1, 2. a) ¿Tiʼ bʼant tuʼn Dios toj ambʼil ojtxi? b) ¿Tiʼ in kubʼ kyxjelin junjun xjal toj ambʼil jaʼlo?

QA O tzajxix jun matij yabʼil tiʼja, kubʼlo t-xjelina jlu: «¿Okpe chin bʼanixe?». Moqa yabʼlo taʼ jun toj tjaya moqa jun tamiwa ex tajlo teya tuʼn kyqʼanit. Qkyaqil nya qgan tuʼn ttzaj jun yabʼil qiʼj ex kyiʼj qeju xjal kʼujlaʼn quʼn. In yolin Tyol Dios kyiʼj junjun xjal aʼyeju kyajbʼiltoq tuʼn tel kynikʼ tiʼj qa che teltoq toj bʼaʼn moqa miʼn. Jun techel, aju aj kawil Ocozías, aju tkʼwaʼl Acab ex Jezabel, xi tqanin qa oktoq kbʼantel tiʼjju tyabʼil. Ax ikx, aju aj kawil te Siria Ben-hadad tbʼi, aju yabʼtoq taʼ xi tqanin qa oktoq kbʼantel (2 Reyes 1:2; 8:7, 8).

² Ax ikx in yolin Tyol Dios tiʼj qa toj ambʼil ojtxi, at maj in che qʼanittoq junjun xjal tuʼn Jehová tuʼn jun milagr ex at maj e ajbʼen t-sanjel tuʼn, tuʼn kyjaw anqʼin junjun xjal (1 Reyes 17:17-24; 2 Reyes 4:17-20, 32-35). Tuʼntzunju, toj ambʼil jaʼlo ateʼ junjun xjal yabʼ qe in kubʼ kyxjelin qa ax ikx tajbʼil Dios tuʼn tonin kyiʼj tuʼn kyqʼanit.

3-5. a) ¿Tiʼ jaku bʼant tuʼn Jehová ex Jesús b) ¿Alkyeqe xjel che xel tzaqʼwet toj xnaqʼtzbʼil lu?

 ³ Ax ikx at tipumal Jehová tuʼn ttzaj tiʼn yabʼil kyiʼj xjal. At junjun xjal kubʼ tqʼoʼn Jehová kykastiw tukʼil jun yabʼil, ik tzeʼn te aj kawil te tnam Egipto aju Faraón tbʼi ex Míriam aju tanabʼ Moisés (Génesis 12:17; Números 12:9, 10; 2 Samuel 24:15). Ax ikx kubʼ tqʼoʼn kykastiw aj Israel tukʼil «yabʼil ex kʼixbʼisabʼl» tej mintiʼ xi kybʼiʼn Jehová (Deuteronomio 28:58-61). Toj juntl maj, kolin Jehová tiʼj ttnam tuʼn miʼn ttzaj jun yabʼil kyiʼj (Éxodo 23:25; Deuteronomio 7:15). Axpe ikx e kubʼ tqʼanin junjun kyxol. Jun techel, kubʼ tqʼanin Job tej toktoq jun matij yabʼil tiʼj ex tajbʼiltoq tuʼn tkyim (Job 2:7; 3:11-13; 42:10, 16).

⁴ Qʼuqli qkʼuʼj qa at tipumal Jehová tuʼn kyqʼanit yabʼil tuʼn. Ax ikx te Jesús e qʼanit yabʼil tuʼn. Tej tten twitz Txʼotxʼ e qʼanit junjun xjal tuʼn, aʼyeju attoq jun yabʼil kyiʼj ik tzeʼn txʼaʼk, epilepsia, qe moẍ ex qeju mintiʼ in yukch kyxmilal (kjawil uʼjit Mateo 4:23, 24; Juan 9:1-7). Aʼyeju milagr lu in che onin qiʼj tuʼn qximen kyiʼj qeju tbʼanel tiʼchaq che kbʼantel tuʼn Jesús toj akʼaj twitz Txʼotxʼ. Toj ambʼil aju «mi jun xjal najl tuj tnam ok tmaʼ kyjaʼ: Yabʼ qine» (Isaías 33:24).

⁵ Tuʼntzunju, qa at jun yabʼil tok qiʼj, ¿bʼaʼnpe tuʼn qyon tuʼn tbʼant jun milagr tuʼn Jehová moqa tuʼn Jesús tuʼn qqʼanit toj ambʼil jaʼlo? Ex qa ma jaw qjyoʼn jun qʼanbʼil, ¿alqiʼj bʼaʼn tuʼn qximen?

6. ¿Tiʼ in tzaj tqʼamaʼn Tyol Dios kyiʼj qeju milagr e bʼant kyuʼn okslal toj tnejel syent abʼqʼi?

⁶ Toj tnejel syent abʼqʼi, e jaw t-skʼoʼn Jehová qe okslal tuʼn xewbʼaj xjan ex at junjun xi qʼoʼn kyoklen tuʼn tbʼant qe milagr kyuʼn (Hechos 3:2-7; 9:36-42). Jun techel, in che qʼanittoq xjal kyuʼn ex in bʼanttoq kyyolin toj junxichaq yol (1 Corintios 12:4-11). Noqtzun tuʼnj, kyaj tqʼamaʼn Tyol Dios qa ya mlaytoq che bʼant qeju milagr ex atzun bʼajju (1 Corintios 13:8). Tuʼntzunju, toj ambʼil jaʼlo mintiʼ in qo yon tuʼn tbʼant jun milagr tuʼn Dios tuʼn qqʼanit moqa kyiʼj qeju xjal kʼujlaʼn quʼn.

7. ¿Alkye tten jaku tzaj tqʼoʼn Salmo 41:3 qipumal?

⁷ ¿Yajtzun qa at jun yabʼil tok tiʼja? Kʼonil Jehová tiʼja ex tzul tqʼuqbʼaʼn tkʼuʼja, ik tzeʼn bʼant tuʼn kyiʼj tmajen toj ambʼil ojtxi. Kubʼ ttzʼibʼin aj kawil David jlu: «At tzalajbʼil teju xjal in ximan kyiʼj qeju mintiʼ kyipun ex kyiʼj qe mebʼa; porque ok kletel tuʼn Qman tuj tqʼijlalil mya bʼaʼn. Kʼokel kwentin tuʼn Qman, kxel tqʼoʼn tchwinqlal» (Salmo 41:1, 2). Kyukʼil qe yol lu mintiʼ tqʼama David qa mlayx kyim jun tbʼanel xjal noq tuʼnju in nonin tiʼj jun xjal mebʼa. ¿Alkyetzun tten jakutoq tzʼonin Jehová kyiʼj tbʼanel xjal?  Ax David tzaj qʼamante jlu: «Kxel tqʼoʼn Qman tipun ok ttzaj yabʼil tiʼj ex kbʼanixel tyabʼil tuʼn» (Salmo 41:3). Ojtzqiʼnxix tuʼn Jehová qa ateʼ tmajen toj kʼixkʼoj ex mintiʼ in che el naj tiʼj tkʼuʼj. Jaku txi tqʼoʼn kyipumal ex kynabʼil. Ax ikx kubʼ tbʼinchaʼn Jehová qxmilal tuʼn tqʼanit tuʼnx tibʼ kyiʼj junjun yabʼil.

8. Ik tzeʼn in tzaj tqʼamaʼn Salmo 41:4, ¿tiʼ xi tqʼanin David te Jehová tej toktoq jun matij yabʼil tiʼj?

⁸ Toj Salmo 41 ax ikx in tzaj tqʼamaʼn David tiʼj ambʼil tej ttzaj jun matij yabʼil tiʼj, tej tel bʼaj tipumal ex tej ttzaj bʼaj tkʼuʼj. A jlu bʼajlo toj ambʼil tej tajbʼiltoq tkʼwaʼl tuʼn tok te aj kawil te t-xel aju Absalón tbʼi. Ojtzqiʼntoq tuʼn David qa aju nya bʼaʼn tzaj toj tja, tzaj jlu tuʼnju il kubʼ tbʼinchaʼn tukʼil Bat-seba (2 Samuel 12:7-14). ¿Tiʼtzun bʼant tuʼn? Ok ten naʼl Dios kyjalu: «Nman, qʼaqʼantz tkʼuʼja wiʼje; chin tqʼanan oka, maske o chin bʼinchane il twitza» (Salmo 41:4). Ojtzqiʼntoq tuʼn David qa otoq kubʼ tnajsaʼn Jehová til ex jyoʼn onbʼil tukʼil Jehová akux yabʼtoq. Noqtzun tuʼnj, ¿in yonpetoq David tuʼn tbʼant jun milagr tuʼn Jehová tiʼj?

9. a) ¿Alkye tten onin Jehová tiʼj aj kawil Ezequías? b) ¿Alkye tten in yontoq David tuʼn tonin Jehová tiʼj?

⁹ Ax tok e qanit junjun xjal tuʼn Jehová. Jun techel, tej chʼixtoq tkyim aj kawil Ezequías, qʼanit tuʼn Jehová ex anqʼintl 15 abʼqʼi (2 Reyes 20:1-6). Yajtzun te David, ¿yonpe tuʼn tbʼant jun milagr tuʼn Jehová tiʼj tuʼn tqʼanit? Mintiʼ. Oʼkx kubʼ tyoʼn tuʼn tonin Dios tiʼj ik tzeʼn bʼant tuʼn «kyiʼj qeju mintiʼ kyipun ex kyiʼj qe mebʼa». Ten jun tbʼanel tamiwbʼil David tukʼil Jehová, tuʼntzunju xi tqʼanin te tuʼn ttzaj tqʼuqbʼaʼn tkʼuʼj ex tuʼn tok t-xqʼuqin tej tok yabʼil tiʼj. Ax ikx xi tqʼanin onbʼil te Jehová tuʼn tbʼanix. Ax jlu jaku txi qqanin te Jehová (Salmo 103:3).

10. ¿Tiʼ bʼaj tiʼj Trófimo ex tiʼj Epafrodito, ex tiʼ in tzaj t-xnaqʼtzan jlu qe?

¹⁰ Toj tnejel syent abʼqʼi, nya kykyaqilx okslal in che qʼanittoq yabʼil kyuʼn tukʼil jun milagr, atzun te apóstol Pablo ex junjuntl okslal in che qʼanittoq yabʼil kyuʼn tukʼil milagr (kjawil uʼjit Hechos 14:8-10). Qʼanit tman Publio tuʼn apóstol Pablo aju yabʼtoq taʼ tuʼn kyaq ex tuʼn jun kyuwxix infección. Naʼn apóstol Pablo «Dios, kubʼ tqʼoʼn tqʼabʼ tibʼaj, ex o bʼanix» (Hechos 28:8). Noqtzun tuʼnj, mintiʼ e kubʼ tqʼanin Pablo kykyaqilx qeju ojtzqiʼntoq tuʼn. Jun kyxol qeju tamiw aju Trófimo tbʼi, aju bʼet tukʼil Pablo tej in bʼettoq toj pakbʼabʼil (Hechos 20:3-5, 22; 21:29). Tej ttzaj jun yabʼil tiʼj Trófimo, mintiʼ kubʼ tqʼanin Pablo. Tuʼntzunju, mintiʼtl bʼet Trófimo tukʼil Pablo ex atz kyaj ten toj tnam Mileto tuʼn tbʼanix (2 Timoteo 4:20). Juntl kyxol qeju tamiw Pablo aju Epafrodito, ax ikx te tzaj jun yabʼil tiʼj ex chʼixmi kyim. Noqtzun tuʼnj, mintiʼ in tzaj tqʼamaʼn Tyol Dios qa kubʼ tqʼanin Pablo (Filipenses 2:25-27, 30).

11, 12. a) ¿Alkye tten onin Lucas tiʼj Pablo? b) ¿Tiʼ ojtzqiʼn quʼn tiʼj Lucas?

¹¹ Jun aj qʼaniltoq te Lucas, ex bʼet junjun maj tukʼil apóstol Pablo (Hechos 16:10-12; 20:5, 6; Colosenses 4:14). Oninlo tiʼj apóstol Pablo ex kyiʼj junjuntl  tej in che yabʼtoq tej in che bʼet toj pakbʼabʼil (Gálatas 4:13). Ex tqʼama Jesús jlu: «Aqeju xjal bʼaʼn qe mya il tiʼj jun qʼanal kye, oʼkx qeju xjal yabʼ qe» (Lucas 5:31).

¹² Tgantoq Lucas tuʼn t-xi tqʼoʼn jun kynabʼil xjal tiʼj jun qʼanbʼil. Otoq xnaqʼtzaʼn Lucas tuʼn tok te jun aj qʼanil. Mintiʼ in tzaj tqʼamaʼn Tyol Dios toj alkye ambʼil ex jatumel xnaqʼtzan. Noqtzun tuʼnj, in tzaj tqʼamaʼn Tyol Dios, qa xi tqʼoʼn Pablo tqʼolbʼebʼil Lucas xi t-samaʼn kye aj Colosenses. Jaku txi qqʼamaʼn qa atz xnaqʼtzan Lucas tuʼn tok te aj qʼanil toj tja xnaqʼtzbʼil te Laodicea, jun tnam atz niqayin ttxlaj Colosas. Tej tkubʼ ttzʼibʼin Lucas aju uʼj tok tbʼi tiʼj ex aju uʼj te Hechos, e ajbʼen yol tuʼn ik tzeʼn jun aj qʼanil. Tuʼnju ok Lucas te aj qʼanil, kubʼ ttzʼibʼin nim txʼolbʼabʼil tiʼj Jesús tej kyqʼanit xjal tuʼn.

13. ¿Tiʼ il tiʼj tuʼn ttzaj qnaʼn aj ttzaj qʼoʼn jun nabʼil qe tiʼj jun qʼanbʼil?

¹³ Toj ambʼil jaʼlo, mintiʼ jun erman in che bʼant milagr tuʼn ex mintiʼ in qo qʼanit kyuʼn. Noqtzun tuʼnj, kyajbʼil tuʼn kyonin qiʼj, jakulo tzaj tqʼoʼn jun erman jun qnabʼil maske mintiʼ in xi qqanin te. Ex at junjun nabʼil tbʼanil qe. Jun techel, xi tqʼamaʼn Pablo te Timoteo tuʼn t-xi tkʼaʼn chʼin vin tej in chyontoq tkʼuʼj, tuʼnlo xi tkʼaʼn tzʼil aʼ (kjawil uʼjit 1 Timoteo 5:23). * (Qʼonka twitza tiʼj tqanil t-xe t-xaq uʼj.) Noqtzun tuʼnj, il tiʼj tuʼn tok qxqʼuqin qibʼ. Jakulo tzaj tqʼamaʼn jun erman qe tuʼn t-xi qkʼaʼn junjun wiq qʼanbʼil moqa jun kʼul. Ex jaku tzaj tqʼamaʼn qe tiʼ kxel qwaʼn moqa tiʼ miʼn txi qwaʼn. Jakulo tzaj tqʼamaʼn qe qa o tzʼonin jlu tiʼj jun toj tja aju axju tyabʼil ik tzeʼn qe. Nya a t-xilen jlu qa kʼonil qiʼj. Bʼaʼn tuʼn ttzaj qnaʼn qa jakulo tzʼonin jun qʼanbʼil tiʼj jun xjal, noqtzun tuʼnj, jaku tzaj tiʼn nya bʼaʼn kyiʼj junjuntl (kjawil uʼjit Proverbios 27:12).

14, 15. a) ¿Tiquʼn il tiʼj tuʼn tten qnabʼil? b) ¿Tiʼ xnaqʼtzbʼil in tzaj tqʼoʼn Proverbios 14:15 qe?

¹⁴ Qkyaqilx qajbʼil tuʼn miʼn ttzaj jun yabʼil qiʼj tuʼntzun qtzalaj toj qanqʼibʼil ex tuʼn qajbʼen te Jehová. Noqtzun tuʼnj, tuʼnju aj il qoʼ jaku qo yabʼti. Aj tbʼaj jlu qiʼj, jaku kubʼ qximen alkyeqe wiq qʼanbʼil che ajbʼel quʼn ex at qoklen tiʼj tuʼn tjaw qjyoʼn. Noqtzun tuʼnj, il tiʼj tuʼn tten qnabʼil. Tuʼnju ateʼ xjal ex kʼloj xjal in tzaj kyqʼamaʼn qa o kanet jun qʼanbʼil kyuʼn aju kʼonil qiʼj tuʼn qbʼanix. In bʼant jlu kyuʼn noq tuʼn tkambʼet nim pwaq kyuʼn. Jakulo tzaj kyqʼamaʼn qe qa nim xjal o tzʼajbʼen qʼanbʼil lu kyuʼn ex qa o tzʼonin kyiʼj. Noqtzun tuʼnj, mintiʼ tuʼn tajbʼen alkyexku qʼanbʼil quʼn noq tuʼn tkubʼ qnaʼn bʼaʼn ex tuʼn qanqʼin mas ambʼil. Mintiʼ tuʼn tikʼ tnaʼl quʼn aju  nabʼil in tzaj tqʼoʼn Tyol Dios lu: «Aju xjal mintiʼ tnabʼl in xi tniman tkyaqil aju in tzaj qʼmaʼn te; atzunju xjal at tnabʼl tok tkwent tiʼj jatum in bʼet» (Proverbios 14:15).

¹⁵ Qa at qnabʼil, kʼokel qxqʼuqin qibʼ tiʼjju kxel qnimen, mas qa aju xjal saj qʼonte jun nabʼil qe mintiʼ tojtzqibʼil tiʼj qyabʼil. Tuʼntzunju, bʼaʼn tuʼn tkubʼ qxjelin jlu: «¿In nokpe qeʼ nkʼuʼje tiʼj qa aju vitamina lu, aju kʼul lu moqa aju dieta lu o tzʼonin kyiʼj junjuntl xjal? Axpe ikx qa o tzʼonin kyiʼj, ¿okpe kʼonil wiʼje? ¿Maspelo bʼaʼn tuʼn njyone mas tqanil tiʼj nyabʼile moqa tuʼn t-xi nqanine te jun aj qʼanil aju at tojtzqibʼil tiʼj?» (Deuteronomio 17:6).

16. ¿Alqiʼj bʼaʼn tuʼn qximen aj tjaw qjyoʼn jun qʼanbʼil tiʼj jun qyabʼil?

¹⁶ Aj tkubʼ qximen alkyeqe examen che eletz quʼn moqa alkyeqe wiq qʼanbʼil kxel qkʼaʼn, il tiʼj «tuʼn tten qnabʼl» (Tito 2:12). Nim toklen tuʼn tten qnabʼil, mas qa aju examen ex aju qʼanbʼil kyxel qkʼaʼn mintiʼxix ojtzqiʼn quʼn. ¿Jakupe tzaj tchikʼbʼaʼn xjal jatumel xqo t-xaj alkye tten kʼonil examen ex aju qʼanbʼil kxel qkʼaʼn? ¿Axpe tok aju in tzaj tchikʼbʼaʼn? ¿Axpe kyximbʼetz nim aj qʼanil tiʼj jlu? (Proverbios 22:29.) Jakulo tzaj tqʼamaʼn jun xjal qe qa at juntl akʼaj tten tuʼn tqʼanit jun yabʼil aju najchaq taʼ ex naʼmxtoq tok kyojtzqiʼn aj qʼanil. ¿Atpe yekbʼil tiʼj qa at aju akʼaj  tten tuʼn tqʼanit aju yabʼil lu? Atlo jun xjal jaku kanet jun wiq qʼanbʼil tuʼn, aju ateʼkux junjun tiʼchaq mintiʼ ojtzqiʼn quʼn moqa aju at toklen tukʼil kyaqʼunbʼen chman, moqa aj yoẍ. A jlu jaku tzaj tiʼn nim nya bʼaʼn qiʼj. Bʼaʼn tuʼn ttzaj qnaʼn qa nya tajbʼil Jehová tuʼn tajbʼen kyaqʼunbʼen tchman quʼn nix kyipumal juʼẍ (Deuteronomio 18:10-12; Isaías 1:13).

17. ¿Tiʼ qajbʼil qkyaqilx?

¹⁷ Aju kʼloj xjal qʼil twitz aqʼuntl toj tnejel syent abʼqʼi xi t-samaʼn jun uʼj kye erman kyoj kʼloj okslal jatumel xi ttzʼibʼin alkyeqe junjun tiʼchaq iltoq tiʼj tuʼn tel kyikʼun. Kubʼaj aju uʼj lu kyukʼe yol lu: «Kylomtzun kyibʼe» (Hechos 15:29). Aʼyeju mankbʼil t-xol yol atzun juntl tten tuʼn t-xi qʼamet kaʼyinx kyibʼe, a jlu in tzaj tyekʼun qe qa qajbʼil tuʼn tten jun tbʼanel qchwinqlal.

18, 19. ¿Tiʼ kʼokel qqʼoʼn qwitz tiʼj toj akʼaj twitz Txʼotxʼ?

¹⁸ Tuʼnju aj il qoʼ, jaku tzaj jun yabʼil qiʼj. Aj ttzaj jun yabʼil qiʼj maly qo yon tuʼn tbʼant jun milagr tuʼn Jehová qiʼj tuʼn qbʼanix. Noqtzun tuʼnj, ojtzqiʼn quʼn qa ax tok ya mlay tzaj yabʼil qiʼj toj ambʼil tzul. Toj Apocalipsis 22:1, 2, yolin apóstol Juan tiʼj «aʼ te chwinqlal» ex kyiʼj «qe tzeʼ te chwinqlal» aju qkyaqilx in qo yon tiʼj tuʼn qqʼanit tuʼn. A jlu mintiʼ in yolin kyiʼj junjun kʼul in che ajbʼen te qʼanbʼil tuʼn t-xi qkʼaʼn tuʼn qbʼanix toj ambʼil jaʼlo moqa toj akʼaj twitz Txʼotxʼ. Sino a jlu in yolin tiʼj tkyaqilju kbʼantel tuʼn Jehová ex tuʼn Jesús tuʼn qanqʼin te jumajx (Isaías 35:5, 6).

¹⁹ Nimxix in qo yon tuʼn qanqʼin toj Tbʼanel Najbʼil. Noqtzun tuʼnj, toj ambʼil jaʼlo, jaku tzʼok qe qkʼuʼj tiʼj Jehová qa kʼujlaʼn teyele junjun qe tuʼn ex qa in nel tnikʼ tiʼjju in qnaʼn aj ttzaj jun yabʼil qiʼj. Ik tzeʼn te David, qʼuqli qkʼuʼj tiʼj Jehová qa mlay qo kyaj ttzaqpiʼn. Qa kukx xqo ajbʼen te Jehová ok qo okel t-xqʼuqin (Salmo 41:12).