1, 2. a) ¿Tiquʼn jaku txi tqʼamaʼna qa nya jun saqchbʼil aju tuʼn tjaw aʼ twiʼya? b) ¿Tiʼ il tiʼj tuʼn tel tnikʼa tiʼj naʼmxtoq tjaw aʼ twiʼya?

¿KUʼXUN teya ex taja tuʼn tjaw aʼ twiʼya? Aju tuʼn tjaw aʼ qwiʼ, atzun jun matij qoklen jaku ten. Ik tzeʼn el qnikʼ tiʼj toj xnaqʼtzbʼil ma kyaj, nya jun saqchbʼil aju tuʼn tjaw aʼ twiʼya. Aj tjaw aʼ twiʼya, in kubʼ tyekʼuna kywitz txqantl qa o txi tqʼamaʼna te Jehová tuʼn tajbʼena te. Toj juntl yol, in kubʼ tyekʼuna qa o txi ttziyena te Jehová tuʼn tajbʼena te te jumajx ex qa a jlu atzun mas nim toklen ktel toj tanqʼibʼila. Tuʼnju nya jun saqchbʼil aju kxel ttziyena te, tuʼntzunju, naʼmxtoq tjaw aʼ twiʼya, il tiʼj tuʼn tel tnikʼa tiʼj qa ya at tnabʼila ex qa taja tuʼn tjaw aʼ twiʼya tuʼnju kʼujlaʼn Jehová tuʼna ex tuʼnju in nelxix tnikʼa tiʼj tiʼ t-xilen aju tuʼn t-xi tqʼamaʼna te Jehová tuʼn tajbʼena te.

² ¿In kubʼ t-ximen teya qa ya ma bʼant ttena tuʼn tjaw aʼ twiʼya? Jakulo kubʼ t-ximana qa naʼmx. Moqa jaku kubʼ t-ximana qa ya ma bʼant ttena, noqtzun tuʼnj, in tzaj kyqʼamaʼn tmana teya qa bʼaʼn tuʼn tyona chʼintl akux in chʼiya ex akux in nok chʼintl tnabʼila. Miʼn tzaj bʼaj tkʼuʼja. Tzʼok tililxix tuʼna tuʼn tbʼant ttena tuʼntzun toj chʼintl ambʼil, jaku jaw aʼ twiʼya. Aju  xnaqʼtzbʼil lu, kʼonil tiʼja tuʼn tbʼant junjun tiʼchaq tuʼna toj oxe tten. Tnejel, aqeju tiʼchaq in xi tnimana. Tkabʼ, aqeju tiʼchaq in kubʼ tbʼinchaʼna. Ex toxin, aju in tnaʼna tiʼj Jehová.

3, 4. ¿Tiʼ xnaqʼtzbʼil jaku tzʼel kykanoʼn kuʼxun tiʼj techel kyaj tqʼoʼn Timoteo?

³ Bʼaʼn tuʼn tkubʼ t-xjelina qeju xjel lu: «¿Tiquʼn in xi nnimane qa at Dios? ¿Tiquʼn in nok qʼuqeʼ nkʼuʼje tiʼj qa atz tzajni Xjan Uʼj tukʼil Dios? ¿Tiquʼn in xi nnimane qe tkawbʼil Dios ex nya qeju kykawbʼil xjal?». Qa ma kubʼ t-xjelina qeju xjel lu, che onil tiʼja tuʼn t-xi tbʼiʼna aju nabʼil tqʼama apóstol Pablo tej tqʼama jlu: «Tuʼntzun tel kynikʼe kyuʼnx kyibʼe alkye bʼaʼn ex alkye in xi tkʼamoʼn Dios ex alkyeju tzʼaqli tajbʼil» (Romanos 12 :2, TNM). ¿Tiquʼn il tiʼj tuʼn tel tnikʼa tuʼnx tibʼa kyiʼj qe tiʼchaq?

⁴ Jaku tzʼonin aju techel kyaj tqʼoʼn Timoteo tiʼja. Ojtzqiʼntoq tuʼn aju in tzaj tqʼamaʼn Tyol Dios, tuʼnju xi t-xnaqʼtzaʼn ttxuʼ te ex tyaʼ alkye axix tok. Noqtzun tuʼnj, xi tqʼamaʼn Pablo jlu te: «Ax tuʼn tkyaj tena tuj ju xnaqʼtzbʼil ma tkʼama ex ma qeʼ tkʼuʼja tiʼj» (2 Timoteo 3:14, 15). Aju txol yol «ma qeʼ tkʼuʼja tiʼj», a t-xilen qa qʼuqlixix qkʼuʼj tiʼj qa ax tok jun tiʼ. Tuʼntzunju, qʼuqlitoq tkʼuʼj Timoteo tiʼj qa otoq kanet axix tok tuʼn toj Tyol Dios. Xi tkʼamoʼn xnaqʼtzbʼil nya noq tuʼnju xi qʼamaʼn te tuʼn ttxuʼ ex tuʼn tyaʼ, sino ax te kubʼ ten ximil tiʼjju xnaqʼtzbʼil ex ok qeʼ tkʼuʼj tiʼj qa ax tok (kjawil uʼjit Hebreos 5:14).

5, 6. ¿Tiquʼn nim toklen tuʼn t-xi tzyet naj tuʼn tajbʼen tnabʼila?

⁵ ¿Tiʼ jaku tzʼel tkanoʼna tiʼj techel kyaj tqʼoʼn Timoteo? Qape ax ikx teya o tzikʼ ambʼil toklen tojtzqiʼna axix tok tiʼj Tyol Dios. Qa ikju, tzʼok tilel tuʼna tuʼn t-ximana tiʼj tiquʼn in nok qeʼ tkʼuʼja tiʼjju in xi tnimana. Qa ma tzʼok qeʼxix tkʼuʼja tiʼjju in xi tnimana, kchʼiyil mas qʼuqbʼil tkʼuʼja. Nya oʼkxju, ax ikx mlay txi tqʼoʼna ambʼil tuʼn tkubʼ tkʼuʼja kyuʼn tukʼila, kyuʼn junjuntl xjal nix tuʼnju in kubʼ tnaʼna.

⁶ Nim toklen tuʼn t-xi tzyet naj tuʼn tajbʼen tnabʼila. ¿Tiquʼn? Tuʼntzun kytzaqʼwet qeju xjelbʼitz in tzaj kyqanin qeju tukʼila teya ik tzeʼn jlu: «¿Tiquʼn in nok qeʼ tkʼuʼja tiʼj qa at Dios? Qa at tkʼujlabʼil Dios, ¿tiquʼn in tzaj tqʼoʼn ambʼil te nya bʼaʼn? Qa a Dios bʼinchalte tkyaqil, ¿alkye kubʼ bʼinchante Dios?». Aj t-xi t-xnaqʼtzan tibʼa tuʼn tajbʼen tnabʼila, jaku che onin xjel lu tiʼja tuʼn tok qeʼxix tkʼuʼja tiʼjju in xi tnimana. Ex kʼonil tiʼja tuʼn tten mas tajbʼila tuʼn t-xnaqʼtzana tiʼj Tyol Dios.

7-9. Qʼamantza alkye tten jaku tzʼonin tiʼja aju onbʼil tiʼj uʼj, ¿Qué enseña realmente la Biblia? tuʼntzun tchʼiy qʼuqbʼil tkʼuʼja.

⁷ Qa ma tzʼok tqʼoʼnxixa twiʼya tiʼj Tyol Dios aj t-xnaqʼtzana tiʼj, jaku che tzaqʼwet xjelbʼitz tuʼna, jaku kanet tqanil tuʼna tiʼjju mintiʼ in nel tnikʼa tiʼj ex jaku tzʼok qeʼ tkʼuʼja tiʼjju in xi tnimana (Hechos 17:11). At  nim uʼj kyuʼn Testigos de Jehová aju jaku tzʼonin tiʼja tuʼn tbʼant jlu tuʼna. Jun techel, ateʼ nim kuʼxun o tzʼonin kyiʼj aju uʼj El origen de la vida ex aju uʼj, ¿Existe un Creador que se interese por nosotros? Ax ikx o tzʼonin kyiʼj txqantl aju xnaqʼtzbʼil tkubʼ toj jw.org tiʼj uʼj, ¿Qué enseña realmente la Biblia? A jlu atz tkubʼ toj ENSEÑANZAS BÍBLICAS > JÓVENES. Ateʼ junjun onbʼil tiʼj xnaqʼtzbʼil toj, aju ximen maj tuʼn tonin tiʼja tuʼn tel mas tnikʼa kyiʼj nim xnaqʼtzbʼil toj Tyol Dios.

⁸ Tuʼnju ya in xnaqʼtzana tiʼj Tyol Dios, olo tzʼel tnikʼa kyiʼj junjun tzaqʼwebʼil kyiʼj junjun xjel tkubʼ toj onbʼil tiʼj xnaqʼtzbʼil. Noqtzun tuʼnj, ¿in nokpe qeʼ tkʼuʼja kyiʼj tzaqʼwebʼil tkubʼ toj? Aqeju onbʼil tiʼj xnaqʼtzbʼil jaku tzʼonin tiʼja tuʼn t-ximana kyiʼj nim taqikʼ Tyol Dios ex jaku tzʼonin tiʼja tuʼn tkubʼ ttzʼibʼena tiʼ teya in xi tnimen. Nya oʼkxju, ax ikx jaku tzʼonin tiʼja tuʼn t-xi tchikʼbʼaʼna kye txqantl xjal. Qa jaku bʼant tuʼn tok tqʼoʼn twitza kyiʼj onbʼil tiʼj xnaqʼtzbʼil, bʼaʼn tuʼn tajbʼenxix tuʼna tuʼn t-xnaqʼtzana ex tuʼn tchʼiy qʼuqbʼil tkʼuʼja tiʼjju o tzʼel tnikʼa tiʼj toj Tyol Dios.

⁹ Nim toklen tuʼn tok qeʼ tkʼuʼja tuʼnx tibʼa qa aju o tzʼel tnikʼa tiʼj toj Tyol Dios, atzun axix tok. A jlu kʼonil tiʼja tuʼn tbʼant ttena tuʼn tjaw aʼ twiʼya. At jun ermana tzma in nokx toj ttxinil tqʼama jlu: «Tej naʼmxtoq tjaw aʼ nwiʼye, kubʼ nxnaqʼtzaʼne Tyol Dios ex ok qeʼ nkʼuʼje tiʼj qa a jlu, atzun okslabʼil axix tok». In tzaj tqʼamaʼn qa aj tel junjun qʼij, mas in nok qeʼ tkʼuʼj tiʼj jlu.

10. ¿Tiquʼn il tiʼj tuʼn tkubʼ tyekʼun jun testigo de Jehová tuʼn taqʼunbʼen qa at qʼuqbʼil tkʼuʼj?

¹⁰ In tzaj tqʼamaʼn Tyol Dios qa «mintiʼ tajbʼen qokslabʼl» qa mintiʼ xkubʼ qyekʼun tukʼil qaqʼunbʼen (Santiago 2:17). Tuʼntzunju, qa qʼuqlixix tkʼuʼja tiʼjju in xi tnimana, kbʼel tyekʼuna kyuʼn qe tiʼchaq in kubʼ tbʼinchaʼna. Kbʼantel tuʼna aju in tzaj tqʼamaʼn Tyol Dios  tuʼn tel tpan tibʼa «tiʼj tkyaqil mya bʼaʼn» ex tuʼn tnimana «te Dios» (kjawil uʼjit 2 Pedro 3:11).

11. ¿Tiʼ t-xilen aju txol yol tuʼn tel tpan tibʼa «tiʼj tkyaqil mya bʼaʼn»?

¹¹ ¿Tiʼ t-xilen aju tuʼn tel tpan tibʼa «tiʼj tkyaqil mya bʼaʼn»? A t-xilen jlu tuʼn tten jun qanqʼibʼil tbʼanel toj twitz Dios. Jun techel, ximana tiʼjju o kubʼ tbʼinchaʼna kyoj qeju mankbʼil qaq xjaw. Tej tok weʼya twitz joybʼil, ¿elpe tnikʼa tiʼj alkye bʼaʼn ex alkye nya bʼaʼn? (Hebreos 5:14). ¿Naʼnx tuʼna qa el tikʼuna jun joybʼil moqa aju kyajbʼil junjuntl kuʼxun tuʼn tkubʼ tbʼinchaʼna? ¿Tbʼanelpe tmoda at toj tja xnaqʼtzbʼil? ¿In kubʼ tbʼinchaʼna aju in tzaj tqʼamaʼn Jehová, moqa in kubʼ tbʼinchaʼna aju in tzaj kyqʼamaʼn tukʼila noq tuʼn miʼn kyyolin nya bʼaʼn tiʼja? (1 Pedro 4:3, 4). Ax tok, mi jun qe tzʼaqli. Axpe ikx qeju ma bʼet-xi ambʼil in che ajbʼen te Jehová, at maj in tzaj kychʼixwi tuʼn t-xi kyqʼamaʼn qa testigos de Jehová qe. Noqtzun tuʼnj, aju xjal o txi tqʼoʼn tchwinqlal tuʼn tajbʼen te Dios, il tiʼj tuʼn ttzalajxix tuʼnju testigo de Jehová ex tuʼn tkubʼ tyekʼun jun tanqʼibʼil tbʼanel toj twitz Dios.

12. a) ¿Tiʼ aju tuʼn tnimana «te Dios»? b) ¿Alkye t-ximbʼetza ktel tiʼjju tuʼn tajbʼena «te Dios»?

¹² ¿Tiʼ aju tuʼn tnimana «te Dios»? A jlu in yolin kyiʼj qeju tiʼchaq in bʼant tuʼna jatumel in nok tchmon tibʼa, ik tzeʼn tuʼn t-xiʼya kyoj chmabʼil ex tuʼn tpakbʼana. Noqtzun tuʼnj, ax ikx qeju tiʼchaq in bʼant tuʼna tjunalxa, ik tzeʼn tuʼn tnaʼna Dios te Jehová ex tuʼn t-xnaqʼtzana tiʼj Tyol. Aju xjal in xi tqʼoʼn tchwinqlal te Jehová tuʼn tajbʼen te, in tzalaj aj tkubʼ tbʼinchaʼn qeju tiʼchaq lu ex mintiʼ in che ok tqʼoʼn ik tzeʼn jun iqtz. In kubʼ tnaʼn ik tzeʼn te aj kawil David tej tqʼama jlu: «Nman Dios, in chin tzalaje tuʼn tbʼant tajbʼila; aju t-xnaqʼtzbʼila kʼuʼn wuʼne tuj wanmiye» (Salmo 40:8).

13, 14. a) ¿Tiʼ jaku tzʼonin tiʼja tuʼn tnimana «te Dios»? b) ¿Alkye tten o che onin xjel kyiʼj junjun kuʼxun?

¹³ Tuʼn t-ximana kyiʼj junjun tiʼchaq jaku bʼant tuʼna, ateʼ junjun xjel jaku ximana kyiʼj ex jaku kubʼ ttzʼibʼina tzaqʼwebʼil kyiʼj ik tzeʼn jlu: «¿In xi tqʼamaʼna aju tajbʼila te Jehová toj tnaʼj Diosa? ¿Qʼanchaʼl tiʼjju in xi tqʼamaʼna toj tnaʼj Diosa qa kʼujlaʼn Jehová tuʼna?». «¿Tiʼ in kubʼ t-xnaqʼtzana aj t-xnaqʼtzana tjunalxa?». «¿In nexa pakbʼal, axpe ikx qa mintiʼ in che eʼx tmana?». Ax ikx jaku kubʼ ttzʼibʼina junjuntl tiʼchaq tajbʼila tuʼn tbʼant tuʼna, ik tzeʼn tuʼn kyel mas tbʼanel qe tnaʼj Diosa, tuʼn tbʼant-xix t-xnaqʼtzana tiʼj Tyol Dios ex tuʼn tbʼant-xix tpakbʼana.

¹⁴ Nim kuʼxun aʼyeju kyajbʼil tuʼn tjaw aʼ kywiʼ, o tzʼonin kyiʼj aju tuʼn tkubʼ kytzʼibʼin aju kyajbʼil tuʼn tbʼant kyuʼn. Jun ermana tzma txin, aju Tilda tbʼi, in tzaj tqʼamaʼn qa kubʼ ttzʼibʼin aju tajbʼil tuʼn tbʼant tuʼn ex iktzun tten chebʼe chebʼe bʼant tuʼn aju kubʼ t-ximen, ex tej tikʼ juntl abʼqʼi otoq bʼant tten tuʼn tjaw aʼ twiʼ. Chʼixme axju in tzaj tqʼamaʼn jun ermano kuʼxun Patrick tbʼi. Tqʼama jlu: «Otoq kubʼ nximane tiʼ tuʼn tbʼant wuʼne, noqtzun tuʼnj, tej tkubʼ ntzʼibʼine onin wiʼje  tuʼn tok tilil mas wuʼne tuʼn tbʼant aju kubʼ nximane».

15. ¿Tiquʼn aya kbʼel ximente tuʼn t-xi tqʼamaʼna te Jehová tuʼn tajbʼena te?

¹⁵ Ax ikx, ximana tiʼj juntl xjel lu: «Qa ma kyaj kytzaqpiʼn tmana moqa qe tamiwa aju axix tok, ¿kukxpe kʼajbʼela te Jehová». Naʼntza qa aya kbʼel ximente tiʼ kbʼantel tuʼna. Aj t-xi tqʼamaʼna te Jehová tuʼn tajbʼena te ex aj tjaw aʼ twiʼya, tex teya tamiwbʼil ktel tukʼil ex kxel tqʼoʼna tajlal te tiʼjju kbʼel tbʼinchaʼna. Tuʼntzunju, tkyaqilju in bʼant tuʼna tiʼj Jehová, mintiʼ in bʼant tuʼna noq tuʼnju in bʼant kyuʼn tmana moqa tuʼn juntl xjal. Qa in nel tpan tibʼa jaʼlo tiʼj tkyaqilju nya bʼaʼn ex qa in nimana te Dios, kbʼel tyekʼuna qa qʼuqli tkʼuʼja tiʼj qa a jlu atzun axix tok ex qa tajbʼila tuʼn t-xi tnimana qe tkawbʼil Dios. Iktzun tten kbʼantel ttena tuʼn tjaw aʼ twiʼya toj chʼin ambʼil.

16, 17. a) ¿Tiquʼn kjawel aʼ twiʼ jun xjal? b) Qʼamantza jun techel alkye tten kʼokel tqʼoʼna mas toklen chojbʼil.

¹⁶ Jun qʼij, jun xinaq, moqa ichan, aju ojtzqiʼnxixtoq Tley Moisés tuʼn xi tqanin te Jesús alkyetoq mandamyent mas nim toklen. Xi tqʼamaʼn Jesús jlu te: «Kykʼujlame  Qman Dios tuʼn tkyaqil kyanmiye ex tuʼn tkyaqil kykʼuʼje ex tuʼn tkyaqil kynabʼle» (Mateo 22:35-37). Ik tzeʼn in nel qnikʼ tiʼj, qa at jun xjal tajbʼil tuʼn tjaw aʼ twiʼ ex tuʼn tok te okslal, kbʼel tbʼinchaʼn jlu tuʼnju kʼujlaʼn Jehová tuʼn. ¿Alkye tten jaku chʼiy tkʼujlabʼila tiʼj Jehová? Jun tbʼanel tten aju qa ma ximana tiʼjju chojbʼil bʼant tuʼn Jesús (kjawil uʼjit 2 Corintios 5:14, 15 ex 1 Juan 4:9, 19). Qa ma tzʼel tpaʼna ambʼil tuʼn t-ximana tiʼj tbʼanel oyaj o tzaj tqʼoʼn Dios teya, kʼokel tqʼoʼna mas toklen ex ktel tajbʼila tuʼn t-xi tqʼoʼna chjonte te.

¹⁷ Ximana tiʼj techel lu. Noqwit chʼix tjaw jiqʼwiya, moqa jaqʼwiya, toj aʼ ex in pon jun xjal kolil teya. ¿Tiʼ jaku bʼant tuʼna? ¿Jakupe tzʼaja tjaya tuʼn tchʼixpet t-xbʼaluna ex mintiʼ otoq t-xi tqʼoʼna chjonte teju xjal otoq kolin tiʼja? Mlay. Kukx jakulo t-xi tqʼoʼna chjonte te akux in nanqʼina. Chʼixme axju in bʼaj tuʼn tpaj il ex kyimen, qkyaqilx atoʼ ik tzeʼn chʼix qjaw jiqʼwi. Noqtzun tuʼnj, o qo klet tuʼn Jehová ex Jesús tuʼnju nimxix kʼujlaʼn qoʼ kyuʼn. ¡O klet qchwinqlal kyuʼn! Chjonte te Jehová ex Jesús at qʼuqbʼil qkʼuʼj tuʼn qanqʼin te jumajx toj jun tbʼanel najbʼil tzalu twitz Txʼotxʼ. Ax tok in xi qqʼoʼn nim chjonte kye.

18, 19. a) ¿Tiquʼn mintiʼ tuʼn ttzaj xobʼa tuʼn t-xi tqʼoʼna chwinqlala te Jehová? b) ¿Tiquʼn mas tbʼanel ktel tchwinqlala qa ma tzʼajbʼena te Jehová?

¹⁸ ¿In kubʼpe tnaʼna tuʼn t-xi tqʼoʼna chjonte tiʼjju o bʼant tuʼn Jehová tiʼja? Qa ikju, aju mas bʼaʼn jaku bʼant tuʼna aju tuʼn t-xi tqʼamaʼna te Jehová tuʼn tajbʼena te ex tuʼn tjaw aʼ twiʼya. Aju tuʼn t-xi tqʼoʼna tchwinqlala te Jehová, a t-xilenju tuʼn t-xi ttziyena te qa kbʼel tbʼinchaʼna tajbʼil te jumajx. ¿Ilpe tiʼj tuʼn ttzaj xobʼa tuʼn t-xi ttziyena jlu te Jehová? Miʼn. Tuʼnju tajbʼil Jehová tuʼn ttena bʼaʼn, ex o tzaj ttziyen tuʼn t-xi tqʼoʼn chojbʼil kye qeju in che nimen te (Hebreos 11:6). Aj t-xi tqʼamaʼna te Jehová tuʼn tajbʼena te ex aj tjaw aʼ twiʼya, ¡mas tbʼanel ktel tchwinqlala! Jun ermano te 24 abʼqʼi jaw aʼ twiʼ tej naʼmxtoq tokx toj tkuʼxumal, tqʼama jlu: «Noqwit kubʼ nyoʼne junjun abʼqʼi, ax tok mawtlo tzʼelxix nnikʼe tiʼjju in bʼanttoq wuʼne. Noqtzun tuʼnj, tej tjaw aʼ nwiʼye kolin wiʼje tuʼn miʼn nkubʼ tzʼaqe kyoj nya bʼaʼn at twitz txʼotxʼ».

¹⁹ Tajbʼil Jehová aju mas bʼaʼn teya. Atzunte Satanás nya nim toklena toj twitz, tuʼnju mintiʼ tkʼuʼj kyiʼj xjal. Qa ma kubʼ tbʼinchaʼna aju tajbʼil, mlay tzaj tqʼoʼn jun tiʼ tbʼanel teya. ¿Alkye tten jaku tzaj tqʼoʼn teya, tuʼnju mintiʼ jun tbʼanel at tukʼil? Mintiʼ tbʼanel tqanil at tuʼn kye xjal nix qʼuqbʼil kykʼuʼj. Mlay tzaj ttziyen jun qʼuqbʼil tkʼuʼja toj ambʼil tzul, tuʼnju mintiʼx te jun qʼuqbʼil tkʼuʼj at toj ambʼil tzul (Apocalipsis 20:10).

20. ¿Tiʼ kʼonil tiʼja tuʼn tbʼant ttena tuʼn t-xi tqʼamaʼna te Jehová tuʼn tajbʼena te ex tuʼn tjaw aʼ twiʼya? (Qʼonka twitza tiʼj xnaqʼtzbʼil, «Qe onbʼil tuʼn tchʼiy tamiwbʼila tukʼil Dios»).

²⁰ Aju tuʼn t-xi tqʼamaʼna te Jehová tuʼn tajbʼena te atzun mas tbʼanel jaku bʼant tuʼna. ¿Mape bʼant ttena tuʼn tbʼant tuʼna? Qa ikju, mintiʼ tuʼn ttzaj xobʼa tuʼn tbʼant tuʼna. Noqtzun tuʼnj, qa in kubʼ t-ximana qa naʼmx tbʼant ttena, bʼinxa qeju nabʼil tkuʼx toj xnaqʼtzbʼil lu tuʼntzun tkubʼ tbʼinchaʼn ttena. Xi tqʼoʼn Pablo jun nabʼil kye erman te tnam Filipos tuʼn kukx kychʼiy toj kyokslabʼil (Filipenses 3:16). Qa ma t-xi tbʼiʼna aju nabʼil lu, toj chʼin ambʼil kbʼantel ttena tuʼn t-xi tqʼamaʼna te Jehová tuʼn tajbʼena te ex tuʼn tjaw aʼ twiʼya.