¿Tiʼ xnaqʼtzbʼil jaku tzʼel qiʼn kyiʼj txkup?

«Qaninxa kye txkup ex qa kye chyuʼj; jaku tzaj xnaqʼtzaʼna kyuʼn. Ax ikx te txʼotxʼ ex qe kyiẍ ateʼ tuj mar, bʼaʼn t-xi tqanina kye tuʼn ttzaj xnaqʼtzaʼna kyuʼn» (Job 12:7, 8).

MA TZIKʼ junjun abʼqʼi in nel kykanoʼn científico ex ingeniero kyiʼj tzeʼ ex txkup aj tbʼant junjun tiʼchaq. Tuʼn tel kynikʼ tiʼj jlu, in che xnaqʼtzan tiʼj tzeʼn in che yukch qe tiʼchaq at kyanqʼibʼil ex in nok qʼoʼn tbʼi xnaqʼtzbʼil lu te biomimética. In che xnaqʼtzan tiʼj jlu tuʼntzun kybʼant akʼaj máquina kyuʼn ex junjun tiʼchaq, ex tuʼn kyok tiʼchaq ya ateʼ te mas tbʼanel. Aj qxnaqʼtzan kyiʼj junjun txkup toj xnaqʼtzbʼil lu, bʼaʼn tuʼn tkubʼ t-xjelina jlu: ¿Alkye at toklen tuʼn tjaw nimset kyiʼj kykyaqil tiʼchaq in nok qkeʼyin?

Qeju t-aleta ballena jorobada

¿Tiʼ xnaqʼtzbʼil in nel kykanoʼn xjal in che bʼinchan kyiʼj avión aj tok kyqʼoʼn kywitz tiʼj ballena jorobada? Nimlo xnaqʼtzbʼil in nel kykanoʼn kyiʼj. Qa matij jun ballena, bʼalo 30 tonelada talil, chʼixme ik tzeʼn talil jun matij camión nojni tuʼn iqtz. Ex bʼalo jun 12 metro tqʼelil ex nya suave t-xmilal. Matij qe tqʼabʼ ik tzeʼn qe t-aleta jun avión. Jun rat in bʼant junjun tiʼchaq tuʼn jun ballena jorobada. Jun techel, aj in waʼn, in nokx tqʼon tibʼ jatumel ateʼ nim pescad ex in xi tzyet tnadarin jawni ex in kyaj tqʼoʼn qe burbuja toj aʼ. Nya matij qe burbuja in che kyaj tqʼoʼn ballena, bʼalo jun metro y medio tqan in kyaj tqʼoʼn, pero tuʼn jlu in nok kychmon kyibʼ txqantl pescad. Aj tok tkeʼyin ballena jlu, in xi tzoqpaj kyibʼaj ex in chex tchyoʼn.

Aju mas in che jaw labʼin científico tiʼj, aju tzeʼn in qʼoʼn jun ballena welt ex nya suave t-xmilal. Yajxitl, el kynikʼ tiʼj qa in che qʼoʼn welt tuʼnju alkye tten bʼinchaʼn ky-aleta. Nya liso ttxaʼn ky-aleta ballena ik tzeʼn t-aleta jun avión, sino ik keʼyin ik tzeʼn jun serruch.

Aj in xi tyukin tibʼ ballena tjaqʼ aʼ, kyuʼn qe tiʼchaq tok tiʼj t-aleta, mas in jaw tibʼaj aʼ ex tuʼn jlu mas chebʼe in qʼon welt. ¿Alkye tten in bʼant jlu tuʼn? In tzaj tqʼamaʼn revista Natural History qa jun rat in nikʼ aʼ tibʼaj t-aleta ballena jorobada aj tyukch tuʼnju nya liso, axpe ikx aj tqʼoʼn welt toj aʼ. Noqwit liso qeju plaj t-aleta jun ballena, mlaylo bʼaj tbʼalqʼin tibʼ t-xmilal tuʼnju jaku bʼaj tchmon tibʼ aʼ tiʼjxi t-aleta ex mlay ten tipumal tuʼn tjaw weʼ toj aʼ.

¿Tiʼ jaku tzʼel kykanoʼn xjal tiʼj jlu? Noqwit ik ky-aleta avión ik tzeʼn ky-aleta ballena lu, nyalo il tiʼj tuʼn tok kyqʼoʼn nim kʼuxbʼil tiʼj tuʼntzun kybʼet naj toj kyqʼiqʼ. Nya oʼkxju, ax ikx jaku tzʼonin tuʼn miʼn ttzaj nya bʼaʼn kyiʼj xjal ex mas nya kwest tuʼn kyok xqʼuqit. In kubʼ t-ximen John Long, aju in xnaqʼtzan tiʼj biomecánica, «qa tojlo chʼintl ambʼil kʼokel qʼoʼn ky-aleta avión ik tzeʼn ky-aleta ballena jorobada».

Qeju t-xikʼ gaviota

Qʼanchaʼl qa atz in nel kykanoʼn ingeniero ky-aleta avión tiʼj kyxikʼ chyuʼj. Pero kyoj abʼqʼi o che ikʼ, mas tbʼanel chʼintl aqʼuntl o bʼant kyuʼn. Tzaj tqʼamaʼn revista New Scientist jlu: «O kubʼ kybʼinchaʼn xjal in che xnaqʼtzan toj Universidad te Florida jun avión in kyaj weʼ tjunalx toj kyqʼiqʼ, in sutin toj kyqʼiqʼ ex jun rat in xi ttzyuʼn tbʼe ik tzeʼn in bʼant kyuʼn gaviota».

Aj in che lipen gaviota toj kyqʼiqʼ, in yukch tkyaqil kyxikʼ. In tzaj tqʼamaʼn uʼj New Scientist tiʼ in bʼant kyuʼn xjal tuʼn tel kycopiarin aju in bʼant kyuʼn gaviota. «Tiʼj jun tal avioneta te 60 centímetro t-aleta, in najbʼen jun motor kyuʼn ex in nok kyqʼoʼn nim varillas tiʼj tuʼntzun tyukch qe t-aleta tal avioneta». Atzun jlu in nonin tiʼj jun avioneta tuʼn tkyaj ten toj kyqʼiqʼ ex jaku kubʼ kyxol matij edificio. Taj Fuerzas Aéreas te Estados Unidos tuʼn tkubʼ kybʼinchaʼn jun avioneta ik tzeʼn jlu tuʼnju in tzaj kyqʼamaʼn qa jaku che ajbʼen tuʼn kykanet armas químicas ex biológicas kyoj nimaq tnam.

Qeju tqan ẍul moqa xmatx

Ax ikx jaku tzʼel qiʼn nim xnaqʼtzbʼil kyiʼj txkup ateʼ twitz Txʼotxʼ. Jun techel, jaku bʼet ẍul twitz ja, tqul ja ex noq jaxku tumel. Atxix toj ambʼil ojtxe in che jaw labʼin xjal tiʼjju in bʼant kyuʼn (Proverbios 30:28). ¿Tiʼ in bʼant tuʼn tal txkup lu tuʼn miʼn tel jilj qe tqan?

Jaku che bʼet ẍul twitza ja, twitz vidrio moqa twitz alkyexku juntl tiʼ liso tiʼj, tuʼnju at jun tiʼ tokx tjaqʼ kyqan aju seda tbʼi ex in nonin kyiʼj tuʼn miʼn kyel jilj. Aj in bʼet ẍul, in nok tmojbʼan tibʼ seda kyukʼil tiʼchaq jatumel in kubʼ tqʼoʼn tqan ex tuʼn jlu mintiʼ in nel jilj. Aj tok tmojbʼan tibʼ seda kyukʼil tiʼchaq, in nok qʼoʼn tbʼi te Van der Waals ex nya kyuw in nok tmojbʼan tibʼ. Chʼixme in kubʼ naj tuʼn gravedad, tuʼn jlu in nel qnikʼ tiʼj tiquʼn mintiʼ in weʼ qqʼabʼ aj tok qqʼoʼn twitz ja. Kyuʼn seda tokx tjaqʼ tqan ẍul in ten tipumal tuʼn tkyaj ten twitz ja. Aj tok tmojbʼan tibʼ qe tqan ẍul kyukʼil tiʼchaq jatumel in bʼet, tuʼn jlu mintiʼ in kutz tzʼaq tjaqʼ talil.

¿Atpe tajbʼen aju o tzʼel kynikʼ xjal tiʼj? In kubʼ kyximen xjal tuʼn tkubʼ kybʼinchaʼn juntl tiʼ ik tzeʼn velcro, aju ax ikx el kykanoʼn xjal kyiʼj tiʼchaq at twitz txʼotxʼ. * Chi uʼj The Economist qa in tzaj tqʼamaʼn jun xjal in jyon tqanil qa nim jaku tzʼajbʼen jun cinta adhesiva kyuʼn doctor ik tzeʼn qe tqan ẍul jatumel mlayx tzʼajbʼen jun cinta adhesiva kyukʼil químico.

¿Alkye at toklen tuʼn tjaw nimsaʼn tiʼj tkyaqil jlu?

In naqʼunan NASA (Administración Nacional de Aeronáutica y del Espacio, de Estados Unidos) tuʼn tbʼant jun robot tuʼn. Aj tbʼant, kʼokel qʼoʼn wajxaq tqan ik tzeʼn jun escorpión. Ex o kubʼ kybʼinchaʼn junjun ingeniero te Finlandia jun tractor kyukʼil qaq tqan ex jaku tzikʼx kybʼaj matij abʼj ik tzeʼn in bʼant kyuʼn tal txkup. Atzun juntl kʼloj jyol tqanil o kubʼ kyximen tuʼn tkubʼ kybʼinchaʼn jun xbʼalun ik tzeʼn qe twitz tzaj, kyjunalx in nok kyjunin kyibʼ ex kyjunalx in che jaqet. Ax ikx in bʼinchan jun empresa tiʼj jun kar ik keʼyin ik tzeʼn pescad cofre, jun tal pez in bʼant nim tiʼchaq tuʼn. Ex in che xnaqʼtzan junjuntl científico kyiʼj concha de abulón tuʼntzun tkubʼ kybʼinchaʼn qe chaleco antibalas tuʼn kyok te mas kyuw ex te sasj.

At nim tiʼchaq jaku tzʼel kykanoʼn científico kyiʼj tiʼchaq at twitz Txʼotxʼ, axpe ikx, ya o txi kykʼuʼn nim mil tqanil tiʼj tuʼntzun tkubʼ kybʼinchaʼn junjun tiʼchaq. Qa at jun ingeniero taj tuʼn tok tbʼiʼn tqanil kyiʼj junjun tiʼchaq, jaku txi tjyoʼn kyoj tqanil o txi kykʼuʼn xjal tuʼntzun tkanet tumel tuʼn tzeʼn jaku kubʼ tbʼinchaʼn jun tiʼ. Atzun jlu tqʼama uʼj The Economist. Aj kyxi kʼuʼn tqanil, in nok qʼoʼn kybʼi te «patentes biológicas». Chʼixmi tkyaqil maj, aj t-xi kʼuʼn jun tqanil, in bʼant jlu tuʼn jun xjal moqa tuʼn jun kʼloj xjal ex in kux ttzʼibʼin twitz ley jun akʼaj tiʼ o bʼant kyuʼn moqa o tzʼel kynikʼ tiʼj. Tqʼamatl uʼj The Economist jlu: «Aj tok qʼoʼn kybʼi qeju tiʼchaq in nel kykanoʼn xjal kyiʼj tiʼchaq te twitz Txʼotxʼ te ‹patentes biológicas›, in tzaj kyqʼamaʼn científico qa tuʼn jlu in nok qʼet mas nim kyoklen qeju tiʼchaq ateʼ twitz Txʼotxʼ».

¿Jatumel tzaj kyiʼn tiʼchaq ateʼ twitz Txʼotxʼ qe tbʼanel nabʼil? In kubʼ kyximen xjal in che jyon tqanil qa tuʼn evolución o che bʼant tkyaqil tiʼchaq in che ok qkeʼyin ex qa o txi tiʼn nim ambʼil tuʼn kyok te tbʼanel. Atzun junjuntl científico, junxitl kyximbʼetz at tiʼj jlu. Kubʼ ttzʼibʼin Michael Behe, jun microbiólogo toj uʼj The New York Times te 2005 jlu: «Aj tok qkeʼyin tzeʼn bʼinchaʼn qe tiʼchaq, in nel qnikʼ tiʼj qa nya kyunx kyibʼ e bʼant. Toj juntl yol, qa in nok qkeʼyin jun txkup ik tzeʼn jun pato, in nadarin ex in noqʼ ik tzeʼn jun pato, qa mintiʼ ma chʼexpaj keʼyin, jaku txi qqʼamaʼn qa jun pato». ¿Tiʼtzun taj científico tuʼn tel qnikʼ tiʼj? «Qa nim toklen tuʼn tok qqʼoʼn qwitz kyiʼj tiʼchaq tuʼnju in tzaj kyyekʼin qa at jun bʼinchal kye».

In nel qnikʼ tiʼj qa il tiʼj tuʼn tok qʼet toklen taqʼun xjal in kubʼ ximente tuʼn kyok ky-aleta avión te mas tbʼanel, ax ikx te xjal in kubʼ ximente tuʼn tok jun cinta adhesiva te mas tbʼanel. Ax ikx tbʼanel tuʼn tok qʼoʼn toklen taqʼun xjal in kubʼ ximente tuʼn tok jun xbʼalun te tbʼanel ex aju xjal in kubʼ ximente tuʼn tbʼant jun tbʼanel kar. Nya oʼkxju, in tzaj tqʼamaʼn ley qa jun il qa ma tzʼel tcopiarin jun xjal taqʼun juntl ex mintiʼ otoq txi tqanin te qa jaku tzʼel tcopiarin.

Toj ambʼil jaʼlo, in nel kykanoʼn ingeniero junjun tiʼchaq kyiʼj tiʼchaq ateʼ twitz Txʼotxʼ ex in tzaj kyqʼamaʼn qa tuʼn evolución bʼant tkyaqil, ¿toj tumelpe aju in bʼant kyuʼn? Qa il tiʼj tuʼn tten jun xjal tuʼn tel tkanoʼn jun tiʼ tiʼj juntl, ¿tiʼ jaku txi qqʼamaʼn tiʼjju kubʼ bʼinchante tkyaqil? ¿Alkye il tiʼj tuʼn tok qʼet mas toklen? ¿Apeju xjal kubʼ bʼinchante tnejel moqa aju in nel kanonte tiʼj?

Aju in nel qnikʼ tiʼj

Aj kyximen xjal tiʼj tzeʼn o che bʼaj bʼinchaʼn qe tiʼchaq ateʼ twitz Txʼotxʼ, nim kye in kubʼ kyximen ik tzeʼn jun salmista tej tkubʼ ttzʼibʼin jlu: «Nimku tbʼinchbʼena o bʼant Nman. Tkyaqil o bʼant tuʼna tuʼnju at nim tnabʼla; nojni twitz txʼotxʼ tuʼn tchʼisbʼena» (Salmo 104:24). Chʼixme ax jlu kubʼ t-ximen juntl aj tzʼibʼil tiʼj Tyol Dios, aju Pablo tbʼi ex tqʼama jlu: «Maske mintiʼ qʼanchaʼl te Dios, pero jaku tzʼel qnikʼ tiʼj qa ma qo kubʼ ten ximal tiʼj tkyaqilju o tbʼincha. Kyjaʼtzun, chikʼlxix taʼ, atxix tej tbʼant twitz txʼotxʼ nneʼl qnikʼ tiʼj qa at Dios ex aju tipumal mintiʼ bʼajsbʼil te» (Romanos 1:19, 20).

Ateʼ nim xjal in nok kyqʼoʼn toklen Xjan Uʼj ex in tzaj kyqʼamaʼn qa ajbʼen evolución tuʼn Dios tuʼn kybʼant tkyaqil tiʼchaq. Pero, ¿ape jlu in tzaj t-xnaqʼtzaʼn Tyol Dios?

[Tqanil]

[Aju yol]

¿Jatumel tzaj kyiʼn tiʼchaq ateʼ twitz Txʼotxʼ qe tbʼanel nabʼil?

[Aju yol]

¿Alkye at toklen tiʼj tkyaqil tiʼchaq in nok qqʼoʼn qwitz tiʼj?

[A’yeju recuadro ex qe tilb’ilal]

Qa il tiʼj tuʼn tten jun xjal tuʼn tel tkanoʼn jun tiʼ tiʼj juntl, ¿tiʼ jaku txi qqʼamaʼn tiʼjju kubʼ bʼinchante tkyaqil?

In bʼant nim tiʼchaq tuʼn avioneta lu tuʼnju in nel tkanoʼn kyiʼj t-xikʼ gaviota.

In nok tilil kyuʼn científico tuʼn tel kycopiarin alkye tten bʼinchaʼn qe kyqan ẍul moqa xmatx. Mintiʼ in che tzʼilix kyqan, mintiʼ in kyaj kyqʼoʼn techel kyqan ex jun rat in che kyaj weʼ tiʼj alkyexku tiʼchaq. Oʼkx twitz teflón in che el jilj.

O bʼaj kybʼinchaʼn xjal jun tbʼanel kar tuʼnju o tzʼel kykanoʼn tiʼj pez cofre, aju in bʼant nim tiʼchaq tuʼn.

[Reconocimientos]

Aeronave: Kristen Bartlett/ University of Florida; aju tqan ẍul: Breck P. Kent; aju pez cofre ex jun kar: Mercedes-Benz USA

[A’yeju recuadro ex qe tilb’ilal]

IN NONIN KYNABʼIL KYIʼJ

Aj tbʼant junjun tiʼchaq kyuʼn txkup, in tzaj tyekʼin qa «at kynabʼl» (Proverbios 30:24, 25). Qo xnaqʼtzan kyiʼj kabʼe techel.

◼ Aj kybʼet snik toj ttxolil. ¿Tzeʼn in kanet bʼe juntl maj kyuʼn snik tuʼn kymeltzʼaj toj kyja aj in che ex jyol kywa? In tzaj kyqʼamaʼn jun kʼloj xjal in che jyon tqanil te Gran Bretaña qa nya oʼkx in kyaj kyqʼoʼn junjun tal snik kyxew, sino ax ikx in che ok lepeʼ tiʼj techel in kyaj kyqʼoʼn toj kybʼe tuʼn kymeltzʼaj kyja. Jun techel, in tzaj tqʼamaʼn jun xnaqʼtzbʼil toj uʼj New Scientist qa aqeju tal snik faraón, «in kubʼ kypaʼn junlo 50 ex qa 60 grados kybʼe tiʼj kyja». ¿Tiquʼn tbʼanel aju in bʼant kyuʼn? Tuʼnju aj tpon jun snik jatumel otoq tzʼel paʼn tbʼe, in tzaj tqʼamaʼn tnabʼil te tuʼn miʼn tel laqʼeʼ mas tiʼj tbʼe ex in nonin jlu tiʼj tuʼn tmeltzʼaj tja. Axju uʼj lu tzaj qʼamante qa aju t-xol bʼe in kyaj kyqʼoʼn aj tkubʼ kypaʼn kyibʼ snik, in nonin kyiʼj tuʼn miʼn tchmet nim kybʼet toj bʼe, mas qa in che bʼet toj kabʼe plaj, ex tuʼn jlu mintiʼ in bʼaj kynajsaʼn kyipumal.

◼ Aju kynabʼil chyuʼj. Ateʼ nim chyuʼj mintiʼ in tzaj nya bʼaʼn kyiʼj aj kyxiʼ toj jun lugar maske najchaq taʼ ex in che ikʼ kyoj junxichaq lugar. ¿Tzeʼn in bʼant jlu kyuʼn? O tzʼel kynikʼ científico tiʼj qa in nel kynikʼ tiʼj campo magnético tiʼj Txʼotxʼ. Pero in tzaj tqʼamaʼn uʼj Science, qa «nya tkyaqil maj in tzaj tyekʼin campo magnético jatumel tok norte, tuʼnju in chʼexpaj toj jun lugar tukʼil juntl». Qa ikju, ¿tiʼtzun in nonin kyiʼj chyuʼj tuʼn miʼn kyel tzpet tiʼj kybʼe? Bʼalo atz in che ok lepeʼ tiʼj Qʼij maske mintiʼ in kuxbʼaj toj ax lugar, tuʼnju in chʼexpaj ambʼil ex najchaq taʼ junjun lugar. Tuʼntzunju, in tzaj kyqʼamaʼn xjal in che xnaqʼtzan qa mintiʼ in che el tzpet chyuʼj tiʼj kybʼe tuʼnju in tzaj tqʼamaʼn kynabʼil kye toj alkye ambʼil ateʼ.

¿Alkye xi qʼonte kynabʼil snik tuʼn tel kynikʼ tiʼj kybʼe? ¿Alkye xi qʼonte kynabʼil ex kyojtzqibʼil chyuʼj tuʼn tel kynikʼ tiʼj tzeʼn tuʼn kypon kyoj junxichaq lugar? ¿Bʼantpe jlu tuʼn evolución moqa at jun Bʼinchal kye?

[Credit Line]

© E.J.H. Robinson 2004