1-3. a) ¿Tiquʼn ojtzqiʼn quʼn qa aju alkye tten in yolin Jehová mas nimxix toklen twitzju qe? b) ¿Tiʼ kbʼel qxnaqʼtzaʼn toj xnaqʼtzbʼil lu?

¿TIQUʼN e kubʼ tbʼinchaʼn Jehová qe anjel ex qe xjal? Tuʼnju tajbʼiltoq tuʼn t-xi tqʼoʼn ambʼil kye junjuntl tbʼinchbʼen tuʼn tkubʼ kynaʼn aju tzalajbʼil tiʼj chwinqlal (Salmo 36:9; 1 Timoteo 1:11). Aju tnejel xjal kubʼ tbʼinchbʼen Jehová atzun Jesús, aju in nok tqʼoʼn apóstol Juan tbʼi te «Yol» (Juan 1:1; Apocalipsis 3:14). In yolintoq Jehová tukʼil Jesús ex in xi tqʼamaʼntoq te aju t-xim ex aju in tnaʼn (Juan 1:14, 17; Colosenses 1:15). In tzaj tqʼamaʼn apóstol Pablo qa ax ikx kye anjel in che yolin kyxolx toj kyex kyyol. Noqtzun tuʼnj, aju yol lu junxitl twitz aju in najbʼen kyuʼn xjal (1 Corintios 13:1).

² Ojtzqiʼnxix qeju nim millón anjel ex xjal tuʼn Jehová, aʼyeju e kubʼ tbʼinchaʼn. Jaku tzaj tbʼiʼn Jehová nim millón naʼj Dios toj junx maj. Ax ikx, in nel tnikʼ kyiʼj qnaʼj Dios toj alkyexku yol in xi qqʼamaʼn. Ex akux in bʼin kyiʼj qnaʼj Dios, in xi tyekʼun kybʼe anjel ex in yolin kyukʼil. Jaku bʼant tkyaqil jlu tuʼn Dios tuʼnju mas nimxix te t-ximbʼetz ex alkye tten in yolin twitzju kyximbʼetz xjal ex kyyol (kjawil uʼjit Isaías 55:8, 9). Tuʼn tel qnikʼ tiʼjju in tzaj tqʼamaʼn Dios, in yolin qukʼil toj jun tten nya kwest.

 ³ Toj xnaqʼtzbʼil lu kʼelel qnikʼ tiʼj qa kukx in yolin Jehová qukʼil toj junjun tten jaku tzʼelxix qnikʼ tiʼj. Ax ikx kʼelel qnikʼ tiʼj qa in chʼexpaj alkye tten in yolin Jehová qukʼil tuʼnju in chʼexpaj ambʼil.

4. a) ¿Toj alkye yol tzaj yolin Jehová tukʼil Moisés, Samuel ex David? b) ¿Tiʼ tqanil tkuʼx toj Tyol Dios?

⁴ Tzajlo yolin Jehová tukʼil Adán toj ojtxi yol hebreo. Yajxitl, tzaj yolin toj yol lu kyukʼil txqantl xjal ik tzeʼn Moisés, Samuel ex David. Xi tqʼamaʼn Jehová aju t-ximbʼetz kye ex kubʼ kytzʼibʼin toj kyex kyyol ex teyele junjun kubʼ ttzʼibʼin tukʼil alkye tten tzʼibʼin. Ax ikx kubʼ kytzʼibʼin aju yol xi tqʼamaʼn Jehová kye ex kubʼ kytzʼibʼin aju txʼolbʼabʼil tiʼj ttnam. Jun techel, in yolin Xjan Uʼj tiʼj qʼuqbʼil kykʼuʼj ex tiʼj kykʼujlabʼil tmajen Dios, ax ikx tej kyel txalpaj ex tiʼj il kubʼ kybʼinchaʼn. Tkyaqil jlu kubʼ tzʼibʼin te xnaqʼtzbʼil qe (Romanos 15:4).

5. ¿Tiquʼn nya kukx yolin Jehová toj yol hebreo kyukʼil xjal?

⁵ Nya kukx tzaj yolin Jehová toj yol hebreo kyukʼil xjal. ¿Tiquʼn? Tuʼnju chʼexpaj kyyol. Jun techel, tej kyetz tzaqpiʼn aj Israel in che anqʼintoq toj tnam Babilonia, nim kyxol qe jlu in che yolintoq tkyaqil qʼij toj yol arameo. Tuʼnlo aju, kubʼ kytzʼibʼin Daniel, Jeremías ex Esdras junjun piẍ Tyol Dios toj yol arameo. * (Qʼonka twitza tiʼj tqanil t-xe t-xaq uʼj.)

6. ¿Tiquʼn e kubʼ qʼet toj yol griego qeju uʼj e kubʼ tzʼibʼin toj yol hebreo?

⁶ Jun aj kawil te tnam Grecia aju Alejandro Magno tbʼi kubʼ t-xiten nim tnam. Tuʼn jlu, aʼyeju xjal in che anqʼintoq kyoj qeju tnam e kubʼ xitin, xi tzyet tuʼn kyyolin toj yol griego aju in nel kynikʼ kykyaqil xjal tiʼj toj ambʼil aju. Ax ikx nim aj judiy xi tzyet tuʼn tajbʼen aju yol lu kyuʼn. Tuʼntzunju, aʼyeju uʼj e kubʼ tzʼibʼin toj yol hebreo e kubʼ qʼet toj yol griego ex ok tbʼi jlu te Septuaginta. Atzun tnejel maj kubʼ qʼoʼn Tyol Dios toj yol griego ex atzun jun kyxol qeju mas nim kyoklen. In tzaj kyqʼamaʼn xjal at kyojtzqibʼil qa kubʼlo bʼaj tuʼn tkubʼ ttraducirit Tyol Dios lu kyuʼn 72 xjal. * (Qʼonka twitza tiʼj tqanil t-xe t-xaq uʼj.) Ateʼ junjun kyxol qeju xjal e onin tiʼj, kubʼ kytraducirin teyele junjun yol ex ateʼ junjuntl mintiʼ bʼant jlu kyuʼn. Noqtzun tuʼnj, toj kywitz judiy in che yolintoq toj yol griego ex toj kywitz okslal, aju Septuaginta atzun Tyol Dios.

7. ¿Toj alkye yol yolin Jesús kyukʼil t-xnaqʼtzbʼen?

⁷ Tej tten Jesús twitz Txʼotxʼ, ajbʼenlo yol hebreo tuʼn tej tyolin (Juan 19:20; 20:16; Hechos 26:14). Ax ikx ajbʼenlo junjun  yol tuʼn toj yol arameo aʼyeju in neltoq kynikʼ xjal tiʼj. Ex ojtzqiʼntoq tuʼn Jesús aju ojtxi yol hebreo aju ajbʼen tuʼn Moisés ex kyuʼn t-sanjel Dios, tuʼnju in kubʼtoq kyuʼjin aj judiy aʼyeju taqikʼ Tyol Dios tkyaqil seman kyoj tembʼil jatumel in noktoq kychmon kyibʼ (Lucas 4:17-19; 24:44, 45; Hechos 15:21). Ax ikx in najbʼentoq yol griego ex latín toj ambʼil aju, noqtzun tuʼnj, mintiʼ in tzaj tqʼamaʼn Tyol Dios qa yolin Jesús kyoj yol lu.

8, 9. a) ¿Tiquʼn ateʼ junjun uʼj toj Tyol Dios e kubʼ tzʼibʼin toj yol griego? b) ¿Tiʼ in tzaj t-xnaqʼtzaʼn jlu qe tiʼj Jehová?

⁸ Aʼyeju tnejel t-xnaqʼtzbʼen Jesús in che yolintoq toj yol hebreo. Noqtzun tuʼnj, tej tkyim Jesús, nim xjal in che yolintoq toj junjuntl yol xi tzyet tuʼn kyok te t-xnaqʼtzbʼen (kjawil uʼjit Hechos 6:1). Tej tbʼet ambʼil, mas in che yolintoq okslal toj yol griego twitzju yol hebreo. Tuʼnju a yol griego mas in najbʼentoq kyuʼn xjal, aʼyeju uʼj te Mateo, Marcos, Lucas ex Juan e kubʼ tzʼibʼin toj yol aju. * (Qʼonka twitza tiʼj tqanil t-xe t-xaq uʼj.) Ax ikx, aʼyeju uʼj e kubʼ ttzʼibʼin apóstol Pablo ex junjuntl uʼj e kubʼ tzʼibʼin toj yol griego.

⁹ Tej kyajbʼiltoq qeju aj tzʼibʼil tiʼj Tyol Dios toj yol griego tuʼn tajbʼen junjun yol kyuʼn, aʼyeju ateʼkux kyoj uʼj e kubʼ tzʼibʼin toj yol hebreo, nim maj atz jatz kyiʼn toj Septuaginta, tuʼnju otoq kubʼ qʼet toj yol griego. At junjun maj, aju alkye tten tzʼibʼin yol lu toj Septuaginta junxitl chʼintl tzʼibʼin te twitzju alkye tten tzʼibʼin toj ojtxi yol hebreo. Maske ikju, aʼyeju traducción lu, aju bʼinchan kyuʼn xjal aj il, at toklen tukʼil Tyol Dios at qukʼil toj ambʼil jaʼlo. ¿Tiʼ in tzaj t-xnaqʼtzaʼn jlu qe? Qa mintiʼ in kubʼ t-ximen Jehová qa at jun yol ex jun kyyajil, moqa kyiyjil, xjal mas nim toklen kywitz txqantl (kjawil uʼjit Hechos 10:34).

10. ¿Tiʼ in bʼant tuʼn Jehová tuʼn tyolin qukʼe?

¹⁰ Ma tzʼel qnikʼ tiʼj qa in tzaj yolin Jehová kyukʼe xjal tojx kyyol ex ax ikx aj tchʼexpaj ambʼil. Mintiʼ in qo ok t-obligarin Jehová tuʼn tajbʼen junx yol quʼn tuʼn tok qojtzqiʼn moqa tuʼn tel qnikʼ kyiʼj tyol e kyaj ttziyen (kjawil uʼjit Zacarías 8:23 ex Apocalipsis 7:9, 10). Ax ikx ma tzʼel qnikʼ tiʼj qa e ajbʼen junjun xjal tuʼn Jehová tuʼn tkubʼ kytzʼibʼin t-ximbʼetz, noqtzun tuʼnj, xi tqʼoʼn ambʼil kye tuʼn tkubʼ kytzʼibʼin toj kyex kyyol.

11. ¿Tiquʼn in bʼant tyolin Jehová qukʼil maske in qo yolin toj nimku yol?

¹¹ In najbʼen nimxix yol kyuʼn xjal tuʼn kyyolin. Noqtzun tuʼnj, nya tuʼn jlu mintiʼ in tzaj yolin Jehová qukʼe. ¿Tiquʼn? Tuʼnju o tzʼok tilil tuʼn Jehová tuʼn tkubʼ qʼet Tyol kyoj nimku yol. Jun techel, toj Tyol Dios oʼkx in che jyet junjun tyol Jesús tojxju yol tqʼama (Mateo 27:46;  Marcos 5:41; 7:34). Noqtzun tuʼnj, ok tilil tuʼn Jehová tuʼn tkubʼ tzʼibʼet aju tqanil xi tqʼoʼn Jesús ex yajxitl kubʼ qʼet toj yol griego ex kyoj txqantl yol. Ax ikx, aju tqanil tkuʼx toj Xjan Uʼj o tzʼok t-xqʼuqin Jehová tej kyajbʼen xjal judiy tuʼn ex qe okslal tuʼn tetz kyiʼn nim copia tiʼj. Ex aʼyeju copia lu e kubʼ qʼet kyoj nimku yol. Junlo 400 abʼqʼi tiʼjxi tkyimlen Jesús, at jun aj tzʼibʼil tiʼj okslabʼil tqʼama qa aʼyeju t-xnaqʼtzbʼil Jesús otoq che kubʼ qʼet kyoj yol in najbʼen kyuʼn nimku tnam, ik tzeʼn Siria, Egipto, India, Persia ex Etiopía.

12. ¿Tiʼ nimku nya bʼaʼn o tzʼok bʼinchaʼn tiʼj Tyol Dios?

¹² Toj nimku abʼqʼi o tzʼok bʼinchaʼn nim nya bʼaʼn tiʼj Tyol Dios ex kyiʼj xjal o kubʼ kyqʼoʼn kyoj txqantl yol ex qeju in chex sipinte. Junlo 300 abʼqʼi tiʼjxi tkyimlen Jesús, xi tqʼoʼn jun aj kawil te tnam Roma jun orden tuʼn kykubʼ najset tkyaqil copia tiʼj Tyol Dios. Junlo 1,200 abʼqʼi yajxitl, xi tzyet tuʼn tkubʼ qʼet Tyol Dios toj inglés tuʼn William Tyndale. Tqʼama qa ma txi tqʼoʼntoq Dios ambʼil te tuʼn tanqʼin nim ambʼil, jakutoq bʼant tuʼn, tuʼn mas tel tnikʼ jun kuʼxin aqʼunal tiʼj txʼotxʼ tiʼj Tyol Dios twitz te jun pal. Tej kyok ten nejenel kye okslabʼil qʼojil tiʼj William Tyndale, etz oq toj tnam Inglaterra tuʼntzun tbʼaj ttraducirin tkyaqil Tyol Dios toj yol inglés ex tuʼn tetz imprimirit. Maske ok tilil kyuʼn nejenel kye okslabʼil tuʼn tkubʼ kypatin tkyaqil copia kanet kyuʼn tiʼj Tyol Dios, aju traducción bʼant tuʼn pon kyukʼe nimku xjal. Tej tbʼet ambʼil, kubʼ bʼyoʼn William Tyndale ex kubʼ patin. Noqtzun tuʼnj, mintiʼ kubʼ naj aju traducción bʼant tuʼn tej tok bʼinchaʼn nim nya bʼan tiʼj ex aju traducción bʼant tuʼn, ajbʼen tej tkubʼ qʼet Tyol Dios toj inglés aju tok tbʼi te King James Version (Versión del Rey Jacobo) (kjawil uʼjit 2 Timoteo 2:9).

13. ¿Tiʼ o kanet kyuʼn xjal at kyojtzqibʼil tej tkubʼ kyxnaqʼtzaʼn ojtxi uʼj tiʼj Tyol Dios?

¹³ Ax tok, ateʼ junjun ojtxi copia tiʼj Tyol Dios at junjun yol nya toj tumel e kubʼ tzʼibʼin kyoj ex at junjun chʼixpubʼil kyoj. Noqtzun tuʼnj, nim xjal at kyojtzqibʼil o che xnaqʼtzaʼn kyiʼj nimku mil uʼj ex kyiʼj ojtxi uʼj tiʼj Tyol Dios e kubʼ qʼoʼn kyoj txqantl yol. ¿Tiʼ o kanet kyuʼn? Qa oʼkx at junjun tiʼ junxitl chʼintl kyoj junjun taqikʼ Tyol Dios ex mintiʼ in chʼexpaj aju tqanil tkuʼx toj kyuʼn. Aʼyeju in che xnaqʼtzan tiʼj Tyol Dios qʼuqli kykʼuʼj tiʼj qa at toj kyqʼabʼ aju Xjan Uʼj ex qa a Dios o qʼamante aju tkuʼx toj (Isaías 40:8).

14. ¿Toj jteʼ yol jaku kubʼ uʼjit Tyol Dios toj ambʼil jaʼlo?

 ¹⁴ O tzʼok bʼinchaʼn nim nya bʼaʼn tuʼn miʼn tetz Tyol Dios, noqtzun tuʼnj, toj ambʼil jaʼlo in kubʼ uʼjit toj mas te 2,800 yol. Mintiʼ juntl uʼj o kubʼ chʼixpet toj nimku yol. Ex maske nimku xjal mintiʼ in nok qeʼ kykʼuʼj tiʼj Dios, a Tyol atzun uʼj mas in xi sipet toj ambʼil jaʼlo. Ax tok ateʼ junjun traducción tiʼj Tyol Dios nya tzʼaqli qe ex kwest tuʼn kyjaw uʼjit. Noqtzun tuʼnj, chʼixme kykyaqil qe jlu, tkuʼx aju tqanil mas nim toklen tiʼj qʼuqbʼil qkʼuʼj kyoj ex tiʼj qchwinqlal te jumajx.

15. a) ¿Alkye chʼixpubʼil o bʼant atxix toj abʼqʼi 1919 ex toj ambʼil jaʼlo? b) ¿Tiquʼn in che kubʼ qʼet quʼj tnejel toj yol inglés?

¹⁵ Toj abʼqʼi 1919, e jaw skʼoʼn jun tal kʼloj xnaqʼtzal tiʼj Tyol Dios tuʼn kyok te «aju majen in bʼant taqʼun [...] ex at tnabʼl» (Mateo 24:45). Toj ambʼil aju, aju majen in bʼant taqʼun in yolintoq tukʼe ttnam Dios mas toj yol inglés. Noqtzun tuʼnj, toj ambʼil jaʼlo aʼyeju uʼj in che bʼant tuʼn majen in bʼant taqʼun ateʼ toj mas te 700 yol. Ik tzeʼn bʼaj toj ambʼil ojtxi tukʼe yol griego, toj ambʼil jaʼlo aju yol inglés atzun yol mas in najbʼen kyoj tja xnaqʼtzbʼil ex kyoj kʼaybʼil. Tuʼntzunju, tnejel in che kubʼ qʼet quʼj toj yol inglés ex yajxitl in che kubʼ qʼet kyoj txqantl yol.

16, 17. a) ¿Ti tajbʼiltoq ttnam Dios? b) ¿Tiʼ bʼant tuʼn t-xi qʼet aju at tajbʼen te ttnam Dios? c) ¿Tiʼ tajbʼiltoq erman Knorr?

¹⁶ Aʼyeju uʼj in che bʼant tuʼn ttnam Dios atz in che jatz toj Tyol Dios. Ma tzikʼ mas te 60 abʼqʼi, aju Tyol Dios mas in najbʼentoq toj yol inglés atzun King James Version (Versión del Rey Jacobo). Noqtzun tuʼnj, aju Tyol Dios lu kubʼ traducirit toj abʼqʼi 1611, tuʼntzun aju in che ajbʼen ojtxi yol tuʼn ex kwest tuʼn tel nikʼbʼaj kyiʼj. Aʼyeju ojtxi uʼj tiʼj Tyol Dios tkuʼx nim mil maj tbʼi Dios toj, atzunte traducción lu noq oʼkx junjun maj tkuʼx toj. Nya oʼkxju, ax ikx ateʼ nim taqikʼ Tyol Dios nya toj tumel tzʼibʼin qe ex tkuʼx nim taqikʼ Tyol Dios toj aju mintiʼ tkuʼx kyoj ojtxi uʼj tiʼj Tyol Dios. Ex chʼixme ax jlu tkuʼx kyoj junjuntl Tyol Dios o che kubʼ qʼet toj yol inglés.

¹⁷ Tuʼn jlu in nel qnikʼ tiʼj qa tajbʼiltoq ttnam Dios jun traducción tzʼaqli tiʼj Tyol Dios ex nya kwest tuʼn tel nikʼbʼaj tiʼj. Tuʼntzunju, e jaw skʼoʼn jun kʼloj erman tuʼn tkubʼ kytraducirin Tyol Dios. Aju tal kʼloj lu ok tbʼi te Kʼloj Xjal Bʼinchal Traducción del Nuevo Mundo. Etz kyiʼn erman aju kytraducción toj 6 kʼloj uʼj toj abʼqʼi 1950  ex 1960. Etz qʼamaʼn tqanil tiʼj qa otoq bʼant tnejel kʼloj uʼj toj jun nimaq chmabʼil ok toj 2 te agosto te abʼqʼi 1950. Tojx qʼij aju, tqʼama ermano Knorr qa kyajbʼiltoq tmajen Dios jun Tyol Dios tzʼaqli, aju ateʼ yol toj mas in che ajbʼen kyuʼn xjal ex aju nya kwest tuʼn tok toj kywiʼ. Iktzun tten nya kwest tuʼn tel kynikʼ tiʼjju axix tok tiʼj Dios. Ex aju traducción lu, nyatoq kwest tuʼn tjaw uʼjit ex tuʼn tel nikʼbʼaj tiʼj, ik tzeʼn qeju uʼj e kubʼ kytzʼibʼin qeju t-xnaqʼtzbʼen Jesús. Tajbʼiltoq ermano Knorr tuʼn tonin Traducción del Nuevo Mundo kyiʼj nim millón xjal tuʼn tel kynikʼ tiʼj Jehová.

18. ¿Tiʼ o tzʼonin tuʼn tkubʼ qʼet Tyol Dios kyoj mastl yol?

¹⁸ Aju tajbʼiltoq ermano Knorr japun bʼaj twiʼ toj abʼqʼi 1963. Toj abʼqʼi lu, aju Traducción del Nuevo Mundo de las Escrituras Griegas Cristianas ya otoq kubʼ qʼet toj yol alemán, español, francés, holandés, italiano ex portugués. Toj abʼqʼi 1989, aju K’loj Xjal Q’il Twitz Aq’untl kubʼ tqʼoʼn toj kytxuylal ninja qʼil twitz aqʼuntl jun kʼloj erman tuʼn tonin kyiʼj qe erman in che traducirin tiʼj Tyol Dios. Toj abʼqʼi 2005 xi tqʼoʼn K’loj Xjal Q’il Twitz Aq’untl ambʼil tuʼn tkubʼ traducirit Tyol Dios kyoj kykyaqil yol in netz aju uʼj Aju Xqʼuqil kyuʼn toj kyyol. Tuʼn jlu, toj ambʼil jaʼlo at tkyaqil moqa jun plaj Traducción del Nuevo Mundo toj mas te 130 yol.

19. a) ¿Tiʼ bʼaj toj 2013? b) ¿Tiʼ qo xnaqʼtzal tiʼj toj juntl xnaqʼtzbʼil?

¹⁹ Ma tzikʼ mas te 60 abʼqʼi tetzlen aju Traducción del Nuevo Mundo toj inglés. Atxix toj ambʼil aju, o chʼexpaj yol inglés. Tuʼntzun aju, iltoq tiʼj tuʼn tbʼaj bʼinchet chʼintl Tyol Dios. Toj qʼij 5 ex 6 te octubre te 2013 kubʼ ikʼset chmabʼil in nok jun maj toj abʼqʼi aju tajlal 129. Mas te jun millón 400,000 erman ok kyqʼoʼn kywitz tiʼj chmabʼil tojx lugar jatumel ok moqa toj Internet toj 31 nimaq tnam. Toj chmabʼil lu, jun kyxol qeju at toj K’loj Xjal Q’il Twitz Aq’untl etz tyekʼun aju Traducción del Nuevo Mundo bʼaj bʼinchaʼn chʼintl toj inglés. Kykyaqil qeju e bʼin tiʼj, nimxix e jaw tzalaj ex nim kyxol qe jlu e jaw oqʼ tej t-xi qʼoʼn jun Tyol Dios kye. Kyoj qeju chikʼbʼabʼil i etz qʼoʼn, aʼyeju chikʼbʼal jaw kyuʼjin qe taqikʼ Tyol Dios tojju Tyol Dios bʼaj bʼinchaʼn chʼintl, ex kykyaqil ok kyqʼoʼn kywitz tiʼj qa mas nya kwest tuʼn tel kynikʼ tiʼj. Toj juntl xnaqʼtzbʼil qo xnaqʼtzal tiʼj Tyol Dios bʼaj bʼinchaʼn chʼintl ex alkye tten o kubʼ qʼet kyoj txqantl yol.