Xi tqʼamaʼn Jesús jlu te jun xjal tajtoq tuʼn tok lepeʼ tiʼj: «Txiʼya tjaya kyxol qe termaniya, ex txʼolbʼanxa kye aju nimxix ma tbʼincha Qman teya ex tzaʼn tten ma tzaj qʼaqʼan tkʼuʼj tiʼja» (Mar. 5:19). Bʼalo atztoq taʼ Jesús nqayin tiʼj tnam Gadara, atz kubʼni toj telex Qʼij te mar te Galilea. In tzaj kyyekʼin tyol Jesús qa kygan xjal tuʼn kyyolin kyiʼj tiʼchaq mas nim kyoklen toj kywitz kyukʼil toj kyja.

Ex atzun jlu in nok qqʼoʼn twitz tiʼj toj ambʼil jaʼlo. Jun techel, aj tel qnikʼ tiʼj Tyol Dios, qaj tuʼn qyolin tiʼj jlu kyukʼil toj qja. Pero, ¿tzeʼn jaku bʼant jlu quʼn? ¿Tiʼ jaku bʼant quʼn tuʼn tpon xnaqʼtzbʼil toj kyanmi toj qja junxitl kyokslabʼil moqa mintiʼ nimen Dios kyuʼn? In kanet junjun tbʼanel consej quʼn toj Tyol Dios.

Toj tnejel syent abʼqʼi, jun kyxol qeju xjal el kynikʼ tiʼj qa a Jesús Mesías, ten Andrés. ¿Alqetzun xi tqʼamaʼn naj? «Nej xiʼ Andrés jyolte Simón aju ttzik; tejtzun tknet tuʼn, xi tmaʼn te: —Ma knet ju Mesías quʼne, chi Andrés. (Aju yol Mesías atzun in tmaʼn aju Crist aju at toklen tuʼn Dios)». Yajxitl, xi tiʼn Andrés te Pedro jatumel attoq Jesús ex onin tiʼj tuʼn tok te tdisípulo (Juan 1:35-42).

Yajxitl, tej tikʼ qaq abʼqʼi, atztoq taʼ Pedro toj tnam Jope, pero xi qʼamaʼn te tuʼn t-xiʼ toj tnam Cesarea toj tja jun nejenel kye soldad aju Cornelio tbʼi. ¿Alkyeqe e kanet tuʼn tej tpon atz? In tzaj tqʼamaʼn Tyol Dios jlu: «Atzunte Cornelio in ayontoq kyiʼj [Pedro ex qe tukʼil], otoq che tzaj ttxkoʼn qeju at kyxilen tukʼil ex qe tamiw aqeju kʼujlaʼnxix tuʼn» (Hech. 10:22-33). Tuʼn jlu in nel qnikʼ tiʼj qa xi tqʼoʼn Cornelio ambʼil kye toj tja tuʼn tok kybʼiʼn tyol Pedro ex tuʼn tkubʼ kyximen tiʼtoq tuʼn tbʼant kyuʼn.

¿Tiʼ xnaqʼtzbʼil in nel qiʼn tiʼj tmod Andrés ex Cornelio kubʼ kyyekʼin kyukʼil toj kyja?

Kykabʼil ok tilil kyuʼn tuʼn kyonin kyiʼj toj kyja. Onin Andrés tiʼj Pedro tuʼn tok tojtzqiʼn Jesús, atzunte Cornelio e ok tchmoʼn qe toj tja tuʼn tok kybʼiʼn tyol Pedro. Pero mintiʼ e ok ky-obligarin qe toj kyja tuʼn kyok te okslal moqa nimel. ¿Tiʼ in tzaj tyekʼin jlu qe ex tzeʼn jaku tzʼel qkanoʼn kyiʼj? Bʼalo jaku txi qqʼamaʼn jun xnaqʼtzbʼil nim toklen kye toj qja, jaku tzaj qjyoʼn jun tbʼanel ambʼil tuʼn qyolin kyukʼil tiʼj Tyol Dios moqa jaku tzʼok kyojtzqiʼn junjuntl erman. Pero bʼaʼn tuʼn ttzaj qnaʼn tuʼn miʼn kyok qchqʼoʼn nix tuʼn tkubʼ kynaʼn nya bʼaʼn. Tuʼn tel qnikʼ tzeʼn jaku qo onin kyiʼj, qo xnaqʼtzan tiʼjju bʼaj tiʼj Jürgen ex Petra, jun mejebʼleʼn te Alemania.

Xnaqʼtzan Petra tiʼj Tyol Dios kyukʼil testigos de Jehová ex bautisarin. Atzunte Jürgen, in najbʼentoq te soldad ex nya bʼaʼn ela toj twitz tej tbautisarin Petra. Noqtzun tuʼnj, tej tbʼet ambʼil el tnikʼ tiʼj qa in tzaj kyxnaqʼtzaʼn testigos de Jehová aju axix tok tiʼj Tyol Dios. Tuʼntzunju, kubʼ t-ximen tuʼn tajbʼen te Jehová ex jaʼlo in najbʼen te ansyan toj kʼloj okslal. ¿Tiʼ in tzaj tqʼamaʼn Jürgen tuʼn tbʼant quʼn tuʼn tpon Tyol Dios toj kyanmi toj qja junxitl kyokslabʼil?

In tzaj tqʼamaʼn jlu: «Miʼn che ok t-obligarina qe toj tjaya tuʼn t-xi kyimen aju nimen tuʼna ex miʼn txi tqʼamaʼna nim xnaqʼtzbʼil kye, tuʼnju jaku tzʼel kypan kyibʼ tiʼja. Mas bʼaʼn tuʼn miʼn tyolina tiʼj Tyol Dios tkyaqil maj. Ax ikx, tbʼanel qa ma tzʼok kyojtzqiʼn junjun erman ax kyabʼqʼi ik tzeʼn kye moqa aʼyex tiʼchaq kygan, tuʼnju jaku tzʼonin kyiʼj tuʼn kyxnaqʼtzan tiʼj Tyol Dios».

Xi tbʼiʼn naj Pedro ex qe toj tja Cornelio aju in tzaj tqʼamaʼn Tyol Dios. Pero ateʼ junjuntl xi tiʼn mas ambʼil tuʼn tel kynikʼ tiʼj.

Ateʼ nim toj tja Jesús ok qeʼ kykʼuʼj tiʼj toj ambʼil tej tpakbʼan. Ik tzeʼn apóstol Santiago ex Juan tukʼix kytxuʼ Salomé. Bʼalo tprim Jesús qe ex ttiya Salomé. Ex alo jun kyxol qe xuʼj lu onin tiʼj Jesús ex kyiʼj t-apóstol (Luc. 8:1-3).

Pero ateʼ junjuntl toj tja Jesús xi tiʼn ambʼil tuʼn tok qeʼ kykʼuʼj tiʼj. Jun maj, tej otoq tzikʼ mas te jun abʼqʼi tbautizarin Jesús, ok kychmon kyibʼ nim xjal tuʼn kybʼin tiʼj. ¿Tiʼtzun bʼaj? In tzaj tqʼamaʼn Tyol Dios jlu: «Tejtzun kybʼinte qe terman Jesús, e ul qʼil te porke in kymaʼn qa otoq tzʼok te tzkaj». Yajxitl, tej t-xi kyqanin medio terman te jatumeltoq tuʼn t-xiʼ, mintiʼ xi tqʼamaʼn kye. ¿Tiquʼn? Tuʼnju «mintiʼ e okslan tiʼj» (Mar. 3:21; Juan 7:5).

¿Tiʼ xnaqʼtzbʼil jaku tzʼel qiʼn tiʼj tmod Jesús ten kyukʼil toj tja? Mintiʼ tzaj tqʼoj tej t-xi kyqʼamaʼn te qa otoq tzʼok te tzkaj moqa otoq naj tnabʼil. Kukx onin Jesús kyiʼj toj tja, axpe ikx tej tkubʼ bʼyoʼn ex tej tjaw anqʼin. ¿Tiquʼn in xi qqʼamaʼn jlu? Tuʼnju kubʼ tyekʼin tibʼ twitz Santiago tej tjaw anqʼin, aju medio terman. Jaku qqʼama qa onin jlu tiʼj Santiago ex kyiʼj junjuntl terman tuʼn tok qeʼ kykʼuʼj tiʼj qa a Jesús Mesías. Ax ikx, e ten medio terman junx kyukʼil apóstol ex junjuntl okslal toj jun ja te Jerusalén tej ttzaj kykʼamoʼn xewbʼaj xjan. Yajxitl, xi qʼoʼn junjun aqʼuntl nim toklen te Santiago ex te Judas, juntl medio terman Jesús (Hech. 1:​12-14; 2:​1-4; 1 Cor. 15:7).

Ik tzeʼn bʼaj toj tnejel syent abʼqʼi, ax ikx toj ambʼil jaʼlo ateʼ junjun toj qja kyaj mas ambʼil tuʼn tkubʼ kyximen tuʼn kybʼet toj bʼe te chwinqlal. Qo yolin tiʼjju bʼaj tiʼj jun xuʼj Roswitha tbʼi. Tej tok tchmil te testigo de Jehová toj 1978, tokxtoq xuʼj lu toj okslabʼil Católica. Tuʼnju qʼuqlitoq tkʼuʼj tiʼjju nimen tuʼn, nya bʼaʼn ela toj twitz tej tbautisarin tchmil. Pero tej tbʼet ambʼil, chʼexpaj tmod ex el tnikʼ tiʼj qa in xi kyxnaqʼtzaʼn testigos de Jehová axix tok. Ex bautisarin toj 2003. ¿Tiʼ onin tiʼj tuʼn tchʼexpaj t-ximbʼetz? Chʼexpaj t-ximbʼetz Roswitha tuʼn tbʼanel tmod tchmil kubʼ tyekʼin tukʼil, tuʼnju mintiʼ aj tqʼoʼn t-xel nya bʼaʼn ok tbʼinchaʼn tiʼj ex ten tpasens tiʼj. In tzaj tqʼamaʼn Roswitha jlu: «Jaku tzaj nim tbʼanel qa ma ten qpasens, qpasens ex nim qpasens».

Bautisarin Monika toj 1974 ex tej tikʼ chʼixme 10 abʼqʼi e bautisarin kabʼe tal. Mintiʼ tzaj tqʼoj tchmil tiʼjju bʼant tuʼn, aju Hans tbʼi. Pero xi tiʼn ambʼil tuʼn tbautisarin, bʼant jlu tuʼn toj 2006. Aj kyximen tiʼjju bʼaj kyiʼj, in tzaj kyqʼamaʼn jlu: «Kukx tzʼajbʼena te Jehová ex miʼn txi tqʼoʼna ambʼil tuʼn tchewix qʼuqbʼil tkʼuʼja». Kukx kubʼ kyyekʼin toj tja Hans qa kʼujlaʼntoq kyuʼn ex nim onin jlu tiʼj tuʼn tchʼiy qʼuqbʼil tkʼuʼj. Ex ok qeʼ kykʼuʼj toj tja tiʼj qa kpol jun qʼij tuʼn tok te testigo de Jehová.

Tqʼama Jesús qa aju tqanil tkuʼx toj Tyol Dios ik tten ik tzeʼn aʼ in tzaj tqʼoʼn qchwinqlal (Juan 4:​13, 14). Qaj tuʼn t-xi kykʼaʼn toj qja aʼ lu, pero nya qaj tuʼn t-xi qqʼoʼn nim kye. Tuʼn tbʼant jlu, at toklen tukʼilju tzeʼn kxel qqʼamaʼn kye aju nimen quʼn. In tzaj tqʼamaʼn Tyol Dios jlu: «Aju xjal tzʼaqlxix, nej in kubʼ ten ximal tiʼj alkye yol tuʼn t-xiʼ ttzaqʼweʼn» ex «aju xjal at tnabʼl, tok tkwent tiʼj tyol, ex in kubʼ tiʼj kynabʼl xjal tuʼn tyol» (Prov. 15:28; 16:23). ¿Tzeʼn jaku bʼant jlu quʼn?

Aju xuʼjilbʼaj taj tuʼn tel tnikʼ tchmil tiʼjju nimen tuʼn, tnejel «in kubʼ ten ximal tiʼj alkye yol tuʼn t-xiʼ ttzaqʼweʼn». Mintiʼ tuʼn tjaw tnimsan tibʼ twitz tchmil ex mintiʼ tuʼn tkubʼ tyekʼin qa mas tzʼaqli te twitz tchmil. Iktzun tten, jaku che onin tyol tiʼj tchmil ex ktel mujbʼabʼil kyxol. Tuʼn kyajbʼen tbʼanel yol tuʼn jun xuʼjilbʼaj, bʼaʼn tuʼn tkubʼ t-xjelin jlu: «¿Toj alkye ambʼil mas bʼaʼn tuʼn nyoline tukʼil nchmile? ¿Alkyeqe tiʼchaq taj tuʼn tyolin tiʼj? ¿Tiʼ tgan tuʼn tuʼjin tiʼj? ¿Tganpe tuʼn tyolin kyiʼj aj kawil, kyiʼj saqchbʼil moqa tiʼj juntl tiʼ? ¿Tzeʼn jaku chin onine tiʼj tuʼn tel tnikʼ tiʼj Tyol Dios ex tuʼn tok nqʼoʼne toklen t-ximbʼetz?».

Noqtzun tuʼnj, nya oʼkx jlu tuʼn tbʼant quʼn tuʼn tpon tqanil toj kyanmi toj qja mintiʼ in che ajbʼen te Jehová. Ax ikx, nim toklen tuʼn tkubʼ qanqʼin aju in xi qqʼamaʼn kye.

In tzaj tqʼamaʼntl Jürgen jlu: «Kukx bʼinxa qe consej in tzaj tqʼamaʼn Tyol Dios. Iktzun tten kʼelel kynikʼ toj qja tiʼj qa in kubʼ qanqʼin aju in nel qnikʼ tiʼj, maske mintiʼ in tzaj kyqʼamaʼn qe». Ax t-ximbʼetz Hans tiʼj jlu, aju bautisarin tej otoq tzikʼ junlo 30 abʼqʼi tej tbautisarin t-xuʼjil. Tqʼama jlu: «Bʼaʼn tuʼn tkubʼ qyekʼin tbʼanel qmod, iktzun tten kʼelel kynikʼ toj qja tiʼj qa in nonin Tyol Dios qiʼj». Nim toklen tuʼn tel kynikʼ tiʼj qa o tzʼonin Tyol Dios qiʼj tuʼn qok te tbʼanel xjal.

Xi tqʼamaʼn Pedro tbʼanel consej lu kye xuʼjilbʼaj nya okslal kychmil: «Ax ikx kyeye aqeye xuʼj, kynimanx kychmile tuʼntzun tokslan kychmile qa mya okslal kychmile tiʼj tyol Dios, mya tuʼn yol tuʼn tokslan, noq oʼkx tuʼnju kymodiye bʼaʼn. Jakulo tzʼokslan kychmile ok tkeʼyinte mintiʼ jun kyximbʼetze mya bʼaʼn ex bʼaʼn che nimane te. Aju kyyekʼbʼil kyibʼe myawt aju qʼanchaʼl tuʼn tbʼaj kybʼinchaʼne ttzmal kywiʼye ax tuʼn tok bʼaj kywitz xjal tiʼj, ex qa tuʼn tok kyqʼoʼne ganch qʼan pwaq kyiʼje, ex qa tuʼn tok kyqʼoʼne kyxbʼalune wiʼyilxix; noq oʼkx tuʼn kyyekʼunteye aju at tuj kyanmiye, aju tbʼanilxix, tuʼn tten kyanmiye mans ex txulch, atzun jlu tbʼanilxix ex mlay naj, ex atzun jlu wiʼyilxix tuj twitz Dios» (1 Ped. 3:​1-4).

Tqʼamaʼn Pedro qa jaku onin tmod xuʼjilbʼaj tiʼj tchmil. Qqʼonk qwitz tiʼjju bʼaj tiʼj ermana Christa. Atxix tej tbautisarin toj 1972, o tzʼok tilil tuʼn tuʼn tpon Tyol Dios toj tanmi tchmil. O xnaqʼtzan tchmil tiʼj Tyol Dios pero naʼmx tkubʼ t-ximen tuʼn tajbʼen te Jehová. In xiʼ kyoj junjun chmabʼil ex tbʼanel tmod kyukʼil erman aʼyeju in nok kyqʼoʼn toklen t-ximbʼetz. ¿Tzeʼn in nonin Christa tiʼj tchmil?

In tzaj tqʼamaʼn jlu: «Kukx chin bʼetele toj bʼe in tzaj tyekʼin Jehová weye. Ax ikx waje tuʼn tonin nmode tiʼj nchmile «tuʼn tokslan». In nok tilil wuʼne tuʼn wonine tiʼj toj tkyaqil, oʼkx mintiʼ in bʼant wuʼne qa mintiʼ in tzaj tqʼoʼn Biblia ambʼil. Ax ikx, in nok nqʼoʼne toklen aju taj tuʼn tbʼant tuʼn ex in kyaj nqʼoʼne tkyaqil toj tqʼabʼ Jehová».

Aju bʼaj tiʼj Christa in tzaj tyekʼin qe qa il tiʼj tuʼn tel qnikʼ kyiʼj txqantl. Maske kukx in bʼet kyoj chmabʼil ex in nex pakbʼal, kukx in ximen tiʼj tchmil. Tuʼntzunju, in kubʼ tyekʼin tkʼujlabʼil tiʼj tchmil, in nel tpaʼn ambʼil tuʼn tten tukʼil. Qkyaqilx bʼaʼn tuʼn qximen kyiʼj toj qja nya testigo de Jehová. In tzaj tqʼamaʼn Tyol Dios jlu: «Tkyaqil bʼanimaj tqʼijlalil tzalu twitz txʼotxʼ» (Ecl. 3:1). A t-xilen jlu tuʼn qten kyukʼil toj qja mintiʼ in che ajbʼen te Jehová, ex mas nim toklen tuʼn tbʼant jlu kyuʼn mejebʼleʼn. ¿Tzeʼn jaku tzʼonin jlu kyiʼj? Jaku tzʼonin kyiʼj tuʼn kyyolin tiʼjju in bʼaj kykʼuʼj tiʼj, tuʼn miʼn ttzaj loʼch tiʼj kykʼuʼj ex tuʼn miʼn tkubʼ kynaʼn qa kyjunalx ateʼ.

In tzaj tqʼamaʼn Holger jlu aju bautisarin tej otoq bʼaj 20 abʼqʼi kybautisarin toj tja: «Nim toklen tuʼn tel kynikʼ toj qja tiʼj qa kʼujlaʼn qe quʼn ex qa in qo naʼn Dios kyiʼj». Ax ikx in tzaj tqʼamaʼn Christa jlu: «Qʼuqli nkʼuʼje tiʼj qa kpol jun qʼij tuʼn tok nchmile te testigo de Jehová». Nim toklen tuʼn tten tbʼanel qximbʼetz kyiʼj toj qja nya Testigo ex kukx qo onin kyiʼj.

Qaj tuʼn tten tbʼanel qmod kyukʼil toj qja, tuʼn tel kynikʼ tiʼj axix tok ex tuʼn tpon Tyol Dios toj kyanmi. Tuʼntzunju, kukx qyekʼinx tbʼanel qmod ex qqʼonk kyoklen (1 Ped. 3:15).