El nnikʼe tiʼj alkye tten kxel bʼinchaʼn tiʼj nya bʼaʼn

Tzaj tqʼamaʼn Ursula Menne

Atxix tej tok nnabʼile, wajtoqe tuʼn kyxi bʼinchet qe tiʼchaq toj tumel kyiʼj kykyaqil xjal. Tuʼnju ok tilil wuʼne tuʼn kyxi bʼinchet qe tiʼchaq toj tumel, in xi samaʼne toj cárcel tjaqʼ kykawbʼil xjal comunista te Alemania. Pero atz toj cárcel el nnikʼe tiʼj tzeʼn jaku chex bʼinchet qe tiʼchaq toj tumel. Kyqʼontze ambʼil weye tuʼn t-xi nqʼamaʼne kyeye.

IN NUL itzʼje Halle te tnam Alemania toj 1922 ex atz tok lugar lu junlo 200 kilómetro tiʼj suroeste te Berlín. At jun t-historia lugar Halle te mas te 1,200 abʼqʼi ex atzun jun kyxol qeju tnejel lugar e ok te protestante. Ul itzʼj juntl witzʼine toj 1923 aju Käthe tbʼi. Ten nmane kyxol soldad, atzunte ntxuʼye in bʼitzintoq kyoj teatro.

Atz el nkanoʼne tiʼj nmane tuʼn kyxi bʼinchet qe tiʼchaq toj tumel. Tej tetz kyxol soldad, tzaj tlaqʼoʼn jun tienda. Tuʼnju chʼixmi kykyaqil xjal e pon loqʼel tukʼil, mebʼa qe ex tuʼntzunju, xi tqʼoʼn kykʼas. Pero tuʼn jlu, kubʼ naj tkʼaʼẍ. Tuʼnju bʼaj tiʼj nmane, el nnikʼe tiʼj qa kwest tuʼn tjyet tumel quʼn tzeʼn jaku qo onin kyiʼj xjal ex tzeʼn jaku chex bʼinchet qe tiʼchaq toj tumel. Atzun kye kuʼxun, in kubʼ kyximen qa jaku che ok qe tiʼchaq te tbʼanel ex kwest tuʼn tetz kyiʼn jlu toj kyximbʼetz.

El nkanoʼne qe tiʼchaq in che bʼant tuʼn ntxuʼye. Okx ttzʼibʼin ntxuʼye nbʼiye tukʼil Käthe tuʼn tbʼant música quʼne, qbʼitzine ex tuʼn tbʼant qbʼixine. Kubʼ qnaʼne nim tzalajbʼil tukʼil witzʼine tej tzmatoq tal txin qoʼye. Pero chʼexpaj tkyaqil toj 1939.

Xi tzyet qe nya bʼaʼn

Tej tetz bʼaj básico wuʼne, okx ntzʼibʼine nbʼiye toj jun academia te ballet tuʼntzun nxnaqʼtzane tiʼj bʼixbʼil jatumel in kubʼ kyyekʼin xjal aju in kubʼ kynaʼn (ausdruckstanz, atzun tbʼi toj yol alemán) ik tzeʼn t-estilo Mary Wigman. Toj bʼixbʼil lu, aj in xi tyukin xjal t-xmilal, tuʼn jlu in kubʼ tyekʼin aju in kubʼ tnaʼn. Ax ikx xi tzyet npintarine. Ik tzeʼn in nok kykeʼyine, kubʼ nnaʼne nim tzalajbʼil tej tzmatoq in chin chʼiye ex el nnikʼe kyiʼj nim tiʼchaq. Pero pon abʼqʼi 1939 ex toj ambʼil aju xi tzyet Tkabʼin Nimaq Qʼoj twitz Tkyaqil Txʼotxʼ. Tej tikʼ juntl kabʼe abʼqʼi, toj 1941 tzaj juntl bʼis wiʼje, kyim nmane tuʼn tuberculosis.

Kwest ok qanqʼibʼile tej t-xi tzyet nimaq qʼoj. Maske oʼkx qʼiʼntoq 17 abʼqʼi wuʼne tej t-xi tzyet nimaq qʼoj, kubʼ nximane qa otoq che el locx xjal tuʼnju chʼexpaj kymod ex e ok te nya bʼaʼn. Tej tikʼ chʼin ambʼil, ya otoq che naqʼet xjal tiʼj kyimen, tiʼj xitbʼil ex tej mintiʼ tzaj qʼoʼn ambʼil kye tuʼn tbʼant junjun tiʼchaq kyuʼn. Chʼixmi oʼkx tbʼuchil qjaye kyaj ten tej tok jun qʼoj ex e kyim nim nfamiliare akux in bʼajtoq nimaq qʼoj.

Tej tkubʼaj nimaq qʼoj toj 1945, kukx in qo anqʼintoq atz Halle tukʼil ntxuʼye ex Käthe. Toj ambʼil aju, ya otoq chin kubʼ mojeʼye ex otoq tzul jun tal ntxine. Pero otoq tzaj nya bʼaʼn toj nmejebʼleʼne ex el qpan qibʼe tukʼil nchmile. Iltoq tiʼj tuʼn t-xi nkʼaʼchine wale njunalxe, tuʼntzunju, xi njyoʼne jun waqʼune tuʼn nbʼixine ex xi tzyet tuʼn npintarine qe cuadros.

Tej otoq bʼaj nimaq qʼoj toj tnam Alemania, kubʼ paʼn te kyaje. Atz kyaj sector jatumel o kyaj tene toj tkwent Unión Soviética. Tuʼntzunju, o naqʼete tuʼn qanqʼine tej tok kykawbʼil xjal te comunismo. Ex toj 1949 ok Alemania oriental, aju plaj tnam jatumel atoʼye te República Democrática Alemana.

Aju anqʼibʼil tjaqʼ kykawbʼil comunista

Kyoj abʼqʼi aju, tzaj yabʼil tiʼj ntxuʼye ex aʼyine ok xqʼuqin te. Kanet jun waqʼune toj jun oficina te gobierno. Pero in yoline kyukʼil jun kʼloj estudiante ok tilil kyuʼn tuʼn tel toj qʼanchaʼl qeju nya bʼaʼn in bʼant kyuʼn aj kawil. Jun techel, mintiʼ xi qʼoʼn ambʼil te jun kuʼxun tuʼn tokx toj universidad noq tuʼnju otoq tzʼonin tman tiʼj partido nazi. Ojtzqiʼntoq twitz kuʼxun lu wuʼne tuʼnju in noktoq qchmon qibʼe tuʼn qbʼitzine junx ex tuʼn tbʼant música quʼne. Tuʼntzunju, kubʼ nxjeline jlu: «¿Tiquʼn in nok qʼoʼn te tpaj kuʼxun aju o bʼant tuʼn tman?». Mas okx nqʼon wibʼe kyxol qe estudiante ex xi tzyet tuʼn qmanifestarine, axpe ikx, ok npegarine junjun uʼj kywitz grada te tribunal.

Pero mas tzaj nqʼoje tej ttzaj qʼamaʼn qa iltoq tiʼj tuʼn tkubʼ ntzʼibʼine junjun carta tuʼnju in chin aqʼunane te secretaria te Comité Regional de Paz. Jun maj, xi tsamaʼn Comité jun propaganda comunista te jun tij xjal te Alemania Occidental tuʼntzun tkubʼ kyximen xjal nya bʼaʼn tiʼj ex bʼant jlu kyuʼn noq tuʼn tpaj política. Nya bʼaʼn ela jlu toj nwitze, tuʼntzunju, xi wewane qe uʼj toj oficina ex mintiʼ xi nsamaʼne.

Qeʼ nkʼuʼje tuʼn xuʼj ok qʼoʼn te nya bʼaʼn

Toj junio te 1951, e okx kabʼe xinaq toj n-oficinaye ex tzaj kyqʼamaʼn jlu weye: «Ma txiʼya toj cárcel». In xi qʼiʼne toj cárcel Roter Ochse moqa Buey Rojo ex tej tikʼ juntl abʼqʼi, tzaj qʼamaʼn weye qa otoq chin ok meltzʼaje tiʼj Estado. Otoq txi tqʼamaʼn jun estudiante te jun policía secreta qa otoq tzʼok npegarine qe uʼj twitz grada te tribunal. Tuʼntzunju, in xiʼye toj juicio ex ni jun ok tqʼoʼn twiʼ tiʼj nyole, oʼkx tzaj qʼamaʼn weye qa iltoq tiʼj tuʼn ntene qaq abʼqʼi toj cárcel. Akux atine toj cárcel, tzaj yabʼil wiʼje ex in xi qʼiʼne jatumel ateʼ qe yabʼ, tej npone atz, ateʼ junlo 40 xuʼj toj. Tej tok nkeʼyine qa mintiʼtoq in che tzalaj xuʼj lu, in tzaj xobʼe. In xi karreline ttzi puerta ex in nok tene pajolte tuʼn nqʼabʼe.

Tzaj tqanin xjal in xqʼuqin qiʼje jlu weye: «¿Tiʼ taja?».

Xi ntzaqʼweʼne jlu te: «Waje tuʼn wexe tzalu. Qa kyaje, kjapunkxe qine njunalxe, pero miʼn chin kyaj kyqʼoʼne tzalu». Mintiʼ xi tbʼiʼn xjal in xqʼuqin qiʼje aju xi nqʼamaʼne te. Pero tej tikʼ chʼin ambʼil, ok nkeʼyine jun xuʼj ex nya ik tmod ik tzeʼn qe txqantl. In tzalaj twitz, tuʼntzunju kubʼ nximane tuʼn nkubʼ qeʼye tukʼil.

Noq in jaw labʼine tej ttzaj tqʼamaʼn jlu weye: «Qa kbʼel qeʼya wukʼile, mas bʼaʼn tuʼn tok t-xqʼuqin tibʼa. In kubʼ kyximen txqantl qa nya bʼaʼn nmode tuʼnju testigo de Jehová qine».

Mintiʼtoq ojtzqiʼn wuʼne qa in che oktoq qʼoʼn testigo de Jehová te aj qʼoj tiʼj Estado. Oʼkx ojtzqiʼntoq wuʼne qa in che pontoq kabʼe Xnaqʼtzal tiʼj Tyol Dios moqa testigo de Jehová visitaril nmane tej tzmatoq tal txin qine. Axpe ikx, kukx naʼn wuʼne tej tqʼama nmane jlu kyiʼj: «Ax tok aju in kyqʼamaʼn Xnaqʼtzal tiʼj Tyol Dios».

In jaw oqʼe tuʼn tzalajbʼil tej tok wojtzqiʼne xuʼj lu, aju Berta Brüggemeier tbʼi. Xi nqʼamaʼne jlu te: «Najsama, yoline tiʼj Jehová wukʼile». O tene nim ambʼil junx ex nim maj o yoline tiʼj Biblia. Kyxol qe xnaqʼtzbʼil el nnikʼe tiʼj, ok wojtzqiʼne qa ate Jehová aju Dios axix tok, qa at tkʼujlabʼil, qa in tzalaj ex qa in xi tbʼinchaʼn qe tiʼchaq toj tumel. Ax ikx el nnikʼe tiʼj qa in tzaj ttziyen Dios tuʼn t-xi tbʼinchaʼn tiʼj tkyaqil nya bʼaʼn in tzaj kyuʼn xjal. Atzun jlu in tzaj ttziyen toj Salmo 37:10 ex 11 jatumel in tzaj tqʼamaʼn jlu: «Noq chʼintl taj tuʼn kykubʼ naj qeju mya bʼaʼn [...]. Atzun qe xjal mans che okel etzal teju txʼotxʼ, ex puro tuj txubʼtxaj che tel».

In netz tzaqpiʼne toj cárcel ex in xi oqe atz occidente

In netze toj cárcel toj abʼqʼi 1956, tej otoqxi tzikʼ jweʼ abʼqʼi. Tej tikʼ jweʼ qʼij in xiʼye atz Alemania occidental. Toj ambʼil aju, ya attoq kabʼe wale, aju Hannelore ex Sabine, aqeju i eʼx wukʼile. Kubʼ qdivorciarin qibʼe tukʼil nchmile ex in yoline juntl maj kyukʼil testigo de Jehová. Onin xnaqʼtzbʼil tiʼj Tyol Dios wiʼje tuʼn t-xi nnimane qe tkawbʼil Jehová ex tuʼn kybʼant chʼixpubʼil wuʼne. Tuʼntzunju, in bautisarine toj 1958.

In kubʼ mojeʼye juntl maj, pero tukʼil jun testigo de Jehová aju Klaus Menne tbʼi. O tzalaje tiʼj qmejebʼleʼne ex e ul itzʼj kabʼe qkʼwale, aju Benjamin ex Tabia. Bʼisbʼajil tuʼnju kyim Klaus toj jun aksident ex ma bʼaj 20 abʼqʼi. Atxix toj ambʼil aju, njunalxe in chin anqʼine. Pero in qeʼ nkʼuʼje tuʼnju ojtzqiʼn wuʼne qa che jawil anqʼin kyimni juntl maj ex qa che anqʼil toj jun Paraíso tzalu twitz Txʼotxʼ (Lucas 23:43; Hechos 24:15). Ax ikx, in chin tzalaje tuʼnju in che ajbʼen kyaje wale te Jehová.

Noq tuʼnju o chin xnaqʼtzane tiʼj Tyol Dios, o tzʼel nnikʼe tiʼj qa oʼkx Jehová jaku txi bʼinchante qe tiʼchaq toj tumel. In ximen Jehová tiʼjju in bʼaj qiʼj ex tiʼjju o tzikʼ qiʼj ex mlay bʼant jlu tuʼn jun xjal. Tuʼnju ojtzqiʼn jlu wuʼne, in kubʼ nnaʼne tzalajbʼil ex mas aj tok bʼinchaʼn jun nya bʼaʼn wiʼje moqa aj tok nkeʼyine jun tiʼ nya toj tumel. In tzaj tqʼamaʼn Eclesiastés 5:8 jlu: «Miʼn jaw labʼina tiʼj qa ma tila tuj jun tnam in che yajlanjtz qe xjal mebʼa ex mintiʼ in xi bʼinchaʼn kyiʼj tuj tumelxix, porke jun xjal maʼ toklen in kyaj tjaqʼ tkawbʼil juntl xjal mas maʼ toklen twitz, ex kykabʼil qe jlu in che kyaj tjaqʼ tkawbʼil juntl mas maʼ toklen kywitz». Aju kawbʼil mas maʼ toklen, atzun Tkawbʼil Jehová, aju in tzaj tqʼamaʼn Xjan Uʼj jlu tiʼj: «Ex mintiʼ jun tchʼisbʼen Dios miwt qʼanchaʼl twitz, ex mintiʼ jun maqsiʼn; tkyaqil qʼanchaʼl twitz Dios jatum tuʼn qpon qʼol tajlal» (Hebreos 4:13).

In tzaj nnaʼne aju o bʼaj wiʼje toj chʼixmi 90 abʼqʼi

Kukx in tzaj kyqanin xjal weye tzeʼn kyanqʼibʼil xjal ten tjaqʼ tkawbʼil nazi ex tjaqʼ kykawbʼil xjal comunista. In xi nqʼamaʼne kye qa kwest. Noq alkyexku tumel in che kawin xjal, mlayx bʼant kykawin ex in nel qnikʼ tiʼj qa ax tok qe yol tkuʼx toj Tyol Dios jatumel in tzaj tqʼamaʼn jlu: «Aju tipumal xjal at tuʼn tbʼinchante mya bʼaʼn tiʼj juntl» (Eclesiastés 8:9). Atzun jlu in bʼaj.

Tej tzmatoq tal txin qine, wajtoqe tuʼn t-xi kybʼinchaʼn xjal qe tiʼchaq toj tumel. Atzun jaʼlo, o tzʼel nnikʼe tiʼj qa oʼkx Dios jaku txi bʼinchante qe tiʼchaq toj tumel. Kbʼantel jlu tuʼn aj tel tiʼn tkyaqil nya bʼaʼn ex aj t-xi tqʼoʼn ambʼil te Jesús tuʼn tkawin tibʼaj Txʼotxʼ. Kubʼ tyekʼin Jesús qa in ximen kyiʼj txqantl ex atzun jlu in tzaj tqʼamaʼn Tyol Dios toj Hebreos 1:9 jatumel in tzaj tqʼamaʼn jlu: «Ma tzalaja tiʼj ju tzʼaqlxix ex ma tzʼel tikʼuna aju mya bʼaʼn». In chin tzalaje tuʼnju o tzaj tqʼoʼn Dios ambʼil weye tuʼn tel nnikʼe tiʼj aj Kawil toj Tkawbʼil. Ex in chin ayone tiʼj tuʼn ttzaj tqʼoʼn ambʼil weye tuʼn wanqʼine te jumajx tjaw Tkawbʼil.

[Tilb’ilal]

Atine kyukʼil wale Hannelore ex Sabine tej qpone Alemania occidental.

[Tilb’ilal]

Atzun jaʼlo, atine tukʼil wale Benjamin ex Sandra, aju t-xuʼjil.