Jun nya ax tok amiw

Bʼalo ok tojtzqiʼna jun «tamiwa» tej kʼwalxa. Kubʼlo t-ximana qa onin tamiwa lu tiʼja tuʼn tten mas tnabʼila ex tuʼn ttena kyxol qe tamiw. Jakutoq yolina tukʼil aj ttzaj bʼaj tkʼuʼja ex el tnikʼa tiʼj qa nim toklen toj tanqʼibʼila.

Noqtzun tuʼnj, tej tikʼ ambʼil el tnikʼa tiʼj junjun nya bʼaʼn tmod. El tnikʼa tiʼj qa kukx taj tuʼn tten tukʼila maske nya kygan junjun xjal. Bʼalo o tzʼonin tamiwa lu tiʼja tuʼn tten mas tnabʼila, pero axlo ikx o tzaj yabʼil tiʼja tuʼn. Nya oʼkxju, axlo ikx o bʼaj tnajsaʼna tpwaqa tiʼj.

O tzʼok tilil tuʼna tuʼn ya miʼn ttena tukʼil tamiwa lu, pero kukx in jyon tiʼja. Jaku txi qqʼamaʼn qa o tzʼok te tajawa. Ex in kubʼlo t-ximana qa maswitlo bʼaʼn noqwit mintiʼ ok tojtzqiʼna.

ATZUN jlu in bʼaj kyiʼj xjal in che sichʼin tiʼj tabaco. Qo ximen tiʼjju bʼaj tiʼj jun xuʼj Earline tbʼi, aju qʼiʼntoq 50 abʼqʼi in sichʼen. In tzaj tqʼamaʼn jlu: «Mastoq in kubʼ nnaʼne bʼaʼn aj nsichʼine twitzju tuʼn ntene tukʼil jun xjal. Ok nqʼoʼne ik tzeʼn jun ojtxe wamiwe ex at maj oʼkx nsichʼe at wukʼile». Tej tikʼ ambʼil el tnikʼ Earline tiʼj qa jaku tzaj nya bʼaʼn tiʼj tuʼn tabaco ex qa nya jun tbʼanel amiw. In nel qnikʼ tiʼj qa ax tok qe yol saj qʼamaʼn tej saj tzyet xnaqʼtzbʼil, tuʼnju atzun jlu bʼaj tiʼj Earline. Pero kyaj ttzaqpiʼn tuʼn tsichʼen tuʼnju el tnikʼ tiʼj qa in bʼaj tyajin t-xmilal ex qa nya bʼaʼn in nela toj twitz Dios (2 Corintios 7:1).

Ax jlu bʼant tuʼn Frank tuʼnju tajtoq tuʼn ttzalaj Dios tiʼj. Tej tikʼ junjun qʼij tej tbʼaj mankbʼil tsichʼ, okx txakin tjaqʼ tcorredor tja tuʼntzun kykanet tikʼlen moqa tbʼuchil tsichʼ. Tqʼama jlu tiʼjju bʼaj toj qʼij aju: «Kubʼ nnaʼne nya bʼaʼn tej njyone tiʼj tbʼuchil sichʼ twitz txʼotxʼ, atxix toj ambʼil aju ya mintiʼ in sichʼene».

¿Tiquʼn kwest in nela toj kywitz junjun xjal tuʼn tkyaj kytzaqpin tuʼn kysichʼin? In tzaj kyqʼamaʼn xjal in che xnaqʼtzan tiʼj jlu oxe tiquʼn. Tnejel, jun rat in che naqʼet xjal tiʼj tabaco ik tzeʼn tiʼj droga. Tkabʼin, aj kysichʼin xjal, oʼkx in xi tiʼn 7 segundos tuʼn tpon nicotina toj kycerebro. Ex toxin, chʼixme tkyaqil maj in najbʼen tabaco kyuʼn xjal lu, aj kywan, aj kykʼan, aj kyyolin ex tuʼn tel siktleʼn kyiʼj.

Maske jaku che naqʼet xjal tuʼn kysichʼin, jaku kyaj kytzaqpiʼn ik tzeʼn bʼant tuʼn Earline ex Frank. Qa taja tuʼn tkyaj ttzaqpiʼna tuʼn tsichʼina, che onil junjuntl xnaqʼtzbʼil tiʼja tuʼn tbʼant jlu tuʼna.