Kyxjel qeju in che uʼjin

¿Alqiʼj yolin Pablo toj 2 Corintios 6:14 tej tajbʼen txol yol «qe mya okslal» tuʼn?

In jaw quʼjin jlu toj 2 Corintios 6:14: «Miʼn tzʼok kymojbʼan kyibʼe kyukʼil qe mya okslal». Kyukʼil yol ateʼ ttxlaj texto lu in nel qnikʼ tiʼj qa atz yolin Pablo kyiʼj xjal mintiʼ in che ajbʼen te Dios. Ax ikx, ajbʼen txol yol «mya okslal» tuʼn Pablo toj junjuntl texto.

Jun techel, tqʼama apóstol Pablo qa xi kyiʼn okslal qe kyerman kywitz qe «mya okslal» (1 Corintios 6:6). Tej tajbʼen txol yol «mya okslal» tuʼn Pablo, atz yolin kyiʼj jwes ateʼtoq toj tribunal te Corinto. Toj tkabʼ uʼj xi ttzʼibʼin kye okslal te Corinto, tqʼama qa o moẍsantz kyanbʼil xjal nya okslal tuʼn Satanás «tuʼntzun miʼn tel kynikʼ tiʼj ju spikʼun in qoptzʼaj kyibʼaj». Nya kyaj xjal lu tuʼn kyajbʼen te Jehová tuʼnju otoq tqʼama apóstol Pablo jlu: «Ok kyajtz meltzʼaj xjal tukʼil Qajaw kʼelel qʼiʼn ju xbʼalun» (2 Corintios 3:​16; 4:4).

Ateʼ junjun kyxol qeju xjal nya okslal qe, in kubʼ kybʼinchaʼn nya bʼaʼn moqa in che kʼulin kywitz sant (2 Corintios 6:​15, 16). Noqtzun tuʼnj, nya kykyaqil xjal lu in che ok meltzʼaj kyiʼj tmajen Jehová ex ateʼ junjun kyaj tuʼn tel kynikʼ tiʼj axix tok. Ateʼ junjuntl, in najbʼen kychmil moqa kyxuʼjil te Jehová ex kyaj tuʼn kukx kyten kyukʼil (1 Corintios 7:​12-​14; 10:27; 14:​22-​25; 1 Pedro 3:​1, 2). Pero nimku maj in najbʼen txol yol «mya okslal» tuʼn apóstol Pablo tuʼn tyolin kyiʼj xjal mintiʼ in che ajbʼen te Dios ex nya okslal qe «tiʼj Qajaw» (Hechos 2:​41; 5:​14; 8:​12, 13).

Nim jaku tzʼonin nabʼil in kanet quʼn toj 2 Corintios 6:14 kyiʼj okslal ex mas kyiʼj qeju kyaj tuʼn kykubʼ mojeʼ (Mateo 19:​4-6). Aju xjal o txi tqʼamaʼn te Jehová tuʼn tajbʼen te ex o bautisarin, kbʼel tyekʼin tnabʼil ex mlay kubʼ mojeʼ tukʼil jun xjal nya okslal. ¿Tiquʼn? Tuʼnju junxitl qe xnaqʼtzbʼil nimen tuʼn ex junxitl tiʼ taj tuʼn tbʼant tuʼn toj tanqʼibʼil ik tzeʼn qeju in che ajbʼen te Jehová.

Yajtzun qeju xjal in che xnaqʼtzan tiʼj Tyol Dios ex in che pon kyoj chmabʼil ex qeju o che ok te pakbʼal, ¿jakupe txi qqʼamaʼn qa nya okslal qe? Mlay. ¿Tiquʼn? Tuʼnju in nok tilil kyuʼn xjal lu tuʼn kybautisarin (Romanos 10:10; 2 Corintios 4:​13). Tej naʼmxtoq tbautisarin Cornelio, ojtzqiʼntoq twitz ik tzeʼn jun xjal «nimal Dios ex at tchi Dios tuj twitz» (Hechos 10:2).

Tuʼnju mintiʼ yolin Pablo kyiʼj xjal kyaj tuʼn tel kynikʼ tiʼj Tyol Dios toj 2 Corintios 6:14, ¿tojpe tumel tuʼn tkubʼ t-ximen jun tmajen Jehová tuʼn t-xi tzyet tuʼn tyolin tukʼil jun xjal o tzʼok te pakbʼal? Miʼn. ¿Tiquʼn? Tuʼnju xi tqʼoʼn Pablo consej lu kye xuʼj viud: «Tzoqpiʼntl te xuʼj tuʼn tmojeʼ tukʼil juntl noq al ukʼil tajbʼil, pero tukʼil jun okslal tiʼj Qajaw» (1 Corintios 7:​39). Tuʼn jlu in nel qnikʼ tiʼj qa oʼkx jaku kubʼ mojeʼ jun tmajen Jehová tukʼil «jun okslal tiʼj Qajaw».

¿Tiʼ t-xilen txol yol «okslal tiʼj Qajaw» ex «tmajen Qajaw»? Toj Romanos 16:​8 a 10 ex Colosenses 4:​7, yolin Pablo kyiʼj xjal «okslal tiʼj Crist» moqa «tmajen Qajaw» qe. Aj tjaw quʼjin qe versículo lu, in nel qnikʼ tiʼj qa aqeju xjal lu in che aqʼunan toj «taqʼun Jesucrist», okslal qe, erman qe ex «tmajen Qajaw» qe.

¿Toj alkye ambʼil in nok jun xjal te tmajen Qajaw? Tzaj tqʼoʼn Jesús tzaqʼwebʼil tiʼj xjel lu tej tqʼama jlu: «Qa at jun xjal taj tuʼn tok lpeʼ wiʼje, xkʼayink tibʼ teju tex tajbʼil, qʼinx tcrus, ex lpeʼk wiʼje» (Mateo 16:24). Aj t-xi tqʼamaʼn jun xjal tuʼn tajbʼen te Jehová, in kubʼ tbʼinchaʼn tajbʼil ex in nok lepeʼ tiʼj Cristo. Yajxitl, in bautisarin ex in nok te jun tmajen Dios. * Tuʼntzunju, aj qyolin tiʼjju tuʼn tkubʼ mojeʼ jun xjal «tukʼil jun okslal tiʼj Qajaw», atz in yolin jlu tuʼn tkubʼ mojeʼ tukʼil jun xjal o kubʼ tyekʼin qa ax tok o tzʼok te «tmajen Dios [...] ex tmajen Qajaw Jesucrist» (Santiago 1:1).

Tbʼanel tuʼnju in xnaqʼtzan jun xjal kyukʼil testigos de Jehová ex tuʼnju in nok tilil tuʼn tuʼn tchʼiy toj tokslabʼil. Noqtzun tuʼnj, naʼmx txi tqʼamaʼn te Jehová tuʼn tajbʼen te ex tuʼn tkubʼ tbʼinchaʼn tajbʼil. Kukx kbʼantel junjun chʼixpubʼil tuʼn tuʼntzun t-xi tqʼamaʼn te Jehová tuʼn tajbʼen te ex tuʼn tbautisarin. Ex nim toklen tuʼn tbʼant jlu tuʼn naʼmxtoq tkubʼ t-ximen tuʼn tkubʼ mojeʼ tukʼil jun tmajen Jehová.

¿Tbʼanelpe tuʼn tkubʼ t-ximen jun okslal tuʼn t-xi tzyet tuʼn tyolin tukʼil jun xjal in nok tilil tuʼn tuʼn t-xnaqʼtzan tiʼj Tyol Dios ex tuʼn tayon tiʼj tuʼn tbautisarin tuʼntzun tkubʼ mojeʼ tukʼil? Miʼn. Tuʼnju mlay tzʼel qnikʼ tiʼj qa kʼujlaʼn Jehová tuʼn moqa noq tuʼnju taj tuʼn tkubʼ mojeʼ tukʼil jun okslal.

Chʼixme tkyaqil maj, in nok jun xjal te pakbʼal tzmaxi aj tchʼiy toj tokslabʼil tuʼntzun tbautisarin. Tuʼntzunju, tbʼanel qa ma txi qbʼiʼn consej tuʼn qkubʼ mojeʼ oʼkx «tukʼil jun okslal tiʼj Qajaw». ¿Tiʼ jaku bʼaj qa ma japun tabʼqʼi jun xjal tuʼn tkubʼ mojeʼ, okslal qe toj tja, in nok tilil tuʼn tuʼn tten kyoj chmabʼil ex tuʼn tpakbʼan, pero naʼmx tbautisarin? Qa ikju, ¿tiquʼntzun naʼmx txi tqʼamaʼn te Jehová tuʼn tajbʼen te? ¿Tiquʼn in jawje tkʼuʼj? Mlay txi qqʼamaʼn qa nya okslal, pero ax ikx mlay txi qqʼamaʼn qa «jun okslal tiʼj Qajaw».

Jaku tzaj tiʼn tbʼanel qe qa ma txi qbʼiʼn consej tqʼama Pablo tiʼj mejebʼleʼn (Isaías 48:17). Qa at kabʼe xjal in che ajbʼen te Jehová ex in kubʼ kyximen tuʼn kykubʼ mojeʼ, jaku tzʼonin jlu kyiʼj tuʼn tten jun tbʼanel kymejebʼleʼn ex tuʼn kukx kyajbʼen te Jehová. Ax ikx, jaku che tzalaj tuʼnju ax kyximbʼetz ex axju kyaj tuʼn tbʼant kyuʼn toj kyanqʼibʼil. In kubʼ qyekʼin qa tzʼaqli atoʼ twitz Jehová aj qkubʼ mojeʼ tukʼil «jun okslal tiʼj Qajaw» ex tzul qkʼamoʼn nim kʼiwlabʼil, tuʼnju tzʼaqli te Jehová «tukʼil ju xjal tzʼaqlxix» (Salmo 18:25).

[Tqanil]

[Tilb’ilal]

Tzʼaqli Jehová «tukʼil ju xjal tzʼaqlxix».