AJU IN TZAJ TQʼAMAʼN TYOL DIOS
Qe saqchbʼil tuʼn tkambʼet pwaq
In kubʼ kyximen junjun xjal qa bʼaʼn qe saqchbʼil tuʼn tkambʼet pwaq tuʼnju in qo tzalaj kyuʼn. Atzun junjuntl in tzaj kyqʼamaʼn qa jaku tzaj nya bʼaʼn qiʼj kyuʼn saqchbʼil lu.
¿Jakupe tzaj nya bʼaʼn qiʼj qa ma qo apostarin?
AJU IN TZAJ KYQʼAMAʼN XJAL.
In kubʼ kyximen nim xjal qa mlay tzaj nya bʼaʼn qiʼj kyuʼn saqchbʼil tuʼn tkambʼet pwaq qa ma txi qnimen aju in tzaj tqʼamaʼn ley. In xi kyqʼoʼn aj kawil ambʼil te junjun saqchbʼil ik tzeʼn lotería ex in najbʼen pwaq kyuʼn tuʼn kyonin kyiʼj xjal.
AJU IN TZAJ TQʼAMAʼN TYOL DIOS.
Mintiʼ in yolin Biblia kyiʼj saqchbʼil tuʼn tkambʼet pwaq, pero in nonin qiʼj tuʼn tel qnikʼ tiʼj tiʼ t-ximbʼetz Dios at tiʼj jlu.
In che kambʼan xjal tiʼj kypwaq txqantl kyuʼn saqchbʼil lu ex junxitl jlu twitzju tqʼama Jesús. Tqʼama jlu: «Ten kykwente kyiʼje tuʼn miʼn tpon kykʼuʼje tiʼj qʼinumabʼl» (Lucas 12:15). In che saqchan xjal tuʼnju in pon kykʼuʼj tiʼj pwaq maske mlay che kambʼan tiʼj nimxix pwaq in tzaj kyqʼamaʼn empresa. In che apostarin xjal tiʼj nimxix pwaq kyoj casino tuʼnju kyaj tuʼn kyok te qʼinun. Mintiʼ in che onin saqchbʼil lu kyiʼj xjal tuʼn miʼn tpon kykʼuʼj tiʼj pwaq, sino mas in chʼiy kyajbʼil tuʼn ex kyaj tuʼn kykambʼan jun rat tiʼj pwaq.
Aʼyeju xjal in che saqchan kyiʼj saqchbʼil lu, oʼkx in che ximen kyiʼjx tuʼnju kyaj tuʼn kykambʼan tiʼj kypwaq junjuntl. Noqtzun tuʼnj, in tzaj tqʼamaʼn Tyol Dios jlu: «Mya noq oʼkx tuʼn kyximane tiʼj ju bʼaʼn te kyeye, ax ikx tuʼn kyximane tiʼj alkyeju bʼaʼn kye txqantl» (1 Corintios 10:24). Ex in tzaj tqʼamaʼn jun kyxol qeju lajaj mandamyent jlu: «Miʼn pon kykʼuʼje [...] tiʼj jun tiʼxti at te [kyukʼile]» (Éxodo 20:17). Aj tkubʼ t-ximen jun xjal tuʼn tkambʼan tiʼj saqchbʼil, oʼkx in ximen tiʼjx tuʼnju taj tuʼn tkyaj tukʼil kypwaq txqantl.
In tzaj tqʼamaʼn Tyol Dios qa mintiʼ tuʼn tkubʼ qximen qa jaku tzʼonin swert qiʼj tuʼn tten qqʼinumabʼil. Toj ojtxe tnam Israel ateʼ junjun mintiʼ ok qeʼ kykʼuʼj tiʼj Dios ex e ok ten kʼulil twitz «dios Qʼol Swert, TNM». ¿Tzeʼn ela jlu toj twitz Dios? Tqʼama jlu: «O kybʼinchaye aju mintiʼ in kubʼ tuj nwitze, jaw kyskʼoʼne aju mintiʼ in chin tzalaje tiʼj» (Isaías 65:11, 12).
Toj junjun tnam in najbʼen pwaq in kambʼet kyoj saqchbʼil kyuʼn aj kawil tuʼn kyonin kyiʼj xjal, ik tzeʼn tuʼn t-xi qʼet xnaqʼtzbʼil kye kʼwal ex tuʼn tten mas aqʼuntl. Pero noq alkyexku tten in najbʼen pwaq lu, mintiʼ in chʼexpaj jatumel in tzaj, tuʼnju in ten nya bʼaʼn kymod xjal tuʼn ik tzeʼn tuʼn tpon kykʼuʼj tiʼj nimku, tuʼn kyximen oʼkx kyiʼjx ex tuʼn kykambʼan tiʼj pwaq noq kukx.
«Miʼn pon kykʼuʼje [...] tiʼj jun tiʼxti at te [kyukʼile]» (Éxodo 20:17).
¿Tiʼ nya bʼaʼn jaku tzaj kyiʼj xjal kyuʼn saqchbʼil lu?
AJU IN TZAJ TQʼAMAʼN TYOL DIOS.
In tzaj tqʼamaʼn Tyol Dios qa «aqeju kyaj tuʼn kyok qʼinun, in che ok tuj joybʼil kyiʼj ex in che kubʼ tzʼaq tuj kʼobʼil, tuʼnju in pon kykʼuʼj tiʼj nimku mintiʼ tajbʼen, ex in che kʼixbʼi tuʼn; tuʼntzun jlu in tzaj xitbʼil kyibʼaj ex in cheʼx tuj najen» (1 Timoteo 6:9). In pon kykʼuʼj xjal kyiʼj nim tiʼchaq kyuʼn saqchbʼil jatumel in che kambʼan tiʼj pwaq. Jaku tzaj nim nya bʼaʼn qiʼj qa ma pon qkʼuʼj tiʼj pwaq, tuʼntzunju, in tzaj tqʼamaʼn Tyol Dios tuʼn miʼn t-xi qqʼoʼn ambʼil te nya bʼaʼn qajbʼil lu (Efesios 5:3).
Tuʼnju nya kwest tuʼn kykambʼan xjal tiʼj pwaq kyuʼn saqchbʼil lu, mas in pon kykʼuʼj tiʼj pwaq. Ex in tzaj tqʼamaʼn Biblia qa «atzun tlokʼ tkyaqil mya bʼaʼn». Aju xjal taj tuʼn tok te qʼinun oʼkx in ximen tiʼj pwaq. Tuʼn jlu jaku tzaj tbʼis ex jaku naj qʼuqbʼil tkʼuʼj tiʼj Dios. Ax ikx, in tzaj tqʼamaʼn Tyol Dios qa «nim o che kʼixbʼisanjtz» qeju «o pon kykʼuʼj tiʼj pwaq» (1 Timoteo 6:10).
Qa in pon tkʼuʼj jun xjal tiʼj nimku tiʼchaq ya mintiʼ in tzalaj tiʼjju at te. In tzaj tqʼamaʼn Eclesiastés 5:10 jlu: «Aju xjal tok tkʼuʼj tiʼj pwaq kukx taj txqantl; aju xjal tok tkʼuʼj tiʼj qʼinumabʼl, tuj twitz qa nim at tukʼil».
Ateʼ nim xjal o che naqʼet kyiʼj saqchbʼil lu ex kwest o tzʼela toj kywitz tuʼn tkyaj kytzaqpiʼn. Toj tnam Estados Unidos ateʼ nim millón xjal o che naqʼet kyiʼj saqchbʼil lu.
In tzaj tqʼamaʼn Proverbios 20:21 qa aqeju xjal in pon kykʼuʼj tiʼj pwaq jakulo che ok te qʼinun, pero mlay che tzaj kʼiwlaʼn tuʼn Dios. Kykyaqil qeju xjal o che naqʼet kyiʼj juego lu, jaku cheʼx tjaqʼ kʼas, jaku che naj kyamiw, jaku naj kyaqʼun ex qe toj kyja. Qa ma chex qbʼiʼn nabʼil in tzaj tqʼamaʼn Tyol Dios jaku che onin qiʼj tuʼn miʼn ttzaj nya bʼaʼn qiʼj kyuʼn saqchbʼil lu.
«Aqeju kyaj tuʼn kyok qʼinun, in che ok tuj joybʼil kyiʼj ex in che kubʼ tzʼaq tuj kʼobʼil, tuʼnju in pon kykʼuʼj tiʼj nimku mintiʼ tajbʼen, ex in che kʼixbʼi tuʼn; tuʼntzun jlu in tzaj xitbʼil kyibʼaj ex in cheʼx tuj najen» (1 Timoteo 6:9).
