1-3. a) ¿Tiʼ bʼaj toj ninqʼij nim toklen te Pentecostés? b) ¿Alkye tten japun twiʼ aju otoq kyaj qʼamaʼn toj Tyol Dios? (Qʼonka twitza tiʼj tnejel tilbʼilal).

A JLU atzun qlax, moqa prim, te qʼij domingo te abʼqʼi 33 toj tnam Jerusalén. Aju qʼij lu, nimxix toklen ex tbʼanel tuʼnju in kubʼ ikʼsaʼntoq ninqʼij te Pentecostés, xjan aju qʼij lu ex in kubʼ ikʼsaʼn tkyaqil abʼqʼi toj ambʼil aj t-xi tzyet tuʼn tjaw chmet tnejel twitz triw. Te qlax, in xi tqʼoʼn nejenel kye pal qe oyaj te chojbʼil. Yajxitl, tej chʼixtoq tok las 9 te prim, in xi tqʼoʼn nejenel kye pal kabʼe pan tukʼe t-samel aju bʼinchamaj tiʼj tnejel twitz triw. Ex in xi tyukun qeju pan twitz Jehová (Levítico 23:15-20).

² Toj nimku syent abʼqʼi, in xi tqʼoʼntoq aju nejenel kye pal tkyaqil abʼqʼi qeju oyaj lu. Aʼyeju oyaj lu, attoq toklen tukʼil jun tiʼ nim toklen aju bʼaj tej tkubʼ ikʼsaʼn ninqʼij te Pentecostés toj abʼqʼi 33. A jlu bʼaj kyiʼj qeju 120 t-xnaqʼtzbʼen Jesús tej in che naʼntoq Dios junx, atz toj jun ja toj tnam Jerusalén (Hechos 1:13-15). Otoqxi tzikʼ 800 abʼqʼi kyaj ttzʼibʼin aju t-sanjel Dios  Joel tbʼi qa tuʼn tbʼaj jlu (Joel 2:28-32; Hechos 2:16-21). ¿Tiʼtzun aju nimxix toklen bʼaj?

³ (Kjawil uʼjit Hechos 2:2-4). Tojju abʼqʼi 33 te Pentecostés, tzaj tqʼoʼn Jehová xewbʼaj xjan kyibʼaj qeju 120 t-xnaqʼtzbʼen Jesús ex e jaw t-skʼoʼn tuʼn kyxiʼ toj kyaʼj (Hechos 1:8). Tibʼajxi jlu, ok kychmoʼn nim kybʼet xjal kyiʼj ex e ok ten qeju t-xnaqʼtzbʼen Jesús yolil kyiʼj tbʼanel tiʼchaq otoq tzʼok kybʼiʼn ex otoq tzʼok kyqʼoʼn kywitz tiʼj kye qeju xjal. Yolin apóstol Pedro tiʼjju otoq bʼaj ex tiquʼn nim toklen. Yajxitl, xi tqʼamaʼn jlu kye xjal: «Tajtz tiʼj kyanmiye ex tuʼn tbʼyan teyle junjun kyeye tuj tbʼi Jesucrist tuʼntzun tnajset kyile; ex ktzajeltzun tqʼoʼn Dios Xewbʼaj Xjan te jun oyaj kyeye». Tojxju qʼij lu, jaw aʼ kywiʼ, moqa e bʼyan junlo 3,000 xjal ex ax ikx kye tzaj kykʼamoʼn xewbʼaj xjan (Hechos 2:37, 38, 41).

4. a) ¿Tiquʼn nim toklen toj qwitz aju bʼaj toj ninqʼij te Pentecostés? b) ¿Tiʼ juntl tiʼ nim toklen bʼajlo tojxju qʼij lu kyoj qeju abʼqʼi ojtxi? (Tqanil jun).

⁴ ¿Tiʼtoq in kubʼ techlaʼn aju nejenel kye pal ex qeju pan in kubʼ qʼoʼn te oyaj toj ninqʼij te Pentecostés? Aju nejenel te pal in kubʼtoq techlaʼn Jesús. Ex atzun qeju pan in kubʼtoq kyechlaʼn qeju t-xnaqʼtzbʼen Jesús e jaw skʼoʼn tuʼn kyxiʼ toj kyaʼj. Aʼyeju t-xnaqʼtzbʼen Jesús lu, atz e jaw skʼoʼn kyxol kykyaqil xjal aj il, ex ok qʼoʼn kybʼi te «tnejel twitz awal» (Santiago 1:18). O txi tkʼamoʼn Jehová qeju skʼoʼn maj tuʼn kyok te tkʼwaʼl ex o che jaw t-skʼoʼn tuʼn kykawin junx tukʼil Jesús toj Tkawbʼil toj kyaʼj (1 Pedro 2:9). Kʼajbʼel Tkawbʼil Dios tuʼn tuʼntzun ttzaj tkʼiwlaʼn qeju xjal bʼaʼn che bʼin te. Tuʼntzunju, qa atz qo xel anqʼil toj kyaʼj junx tukʼil Jesús moqa atz toj Tbʼanel Najbʼil tzalu twitz Txʼotxʼ, aju bʼaj toj ninqʼij te Pentecostés toj abʼqʼi 33 nim toklen te qe ^[1] (tqanil jun).

5. ¿Alkye tten in nel qnikʼ tiʼj qa nya kykyaqil okslal in che jaw skʼoʼn toj junx tten?

⁵ Aqeju 120 t-xnaqʼtzbʼen Jesús e ten toj tnam Jerusalén, mlaytoq tzikʼ tnaʼl kyuʼn aju ikʼ kyiʼj toj qʼij aju. Teyele te junjun tkubʼ jun tiʼ tibʼaj twiʼ ik tzeʼn tqan qʼaqʼ. Otoq t-xi tqʼoʼn Jehová kyoklen tuʼn tbʼant kyyolin kyoj junjuntl yol. Qʼuqlitoq kykʼuʼj tiʼj qa otoq che jaw skʼoʼn tuʼn xewbʼaj xjan (Hechos 2:6-12). Noqtzun tuʼnj, mintiʼ bʼaj jlu kyiʼj kykyaqil okslal otoq che jaw skʼoʼn. Jun techel, mintiʼ in tzaj tqʼamaʼn Tyol Dios qa kubʼ ten jun tiʼ ik tzeʼn tqan qʼaqʼ tibʼaj kywiʼ qeju nim mil e jaw skʼoʼn yajxitl toj tnam Jerusalén. Aʼye jlu, e jaw skʼoʼn tuʼn kyxiʼ toj kyaʼj tej tjaw aʼ kywiʼ (Hechos 2:38). Nya tkyaqil maj in jaw t-skʼoʼn Jehová qeju okslal aj tjaw aʼ kywiʼ. Ik tzeʼn qeju okslal te Samaria e jaw skʼoʼn tuʼn kyxiʼ toj kyaʼj tej otoqxi jaw aʼ kywiʼ (Hechos 8:14-17). Ex toj juntl ambʼil nim toklen, jaw skʼoʼn Cornelio kyukʼix toj tja tej naʼmxtoq tjaw aʼ kywiʼ (Hechos 10:44-48).

6. a) ¿Tiʼ in tzaj kykʼamoʼn qeju okslal skʼoʼn maj? b) ¿Alkye tten in nonin xewbʼaj xjan kyiʼj?

⁶ Ateʼ junjun okslal jun rat in nel kynikʼ tiʼj qa otoq che jaw skʼoʼn tuʼn Jehová. Atzun junjuntl, in xi tiʼn chʼin ambʼil tuʼn tel kynikʼ tiʼj qa otoq che jaw skʼoʼn. Noqtzun tuʼnj, at jun tiʼ in tzaj kykʼamoʼn kykyaqil okslal skʼoʼn maj. Tzaj tchikʼbʼaʼn apóstol Pablo jlu: «Tej t-xi kyokslaʼne Crist, ma che ok mojbʼaʼne tukʼil, ex ma tzʼok qʼoʼn jun sey kyiʼje tuʼn Xewbʼaj Xjan,  aju tziyimaj tuʼn Dios. Ate Xewbʼaj Xjan ma tzaj qʼoʼn te jun señ tuʼn qkʼmonte jun qetzbʼil» (Efesios 1:13, 14). Tuʼn jlu in nel qnikʼ tiʼj qa in tzaj tqʼoʼn Jehová xewbʼaj xjan kye kykyaqil qeju skʼoʼn maj. ¿Alkye tten in nonin kyiʼj? In nonin kyiʼj tuʼn tok qeʼxix kykʼuʼj tiʼj qa otoq che jaw skʼoʼn tuʼn kyxiʼ toj kyaʼj. Iktzun tten in nok xewbʼaj xjan «te jun señ» moqa te jun yekʼbʼil kye qa atzun che anqʼil te jumajx toj kyaʼj toj ambʼil tzul ex nya tzalu twitz Txʼotxʼ (kjawil uʼjit 2 Corintios 1:21, 22; 5:5).

7. ¿Tiʼ il tiʼj tuʼn tbʼant tuʼn teyele junjun okslal skʼoʼn maj tuʼn t-xiʼ toj kyaʼj?

⁷ ¿Te jumaxpe in nok techel tiʼj jun okslal skʼoʼn maj qa kxeʼl toj kyaʼj? Nya. Qʼuqli tkʼuʼj jun okslal skʼoʼn maj qa o tzaj qʼoʼn txokbʼil tiʼj tuʼn t-xiʼ toj kyaʼj. Noqtzun tuʼnj, ax ikx ojtzqiʼn tuʼn qa oʼkx tzul qʼoʼn oyaj lu te qa kukx ma tzʼajbʼen te Jehová. In tzaj tchikʼbʼaʼn apóstol Pedro jlu: «Kyjaʼtzun erman, tzʼok tililx kyuʼne tuʼn tqeʼxix kykʼuʼje tuʼnju o che txkete tuʼn Dios ex o che jaw skʼoʼne tuʼn; porque qa ma kybʼinchaye jlu, mlayx che kubʼ tzʼaqe. Kyjaʼtzun ktzajel qʼoʼn kyeye tuʼn kyokxe tuʼn tkyaqil tzalajbʼil tuj jun kawbʼil te jumajx te Qajaw ex Klolqe Jesucrist» (2 Pedro 1:10, 11). Teyele te junjun okslal skʼoʼn maj, il tiʼj tuʼn tok tilel tuʼn, tuʼn kukx tajbʼen te Jehová. Ax tok, o tzaj qʼoʼn txokbʼil tiʼj tuʼn t-xiʼ toj kyaʼj, noqtzun tuʼnj, qa ma kyaj ttzaqpiʼn tajbʼebʼil te Jehová, ya mlay tzaj qʼoʼn aju oyaj te (Hebreos 3:1; Apocalipsis 2:10).

8, 9. a) ¿Tiquʼn kwest tuʼn tel kynikʼ erman tiʼj tiʼ in bʼaj aj tjaw skʼoʼn jun okslal tuʼn Jehová? b) ¿Alkye tten in nel tnikʼ jun okslal tiʼj qa o jaw skʼoʼn tuʼn t-xiʼ toj kyaʼj?

⁸ Toj ambʼil jaʼlo, ateʼ nim tmajen Jehová kwest tuʼn tel kynikʼ tiʼj tiʼ in bʼaj aj tjaw skʼoʼn jun okslal. In kubʼ kyximen jlu tuʼnju nya skʼoʼn maj qe. O che kubʼ tbʼinchaʼn Jehová qe xjal tuʼn kyanqʼin te jumajx tzalu twitz Txʼotxʼ ex nya toj kyaʼj (Génesis 1:28; Salmo 37:29). Noqtzun tuʼnj, o che jaw t-skʼoʼn Jehová junjun xjal tuʼn kyok te pal ex te aj kawil toj kyaʼj. Ex aj kyjaw t-skʼoʼn, aju qʼuqbʼil kykʼuʼj ex aju kyximbʼetz in chʼexpaj, aju kye in che yon tiʼj aju tuʼn kyanqʼin toj kyaʼj (kjawil uʼjit Efesios 1:18).

⁹ Noqtzun tuʼnj, ¿alkye tten in nel tnikʼ jun okslal tiʼj qa o jaw skʼoʼn tuʼn Jehová? Qqʼonk qwiʼ tiʼjju xi tqʼamaʼn apóstol Pablo kye qeju okslal skʼoʼn maj te tnam Roma, aqeju otoq che txkonjtz tuʼn kyok «oʼkx te Dios». Xi tqʼamaʼn jlu kye: «Ma kykʼame aju Xewbʼaj Xjan, mya tuʼn kytene juntl maj te majen ex mya tuʼn kytene juntl maj tuj xobʼajil; noq oʼkx ma kykʼame Xewbʼaj Xjan tuʼn kyoke te tkʼwaʼl Dios; tuʼntzunju nnoʼk qmaʼn te Qman Dios: Tat, qo chi. Porque axte Xewbʼaj Xjan tukʼix qanmi in kymaʼn qa tkʼwaʼl Dios qoʼ» (Romanos 1:7; 8:15, 16). In najbʼen xewbʼaj xjan tuʼn Jehová tuʼntzun telxix tnikʼ jun ermano moqa jun ermana qa o jaw skʼoʼn tuʼn t-xiʼ toj kyaʼj tuʼn tok te jun  aj kawil junx tukʼil Jesús (1 Tesalonicenses 2:12).

10. ¿Alqiʼj in yolin 1 Juan 2:27 aj ttzaj tqʼamaʼn qa nya il tiʼj tuʼn kyxi xnaqʼtzaʼn qeju skʼoʼn maj tuʼn juntl?

¹⁰ Aqeju okslal skʼoʼn maj, mintiʼ in che yon tuʼn t-xi tqʼamaʼn juntl kye tuʼn tel kynikʼ tiʼj qa o che jaw skʼoʼn tuʼn Jehová. In nonin Jehová kyiʼj tuʼn tok qeʼxix kykʼuʼj tiʼj qa o che jaw skʼoʼn. Tqʼama apóstol Juan jlu kye qeju skʼoʼn maj: «Atzun kyeye ma tzʼok qʼoʼn kyoklene tuʼn Xewbʼaj Xjan, ex kykyaqile ojtzqiʼn ju yol axix tok kyuʼne». Ax ikx tqʼamatl jlu kye: «Aju Xewbʼaj Xjan ma kykʼame tuʼn Jesucrist ax taʼ tuj kyanmiye, ex mya il tiʼj tuʼn kyxnaqʼtzanjtze tuʼn juntl; porque aju Xewbʼaj Xjan ma kykʼame tuʼn Jesucrist, in che xnaqʼtzanjtze tuʼn tuj tkyaqil, ax tok tyol ex mya nikʼal yol te. Kyjaʼtzun, ax che kyaj tene tukʼil Crist, ik tzaʼn ma che xnaqʼtzanjtze tuʼn» (1 Juan 2:20, 27). Il tiʼj tuʼn kytzaj t-xnaqʼtzaʼn Jehová qe okslal skʼoʼn maj ik tzeʼn txqantl tmajen. Noqtzun tuʼnj, nya il tiʼj tuʼn t-xi tqʼamaʼn juntl kye qa o che jaw skʼoʼn tuʼn Jehová. In najbʼen xewbʼaj xjan tuʼn Jehová tuʼntzun telxix kynikʼ tiʼj qa o che jaw skʼoʼn.

11, 12. a) ¿Tiʼ jaku kubʼ t-xjelin jun okslal skʼoʼn maj? b) ¿Alqiʼj qʼuqlixix kykʼuʼj okslal skʼoʼn maj?

¹¹ Aj tjaw skʼoʼn jun okslal tuʼn xewbʼaj xjan, nim in chʼexpaj ex tuʼntzunju tqʼama Jesús qa in nul itzʼji «tkabʼmajiʼn», moqa aju itzʼjlen te toj kyaj (Juan 3:3, 5). Yajxitl, tqʼamatl jlu: «Miʼn labʼina tiʼj ju ma txi nmaʼne teya: Ilxix tiʼj tuʼn kyitzʼje tkabʼmajiʼn. Aju kyqʼiqʼ in xumin noq jachaq ex in tbʼiʼna tqʼajqʼajel, pero mintiʼ bʼaʼn tuʼna jatum in tzaj ex tzaʼn t-xiʼ; kyjaʼtzun kyten kykyaqil qeju in che itzʼj tiʼj T-xew Dios» (Juan 3:7, 8). Tuʼn jlu, mlayxix bʼant tchikʼbʼet te jun okslal nya skʼoʼn maj tiʼxix in kubʼ tnaʼn jun okslal skʼoʼn maj ^[2] (tqanil kabʼe).

¹² Jakulo kubʼ t-xjelin jun okslal skʼoʼn maj jlu: «¿Tiquʼn aqine ma chin jaw t-skʼoʼn Jehová ex nya juntl erman?». Ax ikx, jakulo kubʼ t-xjelin qa jaku bʼant aju aqʼuntl tzul tqʼoʼn Jehová te. Noqtzun tuʼnj, qʼuqlixix tkʼuʼj tiʼj qa o jaw skʼoʼn tuʼn Jehová. In tzalajxix okslal skʼoʼn maj tiʼj toklen ex in xi tqʼoʼn chjonte te Jehová tuʼn jlu. In kubʼ kynaʼn qe okslal skʼoʼn maj ik tzeʼn te Pedro tej tqʼama jlu: «Nimanxwit tbʼi Dios aju tman Qajaw Jesucrist, tuʼnju nimxix ma tzaj qʼaqʼan tkʼuʼj qiʼj, ex ma qo itzʼj tkabʼmajiʼn tuʼn, tuʼn tten jun qʼuqbʼabʼl qkʼuʼj mlay naj porque o jatz anqʼin Jesucrist kyxol kyimni. Ax ikx tuʼn qkʼmonte jun etzbʼil mlay naj, ex mlay tzʼilix, ex mlay tzqij. Aju etzbʼil lu kʼuʼn tuʼn Dios tuj kyaʼj te kyeye» (1 Pedro 1:3, 4). Aj tjaw kyuʼjin qeju okslal skʼoʼn maj qeju yol lu, qʼuqlixix kykʼuʼj tiʼj qa kyukʼil in tzaj yolin Jehová.

13. a) Aj tajbʼen xewbʼaj xjan tuʼn Jehová tuʼn kyjaw t-skʼoʼn qe okslal, ¿alkye tten in chʼixpet kyximbʼetz? b) ¿Tiquʼn in chʼixpet kyximbʼetz okslal skʼoʼn maj?

¹³ Ik tzeʼn ma tzʼel qnikʼ tiʼj, aj kyjaw  t-skʼoʼn Jehová qe okslal tuʼn kyxiʼ toj kyaʼj in chʼexpaj kyximbʼetz. Tej naʼmxtoq kyjaw skʼoʼn, attoq qʼuqbʼil kykʼuʼj tuʼn kyanqʼin te jumajx tzalu twitz Txʼotxʼ. Ex kubʼlo kyximen aj tpon ambʼil tuʼn tok Txʼotxʼ te jun tbʼanel najbʼil tuʼn Jehová ex tuʼn tkubʼ tnajsaʼn tkyaqil nya bʼaʼn. Axpe ikx, kubʼlo kyximen qa aʼyex che xel qʼonte bʼaʼn kyulene kye toj kyja ex kye kyamiw aj kyjaw anqʼin. Axlo ikx, kubʼlo kyximen tuʼn tjaw kybʼinchaʼn jun kyja moqa tuʼn tkuʼx kyawaʼn junjun wiq tzeʼ ex tuʼn kywaʼn kyiʼj twitz (Isaías 65:21-23). ¿Tiquʼn xi tzyet tuʼn tkubʼ kychʼixpuʼn kyximbʼetz? ¿Tuʼnpelo in che bʼisintoq moqa tuʼnju ateʼtoq toj kʼixkʼoj? ¿Tuʼnpelo kubʼ kyximen qa jakutoq bʼaj kygan tuʼn kyanqʼin te jumajx tzalu twitz Txʼotxʼ ex qa mlaytoq che tzalaj? ¿Moqa noq tuʼnju kyajbʼil tuʼn tkubʼ kynaʼn tzeʼn aju anqʼibʼil toj kyaʼj? Miʼn. In bʼaj jlu tuʼnju a Jehová in bʼaj ximente. Aj kyjaw t-skʼoʼn Jehová qe okslal tuʼn kyxiʼ toj kyaʼj, in najbʼen xewbʼaj xjan tuʼn tuʼntzun tchʼexpaj kyximbʼetz ex aju qʼuqbʼil kykʼuʼj.

14. ¿Tiʼ in kynaʼn qeju okslal skʼoʼn maj tiʼjju kyanqʼibʼil at tzalu twitz Txʼotxʼ?

¹⁴ ¿Ape t-xilen jlu qa kyajbʼil qeju skʼoʼn maj tuʼn kykyim? Kyaj ttzʼibʼin apóstol Pablo aju in kubʼ kynaʼn. Kubʼ tmojbʼaʼn aju kyxmilal xjal ik tzeʼn jun «pach» tej tqʼama jlu: «Atoʼxkuʼ tojuʼ qxmilal nakuʼj pach nqo bʼisun ex nqo sikt, mya awt qajb’ilju’ tu’n qelq’i’n toj, a qajbʼiljuʼ tuʼn tokjuʼ qxmilal nakuʼj qja akʼaʼj» (2 Corintios 5:4, XT). Nya kyajbʼil qeju okslal skʼoʼn maj tuʼn kykyim. In che tzalaj tiʼj kyanqʼibʼil ex kyajbʼil tuʼn tajbʼen kyuʼn tuʼn kyajbʼen te Jehová junx kyukʼil qeju toj kyja, ex kyamiw. Noqtzun tuʼnj, noq tiʼxku in bʼant kyuʼn, mintiʼ in nikʼ tnaʼl kyuʼn aju in tzaj ttziyen Jehová kye toj ambʼil tzul (1 Corintios 15:53; 2 Pedro 1:4; 1 Juan 3:2, 3; Apocalipsis 20:6).

15. ¿Alkye junjun tiʼchaq mintiʼ in tzaj kyyekʼun qa o jaw skʼoʼn jun okslal?

¹⁵ Jakulo kubʼ t-ximana qa o jaw skʼoʼna tuʼn Jehová tuʼn t-xiʼya toj kyaʼj, qa ikju, ximana kyiʼj xjel lu: ¿In kubʼpe tnaʼn teya qa in nok tilel tuʼna tuʼn tpakbʼana toj jun tbʼanel tten? ¿In tzalajxix teya aj t-xnaqʼtzaʼna tiʼj Tyol Dios ex aj tel tnikʼa kyiʼj qeju «t-ximbʼetz Dios, aju mlay tzʼel qnikʼ tiʼj» jurat naj? (1 Corintios 2:10). ¿In kubʼpe tnaʼna qa o tzʼonin Jehová tiʼja toj jun tbʼanel tten toj pakbʼabʼil? ¿Tajbʼila tuʼn tbʼant mas tajbʼil Jehová tuʼna twitz alkyexku juntl tiʼ? ¿Atpe nim tkʼujlabʼila kyiʼj erman ex in kubʼpe tnaʼna qa il tiʼj tuʼn tonina kyiʼj tuʼntzun kyajbʼen te Jehová? ¿Ope tzʼok tqʼoʼn twitza tiʼj alkye tten o tzʼonin Jehová tiʼja tojxix tanqʼibʼila? Qa in kubʼ t-ximana qa oje, ¿ape t-xilen jlu qa o tzaj qʼoʼn txokbʼil tiʼja tuʼn t-xiʼya toj kyaʼj? Miʼn, nya a t-xilen jlu. ¿Tiquʼn? Tuʼnju kykyaqil tmajen Jehová jaku kubʼ kynaʼn jlu, qa o che jaw skʼoʼn moqa miʼn. Jaku tzʼajbʼen xewbʼaj xjan tuʼn Jehová tuʼn ttzaj tqʼoʼn kyipumal kykyaqil tmajen, qa che xeʼl toj kyaʼj moqa atz che tel tzalu twitz Txʼotxʼ. Tuʼntzunju, qa kukx in kubʼ t-xjelin teya qa o tzaj qʼoʼn txokbʼil tiʼja tuʼn t-xiʼya toj kyaʼj, a t-xilen jlu qa mintiʼ o tzaj qʼoʼn txokbʼil tiʼja. Aqeju o che jaw skʼoʼn tuʼn Jehová, mintiʼ in kubʼ kyxjelin jlu, ¡tuʼnju qʼuqlixix kykʼuʼj tiʼj qa o che jaw skʼoʼn!

16. ¿Alkye tten in nel qnikʼ tiʼj qa nya kykyaqil qeju in tzaj kykʼamoʼn xewbʼaj xjan in che jaw skʼoʼn tuʼn kyxiʼ toj kyaʼj?

 ¹⁶ At nim techel tkuʼx toj Tyol Dios kyiʼj xjal kukx e ajbʼen te Jehová ex tzaj kykʼamoʼn xewbʼaj xjan, noqtzun tuʼnj, mintiʼ o cheʼx toj kyaʼj. Ik tzeʼn Juan el Bautista. Tqʼama Jesús qa mintiʼ jun xjal mas at toklen ik tzeʼn te Juan, noqtzun tuʼnj, yajxitl tqʼama qa mlay kawin Juan toj kyaʼj (Mateo 11:10, 11). Ax ikx te David, tzaj qʼoʼn xewbʼaj xjan te (1 Samuel 16:13). Ax ikx onin xewbʼaj xjan tiʼj David tuʼn tel tnikʼ kyiʼj t-ximbʼetz Jehová aʼyeju kwest tuʼn tel qnikʼ kyiʼj ex tej tkubʼ ttzʼibʼen junjun plaj Tyol Dios (Marcos 12:36). Yajxitl, tqʼama apóstol Pedro qa «mya ate David jax tuj kyaʼj» (Hechos 2:34). Ajbʼen xewbʼaj xjan tuʼn Jehová tuʼn tbʼant nim tiʼchaq kyuʼn tmajen lu, noqtzun tuʼnj, mintiʼ ajbʼen xewbʼaj xjan tuʼn, tuʼn ttzaj tqʼoʼn txokbʼil kyiʼj tuʼn kyxiʼ toj kyaʼj. ¿Ape t-xilen jlu qa nya kukx e ajbʼen te Jehová moqa mintiʼ kyajbʼen tuʼn kykawin toj kyaʼj? Nya. A t-xilen jlu qa che jawil anqʼin tuʼn Jehová tuʼn kyten tzalu twitz Txʼotxʼ toj Tbʼanel Najbʼil (Juan 5:28, 29; Hechos 24:15).

17, 18. a) ¿Jatumel che anqʼil nim tmajen Jehová? b) ¿Alkyeqe xjelbʼitz che ul tzaqʼweʼn toj juntl xnaqʼtzbʼil?

¹⁷ Chʼixmi kykyaqil qeju in che ajbʼen te Jehová toj ambʼil jaʼlo, mlay cheʼx toj kyaʼj. Atz in che yon tiʼj tuʼn kyanqʼin tzalu twitz Txʼotxʼ tjaqʼ Tkawbʼil Dios, ik tzeʼn te Abrahán, David, Juan el Bautista ex txqantl xinaq, moqa ichin, ex xuʼj, moqa qya, aju in yolin Tyol Dios kyiʼj (Hebreos 11:10). Ex aʼyeju che kawil tukʼil Jesús toj kyaʼj, 144,000 kybʼet. Noqtzun tuʼnj, in yolin Tyol Dios kyiʼj «chʼintl tiyjil xuʼj» skʼoʼn maj, aqeju kukx in che anqʼin tzalu twitz Txʼotxʼ kyoj bʼajsbʼil tqʼijlalil toj ambʼil jaʼlo (Apocalipsis 12:17). Ax ikx, chʼixmi kykyaqil qeju 144,000 o che kyim ex atzun ateʼ toj kyaʼj.

¹⁸ Qa at jun ma tzaj qʼamante qa o jaw skʼoʼn tuʼn t-xiʼ toj kyaʼj, ¿alkye kymod qeju che anqʼil twitz Txʼotxʼ ktel tukʼil? Qa at jun erman ma tzʼok ten waʼl tiʼj pan ex kʼal tiʼj vin toj Nabʼitz Tkyimlen Jesucristo, ¿alkye tmoda ktel tukʼil? ¿Ex tiʼ jaku bʼaj qa kukx in chʼiy kybʼet qeju in kyqʼamaʼn qa o che jaw skʼoʼn? ¿Ilpe tiʼj tuʼn ttzaj bʼaj tkʼuʼja tiʼj jlu? Che ul tzaqʼweʼn qeju xjelbʼitz lu toj juntl xnaqʼtzbʼil.