1, 2. a) ¿Tiʼ in che tzalaj tmajen Jehová tiʼj toj ambʼil jaʼlo? b) ¿Tiʼ jaku bʼant kyuʼn mambʼaj okslal ex qeju ansyan tuʼntzun tel kynikʼ kuʼxun tiʼj tzeʼn kʼokel kyanqʼibʼil aj tjaw aʼ kywiʼ?

OʼKX qʼiʼntoq 12 abʼqʼi tuʼn Christopher tej tajbʼiltoq tuʼn tjaw aʼ twiʼ, moqa tuʼn tbʼyan. Xi tqʼamaʼn jun ansyan te: «Ojtzqiʼn twitza wuʼne atxix tel tal neʼẍa. Ex in chin tzalaje tuʼnju taja tuʼn tjaw aʼ twiʼya, atzun jaʼlo waje tuʼn t-xi nqanine teya: ¿Tiquʼn taja tuʼn tjaw aʼ twiʼya?». At nim tiquʼn tuʼnju xi tqanin ansyan jlu te. Nim in che jaw tzalaj tmajen Jehová aj tok kyqʼoʼn kywitz tiʼj aj tjaw aʼ kywiʼ nim kuʼxun tkyaqil abʼqʼi (Eclesiastés 12:1). Noqtzun tuʼnj, aqeju mambʼaj okslal ex qeju ansyan ateʼ kyxol kʼloj okslal, il tiʼj tuʼn tel kynikʼ tiʼj qa tuʼnju kʼujlaʼn Jehová kyuʼn kuʼxun kyaj tuʼn tjaw aʼ kywiʼ ex qa in nel kynikʼ tiʼj tiʼ t-xilen.

² In tzaj tyekʼun Tyol Dios qa aj t-xi tqʼamaʼn jun xjal te Jehová tuʼn tajbʼen te ex aj tjaw aʼ twiʼ, in xi tzyet jun akʼaj tanqʼibʼil ik tzeʼn jun tmajen Dios. A t-xilen jlu qa tzul kʼiwlaʼxix  tuʼn Jehová, noqtzun tuʼnj, ax ikx kʼokel weʼ twitz nim joybʼil tuʼn Satanás (Proverbios 10:22; 1 Pedro 5:8). Tuʼntzunju, aqeju mambʼaj testigos de Jehová qe, il tiʼj tuʼn tel kypaʼn ambʼil tuʼn kyonin kyiʼj kykʼwaʼl tuʼn tel kynikʼ tiʼj tiʼ t-xilen aju tuʼn qok te t-xnaqʼtzbʼen Jesús. ¿Yajtzun qa at jun kuʼxun nya testigo de Jehová qe tman? Qa ikju, aʼye ansyan ateʼ kyxol kʼloj okslal che onil tukʼil kʼujlabʼil tiʼj tuʼn tel tnikʼ tiʼ t-xilen aju tuʼn t-xi tqʼamaʼn te Jehová tuʼn tajbʼen te ex tuʼn tjaw aʼ twiʼ (kjawil uʼjit Lucas 14:27-30). Qa at jun xjal taj tuʼn tjaw tbʼinchaʼn jun matij ja, il tiʼj tuʼn tbʼajxix tbʼinchaʼn tten. Chʼixmi axju in bʼaj qa taj jun kuʼxun tuʼn tjaw aʼ twiʼ, il tiʼj tuʼn tbʼajxix tbʼinchaʼn tten. Iktzun tten kukx kʼajbʼel te Jehová ajxi tul xitbʼil (Mateo 24:13). ¿Ti kʼonil kyiʼj kuʼxun tuʼntzun kyajbʼen te Jehová te jumajx? Qo xnaqʼtzaʼn tiʼj.

3. a) ¿Tiʼ tqʼama Jesús ex apóstol Pedro tiʼjju tuʼn tjaw aʼ qwiʼ? (Mateo 28:19, 20; 1 Pedro 3:21). b) ¿Alkyeqe xjel qo xnaqʼtzal tiʼj toj xnaqʼtzbʼil lu? c) ¿Tiquʼn nim toklen tuʼn tkubʼ t-xjelina qeju xjel lu?

³ ¿Tzma kuʼxun teya ex taja tuʼn tjaw aʼ twiʼya? ¡Tbʼanel qa ikju! Aj tjaw aʼ qwiʼ ex aj qok te testigo de Jehová, jun tbʼanel oklenj jlu. Kyaj t-xnaqʼtzaʼn Jesús qa il tiʼj tuʼn tjaw aʼ kywiʼ kykyaqil okslal. Ex tqʼama apóstol Pedro qa nim toklen tuʼn tjaw aʼ qwiʼ tuʼntzun qklet toj nimxix yajbʼil (Mateo 28:19, 20; 1 Pedro 3:21). Toj xnaqʼtzbʼil lu, kʼelel qnikʼ tiʼj oxe xjel aju kʼonil tiʼja tuʼn tel tnikʼa tiʼj qa ma bʼant ttena tuʼn tjaw aʼ twiʼya: «¿Mape tzʼok nnabʼile? ¿Tiquʼn waje tuʼn tjaw aʼ nwiʼye? ¿In nelpe nnikʼe tiʼj tiʼ t-xilen aju tuʼn t-xi nqʼamaʼne te Jehová tuʼn wajbʼene te?». Nim toklen tuʼn tkubʼ t-xjelina qeju xjel lu. ¿Tiquʼn? Tuʼnju aj tjaw aʼ twiʼya, kbʼel tyekʼuna qa o t-xi ttziyena te Jehová tuʼn tajbʼena te te jumajx. Aqeju xjel lu che onil tiʼja tuʼn tjapun twiʼ tyola.

4, 5. a) ¿Tiquʼn nya il tiʼj tuʼn tjapun jun qabʼqʼi tuʼn tjaw aʼ qwiʼ? b) ¿Tiʼ t-xilen aju qa ma tzʼok tnabʼil jun xjal?

⁴ Mintiʼ in tzaj tqʼamaʼn Tyol Dios jteʼxix qabʼqʼi ktel tuʼn tjaw aʼ qwiʼ. In tzaj tqʼamaʼn Proverbios 20:11 jlu: «Kyuʼn qe tbʼinchbʼen jun kuʼxun nneʼl nikʼbʼaj tiʼj qa bʼaʼn tmod ex qa tuj tumel in bʼet». A jlu in tzaj tyekʼun qa axpe ikx jun tzma kʼwaʼlx jaku tzʼel tnikʼ tiʼj alkye bʼaʼn ex alkye nya bʼaʼn, ex jaku tzʼel tnikʼ tiʼj tiʼ t-xilen aju tuʼn t-xi tqʼamaʼn te Jehová tuʼn tajbʼen te. Tuʼntzunju, qa in kubʼ tyekʼun jun kuʼxun qa ma tzʼok tnabʼil ex qa o t-xi tqʼamaʼn te Jehová tuʼn tajbʼen te, nim toklen ex bʼaʼn tuʼn tjaw aʼ twiʼ (Proverbios 20:7).

⁵ ¿Tiʼtzun t-xilen aju qa ma tzʼok tnabʼil jun xjal? Nya oʼkx in yolin jlu tiʼj qa ya otoq chʼiy jun xjal moqa ya ma tijen. In tzaj tqʼamaʼn Tyol Dios qa a t-xilen jlu qa in nikʼ  qwitz tiʼj nim tiʼchaq ex in nel qnikʼ tiʼj «alkyeju bʼaʼn ex alkyeju mya bʼaʼn» (Hebreos 5:14). Aju xjal at tnabʼil, ojtzqiʼn tuʼn alkye aju bʼaʼn ex tajbʼil tuʼn tkubʼ tbʼinchaʼn tuʼn tkyaqil tkʼuʼj. Ax ikx in nok tilel tuʼn, tuʼn tkubʼ kyiʼj joybʼil tuʼn ex nya il tiʼj tuʼn t-xi tqʼamaʼn juntl te tuʼn tkubʼ tbʼinchaʼn aju bʼaʼn. Aj tjaw aʼ twiʼya, il tiʼj tuʼn tkubʼ tyekʼuna qa kbʼel tbʼinchaʼna aju bʼaʼn, axpe ikx qa mintiʼ in nok kyqʼoʼn tmana kywitz tiʼja moqa junjuntl xjal (chʼixmi ax ximbʼetz jlu kkanetel tuʼna toj Filipenses 2:12).

6, 7. a) ¿Alkyeqe joybʼil ok weʼ Daniel twitz toj tnam Babilonia? b) ¿Alkye tten kubʼ tyekʼun Daniel qa otoq tzʼok tnabʼil?

⁶ ¿Jakupe kubʼ tyekʼun jun kuʼxun qa ya at tnabʼil? Ximana tiʼj techel kyaj tqʼoʼn jun tmajen Jehová, aju Daniel tbʼi. Tzmatoqlo kuʼxun te tej t-xi qʼiʼn toj tnam Babilonia ex mintiʼ xi qʼiʼn qe tman tukʼil. Ok weʼ twitz nim joybʼil atztzu. Jun techel, attoq kyxol xjal aʼyeju mintiʼtoq in che nimen te Dios. Nya oʼkxju, ax ikx ok qʼoʼn te jun xjal nim toklen. Axpe ikx, ok qʼoʼn te jun kyxol qeju kuʼxun e jaw skʼoʼn tuʼn kyajbʼen te aj kawil (Daniel 1:3-5, 13). Qa ma tzʼok ten jun xjal ximel tiʼj, jakulo kubʼ t-ximen qa mas bʼaʼn aju tanqʼibʼil Daniel jakutoq ten toj tnam Babilonia ik tzeʼn toj tnam Israel.

⁷ Kubʼ tyekʼun Daniel qa otoq tzʼok tnabʼil tej tok weʼ kywitz qeju joybʼil. ¿Alkye tten bʼant tuʼn? Mintiʼ xi tqʼoʼn ambʼil tuʼn tkubʼ kychʼexpuʼn xjal t-ximbʼetz moqa tuʼn miʼn t-xi tnimentl Jehová. In tzaj tqʼamaʼn Tyol Dios tiʼj Daniel qa «kubʼ t-ximan tuʼn miʼn tbʼaj ttzʼilsan tibʼ». Toj juntl yol, otoq bʼaj t-ximen tuʼn miʼn tkubʼ tbʼinchaʼn jun tiʼ aju attoq toklen tukʼil okslabʼil nya ax tok (Daniel  1:8). Iktzun tten kubʼ tyekʼun qa otoq tzʼok tnabʼil.

8. ¿Tiʼ jaku tzʼel tkanoʼna tiʼj techel kyaj tqʼoʼn Daniel?

⁸ ¿Tiʼ jaku tzʼel tkanoʼna tiʼj techel kyaj tqʼoʼn Daniel? Qa jun kuʼxun teya ex ma tzʼok tnabʼila, il tiʼj tuʼn t-xi tnimana Jehová axpe ikx aj tok weʼya twitz nya bʼaʼn. Mintiʼ tuʼn toka ik tzeʼn jun camaleón, aju in kubʼ tchʼexpuʼn tcoloril noq tuʼn tten kyukʼil qeju ateʼ ttxlaj. Mlay bʼant tuʼn toka ik tzeʼn jun tamiw Jehová toj Ja te Chmabʼil ex tuʼn toka ik tzeʼn jun kyamiw xjal toj tja xnaqʼtzbʼil. Aju teya tuʼn tbʼant tuʼn, aju tuʼn kukx tajbʼena te Jehová maske ma tzʼok weʼya kywitz joybʼil (kjawil uʼjit Efesios 4:14, 15).

9, 10. a) ¿Tiquʼn il tiʼj tuʼn tok tena ximel tiʼj alkye tmoda kubʼ tyekʼuna tej tok weʼya twitz jun joybʼil mankbʼil maj? b) ¿Tiʼ t-xilen aju tuʼn tjaw aʼ qwiʼ?

⁹ Ax tok, qa kuʼxun qoʼ moqa ma qo tijen, qkyaqilx in qo el txalpaj (Eclesiastés 7:20). Noqtzun tuʼnj, qa taja tuʼn tjaw aʼ twiʼya, il tiʼj tuʼn tkubʼ t-xjelina qa ax tok o kubʼ t-ximana tuʼn tkubʼ tbʼinchaʼna toj tkyaqil ambʼil aju tajbʼil Jehová. ¿Ope bʼet ambʼil in nimana te Jehová? Ximana tiʼj alkye tmoda kubʼ tyekʼuna tej tok weʼya twitz jun joybʼil mankbʼil maj. ¿Kubʼpe tyekʼuna qa el tnikʼa tiʼj alkye bʼaʼn? Moqa in nok weʼya twitz jun nya bʼaʼn ik tzeʼn te Daniel. Qape at jun o tzaj qʼamante teya tuʼn tajbʼen aju tbʼanel in bʼant tuʼna tuʼntzun tten jun tbʼanel tanqʼibʼila toj ambʼil jaʼlo. Aj tok weʼya kywitz nya bʼaʼn ik tzeʼn aju, ¿jakupe tzʼel tnikʼa tiʼj alkye tajbʼil Jehová tuʼn tbʼant tuʼna? (Efesios 5:17, TNM).

¹⁰ Nim toklen tuʼn tkubʼ t-xjelina qeju xjel lu, tuʼnju che onil tiʼja tuʼn tel tnikʼa tiʼj qa nya jun saqchbʼil aju tuʼn tjaw aʼ qwiʼ. Aj tjaw aʼ qwiʼ, a t-xilen qa in kubʼ qyekʼun kye txqantl qa o t-xi qtziyen te Jehová tuʼn tok qkʼujlaʼn ex tuʼn qajbʼen te tuʼn tkyaqil qkʼuʼj te jumajx (Marcos 12:30). Kykyaqil qeju in jaw aʼ kywiʼ, il tiʼj tuʼn tkubʼ kyximen tuʼn tjapun twiʼ kyyol aju xi kytziyen te Jehová (kjawil uʼjit Eclesiastés 5:4, 5).

11, 12. a) Qa in ximana tiʼj tuʼn tjaw aʼ twiʼya, ¿tiʼ il tiʼj tuʼn tok qeʼ tkʼuʼja tiʼj? b) ¿Tiʼ jaku tzʼonin tiʼja tuʼn tten t-ximbʼetza ik tzeʼn te Jehová t-xim at tiʼj aju tuʼn tjaw aʼ qwiʼ?

¹¹ In tzaj tqʼamaʼn Tyol Dios qa kykyaqil qeju tmajen Jehová «kyuʼnx kxel kyqʼon kyibʼ» tuʼn kyajbʼen te, axpe ikx qe kuʼxun (Salmo 110:3). Tuʼntzunju, qa in ximana tiʼj tuʼn tjaw aʼ twiʼya, il tiʼj tuʼn tok qeʼ tkʼuʼja tiʼj qa ax teya o kubʼ ximente. Mas nim toklen jlu qa testigos de Jehová qe ttata tej saj chʼiya.

¹² Tej saj chʼiya, olo tzʼok tqʼoʼna twitza tiʼj qa o jaw aʼ kywiʼ junjuntl xjal. Olo jaw aʼ kywiʼ junjun tamiwa, qe ttzika moqa qe titzʼina. Noqtzun tuʼnj, il tiʼj tuʼn tok t-xqʼuqin tibʼa. Mintiʼ tuʼn tkubʼ t-ximana qa il tiʼj tuʼn tjaw aʼ twiʼya noq tuʼnju ya ma chʼiya moqa noq tuʼnju o jaw aʼ kywiʼ txqantl. ¿Tiʼ jaku tzʼonin tiʼja tuʼn tten t-ximbʼetza ik tzeʼn te Jehová t-xim at tiʼj aju tuʼn tjaw aʼ qwiʼ? Bʼaʼn tuʼn tel tpaʼna ambʼil tuʼn t-ximana tiʼj tiquʼn  nim toklen aju tuʼn tjaw aʼ twiʼya. Tojju xnaqʼtzbʼil lu ex toj juntl, kʼelel tnikʼa tiʼj nim tiquʼn.

13. ¿Alkye tten jaku tzʼel tnikʼa tiʼj qa ax tok taja tuʼn tjaw aʼ twiʼya?

¹³ ¿Alkye tten jaku tzʼel tnikʼa tiʼj qa tuʼnju kʼujlaʼn Jehová tuʼna taja tuʼn tjaw aʼ twiʼya? Jun tten aju qa ma ximana kyiʼj tnaʼj Diosa. Xjelinkuya jlu: «¿Nimpe maj in che naʼne Dios te Jehová moqa nya nim maj? ¿In xi nqʼamaʼne te Jehová alkyexix wajbʼile moqa noq alkyexku tiʼchaq in xi nqʼamaʼne te?». A jlu kʼonil tiʼja tuʼn tel tnikʼa tiʼj qa o tzʼoka te jun tbʼanel tamiw Dios (Salmo 25:4). Nim maj in che tzaj ttzaqʼweʼn Jehová qnaʼj Dios tukʼil tonbʼil Tyol. Aju juntl tiʼ jaku tzʼonin tiʼja tuʼn tel tnikʼa tiʼj qa taja tuʼn tjaw aʼ twiʼya tuʼnju kʼujlaʼn Jehová tuʼna, aju qa ma ximana tiʼj t-xnaqʼtzbʼila tiʼj Tyol Dios (Josué 1:8). Xjelinkuya jlu: «¿Naqʼli qiʼne tuʼn nxnaqʼtzane tiʼj Tyol Dios tkyaqil seman? ¿Ngane tuʼn ntene toj ambʼil in xi qqʼoʼne te Jehová kyukʼil toj njaye?». Aqeju xjel lu, che onil tiʼja tuʼn tel tnikʼa qa axix tok kʼujlaʼn Jehová tuʼna ex tuʼntzunju taja tuʼn tjaw aʼ twiʼya, moqa toj juntl yol, kʼelel tnikʼa tiʼj tiquʼn ma kubʼ t-ximana qa taja tuʼn toka te tamiw Jehová ex tuʼn tajbʼena te tuʼn tkyaqil tkʼuʼja.

14. ¿Tiʼ t-xilen aju tuʼn t-xi tqʼamaʼna te Jehová tuʼn tajbʼen te ex aju tuʼn tjaw aʼ twiʼya?

¹⁴ Ateʼ junjun kuʼxun in kyqʼamaʼn qa o txi kyqʼamaʼn te Jehová tuʼn kyajbʼen te, noqtzun tuʼnj, naʼmx tbʼant kyten tuʼn tjaw aʼ kywiʼ. Mlay bʼaj jlu. Aqeju kuʼxun lu, mintiʼ in nel kynikʼ tiʼj tiʼ t-xilen aju tuʼn t-xi kyqʼamaʼn te Jehová tuʼn kyajbʼen te ex aju tuʼn tjaw aʼ kywiʼ. Aj t-xi tqʼamaʼna te Jehová tuʼn tajbʼena te, a jlu in yolin tiʼj qa in bʼant jun naʼj Dios tuʼna jatumel in xi tqʼamaʼna te Jehová qa kʼajbʼela te te jumajx. Ex yajxitl in jaw aʼ twiʼya tuʼntzun tel kynikʼ kykyaqil tiʼj qa o t-xi tqʼamaʼna te Jehová tuʼn tajbʼena te. Tuʼntzunju, naʼmxtoq tjaw aʼ twiʼya il tiʼj tuʼn tel tnikʼa tiʼj tiʼ t-xilen aju tuʼn t-xi tqʼamaʼna te Jehová tuʼn tajbʼena te.

15. ¿Tiquʼn nya jun saqchbʼil aju tuʼn t-xi tqʼamaʼna te Jehová tuʼn tajbʼena te?

¹⁵ Aj t-xi tqʼamaʼna te Jehová tuʼn tajbʼena te, in xi tqʼamaʼna te qa tojx qʼij aju in xi tqʼoʼna tchwinqlala te. Aj in xi tqʼamaʼna te Jehová tuʼn tajbʼena te, in xi ttziyena te qa aju mas nim toklen toj twitza aju tuʼn tajbʼena te toj tkyaqil ambʼil (kjawil uʼjit Mateo 16:24). Tuʼntzunju, nya jun saqchbʼil aju tuʼn t-xi tqʼamaʼna te Jehová tuʼn tajbʼena te (Mateo 5:33). ¿Alkye tten jaku kubʼ tyekʼuna qa ojtzqiʼn tuʼna qa o txi tqʼoʼna tchwinqlala te Jehová? (Romanos 14:8, TNM).

16, 17. a) Qʼamantza tukʼil jun techel qa ya nya aya tajaw tchwinqlala. b) Aj t-xi tqʼamaʼn jun xjal te Jehová tuʼn tajbʼen te, ¿tiʼ in xi tqʼamaʼn te?

¹⁶ ¿Alkye tten jaku kubʼ tyekʼuna qa nya aya tajaw tchwinqlala? Ximana tiʼj techel lu. Noqwit at jun tamiwa ma tzaj toyin jun tkar teya ex in tzaj tqʼoʼn qe tuʼjil teya, ex in tzaj tqʼamaʼn qa aya tajaw tkar jaʼlo. Noqtzun tuʼnj, ax ikx in tzaj tqʼamaʼn teya qa ax kyjel qʼinte tllave tkar ex oʼkx te kyukil tiʼj. ¿Jakupe txi tqʼamaʼna qa ax tok o tzaj tqʼoʼn tamiwa aju tkar teya? ¿Moqa ax te tajwil kar?

¹⁷ Aj t-xi tqʼamaʼn jun xjal tuʼn tajbʼen te Jehová, in xi tqʼamaʼn jlu te: «Teya aju  nchwinqlale». Ex at toklen Jehová tuʼn tyon tiʼj tuʼn tjapun tuʼn xjal aju o txi ttziyen te. Noqtzun tuʼnj, qa ma txi tzyet tuʼn tyolin xjal lu toj ewaj tukʼil juntl xjal nya testigo de Jehová. Moqa ma txi tzyet jun taqʼun aju mlay tzaj tqʼoʼn ambʼil te tuʼn tex pakbʼal moqa tuʼn t-xiʼ kyoj chmabʼil. Tuʼn jlu, in kubʼ tyekʼun qa mintiʼ in japun twiʼ tyol xi ttziyen te Dios. Ik tten ik tzeʼn aju amiw in kyaj tiʼn tllave tkar. Tuʼntzunju, qa ma txi tqʼamaʼna te Jehová qa ate tajaw tchwinqlala, tkyaqil maj kbʼel tbʼinchaʼna aju tajbʼil Jehová maske at maj, nya a teya tajbʼil. Bʼaʼn tuʼn tel qkanoʼn tiʼj Jesús tej tqʼama jlu: «Ma chin kuʼtze tuj kyaʼj, mya tuʼn nbʼinchanteye aju wajbʼile, noq oʼkx tuʼn nbʼinchanteye aju tajbʼil ju tzaj samante weye» (Juan 6:38).

18, 19. a) ¿Tiʼ in tzaj kyqʼamaʼn Rose ex Christopher tiʼjju tej tjaw aʼ kywiʼ? b) ¿Tiʼ teya t-xim at tiʼjju tuʼn tjaw aʼ qwiʼ?

¹⁸ Tuʼn jlu in nel qnikʼ tiʼj qa nya jun saqchbʼil aju tuʼn tjaw aʼ qwiʼ. Aju tuʼn t-xi qqʼamaʼn te Jehová tuʼn qajbʼen te ex aju tuʼn tjaw aʼ qwiʼ jun tbʼanel qoklen. Qa kʼujlaʼn Jehová tuʼna ex in nel tnikʼa tiʼj aju tuʼn t-xi tqʼoʼn tchwinqlala te, kʼokel qeʼ tkʼuʼja tiʼj tuʼn tjaw aʼ twiʼya. Ex mlay tzaj tbʼisa qa ma bʼant jlu tuʼna. Jun txin aju Rose tbʼi tqʼama jlu: «Kʼujlaʼnxix Jehová wuʼne, ex mintiʼ juntl tiʼ in tzaj qʼonte mas tzalajbʼil weye twitzju tuʼn wajbʼene te. Tej tkubʼ nximane tuʼn tjaw aʼ nwiʼye, qʼuqlitoq nkʼuʼje tiʼj qa atzun mas tbʼanel jakutoq bʼant wuʼne».

¹⁹ Toj tnejel taqikʼ ma qo yolin tiʼj jun kuʼxun aju Christopher tbʼi. Jaw aʼ twiʼ tej qʼiʼntoq 12 abʼqʼi tuʼn. ¿Tiʼ in tnaʼn tuʼnju jaw aʼ twiʼ? In tzaj tqʼamaʼn qa in tzalajxix. Tej qʼiʼntoq 17 abʼqʼi tuʼn ok te precursor regular, ex tej qʼiʼntoq 18 abʼqʼi tuʼn ok te onil kye ansyan. Atzun toj ambʼil jaʼlo in najbʼen toj Betel. In tzaj tqʼamaʼn jlu: «Jaw njyoʼne aju mas bʼaʼn tej tjaw aʼ nwiʼye. Nimxix in chin tzalaje tuʼnju in chin aqʼunane te Jehová ex te ttnam». ¿Yajtzun teya? ¿In ximana tiʼj tuʼn tjaw aʼ twiʼya? Qa ikju, ¿alkye tten jaku kubʼ tbʼinchaʼna ttena? Toj juntl xnaqʼtzbʼil che xel tzaqʼwet qeju xjel lu.