«Qaje qoʼxe kyukʼile»
«Qaje qoʼxe kyukʼile, porque ma qbʼiye atzun taʼ Dios kyukʼile» (ZACARÍAS 8:23).
BʼITZ: 32 EX 31
1, 2. a) ¿Tiʼ tqʼama Jehová tuʼn tbʼaj toj ambʼil jaʼlo? b) ¿Alkyeqe xjel che xel tzaqʼwet toj xnaqʼtzbʼil lu? (Qʼonka twitza tiʼj tnejel tilbʼilal).
TQʼAMA Jehová qa tuʼn tbʼaj lu toj ambʼil jaʼlo: «Laj stranjer xjal kye mastl nasyon ktzajel kytzyuʼn ttxaʼn t-xbʼalun jun xjal judiy ex kxel kymaʼn te kyjaʼ: Qaje qoʼxe kyukʼile, porque ma qbʼiye atzun taʼ Dios kyukʼile» (Zacarías 8:23). Aju «xjal judiy», in nok te kyechel qeju okslal skʼoʼn maj tuʼn Jehová tuʼn xewbʼaj xjan. Aʼye jlu in nok qʼoʼn kybʼi te «axix tok aj Israel qe ex etzan qe tuʼn Dios» (Gálatas 6:16). Atzun qeju «laj stranjer xjal», in nok qʼoʼn te kyechel qeju at qʼuqbʼil kykʼuʼj tuʼn kyanqʼin te jumajx tzalu twitz Txʼotxʼ. ¿Tiquʼn kyajbʼil tuʼn kyxiʼ kyukʼil qeju skʼoʼn maj? Tuʼnju ojtzqiʼn kyuʼn qa o che tzaj tkʼiwlaʼn Jehová ex in kubʼ kynaʼn qa jun tbʼanel oklenj aju tuʼn kyaqʼunan junx kyukʼil.
2 Ik tzeʼn aju tqʼamaʼn t-sanjel Dios Zacarías tbʼi, tqʼama Jesús qa kʼokel kychmon kyibʼ aju ttnam Dios. Tqʼama Jesús jlu kyiʼj qeju in che yon tiʼjju oyaj tuʼn kyanqʼin toj kyaʼj: «Miʼn che xobʼe aqeye nẍneʼle, ichaq nikʼxi kybʼete». Ex tqʼama jlu kyiʼj qeju che anqʼil tzalu twitz Txʼotxʼ: «Ax ikx ateʼ txqantl nẍneʼle mya a ateʼ tuj peʼn lu». Noqtzun tuʼnj, tqʼama Jesús qa aqeju tal ẍneʼl nya nim kybʼet ex qeju txqantl ẍneʼl che okel lepeʼ tiʼj ex junx xqʼuqil kye ktel (Lucas 12:32; Juan 10:16). Tuʼnju ateʼ kabʼe kʼloj okslal, jakulo kubʼ qxjelin jlu: 1) ¿Ilpe tiʼj tuʼn tok qojtzqiʼn kybʼi qeju o che jaw skʼoʼn toj ambʼil jaʼlo? 2) ¿Alkye kyximbʼetz qeju okslal skʼoʼn maj ktel kyiʼjx? 3) Qa at jun in nok ten waʼl tiʼj pan ex in nok ten kʼal tiʼj vin toj Nabʼitz Tkyimlen Jesucristo jatumel in nok qchmon qibʼ, ¿alkye qmod ktel tukʼil? 4) ¿Ilpe tiʼj tuʼn ttzaj bʼaj qkʼuʼj tuʼnju kukx in chmet kybʼaj qeju in che waʼn tiʼj pan ex in che kʼan tiʼj vino? Tojju xnaqʼtzbʼil lu che xel tzaqʼwet qeju xjel lu.
¿ILPE TIʼJ TUʼN TEL QNIKʼ TIʼJ KYBʼI KYKYAQIL QEJU SKʼOʼN MAJ?
3. ¿Tiquʼn mlay tzʼok qojtzqiʼnxix alkye qeju ateʼ kyxol qeju 144,000 che xeʼl toj kyaʼj?
3 ¿Ilpe tiʼj tuʼn tok kyojtzqiʼn txqantl ẍneʼl kybʼi kykyaqil qeju skʼoʼn maj ateʼx twitz Txʼotxʼ toj ambʼil jaʼlo? Nya il tiʼj. ¿Tiquʼn? Mlay bʼant tuʼnju mintiʼ ojtzqiʼnxix quʼn qa ok che xeʼl toj kyaʼj [1] (tqanil jun). Ax tok, o tzaj qʼoʼn txokbʼil kyiʼj tuʼn kyxiʼ toj kyaʼj, noqtzun tuʼnj, oʼkx tzul qʼoʼn oyaj kye qa kukx ma che ajbʼen te Jehová. Ojtzqiʼn jlu tuʼn Satanás ex in che ajbʼen qeju «mya ax tok» okslal tuʼn tuʼntzun tkubʼ «kysbʼun» qe okslal skʼoʼn maj tuʼn miʼn kyajbʼentl te Jehová (Mateo 24:24). Tzmaxi kʼokel qeʼxix kykʼuʼj qeju okslal skʼoʼn maj qa che xeʼl toj kyaʼj ajxi tok señ kyiʼj tuʼn Jehová. Kʼokel tqʼoʼn Jehová señ kyiʼj qeju okslal skʼoʼn maj aj naʼmxtoq kykyim moqa chʼixtoq txi tzyet «nimxix yajbʼil» (Apocalipsis 2:10; 7:3, 14).
Aju Nejenel qwitz a Jesús ex oʼkx tiʼj qo okel lepeʼ
4. Qa mlay tzeʼl nikʼbʼaj tiʼj kybʼi qeju skʼoʼn maj ateʼx twitz Txʼotxʼ toj ambʼil jaʼlo, ¿alkyetzun tten jaku cheʼx txqantl okslal kyukʼil?
4 Qa mlay tzeʼl nikʼbʼaj tiʼj kybʼi qeju skʼoʼn maj ateʼx twitz Txʼotxʼ toj ambʼil jaʼlo, ¿alkyetzun tten jaku cheʼx txqantl okslal kyukʼil? In tzaj tqʼamaʼn Tyol Dios qa aqeju «laj stranjer xjal», «ktzajel kytzyuʼn ttxaʼn t-xbʼalun jun xjal judiy ex kxel kymaʼn te kyjaʼ: Qaje qoʼxe kyukʼile, porque ma qbʼiye atzun taʼ Dios kyukʼile». In yolin taqikʼ Tyol Dios lu tiʼj jun xjal «judiy», noqtzun tuʼnj, yajxitl in tzaj tqʼamaʼn «kyukʼile». A t-xilen jlu qa aju xjal «judiy» nya oʼkx in yolin tiʼj jun xjal, tuʼnju atz in yolin tiʼj kʼloj xjal o che jaw skʼoʼn. Ojtzqiʼn jlu kyuʼn txqantl ẍneʼl ex in che ajbʼen junx te Jehová tukʼil kʼloj xjal lu. Noqtzun tuʼnj, nya il tiʼj tuʼn tok kyojtzqiʼn kybʼi kykyaqil qeju ateʼ toj kʼloj xjal lu ex nya il tiʼj tuʼn kyok lepeʼ tiʼj teyele junjun kye. Aju Nejenel qwitz a Jesús ex in tzaj tqʼamaʼn Tyol Dios qa oʼkx tiʼj qo okel lepeʼ (Mateo 23:10).
¿TIʼ KYXIMBʼETZ QEJU SKʼOʼN MAJ KTEL KYIʼJX?
5. ¿Alkye kawbʼil il tiʼj tuʼn kyximen qeju skʼoʼn maj tiʼj ex tiquʼn?
5 Il tiʼj tuʼn kyximen qeju skʼoʼn maj tiʼjju kawbʼil in tzaj tqʼamaʼn 1 Corintios 11:27-29 (kjawil uʼjit). ¿Alkye tten jaku tzʼok ten jun skʼoʼn maj waʼl tiʼj pan ex kʼal tiʼj vin, ex «mya xoʼn tuʼn» moqa mintiʼ toklen tiʼj toj Nabʼitz Tkyimlen Jesucristo? Qa mintiʼ jun tbʼanel tamiw at tukʼil Jehová ex qa mintiʼ in najbʼenxix te, aj tok ten waʼl tiʼj pan ex kʼal tiʼj vin in kubʼ tyekʼun qa mintiʼ toklen jlu toj twitz (Hebreos 6:4-6; 10:26-29). A jlu in tzaj tnaʼn kye qeju skʼoʼn maj qa il tiʼj tuʼn kyajbʼenxix te Jehová qa kyajbʼil tuʼn ttzaj qʼoʼn aju «oyaj» tzul qʼoʼn kye tzmax «tuj kyaʼj» noq tuʼn Jesús (Filipenses 3:13-16).
6. ¿Alkye kyximbʼetz qeju okslal skʼoʼn maj ktel kyiʼjx?
6 Xi tqʼamaʼn apóstol Pablo jlu kye qeju okslal skʼoʼn maj: «Aqine pres tuʼn tlaj tbʼi Qajaw, chin kubʼsale kywitze tuʼn kybʼete tuj tumelxix, porque ma che txkonjtze tuʼn Dios». ¿Alkye tten in kubʼ kyyekʼun okslal skʼoʼn maj jlu? Tqʼamatl Pablo jlu: «Kymansinku kyibʼe ex che oke mans; ten kypasense ex tzikʼxku kyuʼne kyxolxe, ex kykʼujlam kyibʼe. Tzʼok tililx kyuʼne kukx tuʼn tten kymojbʼabʼl kyibʼe, aju in tqʼoʼn Xewbʼaj Xjan, porque kytzuylaj kyibʼe tuʼnju kymojbʼabʼl kyibʼe» (Efesios 4:1-3). In nonin xewbʼaj xjan kyiʼj okslal tuʼn miʼn tjaw kynimsan kyibʼ (Colosenses 3:12). Mintiʼ in kubʼ kyximen qeju skʼoʼn maj qa mas nim kyoklen kywitz txqantl. In nel kynikʼ skʼoʼn maj tiʼj qa mintiʼ in tzaj tqʼoʼn Jehová mas xewbʼaj xjan kye kywitz txqantl erman. Ax ikx, mintiʼ in kubʼ kyximen qa mas in nel kynikʼ tiʼj Tyol Dios kywitz junjuntl erman. Ex mintiʼ in xi kyqʼamaʼn te juntl okslal qa bʼaʼn tuʼn twaʼn tiʼj pan ex tuʼn tkʼan tiʼj vin tuʼnju in kubʼ kyximen qa skʼoʼn maj. Aju kye in bʼant kyuʼn, in kubʼ kymansin kyibʼ ex ojtzqiʼn kyuʼn qa oʼkx Jehová in tzaj qʼonte txokbʼil tiʼj jun xjal tuʼn t-xiʼ toj kyaʼj.
7, 8. ¿Tiʼ mintiʼ tuʼn tbʼant kyuʼn qeju skʼoʼn maj ex tiquʼn?
7 Ojtzqiʼn kyuʼn qeju skʼoʼn maj qa jun tbʼanel oklenj aju txokbʼil o tzaj qʼoʼn kye tuʼn kyxiʼ toj kyaʼj, noqtzun tuʼnj, mintiʼ in che yon tiʼj tuʼn tok qʼoʼn jun tbʼanel kyoklen kyuʼn txqantl (Efesios 1:18, 19; kjawil uʼjit Filipenses 2:2, 3). Ax ikx, ojtzqiʼn kyuʼn qa mintiʼ in tzaj tqʼoʼn Jehová ambʼil kye kykyaqil tuʼn tok kybʼiʼn qa otoq che jaw skʼoʼn. Ex mintiʼ in jaw labʼin jun okslal skʼoʼn maj qa mintiʼ ma t-xi tnimen juntl erman te qa skʼoʼn maj. Ojtzqiʼn tuʼn qa in tzaj tqʼamaʼn Tyol Dios qa mintiʼ tuʼn t-xi qnimen jun rat naj aj ttzaj tqʼamaʼn jun erman qe, qa ma tzaj qʼoʼn jun tbʼanel oklenj te tuʼn Dios (Apocalipsis 2:2). Ax ikx, mintiʼ in yon jun skʼoʼn maj tuʼn tokxix kyqʼoʼn txqantl kywiʼ tiʼj ex mintiʼ tuʼn tok ten qʼamalte jun rat naj qa otoq jaw skʼoʼn. Qa jaku bʼant, atlo maj mlay t-xi tqʼamaʼn te mi jun. Ax ikx, mintiʼ tuʼn tjaw tnimsan tibʼ tiʼjju toklen tuʼn t-xiʼ toj kyaʼj (1 Corintios 1:28, 29; kjawil uʼjit 1 Corintios 4:6-8).
8 Mintiʼ tuʼn tkubʼ kyximen qeju skʼoʼn maj qa il tiʼj tuʼn kyjyon ambʼil tuʼn oʼkx kyten kyukʼil junjuntl skʼoʼn maj, ik tzeʼn noq oʼkx jun kʼloj xjal qe. Mintiʼ tuʼn tok kychmon kyibʼ tuʼntzun kyyolin tiʼj alkye tten e jaw skʼoʼn moqa tuʼn kyxnaqʼtzan junx tiʼj Tyol Dios (Gálatas 1:15-17). Qa ma bʼant jlu kyuʼn qeju skʼoʼn maj, mlay ten mujbʼabʼil kyxol erman. Ex jakulo che ilen tiʼj xewbʼaj xjan aju in nonin tuʼn tten tzalajbʼil ex mujbʼabʼil toj ttnam Jehová (kjawil uʼjit Romanos 16:17, 18).
¿ALKYE QMOD KTEL KYUKʼIL?
9. ¿Tiquʼn il tiʼj tuʼn tok qxqʼuqin qibʼ aj tkubʼ qyekʼun qmod tukʼil jun skʼoʼn maj? (Qʼonka twitza tiʼj, « Aju kʼujlabʼil ‹at tchi tuj twitz› moqa mintiʼ in nok tbʼinchan nya bʼaʼn»).
9 ¿Alkye teya tmod ktel kyukʼil ermano ex ermana o che jaw skʼoʼn? Tqʼama Jesús jlu kye t-xnaqʼtzbʼen: «Atzun kyeye kyitzʼin kyibʼe kykyaqile». Ax ikx tqʼamatl jlu: «Alkye ma jaw tniman tibʼ kʼokel te chʼin; pero alkye ma tzʼok tqʼon tibʼ te chʼin ok kjawil nimsaʼn» (Mateo 23:8-12). Tuʼntzunju, nya toj tumel tuʼn tok tqʼoʼna nimxix toklen jun xjal maske skʼoʼn maj. Aj tyolin Tyol Dios kyiʼj ansyan, in tzaj tqʼamaʼn qe qa bʼaʼn tuʼn tel qkanoʼn qʼuqbʼil kykʼuʼj, noqtzun tuʼnj, mintiʼ in tzaj tqʼamaʼn tuʼn qok lepeʼ tiʼj jun xjal (Hebreos 13:7). Ax tok, in tzaj tqʼamaʼn Tyol Dios «tuʼn t-xi qʼot mastl onbʼil» kye junjun, moqa nimbʼel kye. In tzaj tqʼamaʼn jlu tuʼnju «in che kawin tuj tumelxix» ex tuʼnju in «kyqʼon kyibʼ tuʼn kypakbʼan ex tuʼn kyqʼon xnaqʼtzbʼil», nya tuʼnju skʼoʼn maj qe (1 Timoteo 5:17). Qa in xi qqʼamaʼn kye qa nim kyoklen ex in nok qqʼoʼnxix qwitz kyiʼj, jaku che tzaj chʼixwi tuʼn jlu. Ex aju mas nya bʼaʼn, jaku qo onin kyiʼj tuʼntzun tjaw kynimsan kyibʼ (Romanos 12:3). Mi jun qe qajbʼil tuʼn qonin tiʼj jun skʼoʼn maj tuʼn tkubʼ tbʼinchaʼn jun nya bʼaʼn (Lucas 17:2).
¿Alkye teya tmod ktel kyukʼil qeju in che waʼn tiʼj pan ex in kʼan tiʼj vin toj Nabʼitz Tkyimlen Jesucristo? (Qʼonka twitza kyiʼj taqikʼ 9 a 11).
10. ¿Alkye tten jaku kubʼ qyekʼun qa in nok qqʼoʼn kyoklen qeju skʼoʼn maj?
10 ¿Alkye tten jaku kubʼ qyekʼun qa in nok qqʼoʼn kyoklen qeju skʼoʼn maj tuʼn Jehová? Jaku kubʼ qyekʼun toj nim tten. Nya toj tumel qa ma txi qqanin kye alkye tten e jaw skʼoʼn. Mintiʼ qoklen tuʼn tok qbʼiʼn jlu tuʼnju oʼkx kye ojtzqilte tukʼil Jehová (1 Tesalonicenses 4:11; 2 Tesalonicenses 3:11). Ex mintiʼ tuʼn tkubʼ qximen qa ax ikx skʼoʼn maj aju kychmil moqa kyxuʼjil ex kytat moqa alkyexku juntl toj kyja. Mintiʼ in tzaj tkʼamoʼn jun xjal aju oyaj lu noq tuʼnju o tzaj qʼoʼn toklen jun toj tja (1 Tesalonicenses 2:12). Ex mintiʼ tuʼn t-xi qqanin jun xjel aju jaku kubʼ kynaʼn txqantl nya bʼaʼn tuʼn. Jun techel, mintiʼ tuʼn t-xi qqanin te t-xuʼjil jun okslal skʼoʼn maj tiʼ in tnaʼn tuʼnju tjunalx kʼanqʼil te jumajx tzalu twitz Txʼotxʼ. Ojtzqiʼnxix quʼn qa toj akʼaj twitz Txʼotxʼ, tzul tqʼoʼn Jehová aju at tajbʼen kye «kykyaqil» qeju tchʼisbʼen (Salmo 145:16).
11. ¿Alkye tten in nok qxqʼuqin qibʼ qa mintiʼ in qo jaw labʼin tiʼj kymod xjal?
11 Qa mintiʼ ma tzʼok qqʼoʼn mas kyoklen qeju skʼoʼn maj kywitz txqantl, in nok qxqʼuqin qibʼ. ¿Alkye tten in nok qxqʼuqin qibʼ? In tzaj tqʼamaʼn Tyol Dios qa che tel «erman xmletzʼ» ex jakulo tzaj kyqʼamaʼn qe qa skʼoʼn maj qe (Gálatas 2:4, 5; 1 Juan 2:19). Ax ikx, jaku ya mlay tzʼajbʼen jun skʼoʼn maj te Jehová (Mateo 25:10-12; 2 Pedro 2:20, 21). Qa mintiʼ in qo jaw labʼin tiʼj kymod xjal, mlay qo ok lepeʼ kyiʼj txqantl maske skʼoʼn maj qe ex qa ojtzqiʼnxix kywitz quʼn moqa ma bʼet nim ambʼil in che ajbʼen te Jehová. Qa ya mintiʼ ma che ajbʼentl te Jehová moqa ma kyaj kykolin ttnam Jehová, atzun qe kukx ktel qʼuqbʼil qkʼuʼj tiʼj Jehová ex mlay kyaj qtzaqpiʼn tuʼn qajbʼen te.
¿ILPE TIʼJ TUʼN TTZAJ BʼAJ QKʼUʼJ TIʼJJU KYAJLAL QEJU SKʼOʼN MAJ?
12, 13. ¿Tiquʼn mintiʼ tuʼn ttzaj bʼaj qkʼuʼj tiʼj kyajlal qeju in che waʼn tiʼj pan ex in che kʼan tiʼj vin?
12 Toj nimku abʼqʼi, kukx in kutztoq kyajlal qeju in che waʼn tiʼj pan ex in che kʼan tiʼj vin toj Nabʼitz Tkyimlen Jesucristo. Noqtzun tuʼnj, kyoj qeju abʼqʼi tzma in che ikʼ, mas in chmet kybʼet. ¿Bʼaʼnpe tuʼn ttzaj bʼaj qkʼuʼj tiʼj jlu? Nya. Qo xnaqʼtzan tiʼj tiquʼn.
13 «Tojtzqi’n Dyos alkyeqe’ju’ te» (2 Timoteo 2:19, XT). Oʼkx Jehová ojtzqilte alkye skʼoʼn maj ex alkye nya. Atzun qeju erman in kubʼ kyajlan kybʼet qeju in che waʼn tiʼj pan ex in che kʼan tiʼj vin toj Nabʼitz Tkyimlen Jesucristo, mintiʼ ojtzqiʼn kyuʼn. Ax ikx in kubʼ ajlet kybʼet qeju in che waʼn tiʼj pan ex in che kʼan tiʼj vin ex nya skʼoʼn maj qe. Jun techel, ateʼ junjun in xi tzyet tuʼn kywaʼn tiʼj pan ex tuʼn kykʼan tiʼj vin ex yajxitl in kyaj kytzaqpiʼn. Ateʼ junjuntl nya bʼaʼn kywiʼ ex in kubʼ kyximen qa che kawil tukʼil Jesús toj kyaʼj. Tuʼn jlu, in nel qnikʼ tiʼj qa mintiʼ ojtzqiʼn quʼn jteʼ kybʼet skʼoʼn maj atx twitz Txʼotxʼ.
14. ¿Tiʼ in tzaj tqʼamaʼn Tyol Dios tiʼj kybʼet qeju skʼoʼn maj che tel twitz Txʼotxʼ aj t-xi tzyet nimxix yajbʼil?
14 Toj nimku plaj twitz Txʼotxʼ che tel qeju skʼoʼn maj aj tul Jesús qʼilte kye tuʼn kyxiʼ toj kyaʼj. Tqʼama Jesús jlu: «Che tzajel nsamaʼne qe n-anjele, kʼokel qʼajtzaʼn chun kyuw, ex qeju skʼoʼmaj wuʼne che okel chmoʼn kyuʼn anjel, che tzajel chmoʼn tuj tkyaqil twitz txʼotxʼ ex max ttxaʼnpun txʼotxʼ» (Mateo 24:31). Ax ikx in tzaj tqʼamaʼn Tyol Dios qa kyoj bʼajsbʼil tqʼijlalil, nya nimxix kybʼet skʼoʼn maj che tel twitz Txʼotxʼ (Apocalipsis 12:17). Noqtzun tuʼnj, mintiʼ in tzaj tqʼamaʼn jteʼ kybʼet che tel aj t-xi tzyet nimxix yajbʼil.
15, 16. ¿Tiʼ il tiʼj tuʼn tel qnikʼ kyiʼj qeju 144,000 o che jaw skʼoʼn tuʼn Jehová?
15 A Jehová in kubʼ ximente alkye ambʼil kjawil t-skʼoʼn jun okslal tuʼn t-xiʼ toj kyaʼj (Romanos 8:28-30). Xi tzyet tuʼn tjaw t-skʼoʼn Jehová junjun okslal tej otoqxi jaw anqʼin Jesús. Toj tnejel syent abʼqʼi, chʼixmelo kykyaqil okslal e ok te skʼoʼn maj. Tejtzun tikʼtl nim abʼqʼi, chʼixme kykyaqil qeju in kyqʼamaʼntoq qa okslal qe, nya atz e ok lepeʼ tiʼj Jesús. Kyjuʼtzun, oʼkx e jaw t-skʼoʼn Jehová junjun axix tok okslal kyoj qeju abʼqʼi aju. E ok qe jlu ik tzeʼn aju triw chʼiy toj nya bʼaʼn kʼul (Mateo 13:24-30). Ax ikx kyoj bʼajsbʼil tqʼijlalil jaʼlo, kukx in che jaw t-skʼoʼn Jehová junjun xjal tuʼn kyok te kyajlal qeju 144,000 [2] (tqanil kabʼe). Ax ikx, qa in kubʼ t-ximen Jehová tuʼn tjaw t-skʼoʼn junjun okslal aj chʼixtoq tul mankbʼil tqʼijlalil, qʼuqli qkʼuʼj tiʼj qa tbʼanel aju in bʼant tuʼn Jehová (Isaías 45:9; Daniel 4:35; kjawil uʼjit Romanos 9:13, 16) [3] (tqanil oxe). Il tiʼj tuʼn tok qxqʼuqin qibʼ tuʼn miʼn qok ik tzeʼn qeju aqʼunal yolin Jesús tiʼj toj jun techel. E ok ten aqʼunal yolil nya bʼaʼn tiʼj tmod kypatron ten kyukʼil qeju e ok ten aqʼunal toj mankbʼil or (kjawil uʼjit Mateo 20:8-15).
16 Nya kykyaqil qeju skʼoʼn maj at kyoklen tuʼn kyok te «aju majen in bʼant taqʼun [...] ex at tnabʼl» (Mateo 24:45-47). Ik tzeʼn toj tnejel syent abʼqʼi, in najbʼen jun kʼloj xjal tuʼn Jehová ex Jesús toj ambʼil jaʼlo tuʼn t-xi qʼet axix tok xnaqʼtzbʼil kye nim xjal. Toj tnejel syent abʼqʼi, noq oʼkx junjun skʼoʼn maj e ajbʼen tuʼn Jehová tuʼn tkubʼ kytzʼibʼin aju Akʼaj Tuʼjil Tyol Dios kubʼ tzʼibʼin toj yol Griego. Ax ikx toj ambʼil jaʼlo, oʼkx junjun kyxol qeju skʼoʼn maj at kyoklen «tuʼn t-xi qʼot kywa» qeju tmajen Dios tojxix ambʼil bʼantni tiʼj.
17. ¿Tiʼ teya ma tzʼel tnikʼ tiʼj toj xnaqʼtzbʼil lu?
17 ¿Tiʼ ma tzʼel qnikʼ tiʼj toj xnaqʼtzbʼil lu? Ma tzʼel qnikʼ tiʼj qa tzul tqʼoʼn Jehová chwinqlal te jumajx tzalu twitz Txʼotxʼ kye nim tmajen ex tzul tqʼoʼn chwinqlal toj kyaʼj kye qeju che kawil tukʼil Jesús toj kyaʼj. Tzul tqʼoʼn Jehová oyaj kye kykyaqil tmajen, ik tzeʼn teju «xjal judiy» ex qeju «laj stranjer xjal». Ex tajbʼil tuʼn t-xi kynimen qeju tkawbʼil ex tuʼn kukx kyajbʼen te. Qkyaqilx, mintiʼ tuʼn tjaw qnimsan qibʼ. Ax ikx, qkyaqilx il tiʼj tuʼn qaqʼunan junx ex toj mujbʼabʼil. Ex qkyaqilx il tiʼj tuʼn tok tilel quʼn tuʼn tten mujbʼabʼil qxol kyukʼil erman. Tuʼnju chʼix tul bʼajsbʼil tqʼijlalil, qkyaqilx il tiʼj tuʼn kukx qajbʼen te Jehová ex tuʼn qok lepeʼ tiʼj Jesús ik tzeʼn jun kʼloj rit, moqa ẍneʼl.
^ [1] (taqikʼ 3): Ik tzeʼn in tzaj tyekʼun Salmo 87:5, 6, tzul-lo tyekʼun Jehová kybʼi kykyaqil qeju che kawil tukʼil Jesús toj kyaʼj toj ambʼil tzul (Romanos 8:19).
^ [2] (taqikʼ 15): In tzaj tyekʼun Hechos 2:33 qa ax ikx te Jesús in nonin tiʼj Jehová aj tjaw t-skʼoʼn jun xjal tuʼn t-xiʼ toj kyaʼj, noqtzun tuʼnj, oʼkx Jehová in tzaj qʼonte txokbʼil tiʼj jun xjal tuʼn t-xiʼ toj kyaʼj.
^ [3] (taqikʼ 15): Kkanetel mas tqanil tuʼna toj xnaqʼtzbʼil «Preguntas de los lectores» aju tkuʼx toj uʼj La Atalaya, te 1 te mayo te 2007, t-xaq 30 ex 31.
