1, 2. ¿Tiquʼn xi ttzʼibʼin apóstol Pablo aju uʼj kye okslal aj Hebreo?

TOJ abʼqʼi 61, mintiʼtoq in bʼaj kykʼuʼj qeju okslal te Israel tuʼnju in che anqʼintoq toj txubʼtxaj. Tokxtoq apóstol Pablo pres toj tnam Roma, noqtzun tuʼnj, in yontoq tuʼn tetz tzaqpiʼn. Tzmatoq in netz Timoteo toj cárcel aju in bʼettoq tukʼil apóstol Pablo. Kykabʼil otoq bʼaj kyximen tuʼn kyxiʼ visitaril kye erman te Judea (Hebreos 13:23). Noqtzun tuʼnj, oktoq kchʼixpetil jlu. Oʼkx tuʼn tikʼtoq jweʼ abʼqʼi yajxitl kʼokeltoq kytxolbʼan kyibʼ qeju soldad te tnam Roma tiʼj tnam Jerusalén. Otoq kyaj tqʼamaʼn Jesús qa aj tok kyqʼoʼn kywitz okslal tiʼj aj tok kytxolbʼan kyibʼ qeju soldad tiʼj tnam, aqeju okslal in che anqʼin toj Judea ex toj Jerusalén, iltoq tiʼj tuʼn kyetz oq (Lucas 21:20-24).

² Otoq tzikʼ 28 abʼqʼi t-xilen tqʼamaʼn Jesús qe yol lu. Tej kyikʼ qeju abʼqʼi lu, i el ikʼun okslal aj Israel ex e ok weʼ twitz nim nya bʼaʼn, noqtzun tuʼnj, kukx e ajbʼen te Jehová (Hebreos 10:32-34). Ex chʼixtoq tpon ambʼil tuʼn tkubʼ qʼuqbʼil kykʼuʼj toj malbʼil tuʼn juntl nimxix joybʼil (Mateo 24:20, 21; Hebreos 12:4). Qa  kyajbʼiltoq tuʼn kukx kynimen te Jesús ex tuʼn kykyaj anqʼin, iltoq tiʼj tuʼn tten qʼuqbʼil kykʼuʼj ex tuʼn tten mas kyipun tuʼntzun tikʼx kyuʼn (kjawil uʼjit Hebreos 10:36-39). Tuʼntzunju, bʼant tuʼn Jehová tuʼn t-xi ttzʼibʼin apóstol Pablo jun uʼj kye okslal aj Hebreo aju ojtzqiʼn quʼn jaʼlo ik tzeʼn aju uʼj xi tzʼibʼin kye aj Hebreo. Aju uʼj lu onin kyiʼj tuʼn tok kyipumal ex tuʼn tbʼaj kybʼinchaʼn kyten tiʼjju ambʼil tuʼn tul.

3. ¿Tiquʼn il tiʼj tuʼn tok qqʼoʼnxix qwiʼ tiʼj uʼj xi tzʼibʼin kye okslal aj Hebreo?

³ Toj ambʼil jaʼlo, il tiʼj tuʼn tok qqʼoʼnxix qwiʼ tiʼjju uʼj xi tzʼibʼin kye okslal aj Hebreo. ¿Tiquʼn? Tuʼnju chʼixme ax qe tiʼchaq in qo ikʼ toj ik tzeʼn kye okslal te tnam Judea. In qo anqʼin kyoj «mankbʼil tqʼijlalil» jatumel at «nim yajbʼil». Ateʼ nim erman o che el ikʼun ex o che ikʼ toj nim nya bʼaʼn, ex kukx o che ajbʼen te Jehová (2 Timoteo 3:1, 12). Chʼixmelo qkyaqil mintiʼxix in tzaj bʼaj qkʼuʼj tuʼnju atoʼ toj txubʼtxaj ex mintiʼ in qo ok weʼ twitz jun ikʼbʼil qʼanchaʼl. Noqtzun tuʼnj, il tiʼj tuʼn tok qxqʼuqin qibʼ ik tzeʼn kye okslal e ten toj ambʼil tej tten apóstol Pablo, ¿tiquʼn? Tuʼnju chʼix tok qʼuqbʼil qkʼuʼj toj jun matij joybʼil (kjawil uʼjit Lucas 21:34-36).

4. a) ¿Alkye taqikʼ Tyol Dios ma jaw jyoʼn te abʼqʼi 2016? b) ¿Tiquʼn ma jaw jyoʼn taqikʼ Tyol Dios lu?

⁴ ¿Tiʼ kʼonil qiʼj tuʼn tbʼaj qbʼinchaʼn qten tiʼjju ambʼil tzul? Jun tiʼ jaku tzʼonin qiʼj aju tbʼanel nabʼil in jaw quʼjin toj Hebreos 13:1, aju in tzaj tqʼamaʼn jlu: «Kukx tuʼn tten kykʼujlalile kyxolxe porque kyerman kyibʼe». A jlu, atzun jun kyxol qeju nim nabʼil xi tqʼoʼn apóstol Pablo kye okslal aj Hebreo tuʼn tonin kyiʼj tuʼn ttenxix qʼuqbʼil kykʼuʼj. Atzun taqikʼ Tyol Dios lu ma jaw jyoʼn te abʼqʼi 2016. ¿Tiquʼn? Tuʼnju jaku tzʼonin qiʼj tuʼn ttenxix qʼuqbʼil qkʼuʼj kyuw.

5. ¿Tiʼ aju tuʼn tten qkʼujlabʼil qxolx tuʼnju qerman qibʼ?

⁵ ¿Tiʼ aju tuʼn tten qkʼujlabʼil qxolx tuʼnju qerman qibʼ? A jlu in yolin tiʼjju kʼujlabʼil in qnaʼn tiʼj jun toj qja moqa tiʼj jun tbʼanel qamiw (Juan 11:36). Tuʼntzunju, aqoʼ okslal axix tok, nya oʼkx in kubʼ qyekʼun qkʼujlabʼil qxolx ik tzeʼn qerman qibʼ, sino tuʼnju qerman qibʼ (Mateo 23:8). Tqʼama Pablo jlu: «Kykʼujlam kyibʼe kyxolxe porque kyitzʼin kyibʼe; tzʼok tililx kyuʼne tuʼn kynimanjtz qe mastl okslal ex mya oʼkx aqeye tuʼn kynimanjtze» (Romanos 12:10). A jlu in tzaj tyekʼun qe qa il tiʼj tuʼn tten nimxix qkʼujlabʼil kyiʼj qerman. Qa at qkʼujlabʼil qxolx kyukʼil qerman, ktel tbʼanel qamiwbʼil kyukʼil ex ktel mujbʼabʼil qxolx.

6. ¿Alqiʼj at kykʼujlabʼil qeju axix tok okslal?

⁶ In tzaj tqʼamaʼn jun xjal at tojtzqibʼil qa aju txol yol «tuʼn tten kykʼujlalile kyxolxe porque kyerman kyibʼe», oʼkx qe okslal in najbʼen kyuʼn kyoj kyuʼj. Toj ambʼil ojtxi, oʼkx in xi kyqʼamaʼn xjal judiy «erman» te jun xjal at t-xilen kyukʼil moqa kye junjun tbʼanel kyamiw. Mintiʼ jun maj in xi kyqʼamaʼn «erman» te jun xjal qa nya judiy. Noqtzun tuʼnj, toj kywitz okslal axix tok, kykyaqil qeju tmajen Jehová in nok kyqʼoʼn te kyerman, noq jaxku tumel najli qe (Romanos 10:12). Tuʼntzunju, qkyaqilx in nok qkʼujlan qibʼ tuʼnju ax tok qerman qibʼ ex atzun o tzaj t-xnaqʼtzaʼn Jehová qe (1 Tesalonicenses 4:9). ¿Tiquʼn nim toklen tuʼn kukx tok tilel quʼn tuʼn tten qkʼujlabʼil kyiʼj qerman?

7. a) ¿Alkye jun tiquʼn mas nim toklen tuʼn tten qkʼujlabʼil kyiʼj qerman? b) ¿Alkye juntl tiquʼn il tiʼj tuʼn tten mas qkʼujlabʼil kyiʼj qerman?

⁷ Aju tiquʼn mas nim toklen tuʼn tten qkʼujlabʼil kyiʼj qerman, tuʼnju a Jehová in tzaj qʼamante  qa il tiʼj tuʼn tbʼant quʼn. Mlay tzʼok qkʼujlaʼn Jehová qa mintiʼ qkʼujlabʼil kyiʼj qerman (1 Juan 4:7, 20, 21). Aju juntl tiquʼn il tiʼj tuʼn tok qkʼujlan qibʼ, tuʼnju qajbʼil tuʼn qonin qibʼ qxolx, mas aj ttzaj nya bʼaʼn qiʼj. Tej t-xi ttzʼibʼin Pablo aju uʼj kye okslal aj Hebreo, ojtzqiʼntoq tuʼn qa nim kybʼet okslal il tiʼj tuʼn kyetz oq ex tuʼn tkyaj kykolin tkyaqilju at kye. Otoq kyaj tqʼamaʼn Jesús qa kwest che okel qeju ambʼil aju (Marcos 13:14-18; Lucas 21:21-23). Tuʼntzunju, naʼmxtoq kypon qeju ambʼil aju, nimtoq toklen tuʼn tten mas kykʼujlabʼil qeju okslal kyxolx (Romanos 12:9).

8. ¿Tiʼ il tiʼj tuʼn tbʼant quʼn jaʼlo naʼmxtoq txi tzyet nimxix yajbʼil?

⁸ Chʼix tul kanin nimxix yajbʼil (Marcos 13:19; Apocalipsis 7:1-3). Aj txi tzyet, nim toklen tuʼn t-xi qbʼiʼn aju kawbʼil lu: «Kyokxe tuj kyjaye ex kylamoʼn etze qe tlamel ja kywitze. Kyewanx chʼin kyibʼe, akux nnikʼ ttxʼuʼjil Qman» (Isaías 26:20). Aj ttzaj qʼamaʼn «kyokxe tuj kyjaye», atzlo in yolin jlu kyiʼj tembʼil jatumel in nok qchmon qibʼ. Kyoj qe tembʼil lu, in qo kʼulin te Jehová junx kyukʼil qerman. Noqtzun tuʼnj, at juntl tiʼ il tiʼj tuʼn tbʼant quʼn ex nya oʼkx tuʼn tok qchmon qibʼ tkyaqil seman. Xi tnaʼn Pablo kye okslal aj Hebreo qa il tiʼj tuʼn t-xi kyqʼuqbʼaʼn kykʼuʼj tuʼn tkubʼ kyyekʼun kykʼujlabʼil ex tuʼn tkubʼ kybʼinchaʼn junjun tbʼanel tiʼchaq kye txqantl (Hebreos 10:24, 25). Nim toklen tuʼn tbʼaj qkyuwsan qkʼujlabʼil qxolx toj ambʼil jaʼlo, tuʼnju kʼonil jlu qiʼj tuʼn kyikʼx nim joybʼil quʼn toj ambʼil tzul.

9. a) ¿Toj alkye ambʼil jaku kubʼ qyekʼun qkʼujlabʼil kyiʼj qerman toj ambʼil jaʼlo? b) Jaku tzaj tqʼamaʼna jun techel jatumel kubʼ kyyekʼun erman kykʼujlabʼil kyiʼj qerman jatumel najliya moqa kyoj junjuntl lugar.

⁹ At nim tumel tzeʼn jaku kubʼ qyekʼun qkʼujlabʼil kyiʼj qerman toj ambʼil jaʼlo, naʼmxtoq txi tzyet nimxix yajbʼil. At nim erman in tzaj nya bʼaʼn kyiʼj tuʼn jun kyaqnajnabʼ, aj tjaw chʼiy aʼ, tuʼn jun kyqʼiqʼ jbʼal, aj tetz mar toj ttembʼil moqa alkyexku juntl nya bʼaʼn. Ateʼ junjuntl in che el ikʼun (Mateo 24:6-9). Ex ateʼ txqantl mintiʼ kypwaq tuʼn tpaj sbʼubʼil at toj ambʼil jaʼlo (Apocalipsis 6:5, 6). Noqtzun tuʼnj, qa mas in che ok weʼ qerman twitz nya bʼaʼn, mas at ambʼil tuʼn tkubʼ qyekʼun qkʼujlabʼil kyiʼj. Ateʼ nim xjal toj ambʼil jaʼlo, mintiʼ in kubʼ kyyekʼun kykʼujlabʼil, atzun qe il tiʼj tuʼn kukx kyok qkʼujlaʼn qerman (Mateo 24:12) ^[1] (tqanil jun).

10. ¿Tiʼ kʼelel qnikʼ tiʼj kyoj qeju taqikʼ che ul?

¹⁰ ¿Tiʼ jaku bʼant quʼn tuʼn kukx tten qkʼujlabʼil kyiʼj qeju qerman toj ambʼil jaʼlo jatumel at nim nya bʼaʼn? Ex, ¿alkye tten jaku kubʼ qyekʼun qa in qnaʼn aju kʼujlabʼil lu tuʼnju qerman qibʼ? Kyaj tqʼamaʼn apóstol Pablo junjun tten toj capítulo 13 toj uʼj te Hebreos, tej otoqxi tqʼama jlu: «Kukx tuʼn tten kykʼujlalile kyxolxe porque kyerman kyibʼe». Qo xnaqʼtzan tiʼj qaq tumel alkye tten jaku kubʼ qyekʼun qkʼujlabʼil.

11, 12. ¿Tiʼ t-xilen aju tuʼn t-xi qqʼoʼn kyposad xjal? (Qʼonka twitza tiʼj tnejel tilbʼilal).

¹¹ «Miʼn tzikʼ tnaʼl kyuʼne tuʼn kyqʼonteye kyposad xjal» (kjawil uʼjit Hebreos 13:2). ¿Tiʼ t-xilen aju tuʼn t-xi qqʼoʼn kyposad xjal? A  t-xilen jlu tuʼn tten tbʼanel qmod kyukʼil qeju mintiʼ ojtzqiʼn kywitz quʼn. In tzajlo tnaʼn jlu qe aju bʼant tuʼn Abrahán ex Lot. Kykabʼil kubʼ kyyekʼun tbʼanel kymod kyukʼil junjun xjal e pon visitaril kye ex mintiʼ ojtzqiʼntoq kywitz kyuʼn, yajxitl ok kybʼiʼn qa anjel qeju e pon visitaril kye (Génesis 18:2-5; 19:1-3). Xi tqʼamaʼn Pablo qeju techel lu kye okslal aj Hebreo tuʼntzun tonin kyiʼj tuʼn tkubʼ kyyekʼun kykʼujlabʼil aj t-xi kyqʼoʼn kyposad xjal.

¹² ¿Alkye tten jaku kubʼ qyekʼun qa bʼaʼn qo qʼoʼn kyposad txqantl? Jaku chex qtxkoʼn erman qja tuʼn qwaʼn kyukʼil moqa tuʼn qten jun rat junx. Ex aj tpon ansyan in bʼet kyojele Ja te Chmabʼil tukʼil t-xuʼjil visitaril aju kʼloj okslal jatumel in nok qchmon qibʼ, jaku chex qtxkoʼn maske mintiʼ ojtzqiʼnxix kywitz quʼn (3 Juan 5-8). Nya il tiʼj tuʼn tbʼant jun matij wabʼj quʼn nix tuʼn tok qʼet nim pwaq tiʼj. Aju qajbʼil tuʼn tbʼant quʼn, aju tuʼn t-xi qqʼuqbʼaʼn kykʼuʼj erman ex nya tuʼn kyjaw labʼin kyiʼj qe tiʼchaq at qe. Nya oʼkxju, ax ikx mintiʼ tuʼn kytzaj qtxkoʼn oʼkx qeju jaku tzaj kyqʼoʼn t-xel qe toj alkyexku juntl tten (Lucas 10:42; 14:12-14). Ex atlo maj mintiʼxix ambʼil qiʼj, noqtzun tuʼnj, mintiʼ tuʼn tikʼ tnaʼl quʼn tuʼn t-xi qqʼoʼn kyposad qerman.

13, 14. ¿Alkye tten jaku qo onin kyiʼj qerman ateʼ toj cárcel?

¹³ «Kynaʼntze qeju ateʼ tuj pres» (kjawil uʼjit Hebreos 13:3). Tej t-xi ttzʼibʼin Pablo qe yol lu, atz in ximintoq kyiʼj erman ateʼtoq toj cárcel tuʼnju kukxtoq in che ajbʼen te Jehová. Xi tqʼamaʼn Pablo qa tbʼanel aju bʼant kyuʼn okslal tuʼnju tzaj qʼaqʼin kykʼuʼj kyiʼj qeju «e okx tuj pres» (Hebreos 10:34). Kyoj qeju kyaje abʼqʼi okx qʼoʼn Pablo toj cárcel, e onin junjun erman tiʼj, aqeju in che anqʼintoq nqayin. Noqtzun tuʼnj, ateʼ junjuntl in che anqʼintoq najchaq. ¿Alkye tten e onin tiʼj? Tej kukx e naʼn Dios tiʼj (Filipenses 1:12-14; Hebreos 13:18, 19).

¹⁴ Toj ambʼil jaʼlo, ateʼ nim erman toj cárcel tuʼnju kukx in che ajbʼen te Jehová. Aqeju erman in che anqʼin nqayin in che onin kyiʼj te junxilchaq tten. Noqtzun tuʼnj, nim qe najchaq in qo anqʼin kyiʼj. ¿Alkye tten jaku qo nin kyiʼj ex tuʼn tkubʼ qyekʼun qa kukx in che tzaj qnaʼn? Qa at qkʼujlabʼil kyiʼj tuʼnju qerman qe, toj tkyaqil ambʼil qo naʼl Dios kyiʼj. Jun techel, jaku qo naʼn Dios kyiʼj ermano ex ermana ex axpe ikx kyiʼj qe tal kʼwaʼl ateʼ toj cárcel atz toj tnam Eritrea. Kyxol qe jlu ateʼ Paulos Eyassu, Isaac Mogos ex Negede Teklemariam. Aʼyeju erman lu, ma tzikʼ mas te 20 abʼqʼi kyokxlen qʼoʼn toj cárcel.

15. ¿Alkye tten jaku kubʼ qyekʼun qa nim toklen mejebʼleʼn toj qwitz?

¹⁵ «Nimanxwit ju mejebʼleʼn kyuʼn kykyaqil» (kjawil uʼjit Hebreos 13:4). Aju juntl tten jaku kubʼ qyekʼun qa at qkʼujlabʼil kyiʼj qerman, aju qa ma tzʼok qqʼoʼn toklen aju mejebʼleʼn ex qa ma tzʼel qikʼun aju yaẍbʼil (1 Timoteo 5:1, 2). Jun techel, qa ma qo yaẍin tukʼil jun ermano moqa tukʼil jun ermana, kʼokel qbʼinchaʼn nim nya bʼaʼn tiʼj ex kyiʼj qeju toj tja. Nya oʼkxju, ax ikx ya mlay tzʼok qʼuqeʼ tkʼuʼj qiʼj nix qe erman (1 Tesalonicenses 4:3-8). Ax ikx bʼaʼn tuʼn qximen tiʼj tiʼ jaku kubʼ tnaʼn jun ermana qa ma tzʼel tnikʼ tiʼj qa in nok tqʼoʼn  twitz tchmil kyiʼj nya bʼaʼn tilbʼilal. ¿Okpe kbʼel tnaʼn qa kʼujlaʼn tuʼn tchmil ex qa nim toklen tmejebʼleʼn toj twitz? Mlay kubʼ tnaʼn ikju (Mateo 5:28).

16. ¿Tiʼ toklen aju tuʼn qtzalaj tukʼilju tuʼn kyok qkʼujlaʼn qerman?

¹⁶ «Che tzalaje tiʼj chʼin at kyeye jaʼlo» (kjawil uʼjit Hebreos 13:5). Qa qʼuqli qkʼuʼj tiʼj Jehová, qo tzalajel kyiʼj qeju tiʼchaq at qe. Noqtzun tuʼnj, ¿tiʼ toklen aju tuʼn qtzalaj tukʼilju tuʼn kyok qkʼujlaʼn qerman? Qa in qo tzalaj kyiʼj tiʼchaq at qe, ok kʼelel qnikʼ tiʼj qa mas nim kyoklen qerman twitzju tuʼn tten nim tiʼchaq qe moqa tuʼn tten nim qpwaq (1 Timoteo 6:6-8). Mlay qo ok ten yolil nya bʼaʼn kyiʼj qerman ex mlay qo ok ten qʼamal yol nya toj tumel tiʼjju in nikʼ qiʼj toj qanqʼibʼil. Ex mlay che el qikʼun txqantl tuʼnju tiʼchaq at kye ex mlay pon qkʼuʼj tuʼn tten mastl tiʼchaq qe. Aju kbʼantel quʼn kxel qqʼoʼn chʼin kye qeju qerman tiʼjju at qe (1 Timoteo 6:17-19).

17. ¿Alkye tten in nonin aju qʼuqbʼil qkʼuʼj ex qipumal tuʼn tkubʼ qyekʼun kye qerman qa kʼujlaʼn qe quʼn?

¹⁷ Jaku «qeʼxix qkʼuʼj tuʼn» (kjawil uʼjit Hebreos 13:6). Qa qʼuqli qkʼuʼj tiʼj Jehová, ktel qʼuqbʼil qkʼuʼj ex qipumal tuʼn tikʼx nimxix nya bʼaʼn quʼn ex ktel jun tbʼanel qximbʼetz. Aju qmod lu, kʼonil qiʼj tuʼn qonin ex tuʼn t-xi qqʼuqbʼaʼn kykʼuʼj qeju qerman. Iktzun tten kbʼel qyekʼun qa at qkʼujlabʼil kyiʼj (1 Tesalonicenses 5:14, 15). Qa in nok qeʼ qkʼuʼj tiʼj Jehová, ax ikx ktel qʼuqbʼil qkʼuʼj ex qipumal aj tul nimxix yajbʼil, tuʼnju kʼelel qnikʼ tiʼj qa jun rat naj tzul Jehová kolil qiʼj (Lucas 21:25-28).

18. ¿Ti kʼonil qiʼj tuʼn kyok qkʼujlaʼn mas qeju ansyan?

¹⁸ «Kynaʼntze qe nejenel e ten kyxole» (kjawil uʼjit Hebreos 13:7, 17). Nimxix in che aqʼunan qeju ansyan kyxol qeju  kʼloj okslal ex in nel kypaʼn ambʼil tuʼn tok kyxqʼuqin qeju erman. Tuʼntzunju, nim toklen tuʼn tten nim qkʼujlabʼil «kyiʼj tuʼnju in che aqʼnan» qxol (1 Tesalonicenses 5:13). Bʼaʼn tuʼn qximen tiʼj tkyaqilju aqʼuntl in bʼant kyuʼn qiʼj. Qa ma qo ximen tiʼj jlu, kxel qqʼoʼn nim chjonte kye ex mas che okel qkʼujlaʼn. Nya qajbʼil tuʼn ttzaj kybʼis nix tuʼn ttzaj jun nya bʼaʼn kyximbʼetz tuʼn jun qbʼinchbʼen. Aju kbʼantel quʼn, qo onil kyiʼj ex qo nimel kye.

19, 20. ¿Tiʼ kʼonil qiʼj tuʼn tok qkʼujlaʼn mas qeju qerman?

¹⁹ Aqoʼ tmajen Jehová, ojtzqiʼn qoʼ kyuʼn nim xjal tuʼnju at qkʼujlabʼil qxolx. Ax jlu bʼaj toj ambʼil tej tten Pablo. Maske ikju, kukx onin Pablo kyiʼj qeju okslal tuʼn tten mas kykʼujlabʼil kyiʼj kyerman tkyaqil qʼij. Tqʼama jlu: «Kukx tuʼn tchʼiy kykʼujlalile» (1 Tesalonicenses 4:9, 10). ¿Tiʼ in tzaj t-xnaqʼtzaʼn jlu qe? Qa qkyaqilx jaku chʼiy mas qkʼujlabʼil junjun qʼij kyiʼj qerman.

²⁰ Tuʼntzunju, tkyaqil maj aj tok qqʼoʼn qwitz tiʼj taqikʼ Tyol Dios te abʼqʼi 2016 toj Ja te Chmabʼil, qo ximen tiʼj jlu: «¿Jakupe bʼant mas wuʼne tuʼn kytzaj ntxkoʼne erman njaye? ¿Alkye tten jaku chin onine kyiʼj erman ateʼ toj cárcel? ¿Nimpe toklen mejebʼleʼn toj nwitze? ¿In chin tzalaje kyiʼj qe tiʼchaq at weye? ¿Tiʼ kʼonil wiʼje tuʼn tok qeʼ mas nkʼuʼje tiʼj Jehová? ¿Tiʼ jaku bʼant wuʼne tuʼn tokx nnimane mas qeju ansyan?». Bʼaʼn tuʼn tok tilel quʼn tuʼn qaqʼunan kyiʼj qeju qaq xnaqʼtzbʼil nim kyoklen lu. Iktzun tten kʼajbʼelxix aju taqikʼ Tyol Dios kʼokel qʼoʼn toj Ja te Chmabʼil ex nya oʼkx tuʼn tok qʼet twitz ja. Kʼajbʼel jlu tuʼn t-xi qbʼiʼn aju nabʼil kyaj tqʼamaʼn Pablo: «Kukx tuʼn tten kykʼujlalile kyxolxe porque kyerman kyibʼe» (Hebreos 13:1).