Bʼaʼn tuʼn tjaw qjyoʼn aju bʼaʼn in nela toj twitz Dios
Bʼaʼn tuʼn tjaw qjyoʼn aju bʼaʼn in nela toj twitz Dios
«Atzunju xjal at tnabʼl tok tkwent tiʼj jatum in bʼet» (PRO. 14:15).
1, 2. a) ¿Alqiʼj bʼaʼn tuʼn qximen naʼmxtoq t-xi qbʼinchaʼn jun tiʼ? b) ¿Alkye qe xjel kxel qqʼoʼn tzaqʼwebʼil kyiʼj?
TOJ tkyaqil ambʼil in kubʼ qximen tiʼ tuʼn t-xi qbʼinchaʼn. Ateʼ junjun in tzaj kyiʼn nya bʼaʼn qiʼj, atzun junjuntl in chʼexpaj qanqʼibʼil kyuʼn. Qa nim moqa nya nim kyoklen, il tiʼj tuʼn qximen tiʼj tuʼn tjaw qnimsaʼn Dios aj kyjaw qjyoʼn (kjawil uʼjit 1 Corintios 10:31).
2 ¿Jun ratpe in nel tnikʼa tiʼj tiʼ tuʼn t-xi tbʼinchaʼna moqa kwest in nela teya? Qa qaj tuʼn qchʼiy toj qokslabʼil, nim toklen tuʼn tel qnikʼ tiʼj alkye bʼaʼn ex alkye nya bʼaʼn, ex tuʼn tkubʼ qbʼinchaʼn aju bʼaʼn in nela toj qwitz ex nya aju in tzaj kyqʼamaʼn txqantl (Rom. 12:1, 2; Heb. 5:14). ¿Tiquʼn nim toklen tuʼn tel qnikʼ tiʼj tiʼ tuʼn t-xi qbʼinchaʼn? ¿Tiquʼn at maj kwest tuʼn tkubʼ qximen tiʼ tuʼn t-xi qbʼinchaʼn? ¿Tzeʼn jaku jaw qnimsaʼn Dios tukʼilju in kubʼ qximen tuʼn t-xi qbʼinchaʼn?
¿Tiquʼn nim toklen tuʼn tel qnikʼ tiʼj tiʼ tuʼn t-xi qbʼinchaʼn?
3. ¿Alkye junjun tiʼ mintiʼ tuʼn t-xi qbʼinchaʼn aj tkubʼ qximen tiʼ tuʼn tbʼant quʼn?
3 Nim toklen tuʼn miʼn tjawje qkʼuʼj kyiʼj nabʼil ateʼ toj Tyol Dios, tuʼnju jaku kubʼ kyximen qukʼil toj aqʼuntl moqa toj tja xnaqʼtzbʼil qa nya qʼuqli qkʼuʼj kyiʼj ex qa jaku txi qbʼinchaʼn aju kyajbʼil. Bʼalo in che elqʼan, in che sbʼun ex in kyqʼamaʼn nya ax tok yol, ex jakulo tzaj kyqʼamaʼn qe tuʼn qok ik tzeʼn kye moqa tuʼn miʼn t-xi qqʼamaʼn aju in kubʼ kybʼinchaʼn. Qa ma bʼant jlu quʼn in qo ok lepeʼ tiʼjju in bʼant kyuʼn xjal (Éxo. 23:2). Aju okslal taj tuʼn tjaw tnimsaʼn Dios, mintiʼ in xi tbʼinchaʼn kyajbʼil txqantl noq tuʼnju taj tuʼn tten kyukʼil moqa tuʼnju nya taj tuʼn tel ikʼun. Sino in xi tbʼinchaʼn ik tzeʼnx o tzʼel tnikʼ tiʼj toj Tyol Dios (Rom. 13:5).
4. ¿Tiquʼn jaku tzaj kyqʼamaʼn txqantl qe tiʼ tuʼn t-xi qbʼinchaʼn?
4 Nya kykyaqil xjal kyaj tuʼn ttzaj jun nya bʼaʼn qiʼj aj ttzaj kyqʼamaʼn jun tiʼ qe. Ateʼ qe qamiw at jun tbʼanel kyanmi ex kyaj tuʼn t-xi qbʼiʼn kyconsej. Ax ikx, ateʼ toj qja kyaj tuʼn kyonin qiʼj maske mintiʼ in qo anqʼin kyukʼil. Jakulo tzaj kyqʼamaʼn qe tiʼ tuʼn t-xi qbʼinchaʼn aj tkubʼ qximen jun tiʼ nim toklen tuʼnju kʼujlaʼn qoʼ kyuʼn. Jun techel, qo ximen kyiʼj qʼanbʼil in tzaj kyqʼamaʼn doctor qe. In tzaj tqʼamaʼn Tyol Dios qa mintiʼ tuʼn tok qqʼoʼn chikʼ qiʼj (Hech. 15:28, 29). Pero mintiʼ in tzaj tqʼamaʼn qa mlay che ajbʼen junjuntl qʼanbʼil quʼn, tuʼntzunju, teyele junjun okslal kbʼel t-ximen qe che ajbʼel tuʼn moqa miʼn. * Bʼalo jaku tzaj kyqʼamaʼn toj qja qe alkye qʼanbʼil bʼaʼn tuʼn tajbʼen quʼn, noqtzun tuʼnj, bʼaʼn tuʼn ttzaj qnaʼn qa teyele junjun okslal o bautisarin kxel «tiqan tex tiqatz» (Gál. 6:4, 5). Mas bʼaʼn tuʼn t-xi qbʼinchaʼn aju in tzalaj Dios tiʼj ex nya aju kyajbʼil xjal (1 Tim. 1:5).
5. ¿Tiʼ jaku bʼant quʼn tuʼn miʼn tnaj qamiwbʼil tukʼil Jehová?
5 Qa mintiʼ ma tzʼok qeʼ qkʼuʼj tiʼjju in kubʼ qximen, jaku tzaj nim nya bʼaʼn qiʼj. ¿Tiquʼn? Tuʼnju tqʼama discípulo Santiago jlu: «Jun xjal kabʼe tkʼuʼj mya segur taʼ tuj tkyaqil tbʼe» (Sant. 1:8). Qa mintiʼ ttimón jun bark jaku txi qʼiʼn noq jaxku tumel tuʼn kyqʼiqʼ jbʼal. Ax jlu jaku bʼaj tiʼj jun xjal in nok lepeʼ tiʼj kyximbʼetz txqantl, jaku tzaj nya bʼaʼn tiʼj tamiwbʼil tukʼil Jehová. Ateʼ junjun in nok kyqʼoʼn kypaj txqantl tuʼn nya bʼaʼn in tzaj kyiʼj (1 Tim. 1:19). ¿Tiʼ jaku bʼant quʼn tuʼn miʼn tbʼaj jlu qiʼj? Bʼaʼn tuʼn tok tilil quʼn tuʼn qweʼxix toj qokslabʼil (kjawil uʼjit Colosenses 2:6, 7). In qo weʼxix toj qokslabʼil aj tok qeʼ qkʼuʼj tiʼjju in tzaj tqʼamaʼn Tyol Dios kyiʼj tiʼchaq in che jaw qjyoʼn (2 Tim. 3:14-17). Noqtzun tuʼnj, ateʼ junjun tiʼchaq mlay che onin qiʼj aj tkubʼ qximen tiʼ tuʼn t-xi qbʼinchaʼn. ¿Alkyeqe?
¿Tiquʼn at maj kwest tuʼn tkubʼ qximen tiʼ tuʼn t-xi qbʼinchaʼn?
6. ¿Tiʼ jaku bʼaj qiʼj qa ma qo tzaj xobʼ?
6 Jakulo qo tzaj xobʼ tuʼn t-xi qbʼinchaʼn jun tiʼ qa ma kubʼ qximen qa nya bʼaʼn kʼelel moqa jaku che tzeʼn xjal qiʼj. In bʼaj jlu qiʼj tuʼnju ni jun qe taj tuʼn ttzaj nya bʼaʼn tiʼj nix tuʼn tkubʼ tchʼixwi. Pero mlay bʼaj jlu qiʼj qa ma tzʼok qkʼujlaʼn Dios ex Tyol. Kʼonil kʼujlabʼil lu qiʼj tuʼn qjyon tqanil toj Biblia ex kyoj uʼj o che etz tuʼn ttnam Jehová, naʼmxtoq tkubʼ qximen tuʼn t-xi qbʼinchaʼn jun tiʼ nim toklen. Qa ma bʼant jlu quʼn, mlayxix qo el txalpaj. ¿Tiquʼn? Tuʼnju in qo tzaj xnaqʼtzaʼn tuʼn Tyol Dios ex in tzaj tqʼoʼn qnabʼil (Pro. 1:4).
7. ¿Tiʼ xnaqʼtzbʼil in nel qiʼn tiʼj aj kawil David?
7 Qa ma txi qbʼinchaʼn aju ma qo yolin tiʼj, ¿ape t-xilen jlu qa mlay qo el txalpaj? Miʼn, tuʼnju nya tzʼaqli qoʼ (Rom. 3:23). Jun techel tiʼj jlu aju aj kawil David. Ten nim tnabʼil ex kukx ajbʼen te Jehová, noqtzun tuʼnj, at maj el txalpaj ex tzaj nya bʼaʼn tiʼj ex kyiʼj txqantl (2 Sam. 12:9-12). Maske ikju, mintiʼ tzaj bʼaj tkʼuʼj David ex kukx ok tilil tuʼn tuʼn t-xi tbʼinchaʼn aju in tzalaj Dios tiʼj (1 Rey. 15:4, 5). Ik tzeʼn bʼant tuʼn David, bʼaʼn tuʼn ttzaj qnaʼn qa in kubʼ tnajsaʼn Jehová qil, in nikʼ tnaʼl tuʼn ex kukx kʼonil kyiʼj qeju in che nimen te ex at kykʼujlabʼil tiʼj. Qa ma bʼant jlu quʼn, mlay qo tzaj xobʼ tuʼn t-xi qbʼinchaʼn jun tiʼ maske jaku qo el txalpaj (Sal. 51:1-4, 7-10).
8. ¿Tiʼ xnaqʼtzbʼil jaku tzʼel qiʼn tiʼjju tqʼama Pablo tiʼj mejebʼleʼn?
8 ¿Tiʼ jaku tzʼonin qiʼj tuʼn miʼn ttzaj bʼaj qkʼuʼj aj tkubʼ qximen tiʼ tuʼn t-xi qbʼinchaʼn? Bʼaʼn tuʼn ttzaj qnaʼn qa nya oʼkx jun tumel tzeʼn tuʼn kybʼant tiʼchaq. Qo ximen tiʼjju kubʼ ttzʼibʼin apóstol Pablo tiʼj mejebʼleʼn. Tqʼama jlu: «Qa at jun ma kubʼ t-ximan qa mya bʼaʼn tuʼn tkubʼ ttzyuʼn tmeʼjel ex otoq pon tabʼqʼiyil, ex qa il tiʼj tuʼn tmojeʼ, bʼincham alkyeju tajbʼil; bʼaʼn tuʼn tmojeʼ, mya il jlu. Atzunju xjal junx t-ximbʼetz, ex mya il tiʼj tuj twitz tuʼn tmojeʼ tmeʼjel, axte xjal tajwil tnabʼl, qa ma kubʼ t-ximan tuj tanmi tuʼn miʼn t-xi tqʼoʼn tmeʼjel, bʼaʼn in tbʼinchaʼn. Kyjaʼtzun, alkye jun xjal in xi tqʼoʼn tmeʼjel tuʼn tmojeʼ, bʼaʼn in tbʼinchaʼn; ex alkye jun xjal mintiʼ in xi tqʼoʼn tmeʼjel tuʼn tmojeʼ, mas bʼaʼn in tbʼinchaʼn» (1 Cor. 7:36-38). Ik tzeʼn ma tzʼel qnikʼ tiʼj, tqʼama Pablo qa bʼaʼn tuʼn tkubʼ mojeʼ jun xjal ex qa bʼaʼn tuʼn miʼn tkubʼ mojeʼ.
9. ¿Bʼaʼnpe tuʼn ttzaj bʼaj qkʼuʼj tiʼjju tzul kyqʼamaʼn txqantl? Chikʼbʼantza.
9 ¿Bʼaʼnpe tuʼn ttzaj bʼaj qkʼuʼj tiʼjju tzul kyqʼamaʼn txqantl? Bʼaʼn, pero nya tkyaqil maj. Qo xnaqʼtzan tiʼjju tqʼama Pablo tiʼj wabʼj otoq kubʼ kyqʼoʼn xjal kywitz tilbʼilal. Tnejel, tqʼama qa jaku kubʼ qximen junjun tiʼchaq toj tumel, pero jaku tzaj bʼaj kykʼuʼj qeju naʼmx kychʼiy toj kyokslabʼil tuʼn. ¿Tiʼtzun kubʼ t-ximen Pablo tuʼn t-xi tbʼinchaʼn? Tqʼama jlu: «Qa tuʼn tlaj nchiʼye kbʼel tzʼaq wermaniye tuj il, mlayx txi nchyoʼne chibʼj, tuʼntzun miʼn tkubʼ tzʼaq wermaniye tuj il» (1 Cor. 8:4-13). Ax ikx qe bʼaʼn tuʼn qximen tiʼjju jaku tzaj kyiʼj txqantl tuʼnju in kubʼ qbʼinchaʼn, pero aju mas nim toklen aju jaku tzaj tiʼj qamiwbʼil tukʼil Jehová (kjawil uʼjit Romanos 14:1-4). ¿Alkyeqe nabʼil jaku che onin qiʼj tuʼn tjaw qnimsaʼn Dios tukʼilju in kubʼ qximen?
Qaq nabʼil jaku che onin qiʼj tuʼn tjaw qjyoʼn aju bʼaʼn
10, 11. a) ¿Tiʼ jaku tzʼonin qiʼj tuʼn miʼn t-xi qbʼinchaʼn qe tiʼchaq mintiʼ qoklen tiʼj toj qja? b) ¿Tiʼ bʼaʼn tuʼn ttzaj kynaʼn ansyan aj tkubʼ kyximen junjun tiʼchaq toj kʼloj okslal?
10 Miʼn kubʼ qximen tuʼn tkubʼ qbʼinchaʼn jun tiʼ qa mintiʼ qoklen tiʼj. Bʼaʼn tuʼn tkubʼ qxjelin jlu: «¿Atpe woklene tuʼn tbʼant jlu wuʼne?». Kubʼ ttzʼibʼin aj kawil Salomón jlu: «Aju xjal in jaw tniman tibʼ kbʼel tchʼixwi; ex kyukʼil qe xjal mans, atzun taʼ nabʼl» (Pro. 11:2).
11 Jun techel, jaku txi tqʼoʼn jun mambʼaj ambʼil te tkʼwal tuʼn t-xi tbʼinchaʼn junjun tiʼchaq. Pero nya a t-xilen jlu qa jaku txi tbʼinchaʼn noq alkyexku tajbʼil (Col. 3:20). Ax ikx te txubʼaj o txi qʼoʼn ambʼil te tuʼn t-xi tbʼinchaʼn junjun tiʼchaq, pero mintiʼ tuʼn tikʼ tnaʼl tuʼn qa a chmilbʼaj wibʼaj toj ja (Pro. 1:8; 31:10-18; Efe. 5:23). Ex bʼaʼn tuʼn ttzaj tnaʼn chmilbʼaj qa il tiʼj tuʼn tokx tqʼon tibʼ tjaqʼ tkawbʼil Cristo (1 Cor. 11:3). Toj kʼloj okslal, aʼye ansyan in che kubʼ ximente tiʼ tuʼn t-xi bʼinchet, aju jaku tzaj tiʼn bʼaʼn moqa nya bʼaʼn kyiʼj erman. Tuʼntzunju, mintiʼ tuʼn kyikʼ tibʼajju in tzaj tqʼamaʼn Tyol Dios (1 Cor. 4:6). Ax ikx, bʼaʼn tuʼn tok tilil kyuʼn tuʼn kyok lepeʼ tiʼj tqanil in tzaj tqʼoʼn majen in bʼant taqʼun ex at tnabʼil (Mat. 24:45-47). Qa nya qaj tuʼn ttzaj nya bʼaʼn qiʼj ex kyiʼj txqantl, bʼaʼn tuʼn tkubʼ qin qibʼ ex tuʼn t-xi qbʼinchaʼn qe tiʼchaq at qoklen kyiʼj.
12. a) ¿Tiquʼn il tiʼj tuʼn qjyon tqanil? b) ¿Ex tiʼ tqanil bʼaʼn tuʼn t-xi qjyoʼn?
12 Bʼaʼn tuʼn tok qbʼiʼn tkyaqil tqanil. Kubʼ ttzʼibʼin Salomón jlu: «Aju xjal nej in kubʼ ten ximal tiʼj alkye tuʼn tbʼant tuʼn, bʼaʼn nneʼl te te, atzunju xjal noq t-xoʼn tibʼ tiʼj jun tiʼxti ex mintiʼ in kubʼ ten ximal tiʼj qa bʼaʼn, ktzajel mebʼayil tiʼj» (Pro. 21:5). Qo xnaqʼtzan tiʼj jun techel. ¿Ope txi qʼamaʼn teya qa taja jun taqʼuna? Miʼn txi ttzaqʼweʼn naja. Bʼaʼn tuʼn t-xi tjyoʼna tqanil ex qaninxa tnabʼila kye qeju at kyojtzqibʼil tiʼj aqʼuntl. Ax ikx, ximana kyiʼj nabʼil in tzaj tqʼoʼn Tyol Dios tiʼj aqʼuntl lu (Pro. 20:18). Yajxitl, jaku kubʼ tbʼinchaʼna jun lista kyiʼj tiʼchaq tbʼanel ex nya tbʼanel jaku tzaj tuʼn. Bʼaʼn tuʼn ttzaj tnaʼna qa aju okslal at tnabʼil in «kubʼ qeʼ ximal» tiʼjju kxel tbʼinchaʼn (Luc. 14:28). Ximana tiʼjju jaku tzaj tiʼj tamiwbʼila tukʼil Jehová ex nya oʼkx tiʼj pwaq. Tuʼn tel qnikʼ tiʼj tkyaqil jlu, in xi tiʼn ambʼil ex qipumal, pero kʼonil qiʼj tuʼn miʼn t-xi qbʼinchaʼn naj aju in tzaj qʼamaʼn qe ex mlay tzaj bʼaj qkʼuʼj tiʼjju kxel qbʼinchaʼn.
13. a) ¿Tiʼ in tzaj ttziyen Santiago 1:5 qe? b) ¿Tiquʼn nim toklen tuʼn t-xi qqanin qnabʼil te Dios?
13 Bʼaʼn tuʼn t-xi qqanin qnabʼil te Dios. Qqaninx onbʼil te Jehová tuʼn ttzalaj tiʼjju in kubʼ qximen tuʼn tbʼant quʼn. Tqʼama Santiago jlu: «Qa at jun kyxole atx taj tnabʼl, qaninx tnabʼl te Dios, ex ktzajel tqʼoʼn Dios tnabʼl; porke ate Dios nimxix in tzaj tqʼoʼn kye kykyaqil ex mintiʼ in ilin» (Sant. 1:5). Nya chʼixbʼajil tuʼn t-xi qqanin qnabʼil te Dios tuʼn tel qnikʼ tiʼj tiʼ tuʼn t-xi qbʼinchaʼn (Pro. 3:5, 6). Qa ma tzʼok qeʼ qkʼuʼj qiʼjx, jaku tzaj nya bʼaʼn qiʼj. Qa ma qo kubʼsan twitz Jehová tuʼn ttzaj tqʼoʼn qnabʼil ex qa ma qo jyon onbʼil toj Tyol, kʼonil xewbʼaj xjan qiʼj tuʼn tel qnikʼ tiʼj tiquʼn bʼaʼn tuʼn t-xi qbʼinchaʼn jun tiʼ (Heb. 4:12; kjawil uʼjit Santiago 1:22-25).
14. ¿Tiquʼn mintiʼ tuʼn tkyaj qqʼoʼn te yajxitl aju in kubʼ qximen?
14 Miʼn kyaj qqʼoʼn te yajxitl. Bʼaʼn tuʼn tok tilil quʼn tuʼn qjyon tqanil, tuʼn t-xi qqanin qnabʼil ex nya jurat tuʼn t-xi qbʼinchaʼn qe tiʼchaq. Ikju, aju xjal at tnabʼil in ximen tiʼjju in xi tbʼinchaʼn (Pro. 14:15). Pero nya bʼaʼn qa ma kubʼ qayon nim ambʼil. Aju xjal in jawje tkʼuʼj, in xi tjyoʼn junjuntl tumel tuʼn miʼn t-xi tbʼinchaʼn aju in kubʼ t-ximen (Pro. 22:13). Noqtzun tuʼnj, qa mintiʼ in nel tnikʼ tiʼj jun tiʼ, in xi tqʼoʼn ambʼil kye txqantl tuʼn ttzaj kyqʼamaʼn te tiʼ tuʼn t-xi tbʼinchaʼn.
15, 16. ¿Tiʼ il tiʼj tuʼn tbʼant quʼn tuʼn t-xi qbʼinchaʼn aju in kubʼ qximen?
15 Qbʼinchanx aju in kubʼ qximen. Noqx gan ambʼil in nel qpan tuʼn tkubʼ qximen tiʼ tuʼn tbʼant quʼn qa mintiʼ in kubʼ qbʼinchaʼn. Tqʼama Salomón jlu: «Tkyaqilju at tuʼn tbʼant tuʼna, tzʼok tililx tuʼna tuʼn tbʼant» (Ecl. 9:10). Ax ikx, bʼaʼn tuʼn kyajbʼen kykyaqil onbʼil quʼn tuʼntzun tel bʼaʼn aju in kubʼ qximen. Qo ximen tiʼj jun pakbʼal taj tuʼn tok te precursor. ¿Okpe ktzalajel tiʼj pakbʼabʼil? Ok, qa ma tzʼok t-xuqin tibʼ tuʼn miʼn t-xi tnajsaʼn nim ambʼil kyiʼj saqchbʼil ex tiʼj aqʼuntl.
16 Chʼixme tkyaqil maj, kwest tuʼn tkubʼ qbʼinchaʼn tbʼanel tiʼchaq in kubʼ qximen. ¿Tiquʼn? Tuʼnju «kykyaqil xjal twitz txʼotxʼ ateʼ tjaqʼ tipumal tajaw il» (1 Juan 5:19). Ikju, «in qo qʼojin, [...] kyukʼil qeju in che kawin tuj qlolj twitz txʼotxʼ, ex kyukʼil qe juʼẍ mya bʼaʼn qe nim kyajlal ateʼ twitz kyaʼj» (Efe. 6:12). Ik tzeʼn tqʼama Pablo ex Judas, il tiʼj tuʼn kyqʼojin tmajen Dios kyukʼil tiʼchaq lu qa kyaj tuʼn tjaw kynimsaʼn (1 Tim. 6:12; Jud. 3).
17. ¿Tiʼ taj Jehová tuʼn tbʼant quʼn otoqxi kubʼ qximen tiʼ tuʼn tbʼant quʼn?
17 Qo ximen tiʼjju otoq bʼant quʼn ex qbʼincham chʼixpubʼil qa il tiʼj. At maj mintiʼ in che bʼant qe tiʼchaq ik tzeʼn otoq kubʼ qximen, tuʼnju «noq minabʼen» in bʼaj jun tiʼ (Ecl. 9:11, 12). Maske ikju, taj Jehová tuʼn t-xi qbʼinchaʼn junjun tiʼchaq ya otoq kubʼ qximen maske in qo ok weʼ twitz junjun nya bʼaʼn. Jun techel, kukx taj Jehová tuʼn tjapun twi qyol xi qtziyen tej qkubʼ mojeʼ moqa tej t-xi qqʼamaʼn te qa ok qo ajbʼel te (kjawil uʼjit Salmo 15:1, 2, 4). Ateʼ junjun tiʼchaq nyaxix nim toklen tuʼn tkubʼ qximen. Pero aju okslal at tnabʼil in nok tqʼoʼn twitz kyiʼj ex mintiʼ in jaw tnimsan tibʼ, sino in bʼant chʼixpubʼil tuʼn qa il tiʼj moqa ya mintiʼ in xi tbʼinchaʼn (Pro. 16:18). Aju mas nim toklen toj twitz aju tuʼn tjaw tnimsaʼn Dios.
Qo onin kyiʼj txqantl tuʼn tjaw kynimsaʼn Dios tukʼilju in kubʼ kyximen
18. ¿Tzeʼn jaku che onin mambʼaj kyiʼj kykʼwal tuʼn tel kynikʼ tiʼj tiʼ tuʼn t-xi kybʼinchaʼn?
18 At nim tiʼ jaku bʼant kyuʼn mambʼaj tuʼn kyonin kyiʼj kykʼwal tuʼn tjaw kynimsaʼn Dios tukʼilju in bʼant kyuʼn. Jaku bʼant jlu kyuʼn aj tkubʼ kyqʼoʼn jun tbʼanel techel kywitz (Luc. 6:40). Ax ikx, jaku txi kychikʼbʼaʼn kye kykʼwal tiʼ bʼant kyuʼn tej naʼmxtoq t-xi kybʼinchaʼn jun tiʼ. Ex jaku txi kyqʼoʼn ambʼil kye kykʼwal tuʼn tkubʼ kyximen tzeʼn tuʼn t-xi kybʼinchaʼn junjun tiʼchaq. Qa toj tumel ma bʼant kyuʼn, jaku txi kyqʼamaʼn tbʼanel yol kye. Pero, ¿yajtzun qa ma che el txalpaj? Bʼalo in kubʼ kyximen mambʼaj tuʼn kykolin kyiʼj kykʼwal, noqtzun tuʼnj, nya tbʼanel qa ma bʼant jlu kyuʼn. Jun techel, qo ximen tiʼj jun mambʼaj in xi tqʼoʼn ambʼil te tkʼwal tuʼn tetz t-licencia tuʼn tmanejarin. Noqtzun tuʼnj, in bʼant jun tiʼ nya bʼaʼn tuʼn tkʼwal ex in nel qʼiʼn tmult. Bʼalo jun rat jaku txi tchjoʼn mambʼaj tmult. Pero mas jaku tzʼok tnabʼil kʼwal qa ma txi tqʼamaʼn mambʼaj te tuʼn taqʼunan tuʼntzun tchjet tmult (Rom. 13:4).
19. ¿Tiʼ il tiʼj tuʼn t-xi qxnaqʼtzaʼn kye qeju in che xnaqʼtzan tiʼj Tyol Dios qukʼil ex tzeʼn jaku bʼant quʼn?
19 Tqʼama Jesús qa nim toklen tuʼn t-xi qqʼoʼn xnaqʼtzbʼil kye xjal (Mat. 28:20). Ex jun kyxol qe tiʼchaq jaku txi qxnaqʼtzan kye xjal in che xnaqʼtzan tiʼj Tyol Dios aju tuʼn tel kynikʼ tiʼj tiʼ tuʼn t-xi kybʼinchaʼn. Tuʼn tbʼant jlu kyuʼn, mintiʼ tuʼn t-xi qqʼamaʼn kye tiʼ tuʼn tbʼant kyuʼn aj kyok weʼ twitz junjun nya bʼaʼn. Mas bʼaʼn tuʼn qonin kyiʼj tuʼn tok kynabʼil ex tuʼn kyximen kyiʼj nabʼil tkuʼx toj Tyol Dios. Bʼaʼn tuʼn ttzaj qnaʼn qa «teyle junjun qe ok tqʼaʼ tajlal twitz Dios tiʼj tbʼinchbʼen» (Rom. 14:12). Qʼuqli qkʼuʼj tiʼj qa at nim tiquʼn tuʼn tjaw qnimsaʼn Dios tukʼilju in kubʼ qximen.
[Tqanil]
^ Qa taja tuʼn tel mas tnikʼa tiʼj xnaqʼtzbʼil lu, jyonxa xnaqʼtzbʼil tok tbʼi «¿Qué opino de las fracciones sanguíneas y de los procedimientos médicos que impliquen el uso de mi sangre?» (Nuestro Ministerio del Reino te noviembre te 2006, t-xaq 3 a 6).
¿Tiʼ teya jaku tzaj ttzaqʼweʼn?
• ¿Tiquʼn nim toklen tuʼn tel qnikʼ tiʼjju tuʼn t-xi qbʼinchaʼn?
• ¿Tiʼ jaku tzaj qiʼj qa ma qo tzaj xobʼ ex tiʼ jaku bʼant quʼn tuʼn miʼn tbʼaj jlu qiʼj?
• ¿Alkyeqe qaq tiʼ jaku bʼant quʼn tuʼn tjaw qnimsaʼn Dios tukʼilju in kubʼ qbʼinchaʼn?
[Aʼyeju xjel tiʼj xnaqʼtzbʼil]
[Aju recuadro/Aju tilbʼilal toj t-xaq 16]
Junjun tiʼ jaku bʼant quʼn tuʼn tjaw qjyon aju bʼaʼn
1 Miʼn kubʼ qximen tuʼn tkubʼ qbʼinchaʼn jun tiʼ qa mintiʼ qoklen tiʼj
2 Bʼaʼn tuʼn tok qbʼiʼn tkyaqil tqanil
3 Bʼaʼn tuʼn t-xi qqanin qnabʼil te Dios
4 Miʼn kyaj qqʼoʼn te yajxitl
5 Qbʼinchanx aju in kubʼ qximen
6 Qo ximen tiʼjju otoq bʼant quʼn ex qbʼincham chʼixpubʼil qa il tiʼj
[Aju tilbʼilal toj t-xaq 15]
In nok xjal in jawje tkʼuʼj tiʼjju in xi tbʼinchaʼn ik tzeʼn jun bark mintiʼ ttimón toj kyqʼiqʼ jbʼal.