1. ¿Tiʼ kukx o ten atxix tej ttzaj qe tkyaqilju o bʼaj bʼinchaʼn?

ATXIX tej ttzaj qe tkyaqilju o bʼaj bʼinchaʼn, kukx o ten mujbʼabʼil. Kukx o che aqʼunan Jehová junx tukʼil Jesús. Aju tnejel tbʼinchbʼen Jehová, a Jesús. Yajxitl, aqʼunan Jesús ttxlaj Jehová ik tzeʼn jun tbʼanel aqʼunal «tuʼn tkubʼ ximet alkye tuʼn tbʼant» (Proverbios 8:30). Chʼixmi ax jlu in bʼant kyuʼn tmajen Jehová, in che aqʼunan junx tuʼntzun tbʼant junjun aqʼuntl kyuʼn aju o tzaj tqʼoʼn Jehová kye. Jun techel, aqʼunan Noé junx kyukʼil qe toj tja tuʼntzun tbʼant ark kyuʼn. Tej tikʼtl mas abʼqʼi, e aqʼunan aj Israel junx tuʼntzun tkubʼ kybʼinchaʼn ja xbʼalun, tuʼn tkubʼ xitit ex tuʼn t-xi iqʼet toj jun ex toj juntl lugar aj in che bʼettoq toj tzqij txʼotxʼ. Tej bʼant tja Dios, e bʼitzen ex e chimbʼan junx kyiʼj tbʼanel bʼitz tuʼntzun tjaw kynimsaʼn Jehová. O bʼant tkyaqil jlu kyuʼn tmajen Jehová tuʼnju kukx o ten mujbʼabʼil kyxol ex o che aqʼunan junx (Génesis 6:14-16, 22; Números 4:4-32; 1 Crónicas 25:1-8).

2. a) ¿Tiʼ in netz qwitz kyiʼj tnejel okslal? b) ¿Tiʼ qo xnaqʼtzal tiʼj toj xnaqʼtzbʼil lu?

 ² In netz qwitz tiʼj qa ax ikx kye tnejel okslal e aqʼunan junx. Tqʼama apóstol Pablo qa junxichaq tbʼanel tiʼchaq in bʼanttoq kyuʼn okslal ex xi qʼoʼn junxichaq kyaqʼun, noqtzun tuʼnj, attoq mujbʼabʼil kyxol tuʼnju kykyaqil e ok lepeʼ tiʼj Jesús. Ok tmojbʼan Pablo kye ik tzeʼn qxmilal aju nimku tok tiʼj ex in che aqʼunan junx (kjawil uʼjit 1 Corintios 12:4-6, 12). ¿Yajtzun qe? ¿Alkye tten kukx jaku ten mujbʼabʼil qxol ex tuʼn qaqʼunan junx toj pakbʼabʼil, kyxol qerman ex kyukʼil qe toj qja? Qo xnaqʼtzal tiʼj toj xnaqʼtzbʼil lu.

3. ¿Tiʼ ok tqʼoʼn apóstol Juan twitz tiʼj toj jun witzikʼ?

³ Jun maj, bʼant tuʼn Jehová tuʼn tok tqʼoʼn apóstol Juan twitz kyiʼj wuq anjel in che chimbʼantoq kyiʼj chun. Tej tok tqʼajtzan tjweʼyin anjel chun, ok tqʼoʼn twitz Juan tiʼj qa «tzaj tzʼaq jun cheʼw twitz kyaʼj kubʼil twitz txʼotxʼ». Aju «cheʼw» lu, ajbʼen jun tal ja tuʼn, «tuʼn tjaqet ttzi jul jalo ponin t-xeʼ». Ex etztzun nim sibʼ toj jul lu. Ex toj sibʼ lu i etz nim ẍplon toj, aju ik che keʼyin ik tzeʼn qe txil. Noqtzun tuʼnj, mintiʼ e ok ten qeju ẍplon lu kyiʼj tzeʼ nix kyiʼj awal sino atz e ok ten kyiʼj xjal, aʼyeju «mintiʼ t-sey Dios tok tibʼaj kywitz» (Apocalipsis 9:1-4). Ojtzqiʼntoq tuʼn Juan qa jakutoq tzʼok kybʼinchaʼn ẍplon nim nya bʼaʼn, ik tzeʼn bʼant kyuʼn toj tnam Egipto tej tanqʼin Moisés (Éxodo 10:12-15). Aqeju ẍplon ok tqʼoʼn Juan twitz tiʼj, in nok qʼoʼn te kyechel qeju okslal o che jaw skʼoʼn, aqeju o txi kypakbʼaʼn jun tqanil kyuwxix kyiʼj okslabʼil nya ax tok. Ex ateʼ nim millón xjal in che yon tuʼn kyanqʼin tzalu twitz Txʼotxʼ, in che onin kyiʼj skʼoʼn maj toj pakbʼabʼil. Kykyaqilx in che aqʼunan junx toj pakbʼabʼil aju o tzʼonin kyiʼj nim xjal tuʼn kyetz klet kyoj okslabʼil nya ax tok ex tjaqʼ tkawbʼil Satanás.

4. a) ¿Alkye aqʼuntl il tiʼj tuʼn tbʼant kyuʼn okslal? b) ¿Tiʼ il tiʼj tuʼn tten qxol tuʼntzun tbʼant aqʼuntl lu quʼn?

⁴ O tzaj tqʼoʼn Jehová jun matij aqʼuntl qe. Il tiʼj tuʼn t-xi qpakbʼaʼn tbʼanel tqanil tiʼj Kawbʼil kye kykyaqil xjal naʼmxtoq tul xitbʼil (Mateo 24:14; 28:19, 20). Il tiʼj tuʼn t-xi qqʼoʼn txokbʼil kyiʼj qeju at kʼaj kyiʼj tuʼn kytzaj kʼal tiʼjju «aʼ te chwinqlal». Toj juntl yol, il tiʼj tuʼn t-xi qxnaqʼtzaʼn aju axix tok tiʼj Tyol Dios kye qeju kyaj tuʼn tel kynikʼ tiʼj (Apocalipsis 22:17). Qa qajbʼil tuʼn tbʼant aqʼuntl quʼn, il tiʼj tuʼn tten mujbʼabʼil qxol ex tuʼn qaqʼunan junx kyukʼil qerman (Efesios 4:16).

5, 6. ¿Tiʼ yekʼbʼil at tiʼj qa at mujbʼabʼil qxol toj pakbʼabʼil?

⁵ Tuʼn tok tilel quʼn tuʼn t-xi qpakbʼaʼn tbʼanel tqanil kye nimku xjal, il tiʼj tuʼn tbʼaj qnukʼunxix qten. Aju jaku tzʼonin qiʼj tuʼn tbʼant jlu quʼn, aʼyeju onbʼil in che tzaj qʼamaʼn jatumel in nok qchmon qibʼ, ik tzeʼn qeju in che etz qʼamaʼn kyoj chmabʼil tuʼn  qex pakbʼal. Tuʼn qe onbʼil lu, jaku txi qpakbʼaʼn tbʼanel tqanil tiʼj Kawbʼil kye kykyaqil xjal ex jaku txi qsipin nim millón uʼj aʼyeju in che jatz toj Tyol Dios. Nya oʼkxju, at maj in tzaj qʼamaʼn qe tuʼn qpakbʼanxix kyoj ambʼil nim kyoklen aj t-xi qsipin qe uʼj. Aj tbʼant jlu quʼn, in qo aqʼunan junx kyukʼil nim millón erman aʼyeju in che pakbʼan tiʼj axju tqanil kye kykyaqil xjal. Ex in qo aqʼunan junx kyukʼil anjel tuʼnju ax ikx kye in che onin qiʼj tuʼn qpakbʼan (Apocalipsis 14:6).

⁶ Ax tok, nimxix in qo jaw tzalaj aj tjaw quʼjin tqanil tiʼj pakbʼabʼil in che etz tkyaqil abʼqʼi toj uʼj Anuario. Ax ikx in nonin nimaq chmabʼil te oxe qʼij tuʼn tten mujbʼabʼil qxolx. Naʼmxtoq kyxi tzyet nimaq chmabʼil, qkyaqilx junx in xi qqʼoʼn txokbʼil kye xjal tuʼn kypon toj. Ex aj tok nimaq chmabʼil, qkyaqil in nok qbʼiʼn axju xnaqʼtzbʼil. Aqeju chikʼbʼabʼil, qeju yekʼbʼil ex qeju txʼolbʼabʼil tiʼj Tyol Dios, in qo tzaj kyonin tuʼn t-xi qqʼoʼn aju mas tbʼanel jaku bʼant quʼn te Jehová. Aju juntl tiʼ in nonin qiʼj tuʼn tten mujbʼabʼil qxolx, aju Nabʼitz Tkyimlen Jesucristo, aju in kubʼ qikʼsaʼn toj qʼij 14 te nisán (1 Corintios 11:23-26). Kyoj nim seman naʼmxtoq tkubʼ ikʼset, qkyaqilx in qo ex qʼol txokbʼil kye kykyaqil xjal tuʼn kypon toj chmabʼil lu aju nim toklen. Ex yajxitl, qkyaqilx in nok qchmon qibʼ axju qʼij aj tkux bʼaj Qʼij. Iktzun tten in xi qbʼiʼn aju kawbʼil tqʼama Jesús ex in kubʼ qyekʼun qa in xi qqʼoʼn chjonte te Jehová tiʼjju bʼant tuʼn qiʼj.

7. ¿Tiʼ in bʼant quʼn tuʼnju at mujbʼabʼil qxol ex in qo aqʼunan junx?

⁷ Mlay bʼant nim tuʼn junx ẍplon. Ax ikx qe, mlay bʼant tuʼn t-xi qpakbʼaʼn Tyol Dios qjunalx kye kykyaqil xjal. Noqtzun tuʼnj, in qo aqʼunan junx ik tzeʼn qe ẍplon. Tuʼn jlu in qo pon kyukʼil nim millón xjal tuʼn qyolin tiʼj Jehová kyukʼil ex tuʼn qonin kyiʼj tuʼn kykʼulin te ex tuʼn tjaw kynimsaʼn.

8, 9. a) ¿Alkye techel ajbʼen tuʼn Pablo tuʼn t-xi tchikʼbʼaʼn tiquʼn nim toklen tuʼn tten mujbʼabʼil qxol? b) ¿Tiʼ jaku bʼant quʼn tuʼn kukx tten mujbʼabʼil kyxol qerman?

⁸ Xi tchikʼbʼaʼn Pablo kye okslal te Éfeso alkye tten nukʼun kyten ex xi tqʼamaʼn nabʼil lu kye: «Qo chʼiy tuj tkyaqil» tiʼchaq (kjawil uʼjit Efesios 4:15, 16). Ajbʼen qxmilal tuʼn Pablo tuʼntzun t-xi tchikʼbʼaʼn qa qkyaqilx jaku qo onin kyxol qerman tuʼn tten mujbʼabʼil qxol ex tuʼn qok lepeʼ tiʼj Jesús, aju wibʼaj tiʼj xmilal lu. Tqʼama Pablo qa toj jun qxmilal, junx in che aqʼunan tkyaqilju tok tiʼj noq tuʼnju kyyaqamil qbʼaqil. Tuʼntzunju, qa kuʼxun qoʼ moqa nya, qa mintiʼxix yabʼil qiʼj ex qa at, ¿tiʼ jaku bʼant quʼn tuʼntzun tten mujbʼabʼil qxol kyukʼil qerman?

⁹ O txi tqʼoʼn Jesús kyoklen ansyan tuʼn kykubʼ nej kywitz erman. Ex taj Jesús tuʼn qnimen kye ex tuʼn t-xi qbʼiʼn qeju kawbʼil in  tzaj kyqʼoʼn qe (Hebreos 13:7, 17). Ax tok, at maj kwest tuʼn tbʼant jlu quʼn. Noqtzun tuʼnj, qa ma txi qqanin onbʼil te Jehová, tzul tqʼoʼn xewbʼaj xjan qe ex qo tzajel tonin tuʼn tbʼant qbʼin. Qa mintiʼ in jaw qnimsan qibʼ ex in qo aqʼunan junx kyukʼil qe ansyan, jaku qo ajbʼen nim kyxol qerman. Qkyaqilx qo tel toj mujbʼabʼil ex mas kʼokel qkʼujlan qibʼ junjun qʼij.

10. ¿Alkye tten in nonin kyaqʼun onil kye ansyan tuʼn kukx tten mujbʼabʼil kyxol erman? (Qʼonka twitza tiʼj tnejel tilbʼilal).

¹⁰ Ax ikx in che onin qeju onil kye ansyan tuʼn kukx tten mujbʼabʼil kyxol erman. In nok tilel kyuʼn tuʼn kyonin kyiʼj ansyan ex in xi qqʼoʼn chjonte tuʼnju onbʼil in xi kyqʼoʼn. Jun techel, in nokxix kyqʼoʼn kywitz tiʼj qa at nim uʼj tuʼn kyajbʼen quʼn toj pakbʼabʼil. Nya oʼkxju, ax ikx in xi kyqʼoʼn bʼaʼn kyulene kye xjal in che pon toj Ja te Chmabʼil. Ex in che aqʼunan tuʼn tbʼaj bʼinchet chʼintl Ja te Chmabʼil ex tuʼn tbʼaj saqet. Aj qonin kyiʼj onil kye ansyan, in qo onin tuʼn tten mujbʼabʼil kyxol qerman ex tuʼn qajbʼen te Jehová toj ttxolil (chʼixmi ax ximbʼetz lu kkanetel tuʼna toj Hechos 6:3-6).

11. ¿Alkye tten jaku che onin kuʼxun tuʼn kukx tten mujbʼabʼil kyxol erman?

¹¹ Ateʼ junjun ansyan nim o che aqʼunan kyoj nim abʼqʼi kyxol erman. Noqtzun tuʼnj, malo che tijen ex ya mlaylo bʼant nim kyuʼn ik tzeʼn ojtxi. Atzun kye kuʼxun jaku bʼant nim aqʼuntl kyuʼn. Qa ma chex xnaqʼtzet kyuʼn erman ma che tijen, jaku bʼant mas aqʼuntl kyuʼn. Ex aqeju onil kye ansyan, qa ma tzʼok tilel kyuʼn tuʼn tbʼant tbʼanel aqʼuntl kyuʼn, jaku che ok te ansyan aj tbʼet ambʼil (1 Timoteo 3:1, 10). Ateʼ junjun kuʼxun o che ok te ansyan ex o che chʼiyxix toj kyokslabʼil, toj ambʼil jaʼlo in che ajbʼen te ansyan in che bʼet kyojele Ja te Chmabʼil ex in che onin kyiʼj nim erman kyxol nim kʼloj okslal. Qkyaqilx in xi qqʼoʼn chjonte tuʼnju ateʼ nim kuʼxun kyaj tuʼn kyajbʼen kye txqantl (kjawil uʼjit Salmo 110:3 ex Eclesiastés 12:1).

12, 13. ¿Tiʼ jaku bʼant kyuʼn ja xjal tuʼn tten mujbʼabʼil kyxol?

¹² ¿Tiʼ jaku bʼant kyuʼn ja xjal tuʼn tten mujbʼabʼil kyxol? Nim toklen tuʼn kukx tkubʼ kyikʼsaʼn tkyaqil seman aju ambʼil in xi kyqʼoʼn te Jehová. Qa ma tzʼel kypaʼn mambʼaj ex kʼwaʼlbʼaj ambʼil tuʼn kyten junx tuʼn kyxnaqʼtzan tiʼj Jehová, mas kʼokel kykʼujlan kyibʼ. Jun techel, jaku kubʼ kyxnaqʼtzaʼn aju kxel kyqʼamaʼn toj pakbʼabʼil. A jlu kʼonil kyiʼj tuʼn tbʼajxix kybʼinchaʼn kyten. Aj tok kybʼiʼn jun ja xjal qa in che yolin qe toj kyja tiʼj Jehová ex in nok kyqʼoʼn kywitz tiʼj qa kʼujlaʼn kyuʼn, ex qa kyajbʼil tuʼn ttzalaj Jehová kyuʼn, kykyaqilx in kubʼ kynaʼn qa at mujbʼabʼil kyxol.

¹³ ¿Tiʼ jaku bʼant tuʼn chmilbʼaj ex xuʼjilbʼaj ex tuʼn kukx tten mujbʼabʼil kyxol? (Mateo 19:6). Qa kykabʼil kʼujlaʼn Jehová kyuʼn ex junx in che ajbʼen te, tuʼn jlu mas kyuw ktel kymejebʼleʼn ex mas che tzalajel. Nim toklen tuʼn tok kykʼujlan kyibʼ ex tuʼn tajbʼen tbʼanel yol kyuʼn kyxolx, ik tzeʼn te Abrahán ex Sara, Isaac ex Rebeca, ex Elqaná tukʼil Ana (Génesis 26:8; 1 Samuel 1:5, 8; 1 Pedro 3:5, 6). Iktzun tten kukx che tel junx ex che okel te tbʼanel tamiw Jehová (kjawil uʼjit Eclesiastés 4:12).

14. Qa mintiʼ in najbʼen tchmila moqa t-xuʼjil te Jehová, ¿tiʼ jaku bʼant tuʼna tuʼn kukx tchʼiy kʼujlabʼil toj tmejebʼleʼna?

 ¹⁴ In tzajxix tyekʼun Tyol Dios qa mintiʼ tuʼn qkubʼ mojeʼ tukʼil jun xjal mintiʼ in najbʼen te Jehová (2 Corintios 6:14). Maske ikju, ateʼ junjun erman o che kubʼ mojeʼ tukʼil jun xjal nya testigo de Jehová. ¿Tiquʼn? Tuʼnju ateʼ junjun ya otoq che kubʼ mojeʼ tej kyok te testigo de Jehová ex mintiʼ ten tajbʼil kychmil moqa kyxuʼjil tuʼn kyok te okslal. Moqa e kubʼlo mojeʼ tukʼil jun testigo de Jehová ex yajxitl, kyaj tkolin ttnam Jehová. Qa a jlu in bʼaj qiʼj, ¿tiʼ jaku bʼant quʼn tuʼntzun kukx tchʼiy kʼujlabʼil toj qmejebʼleʼn? Bʼaʼn tuʼn t-xi qbʼiʼn qe nabʼil tkuʼx toj Tyol Dios, maske kwest tuʼn tbʼant. Qbʼinx aju techel at tuʼn Mary tukʼil tchmil aju David tbʼi. Tnejel, kykabʼil testigos de Jehová qe. Noqtzun tuʼnj, pon jun qʼij ya mintiʼ xi David kyoj chmabʼil. Ok tilel tuʼn Mary tuʼn tok te jun tbʼanel xuʼjilbʼaj ex kubʼ tyekʼun tbʼanel tmod. Xi tqʼoʼn xnaqʼtzbʼil tiʼj Jehová kye qeju qaq tal ex tkyaqil maj xiʼ kyoj chmabʼil ex kyoj nimaq chmabʼil. Tej tbʼet ambʼil e chʼiy qeju tal ex i eʼx toj kyex kyja. Kukx ajbʼen Mary te Jehová maske kwest ela te tuʼnju kyaj ten tjunalx. In kyajtoq tqʼoʼn qe uʼj toj ja tuʼntzun tok tqʼoʼn tchmil twitz kyiʼj. Jun qʼij, ok ten tchmil uʼjil kyiʼj. Tej tikʼtl ambʼil xi tzyet tuʼn tbʼet tchmil kyoj junjun chmabʼil. Attoq jun tal kychman te qaq abʼqʼi ex in neltoq tpaʼn jun tqʼuqbʼil tchman. Aj mintiʼ in pon David kyoj chmabʼil in xitoq tqʼamaʼn tal tchman te qa otoq bʼisun tiʼj tuʼnju mintiʼ otoq pon toj chmabʼil. Otoqxi tzikʼ 25 abʼqʼi, tzyet tajbʼen David juntl maj te Jehová. Jaʼlo, junx in che ajbʼen tukʼil t-xuʼjil te Jehová juntl maj ex nim in che tzalaj.

15. ¿Alkye tten jaku che onin mejebʼleʼn ma che tijen kyiʼj mejebʼleʼn kuʼxun?

¹⁵ Taj Satanás tuʼn ttzaj nya bʼaʼn tiʼj jun ja xjal. Tuʼntzunju, aqeju mejebʼleʼn in che ajbʼen te Jehová, il tiʼj tuʼn kukx tten mujbʼabʼil kyxol. Noq jniʼxku ambʼil kykubʼlen mojeʼ, il tiʼj tuʼn tbʼaj kyximen tiʼ jaku bʼant ex tiʼ yol kʼajbʼel kyuʼn tuʼntzun tten mas  kyuw kymejebʼleʼn. Aqeju mejebʼleʼn ma che tijen jaku kubʼ kyqʼoʼn jun tbʼanel techel kywitz qeju mas kuʼxun. Jakulo txi kytxkoʼn junjun maj jun mejebʼleʼn kuʼxun tojju ambʼil in xi kyqʼoʼn te Jehová. Iktzun tten kʼokel kyqʼoʼn kywitz mejebʼleʼn kuʼxun tiʼj qa maske ma tzikʼ nim ambʼil toj kymejebʼleʼn, il tiʼj tuʼn kukx tten mujbʼabʼil kyxol ex tuʼn kyajbʼen yol tukʼil kʼujlabʼil kyuʼn toj kymejebʼleʼn (Tito 2:3-7).

16, 17. Qa kukx ma ten mujbʼabʼil qxol, ¿tiʼ kʼokel qqʼoʼn qwitz tiʼj?

¹⁶ Tej in chextoq aj Israel toj Jerusalén tuʼn tkubʼ kyikʼsaʼn kyninqʼij, kykyaqilx e aqʼunan junx. Bʼaj kybʼinchaʼn aju kʼajbʼeltoq kye ex yajxitl in bʼajtoq kyonin kyibʼ akux in che bʼet. Tej in che pontoq toj tja Dios, in che kʼuluntoq te Jehová ex kykyaqilx junx in jawtoq kynimsaʼn (Lucas 2:41-44). Ax ikx qe in bʼaj qbʼinchaʼn qten tuʼn qanqʼin toj akʼaj twitz Txʼotxʼ. Tuʼntzunju, ax ikx qe nim toklen tuʼn kukx tten mujbʼabʼil qxolx ex tuʼn kukx qaqʼunan junx. ¿Atpe junjuntl tiʼ in nul toj qwiʼ tuʼntzun qonin mas kyukʼil qe qerman?

¹⁷ Mintiʼ mujbʼabʼil at kyxol xjal ex in che qʼojin tiʼj alkyexku tiʼchaq. Atzun qe, noq tuʼn tonbʼil Jehová, at mujbʼabʼil qxol ex in nel qnikʼ tiʼj xnaqʼtzbʼil tkuʼx toj Tyol. In xi qqʼoʼn nim chjonte te Jehová tuʼn jlu. Toj tkyaqil twitz Txʼotxʼ, in qo ajbʼen te Jehová ik tzeʼn tajbʼil. Nya oʼkxju, kyoj qeju bʼajsbʼil tqʼijlalil jaʼlo mas at mujbʼabʼil qxol. Ik tzeʼn kyaj kyqʼamaʼn t-sanjel Dios aju Isaías ex Miqueas, qkyaqilx junx in «qo jax twiʼ ju witz etzan tuʼn» Jehová (Isaías 2:2-4; kjawil uʼjit Miqueas 4:2-4). Qa kukx ma ten mujbʼabʼil qxolx, tzul qkʼamoʼn nim kʼiwlabʼil. Toj chʼintl ambʼil kʼokel qqʼoʼn qwitz tiʼj aj qkʼulin junx qkyaqilx te Jehová tzalu twitz Txʼotxʼ.