, noqtzun tuʼnj, jaku qo pakbʼan tiʼj tbʼanil tqanil tiʼj Tkawbʼil. ¿Ilpe tiʼj tuʼn qonin tiʼj Jehová tuʼn tbʼant aqʼuntl lu? Nya il tiʼj. Jaku bʼant aqʼuntl lu tuʼn Jehová. Ex jaku tzaj yolin tzmaxi toj kyaʼj tuʼn tyolin kyukʼil xjal. Tqʼama Jesús qa jaku bʼant kyyolin qe abʼj tuʼn Jehová tuʼn t-xi kyqʼamaʼn kye xjal aju tqanil tiʼj aj Kawil toj Tkawbʼil (Lucas 19:37-40). Noqtzun tuʼnj, o tzaj tqʼoʼn Jehová ambʼil qe tuʼn qaqʼunan «junx» tukʼil (1 Corintios 3:9). Kubʼ ttzʼibʼin apóstol Pablo jlu: «In qo aqʼnane junx tukʼil Dios, kyjaʼtzun in qo kubʼsane kywitze tuʼn miʼn kykʼmonteye t-xtalbʼil Dios noqx gan» (2 Corintios 6:1). ¡Jun tbʼanel qoklen tuʼnju o qo tzaj txkoʼn tuʼn qaqʼunan junx tukʼil Dios! Qo xnaqʼtzan tiʼj junjun tiquʼn in tzaj tqʼoʼn jlu tzalajbʼil qe.

6. ¿Ti tqʼama Jesús tiʼjju kubʼ tnaʼn tuʼnju aqʼunan junx tukʼil Ttat?

⁶ Qa in qo aqʼunan tukʼil Jehová, kukx in kanet tzalajbʼil quʼn. Tej naʼmxtoq tul Jesús tzalu twitz Txʼotxʼ, tqʼama jlu: «A qman o bʼinchante weye t-xe tnejel [...] lu qine atine ttxlaj tuʼn tkubʼ ximet alkye tuʼn tbʼant. Tkyaqil qʼij o tzalaj wiʼje ex kukx in chin tzalaje twitz» (Proverbios 8:22, 30). Tej taqʼunan Jesús tukʼil Ttat, nim tzalaj tuʼnju bʼant nim tiʼchaq tuʼn ex el tnikʼ tiʼj qa kʼujlaʼntoq tuʼn Jehová. Yajtzun qe, ¿in qo tzalaj?

7. ¿Tiquʼn in tzaj tiʼn tzalajbʼil qe aju pakbʼabʼil?

 ⁷ Tqʼama Jesús qa in qo tzalaj aj t-xi qqʼoʼn jun tiʼ kye txqantl ex aj ttzaj qkʼamoʼn jun tiʼ (Hechos 20:35). Nimxix o qo tzalaj tej tkanet axix tok quʼn, noqtzun tuʼnj, ¿tiquʼn ax ikx in qnaʼn tzalajbʼil aj t-xi qqʼamaʼn aju axix tok kye txqantl? Tuʼnju aj tok qqʼoʼn qwitz tiʼj qa axix tok in che jaw tzalaj aj tel kynikʼ tiʼj tiʼ in tzaj t-xnaqʼtzanxix Tyol Dios ex aj tok kyojtzqiʼn Jehová. Nim in qo tzalaj aj tok qqʼoʼn qwitz tiʼj alkye tten in bʼaj kychʼixpun kyximbʼetz ex kyanqʼibʼil. Aju pakbʼabʼil, atzun aqʼuntl mas nim toklen tuʼn tbʼant quʼn ex in tzaj tqʼoʼn tzalajbʼil qe. A jlu in nonin kyiʼj qeju at jun kyamiwbʼil tukʼil Dios tuʼn tten kychwinqlal te jumajx (2 Corintios 5:20).

8. ¿Tiʼ in kynaʼn junjun erman tuʼnju in che aqʼunan junx tukʼil Jehová?

⁸ Aj qonin kyiʼj txqantl tuʼn tel kynikʼ tiʼj Dios, in nel qnikʼ tiʼj qa in jaw tzalaj Jehová quʼn ex qa nim toklen toj twitz aju in bʼant quʼn tuʼn qajbʼen te. A jlu in tzaj tqʼoʼn tzalajbʼil qe (kjawil uʼjit 1 Corintios 15:58). Tqʼama jun erman te tnam Italia aju Marco tbʼi: «Mintiʼ in kanet yol wuʼne tuʼn t-xi nchikʼbʼaʼne aju tzalajbʼil in nnaʼne tuʼnju in xi nqʼoʼne aju mas tbʼanel at weye te Jehová ex nya te jun xjal aju kʼikʼel tnaʼl tuʼn aju in bʼant wuʼne». Chʼixmi axju tqʼama juntl erman te tnam Italia aju Franco tbʼi: «Tkyaqil qʼij in najbʼen Xjan Uʼj tuʼn Jehová, qeju uʼj in che etz tuʼn ttnam ex qeju chmabʼil tuʼn ttzaj tnaʼn qe qa kʼujlaʼn qoʼ tuʼn. Nim toklen toj twitz Jehová tkyaqilju in bʼant quʼn tuʼn qajbʼen te, maske nyaxix nim toklen toj qwitz. Tuʼnju in chʼin aqʼunane junx tukʼil Jehová in tzaj tqʼoʼn nim tzalajbʼil weye ex in tzaj tqʼoʼn nim tiquʼn tuʼn wanqʼine».

9. a) ¿Alkye tamiwbʼil Jehová at tukʼil Jesús? b) ¿Tiquʼn attoq jun tbʼanel tamiw Jehová tukʼil Jesús?

⁹ Aj qaqʼunan junx kyukʼil qeju kʼujlaʼn quʼn, mas in qo ok laqʼeʼ kytxlaj. In nel mas  qnikʼ tiʼj kymod. Ex in nel qnikʼ tiʼj tiʼ kyajbʼil tuʼn tbʼant kyuʼn ex alkye tten in japun kyuʼn aju in kubʼ kyximen tuʼn tbʼant. Aqʼunan Jesús tukʼil Jehová tojlo nim millón abʼqʼi tej naʼmxtoq tul tzalu twitz Txʼotxʼ. Aju kʼujlabʼil kubʼ kyyekʼun kyxolx, onin tuʼn miʼn tkubʼ naj aju kyamiwbʼil. Tzaj tqʼamaʼn Jesús aju kyamiwbʼil at tej tqʼama jlu: «Aqine tukʼix Nmane junx qoʼye» (Juan 10:30). A jlu onin kyiʼj tuʼn kyok laqʼeʼxix mas jun tiʼj juntl ex bʼaj kyonin kyibʼ tej kyaqʼunan junx.

10. ¿Tiquʼn in qo ok laqʼeʼ kytxlaj qerman ex ttxlaj Jehová tuʼn pakbʼabʼil?

¹⁰ Xi tqʼamaʼn Jesús te Jehová tuʼn kyok t-xqʼuqin qe t-xnaqʼtzbʼen. ¿Tiquʼn? Tqʼama jlu toj tnaʼj Dios: «Tuʼntzun kyten junx kyximbʼetz, ik tzaʼn qe junx qoʼ» (Juan 17:11). Qa in qo anqʼin ik tzeʼn in tzaj kyqʼamaʼn qe tkawbʼil Jehová ex aj qyolin kyukʼil txqantl toj pakbʼabʼil tiʼj Tyol, mas in nel qnikʼ kyiʼj qe tbʼanel tmod. Ax ikx in nel qnikʼ tiʼj tiquʼn bʼaʼn tuʼn tok qeʼ qkʼuʼj tiʼj ex tuʼn kyjapun qe tkawbʼil quʼn. Qa ma qo ok laqʼeʼ ttxlaj Jehová ax ikx te ktzajel laqʼeʼ qtxlaj (kjawil uʼjit Santiago 4:8). Ax ikx in qo ok laqʼeʼ kytxlaj qerman tuʼn pakbʼabʼil, tuʼnju in nok qqʼoʼn qwitz tiʼj alkye tten in nok tilel kyuʼn tuʼn ttzalaj Jehová kyiʼj. Nya oʼkxju, ax ikx in nok qqʼoʼn qwitz tiʼj qa ax tzalajbʼil in kynaʼn ik tzeʼn qe, ax kyximbʼetz kyajbʼil tuʼn tbʼant ik tzeʼn qe ex aʼyex nya bʼaʼn in che ok weʼ twitz ik tzeʼn qe. Tuʼntzunju, in qo aqʼunan junx, in qo tzalaj junx ex in che ikʼx junjun tiʼchaq quʼn junx. Tqʼama jun ermana Octavia tbʼi aju in nanqʼin toj tnam Gran Bretaña jlu: «Tuʼnju in che onine tukʼil Jehová, in chin ok laqʼeʼye ttxlaj ex kytxlaj erman». ¿Tiquʼn? Ax Octavia in tzaj qʼamante qa tuʼnju ax kyximbʼetz qeju tamiw at ik tzeʼn te. Ax jlu in kubʼ qnaʼn.

11. ¿Tiquʼn mas qo okel laqʼeʼ kytxlaj qerman ex ttxlaj Jehová toj akʼaj twitz Txʼotxʼ?

¹¹ At nim qkʼujlabʼil tiʼj Jehová ex kyiʼj qerman toj ambʼil jaʼlo, noqtzun tuʼnj, mas che okel qkʼujlaʼn toj akʼaj twitz Txʼotxʼ. ¡Qo ximen tiʼj tkyaqilju tbʼanel aqʼuntl kbʼantel quʼn junx toj ambʼil tzul! Kxel qqʼamaʼn bʼaʼn kyulene kye qeju che jawil anqʼin ex kxel qqʼoʼn xnaqʼtzbʼil kye tiʼj Jehová. Ax ikx, qo aqʼunal tuʼn tok Txʼotxʼ te jun tbʼanel najbʼil. Tzul tqʼoʼn nim tzalajbʼil qe aj qaqʼunan junx ex chebʼele kʼokel tkyaqil te tzʼaqli tjaqʼ tkawbʼil Jesús. Ex tkyaqil qʼij mas qo okel laqʼeʼ kytxlaj erman ex ttxlaj Jehová. Ikju, tzul tqʼoʼn Jehová tkyaqilju tbʼanel tiʼchaq in pon qkʼuʼj tiʼj (Salmo 145:16).

12. ¿Alkye tten in qo ok t-xqʼuqin pakbʼabʼil?

¹² Il tiʼj tuʼn tok qxqʼuqin aju qamiwbʼil tukʼil Jehová. Tuʼnju in qo anqʼin kyxol xjal ateʼ tjaqʼ tkawbʼil Satanás ex aj il qoʼ. Ex tuʼn jlu nya kwest jaku qo ok ten ximel ex jaku kubʼ qbʼinchaʼn jun tiʼ ik tzeʼn kye xjal. Ik tten jlu ik tzeʼn in qo ok ten nadaril toj jun nim aʼ aju in qox tjakʼuʼn toj juntl plaj jatumel nya qajbʼil tuʼn qxiʼ. Tuʼntzunju, kʼokel tilel quʼn tuʼn tten qipun tuʼn qnadarin tuʼntzun qxiʼ jatumel qaj. Chʼixmi axju kbʼantel quʼn, il tiʼj tuʼn  tok tilel quʼn tuʼn miʼn qxi jakʼuʼn tuʼn tkubʼ qbʼinchaʼn qe tiʼchaq in bʼant kyuʼn xjal. ¿Alkye tten in qo ok t-xqʼuqin pakbʼabʼil tiʼj jlu? Aj qyolin tiʼj Jehová ex tiʼj Tyol, atz tok qwiʼ kyiʼj tiʼchaq nim kyoklen ex tbʼanel, ex nya kyiʼj qe tiʼchaq jaku chewix qʼuqbʼil qkʼuʼj kyuʼn (Filipenses 4:8). Mas in chʼiy qʼuqbʼil qkʼuʼj tuʼn pakbʼabʼil, tuʼnju in tzaj tnaʼn qeju ttziybʼil Jehová qe ex qeju tbʼanel tkawbʼil. Nya oʼkxju, ax ikx in qo tzaj tonin tuʼn kyten tbʼanel qmod aju il tiʼj tuʼn tten qe tuʼntzun tok qxqʼuqin qibʼ tiʼj Satanás ex kyiʼj xjal ateʼ tjaqʼ tkawbʼil (kjawil uʼjit Efesios 6:14-17).

13. ¿Tiquʼn nin toklen toj twitz erman te Australia aju pakbʼabʼil?

¹³ Aj tok qqʼoʼn ambʼil tiʼj tuʼn qpakbʼan, tuʼn qxnaqʼtzan ex tuʼn qbʼinchan xtalbʼil kyiʼj qerman toj Ja te Chmabʼil, in qo ok t-xqʼuqin jlu tiʼj tuʼn miʼn qok tenxix ximel kyiʼj qeju nya bʼaʼn in che tzaj qiʼj. Tqʼama jun erman Joel tbʼi aju in nanqʼin toj tnam Australia jlu: «In nonin pakbʼabʼil wiʼje tuʼn miʼn tok nqʼoʼn nwiʼye kyiʼj junjun tiʼchaq. Ex tuʼn jlu in nok nqʼoʼn nwitze tiʼj alkyeqe nya bʼaʼn in che ok weʼ xjal twitz, atzun weye, at tbʼanel in tzaj toj wanqʼibʼile tuʼnju in kubʼ nbʼinchaʼne aju in tzaj tqʼamaʼn Tyol Dios. Ax ikx, in nonin pakbʼabʼil wiʼje tuʼn miʼn tjaw nnimsan wibʼe ex in tzaj tqʼoʼn ambʼil weye tuʼn tok qeʼ nkʼuʼje tiʼj Jehová ex kyiʼj erman».

14. ¿Tiquʼn in tzaj tyekʼun aju kukx in qo pakbʼan qa at xewbʼaj xjan qukʼil?

¹⁴ Ax ikx, mas in nok qeʼ qkʼuʼj tiʼj qa at xewbʼaj xjan qukʼil tuʼnju pakbʼabʼil. Tuʼn tel qnikʼ tiʼj qo ximen tiʼj jun techel. Noqwit at jun saj qʼamante teya tuʼn t-xi tiʼna wabʼj kye kykyaqil xjal atz jatumel najliya. Mintiʼ teya in chjet tiʼj aqʼuntl ex ax teya in xi chjonte tkyaqilju in najbʼen tuʼna tuʼn tbʼant wabʼj. Noqtzun tuʼnj, ateʼ junjun xjal nya kygan aju wabʼj in xi tiʼna kye, axpe ikx ateʼ junjuntl in nel ikʼuna kyuʼn tuʼnju in xi tiʼna wabʼj kye. ¿Kukxpe jaku tzʼaqʼunana tiʼj aqʼuntl lu? Nyalo nim ambʼil jaku txi tiʼn tuʼn ttzaj bʼaj tkʼuʼja ex jakulo kubʼ t-ximana tuʼn miʼn taqʼunantla. Ikju, ateʼ junjun qe kukx in qo pakbʼan toj jun ex juntl abʼqʼi, ex atlo maj in nok qqʼoʼn nim ambʼil ex pwaq tiʼj maske in che ok ten junjun xjal xmayil qiʼj ex in qo el ikʼun kyuʼn. A jlu in tzaj tyekʼun qa in nonin Jehová qiʼj tukʼil xewbʼaj xjan.

15. ¿Tiʼ toklen pakbʼabʼil tukʼilju t-ximbʼetz Jehová at kyiʼj kykyaqil xjal?

¹⁵ ¿Tiʼ toklen pakbʼabʼil tukʼilju t-ximbʼetz Jehová at kyiʼj kykyaqil xjal? Atoq te Jehová t-ximbʼetz tuʼn kyanqʼin xjal te jumajx ex mintiʼ chʼixpet t-ximbʼetz tej tkubʼ tbʼinchaʼn Adán il (Isaías 55:11). Kubʼ t-ximen Jehová jun tumel tuʼn kyklet xjal tiʼj il ex kamik. ¿Ti bʼant tuʼn? Tzaj t-samaʼn Tkʼwaʼl tzalu twitz Txʼotxʼ tuʼn t-xi tqʼoʼn tchwinqlal tuʼn qpaj. Noqtzun tuʼnj, tuʼn tonin aju chojbʼil lu qiʼj ex tuʼn qanqʼin te jumajx, il tiʼj tuʼn t-xi qbʼiʼn Jehová. Xi t-xnaqʼtzaʼn Jesús kye xjal aju tajbʼil Jehová tuʼn tbʼant kyuʼn ex axju xi tqʼamaʼn  kye t-xnaqʼtzbʼen tuʼn tbʼant kyuʼn. Aj qpakbʼan ex aj qonin kyiʼj txqantl tuʼn kyok te tamiw Dios toj ambʼil jaʼlo, in qo aqʼunan junx tukʼil Jehová tiʼjju tbʼanel t-ximbʼetz at tuʼn kyklet xjal tiʼj il ex kamik.

16. Aj qpakbʼaʼn, ¿tiʼ in kubʼ qyekʼun?

¹⁶ Aj qonin kyiʼj txqantl tuʼn tel kynikʼ tiʼj tzeʼn jaku kanet kychwinqlal te jumajx, in kubʼ qyekʼun qa at qkʼujlabʼil kyiʼj ex tiʼj Jehová. In tzaj tqʼamaʼn Tyol Dios jlu: «Atzun taj Dios, tuʼn kyklet kykyaqil xjal ex tuʼn tel kynikʼ tiʼj ju yol axix tok» (1 Timoteo 2:4). Tej t-xi tqanin jun fariseo alkye mandamyent mas nim toklen te Jesús, xi ttzaqʼweʼn jlu te: «Kykʼujlame Qman Dios tuʼn tkyaqil kyanmiye ex tuʼn tkyaqil kykʼuʼje ex tuʼn tkyaqil kynabʼle. Atzun tnejel mandamyent jlu maʼxix toklen. Ex aju tkabʼin mandamyent ikx tten ik tzaʼn tnejel, in tmaʼn: Kykʼujlame qe kyukʼile ik tzaʼnx kyeye in kykʼujlan kyibʼe» (Mateo 22:37-39). Aj qpakbʼan tiʼj tbʼanel tqanil, in kubʼ qyekʼun qa in xi qnimen aju mandamyent lu (kjawil uʼjit Hechos 10:42).

17. ¿Tiʼ teya in kubʼ tnaʼn tiʼjju toklena at tuʼn taqʼunana junx tukʼil Jehová?

¹⁷ Qqʼonx chjonte te Jehová tuʼnju o tzaj tqʼoʼn jun tbʼanel qoklen. Tuʼnju in qo aqʼunan junx tukʼil, in tzaj tqʼoʼn tzalajbʼil qe, in qo ok tlaqʼbʼaʼn mas ttxlaj ex kytxlaj qerman, ex in nok t-xqʼuqin qamiwbʼil tukʼil. Ax ikx, in tzaj tqʼoʼn aqʼuntl lu ambʼil qe tuʼn tkubʼ qyekʼun qkʼujlabʼil tiʼj Jehová ex kyiʼj qerman. Ateʼ nim millón tmajen Jehová twitz tkyaqil Txʼotxʼ ex kykyaqilx junxilchaq in nikʼ toj kyanqʼibʼil. Noqtzun tuʼnj, qa kuʼxun qoʼ moqa nya, qa at qpwaq moqa mintiʼ ex qa at nim qipumal moqa mintiʼ, qkyaqilx jaku qo yolin tiʼj qʼuqbʼil qkʼuʼj kyukʼil txqantl. In kubʼ qnaʼn ik tzeʼn te jun ermana te tnam Francia, tej tqʼama jlu: «Aju Xjal mas nim tipumal tibʼaj tkyaqil, aju Bʼinchal tkyaqil qe tiʼchaq, aju Dios at tzalajbʼil tukʼil, in tzaj tqʼamaʼn jlu weye: ‹¡Txiʼya ex yolina! Yolina wiʼje, yolina tuʼn tkyaqil tanmiya. Kxel nqʼoʼne tipuna, kxel nqʼoʼne aju Nyole teya, kxel nqʼoʼne qe n-anjele te onil teya ex kxel nqʼoʼne qe tukʼila toj pakbʼabʼil. Kxel nxnaqʼtzaʼne alkye tten kbʼantel tuʼna ex kxel nqʼoʼne xnaqʼtzbʼil teya tojxix ambʼil bʼantni tiʼj›. In tzaj tqʼoʼn Jehová ambʼil qe tuʼn tbʼant tajbʼil quʼn ex tuʼn qaqʼunan junx tukʼil. ¡Jun tbʼanel oklenj aju tuʼn qaqʼunan junx tukʼil!».