TBʼI XNAQʼTZBʼIL TOK TIʼJ T-XKʼOMIL
¿Tzeʼn jaku tzʼajbʼen ambʼil quʼn toj tumel?
Alkye jun qe naʼmx tqʼama jlu jun maj: «Noqwit at mas ambʼil wiʼje». Qkyaqilx ax ambʼil at qiʼj, mintiʼ mas ambʼil kyiʼj xjal qʼinun kywitz qe xjal mebʼa, ex ni jun xjal jaku txi kʼuʼnte ambʼil. Mlayx meltzʼaj ambʼil, tuʼntzunju, nim toklen tuʼn tajbʼen quʼn toj tumel. Noqtzun tuʼnj, ¿tzeʼn jaku bʼant quʼn? Qo xnaqʼtzan tiʼj kyaje consej o tzʼonin kyiʼj nimku xjal.
Tnejel consej: Tzʼibʼinkuya qe aqʼuntl kbʼantel tuʼna
Ximana tiʼjju mas nim toklen. In tzaj tqʼamaʼn Tyol Dios tuʼn tel qnikʼ kyiʼj tiʼchaq mas nim kyoklen (Filipenses 1:10). Tuʼn tbʼant jlu tuʼna, tzʼibʼinkuya jun lista kyiʼj tiʼchaq mas nim kyoklen ex qeju il tiʼj tuʼn kybʼant. Pero miʼn tzikʼ tnaʼl tuʼna qa ateʼ junjun tiʼchaq nim kyoklen, pero nya il tiʼj tuʼn t-xi bʼinchet naj, ik tzeʼn tuʼn t-xiʼya loqʼel twaya. Ex ateʼ junjun tiʼchaq il tiʼj tuʼn kyxiʼ bʼinchet naj, pero nya nim kyoklen ik tzeʼn tuʼn tok tkeʼyina jun programa toj televisión. *
Ximana tiʼj alkyeqe tiʼchaq jaku bʼant tuʼna. In tzaj tqʼamaʼn Eclesiastés 10:10 jlu: «Qa ma bʼaj ttziʼ siwbʼil kʼuxbʼil ex qa mintiʼ ma kubʼ jaqut ttziʼ juntl maj, taj nim qipun tuʼn ttxʼemit siʼ tuʼn. Mas bʼaʼn tuʼn tbʼant tkyaqil tuj tumel ex tukʼil nabʼl». Ik tzeʼn jun kʼuxbʼil, il tiʼj tuʼn tkubʼ ttziʼ naʼmxtoq tajbʼen, ax ikx qe, il tiʼj tuʼn qximen tiʼj tiʼ kbʼantel quʼn tuʼntzun tajbʼen ambʼil quʼn toj tumel. Qa at junjun tiʼchaq nya nim kyoklen, bʼaʼn tuʼn tkubʼ tbʼinchaʼna toj juntl qʼij moqa tuʼn ya miʼn kybʼant tuʼna, tuʼnju oʼkx kʼelel tiʼn ambʼil tiʼja ex tipumala. Ex qa jun rat ma kubʼaj jun aqʼuntl tuʼna, bʼaʼn tuʼn tkubʼ tbʼinchaʼna juntl. Qa tnejel ma ximana kyiʼj tiʼchaq jaku bʼant tuʼna, kbʼantel nim aqʼuntl tuʼna ik tzeʼn te xjal in bʼaj tjuquʼn ttzi tkʼuxbʼil naʼmxtoq t-xi tzyet tuʼn taqʼunan.
Qʼimela junjun iqtz tibʼaja. Xnaqʼtzam tibʼa tuʼn t-xi tqʼamaʼna miʼn kyiʼj tiʼchaq nya nim kyoklen ex in nel kyiʼn nim ambʼil tiʼja. Qa ma txi tbʼinchaʼna nim tiʼchaq ex ma txi tqʼamaʼna qa jaku bʼant tkyaqil tuʼna, ksiktela ex mlay tzalaja.
Tkabʼin consej: Miʼn kubʼ tbʼinchaʼna qe tiʼchaq jaku tzʼel kyiʼn nim ambʼil tiʼja
Miʼn kyaj tqʼoʼna qe tiʼchaq te yajxitl ex bʼincham naja. In tzaj tqʼamaʼn Eclesiastés 11:4 jlu: «Qa at kyqʼiqʼ in xi tkeʼyin jun xjal, mintiʼ in xiʼ awal, ex qa at muj in xi tkeʼyin, mintiʼ in xiʼ chmol twitz tawal». Qa at jun xjal in nayon tuʼn tten jun tbʼanel ambʼil tuʼn tkux tawaʼn tawal, mlayx kux tawaʼn tawal ex oʼkx kxel tnajsaʼn ambʼil. Ax jlu jaku bʼaj qiʼj qa nya segur atoʼ tiʼjju kbʼantel quʼn toj qanqʼibʼil, mlayx bʼant jun tiʼ quʼn. At maj, il tiʼj tuʼn tel qpaʼn ambʼil tuʼn qximen tiʼj jun tiʼ naʼmxtoq txi qbʼinchaʼn. Ex atzun jlu in tzaj tqʼamaʼn Tyol Dios tuʼn tbʼant quʼn: «Atzunju xjal at tnabʼl tok tkwent tiʼj jatum in bʼet» (Proverbios 14:15). Pero bʼaʼn tuʼn ttzaj qnaʼn qa mlayx tzʼok qojtzqiʼn tkyaqil tqanil tiʼj jun tiʼ in kubʼ qximen tuʼn tbʼant quʼn (Eclesiastés 11:6).
Miʼn tzʼoka te tzʼaqli. In tzaj tqʼamaʼn Filipenses 4:5 jlu: «Tzʼelxwit nikʼbʼaj kyiʼje kyuʼn kykyaqil xjal qa mejor kymodiye». Tbʼanel tuʼn kybʼant qe tiʼchaq quʼn toj tumel, pero qa in kubʼ qximen tuʼn kybʼant qe tiʼchaq quʼn toj jun tten tzʼaqli, oʼkx ktzajel qbʼis tuʼn jlu. Jun techel, qa at jun xjal in bʼant jun akʼaj yol tuʼn, bʼaʼn tuʼn tel tnikʼ tiʼj qa kʼelel tzpet ex chebʼe chebʼe kbʼantel tuʼn. Noqtzun tuʼnj, aju xjal taj tuʼn t-xi tbʼinchaʼn qe tiʼchaq toj jun tten tzʼaqli, mintiʼ in xi tqʼamaʼn jun tyol tuʼnju nya taj tuʼn tel tzpet. Pero mlay tzʼonin jlu tiʼj tuʼn tnaqʼet tiʼj akʼaj yol. Tuʼntzunju, nim toklen tuʼn tten qximbʼetz toj tumel. Ex in tzaj tqʼamaʼn Proverbios 11:2 jlu: «Kyukʼil qe xjal mans, atzun taʼ nabʼl». Aqeju xjal in nel kynikʼ tiʼj qa mlay bʼant tkyaqil kyuʼn, mintiʼxix in nok kyqʼoʼn kywiʼ tiʼjju in che el txalpaj tiʼj ex at maj in che jaw tzeʼn kyiʼjx.
«Mintiʼ in che chjet qe tiʼchaq tuʼna tukʼil pwaq, sino in xi tchjoʼna tukʼil ambʼil» (El arte de vivir. Sé feliz, nadie te está mirando).
Toxin consej: Tenx t-ximbʼetza toj tumel
Paʼmila ambʼil tuʼn taqʼunana ex tuʼn ttzalaja jun rat. «Mas bʼaʼn tuʼn qojlan chʼin twitzju tuʼn qaqʼunan nimxix» (Eclesiastés 4:6, TNM). Aqeju xjal in nok bʼaj kywiʼ tiʼj aqʼuntl, mintiʼ in ten ambʼil kyiʼj nix kyjwers tuʼn kytzalaj tiʼjju tbʼanel in tzaj kye tuʼn kyaqʼun. Atzunte xjal tkʼiʼ tzʼaqʼunan, in bʼaj tyajin ambʼil noq tuʼn tojlan. Noqtzun tuʼnj, in tzaj tqʼamaʼn Tyol Dios tuʼn tok tilil quʼn tuʼn qaqʼunan ex tuʼn qtzalaj tiʼjju tbʼanel in tzaj tuʼn qaqʼun tuʼnju «jun oyaj [jlu] tuʼn Dios» (Eclesiastés 5:19).
Jtana bʼaʼn. In tzaj tqʼamaʼn Salmo 4:8 jlu: «Txubʼtxaj in chin kubʼ koẍeʼye ex in chin tane». Chʼixme kykyaqil xjal il tiʼj tuʼn kyjtan 8 or tuʼntzun tten juntl maj kyipumal ex tuʼn tojlan kyximbʼetz. In nonin jlu qiʼj tuʼn tok qqʼoʼn qwiʼ kyiʼj tiʼchaq ex tuʼn kytzaj qnaʼn. Atzunte qa mintiʼ ma qo jtan bʼaʼn, in tzaj aksident qiʼj, in qo el txalpaj ex jun rat in tzaj qqʼoj.
Bʼinchankuya aju jaku bʼant tuʼna. «Mas bʼaʼn aju nnoʼk qkeʼyin twitzju noq in pon qkʼuʼj tiʼj» (Eclesiastés 6:9). ¿Tiʼ in tzaj tyekʼin jlu qe? Qa aju xjal at tnabʼil, mintiʼ in nok t-xon tibʼ kyiʼj tiʼchaq noq tuʼnju in pon tkʼuʼj tiʼj, mas qa mintiʼ tpwaq tuʼn ttzaj tlaqʼoʼn. Tuʼntzunju, mintiʼ in xi tqʼoʼn ambʼil kye tqanil tuʼn tkubʼ tiʼj kyuʼn nix kyuʼn qe tiʼchaq in che tzaj qʼoʼn kʼas. Sino oʼkx in nok tqʼoʼn twiʼ kyiʼj tiʼchaq jaku kanet tuʼn.
Tkyajin consej: Bʼinchama qe tiʼchaq jaku che onin tiʼja
Lepeʼka kyiʼj tbʼanel nabʼil. Qa ma bʼant jlu tuʼna, kʼonil tiʼja tuʼn tel tnikʼa tiʼj alkyeqe tiʼchaq mas nim kyoklen toj twitza. Qo ximen tiʼj qa ik qanqʼibʼil ik tzeʼn jun plech, atzun qe nabʼil ik kyten ik tzeʼn xobʼil plech, aqeju che onil qiʼj tuʼn tel qnikʼ tiʼj alkye mas nim toklen toj qwitz ex tuʼn tajbʼen ambʼil quʼn toj tumel. ¿Jatumel jaku che kanet nabʼil lu quʼn? Ateʼ nim xjal in xi kyjyoʼn toj Biblia, tuʼnju in nel kynikʼ tiʼj qa mas nim toklen kywitz kynabʼil xjal (Proverbios 2:6, 7).
Yekʼinxa tkʼujlabʼila kyiʼj txqantl. In tzaj tqʼamaʼn Tyol Dios toj Colosenses 3:14 qa «qtzuylaj qibʼ qkyaqil» tuʼn kʼujlabʼil. Qa mintiʼ ma kubʼ qyekʼin qkʼujlabʼil, mlayx qo tzalaj kyukʼil txqantl nix kyukʼil toj qja. Tuʼntzunju, qa mas ma tzʼok qqʼoʼn qwiʼ tiʼj pwaq moqa tuʼn tetz jun qcarrera, mlayx qo tzalaj toj qanqʼibʼil. Tuʼn jlu, in nel qnikʼ tiʼj tiquʼn in tzaj qʼamaʼn nimku maj yol kʼujlabʼil toj Tyol Dios ex atzun mas tbʼanel qmod jaku ten (1 Corintios 13:1-3; 1 Juan 4:8).
Paʼmila ambʼil tuʼn tel tnikʼa tiʼj Dios. Attoq jun tbʼanel t-xuʼjil Geoff, kabʼe tkʼwal, qe tbʼanel tamiw ex attoq jun tbʼanel taqʼun ik tzeʼn paramédico. Noqtzun tuʼnj, nim maj ok weʼ twitz nya bʼaʼn toj aqʼuntl ex chʼixme kyim. Tuʼntzunju, kubʼ t-xjelin jlu: «¿Apetzun qanqʼibʼil jlu?». Jun maj, jaw tuʼjin jun uʼj bʼinchan kyuʼn testigos de Jehová ex kanet tzaqʼwebʼil tiʼj t-xjel.
Xi tchikʼbʼaʼn Geoff te t-xuʼjil ex kye tkʼwal aju otoq jaw tuʼjin, ax ikx kye kyajtoq tuʼn tel mas kynikʼ tiʼj. Kykyaqilx xi tzyet tuʼn kyxnaqʼtzan tiʼj Tyol Dios ex onin jlu kyiʼj tuʼn tten ttxolil kyanqʼibʼil, ex toj ambʼil jaʼlo in najbʼen ambʼil kyuʼn toj tumel. Ax ikx, xi tqʼoʼn jun qʼuqbʼil kykʼuʼj tuʼn kyanqʼin twitz jun txʼotxʼ jatumel ya miʼn ten yajbʼil (Apocalipsis 21:3, 4).
Aju bʼaj tiʼj Geoff, in tzaj tnaʼn qe aju tqʼama Jesús, chi: «At tzalajbʼil kye qeju nneʼl kynikʼ tiʼj qa at tajbʼen Dios kye» (Mateo 5:3). ¿Jakupe tzʼel tpaʼna chʼin ambʼil tuʼn t-xnaqʼtzana tiʼj Tyol Dios? Qa ma bʼant jlu tuʼna, kʼonil tiʼja tuʼn tten tnabʼila ex tuʼn ttzalaja tiʼj tanqʼibʼila tkyaqil qʼij.
^ taqik' 5 Qʼonka twitza tiʼj xnaqʼtzbʼil «Veinte consejos para que el tiempo le rinda», aju etz toj uʼj ¡Despertad! te abril te 2010.
