TZAJ tqanin ntxuʼye jlu weye: «¿Tiquʼn mintiʼ in kʼulune kywitz qe qxeʼchel? ¿Mintiʼpe in nel tnikʼa tiʼj qa kyuʼn qxeʼchel at qchwinqlal? ¿Nyape taja tuʼn t-xi tqʼoʼna chjonte kye? ¿Tiquʼn in nel tikʼuna kykostumbr qxeʼchel? Qa mintiʼ in kʼulina kywitz, in nel tikʼuna qokslabʼil». Tej tbʼaj tqʼamaʼn jlu, oktzun ten oqʼil.

Otoq tzikʼ junjun xjaw, xi kyqʼamaʼn testigo de Jehová te ntxuʼye tuʼn t-xnaqʼtzaʼn tiʼj Tyol Dios. Nyatoq taj tuʼn t-xnaqʼtzaʼn, noqtzun tuʼnj, xi tqʼamaʼn kye testigo de Jehová tuʼn kytzaj qʼol xnaqʼtzbʼil weye. ¿Tiquʼntzun tzaj tqʼoj wiʼje? Tuʼnju wajtoqe tuʼn t-xi nnimane Jehová ex tuʼn ttzalaj wuʼne. Tuʼntzunju ya mlaytoq kubʼ nbʼinchaʼne junjun tiʼchaq in tzaj tqʼamaʼn ntxuʼye weye. Kwest ela toj nwitze, noqtzun tuʼnj, tzaj tqʼoʼn Jehová wipumale.

Otoq qo tene kyukʼe toj njaye toj okslabʼil budista, ik tzeʼn nim xjal toj tnam Japón. Noqtzun tuʼnj, tej tikʼ kabʼe xjaw t-xilen tzyet tuʼn nxnaqʼtzane tiʼj Tyol Dios kyukʼil testigo de Jehová, ok qʼuqeʼxix nkʼuʼje tiʼj qa aju Tyol Dios atzun axix tok. Tej tel nnikʼe tiʼj qa at jun Ntate toj kyaʼj, wajtoqe tuʼn tok wojtzqiʼne. Tnejel, tgantoq ntxuʼye tuʼn qyoline tiʼjju in neltoq nnikʼe tiʼj. Ex xi tzyet tuʼn nxiʼye kyoj chmabʼil toj domingo. Ax ikx tej tel mas nnikʼe, xi nqʼamaʼne te ntxuʼye qa ya mlaytoq chinxe toj okslabʼil budista. Noq in jaw labʼine tej tqʼama jlu: «Chʼixbʼajilxix tuʼnju at jun toj qja nya tajbʼil tuʼn tnimen kye qxeʼchel». Tzaj tqʼamaʼn weye tuʼn miʼntl nxnaqʼtzane tiʼj Tyol Dios ex tuʼn miʼn nxiʼtle kyoj chmabʼil. Mintiʼ ximen wuʼne qa tuʼn ttzaj tqʼamaʼn ntxuʼye jlu. Tuʼnju nyatoq ik tmod wukʼile.

Ax ikx te ntate ax t-ximbʼetz ik tzeʼn te ntxuʼye. Ex otoq tzʼel nnikʼe tiʼj toj capítulo 6 te Efesios qa tajbʼil Jehová tuʼn kyxi nbʼiʼne ntate. Wajtoqe tuʼn tten mujbʼabʼil toj njaye, ex kubʼ nximane qa ma chex nbʼiʼne ntate, jakulo chinx kybʼiʼn. Toj ambʼil aju, iltoq tiʼj tuʼn tkubʼ nbʼinchaʼn ntene kyiʼj junjun examen nim kyoklen toj tja xnaqʼtzbʼil, tuʼntzunju, kubʼ nximane tuʼn miʼn nxiʼye kyoj chmabʼil toj oxe xjaw. Noqtzun tuʼnj, xi ntziyene te Jehová qa oktoq chin xeʼle juntl maj kyoj chmabʼil aj tkyaj jlu toj bʼaʼn.

Nya bʼaʼn ela aju bʼant wuʼne. ¿Tiquʼn? Tnejel, tuʼnju kubʼ nximane qa aj tikʼ oxe xjaw kukxtoq ktel ngane tuʼn wajbʼene te Jehová. Noqtzun tuʼnj, nya ik bʼajju. Tuʼnju jun rat xi naj wamiwbʼile tukʼe Jehová. Tkabʼ, tuʼnju ok tilil kyuʼn ntate tuʼn tkyaj ntzaqpiʼne tuʼn wajbʼene te Jehová.

Toj Ja te Chmabʼil, otoq tzʼok wojtzqiʼne nim erman otoq tzʼok bʼinchaʼn nya bʼaʼn kyiʼj kyuʼn qe toj kyja. Ex tzaj kyqʼamaʼn weye qa ate Jehová kʼonil wiʼje (Mateo 10:34-37). Tzaj kyqʼamaʼn weye qa kukx ma chin ajbʼene te Jehová, jakulo tzʼel kynikʼ qe toj njaye tiʼj. Wajtoqe tuʼn tok qʼuqeʼxix nkʼuʼje tiʼj Jehová, tuʼntzunju in ok tene naʼl Dios te tuʼn tkyaqil wanmiye.

Toj junxichaq tten ok kybʼinchan ntate nya bʼaʼn wiʼje. Jun techel, kubʼ kyqʼoʼn mas aqʼuntl tuʼn tbʼant wuʼne toj ja tuʼntzun miʼn wexe. Ex junjuntl maj kyaj kyqʼoʼn qiʼne tiʼjxi ja ex mintiʼ tzaj kyqʼoʼn nwaye. Ok ten ntxuʼye kubʼsal nwitze tuʼn tkyaj ntzaqpiʼne tuʼn nxnaqʼtzane tiʼj Tyol Dios. Chʼixme tkyaqil maj, mintiʼ jun nyole xi nqʼamaʼne. Qatzun ma txi nqʼamaʼne jun nyole, in netztoq qqʼoje tukʼil tuʼnju teyele te junjun tajtoq tuʼn tkubʼ tyekʼun qa aju te in tqʼamaʼn atzun ax tokju. Jaʼlo in nel nnikʼe tiʼj noqwit xi nbʼiʼne aju tzaj tqʼamaʼn ex aju in xi tokslaʼn ntxuʼye, mintiʼwtlo tzaj nim nya bʼaʼn.

Jyoʼn ntxuʼye onbʼil kyukʼil txqantl. Jun techel, yolin tukʼilju aj xnaqʼtzal toj tja xnaqʼtzbʼil, noqtzun tuʼnj, mintiʼ okx tqʼoʼn tibʼ tojju nya bʼaʼn attoq qxole. Yajxitl, xi tiʼn ntxuʼye qine twitz nejenel toj taqʼun, tuʼntzun tkubʼ nkʼuʼje tuʼn qa oʼkx okslabʼil budismo atzunju axix tok okslabʼil. Ax ikx xi yolin kyukʼe qeju at q-xilene kyukʼil toj yolbʼil ex tukʼil oqʼel ok ten qanil onbʼil kye. Tuʼn tkyaqil jlu, in tzajtoq nbʼise tuʼn. Noqtzun tuʼnj, kyoj chmabʼil tzaj kyqʼamaʼn ansyan weye qa aj tok ten ntxuʼye yolil kyukʼe txqantl tiʼjju nya bʼaʼn lu, tuʼn jlu in pakbʼan.

Kyajbʼiltoq ntate tuʼn nxiʼye toj universidad tuʼntzun tkanet jun tbʼanel waqʼune. Nya bʼaʼn ela jlu toj nwitze ex mintiʼ bʼant tuʼn qyoline tiʼj toj tumel, tuʼntzunju, kubʼ ntzʼibʼine nim uʼj jatumel xi nchikʼbʼaʼne  kye aju wajbʼile tuʼn tbʼant. Tzaj nimxix tqʼoj ntate ex tqʼama jlu: «Qa in kubʼ t-ximana qa jaku kanet jun taqʼuna, txiʼya jyolte nchi’j qatzun miʼn, jaku tzʼexa toj ja». In nok tene naʼl Dios te Jehová ex xi nqanine onbʼil te. Toj juntl qʼij, in nexe pakbʼal, tzaj kyqʼamaʼn kabʼe ermana tuʼn waqʼunane kyukʼil tuʼn t-xi nqʼoʼne xnaqʼtzbʼil kye qe kyal. Noqtzun tuʼnj, mintiʼ tzalaj ntate tuʼn jlu ex mintiʼtl tzaj yolin wukʼile. Tzaj tqʼamaʼn ntxuʼye qa maslo bʼaʼn noqwit in noke te jun nya bʼaʼn xjal twitzju tuʼn woke te jun testigo de Jehová.

At maj kubʼ nxjeline qa bʼaʼn in nela toj twitz Jehová aju mintiʼ in xi nnimane tkyaqilju kyyol ntate. Tuʼntzunju, in nok tene naʼl Dios ex in kubʼ tene ximel tiʼjju in tzaj tqʼamaʼn Xjan Uʼj tiʼj tkʼujlabʼil Jehová. A jlu onin wiʼje tuʼn tten jun tbʼanil nximbʼetze ex tuʼn tel nnikʼe tiʼj qa oʼkxtoq kyajbʼil ntate aju mas tbʼanel te weye. Onin Jehová wiʼje tuʼn tchʼixpet nnabʼile ex tuʼn tel nnikʼe tiʼj tiʼ kbʼantel wuʼne. Ax ikx, qa mastoq in chin pakbʼane, mastoq in chin tzalaje tuʼn nyoline tiʼj Dios. Wajtoqe tuʼn woke te precursora.

Tej tok kybʼiʼn junjun ermana qa wajtoqe tuʼn woke te precursora, tzaj kyqʼamaʼn weye tuʼn tkubʼ nyoʼne akux in chewix kyqʼoj ntate. Xi nqanine onbʼil te Jehová, in jyone tqanil kyoj quʼj ex in ximane tiʼj tiquʼn wajtoqe tuʼn woke te precursora. Ax ikx, in yoline kyukʼe erman otoq bʼet ambʼil in che ajbʼen te Jehová. Iktzun tten el nnikʼe tiʼj qa aju mas nim toklen toj wanqʼibʼile, aju tuʼn ttzalaj Jehová wuʼne. Ex el nnikʼe tiʼj qa ma kubʼ nyoʼne mas ambʼil tuʼn woke te precursora, mintiʼtoq in tzaj tyekʼun jlu qa kbʼeltoq kychʼixpun ntate kymod.

Xi tzyet tuʼn woke te precursora tej attoq qine toj mankbʼil, moqa último, abʼqʼi toj tja xnaqʼtzbʼil. Tej tikʼ chʼin ambʼil, wajtoqe tuʼn nxiʼye onil jatumel mintiʼxix pakbʼal at. Noqtzun tuʼnj, tzaj kyqʼamaʼn ntate weye tuʼn miʼn wexe toj ja. Tuʼntzunju kubʼ nyoʼne tuʼn njapune te 20 abʼqʼi. Yajxitl, xi ntzʼibʼine te ninja qʼil twitz aqʼuntl tuʼn nxi samaʼne atz kubʼni te tnam Japón, jatumel in che anqʼintoq junjun at nxilene kyukʼil. Iktzun tten mlaytoq bʼisinxix ntxuʼye wiʼje.

Tej npone ajbʼel toj tnam lu, nimxix in jaw tzalaje tej wonine kyiʼj nim xjal tuʼn kyok te testigo de Jehová. Ax ikx in xnaqʼtzane tiʼj yol inglés tuʼn wajbʼene mas te Jehová. Yajxitl, ok nqʼoʼn nwitze tiʼj aju in bʼanttoq kyuʼn kabʼe precursor especial toj Ja te Chmabʼil ex alkye tten in che onin kyiʼj txqantl, ax ikx weye wajtoqe tuʼn woke te precursora especial. Tojju ambʼil lu, tzaj kabʼe maj nimxix yabʼil tiʼj ntxuʼye, ex kykabʼil maj, in meltzʼaje njaye tuʼn wonine tiʼj. Tuʼn jlu jaw labʼin ntxuʼye ex kubʼ tyekʼun chʼin tkʼujlabʼil wiʼje.

Wuq abʼqʼi yajxitl, jun kyxol qeju precursor especial ma chin yolin kyiʼj jawni aju Atsushi tbʼi, tzaj t-samaʼn jun uʼj weye. Tajbʼiltoq tuʼn tkubʼ mojeʼ ex tajbʼiltoq tuʼn tok tbʼiʼn tiʼ in kubʼ nnaʼne tiʼj. Mintiʼtoq jun tiʼ in kubʼ nnaʼne tiʼj Atsushi, ex kubʼ nximane qa mintiʼtoq te Atsushi jun tiʼ in kubʼ tnaʼn wiʼje. Tej tikʼ jun xjaw, xi nqʼoʼne tzaqʼwebʼil te qa wajtoqe tuʼn tok wojtzqine mastl. El qnikʼe qa junx taʼ qximbʼetze tiʼjju qajbʼile tuʼn tbʼant. Qajbʼiltoqe tuʼn kukx qajbʼene toj tkyaqil ambʼil te Jehová ex jaxku tumel. Tej tbʼet ambʼil o kubʼ mojeʼye. Nimxix in jaw tzalaje tuʼnju e ul ntate ex qeju at nxilene kyukʼil toj nmejebʼleʼne.

Tej in qo ajbʼentoqe te precursor regular, tzaj qʼoʼn toklen Atsushi tuʼn tonin kyiʼj qeju ansyan in che bʼet kyojele Ja te Chmabʼil. Tej tbʼet ambʼil, tzaj qʼoʼn qoklene te precursor especial ex yajxitl, tzaj qʼoʼn qoklene tuʼn qbʼete kyojele Ja te Chmabʼil. Tej tkubʼaj tnejel maj tuʼn qvisitarine kyiʼj kykyaqil kʼloj okslal, e tzaj yolin qe erman toj ninja qʼil twitz  aqʼuntl qeye. Ex tzaj kyqanin qeye qa jaku qoʼxe ajbʼel toj tnam Nepal tuʼntzun kukx qvisitarine kyiʼj kʼloj okslal.

Tzaj bʼaj chʼin nkʼuʼje tiʼj alkyetoq kyximbʼetz ntate ktel aj t-xi nqʼamaʼne kye qa chin xeʼltoqe ajbʼel toj juntl lugar najchaq. Tej t-xi nqʼamaʼne kye toj yolbʼil, tzaj tqʼamaʼn ntate jlu: «Ma txiʼya toj jun tbʼanel lugar». Tqʼama jlu tuʼnju toj seman otoq tzikʼ, kyaj tqʼoʼn jun tamiw jun uʼj te aju in yolin tiʼj tnam Nepal. Tej tbʼaj tuʼjin, kubʼ t-ximen ntate qa jun tbʼanel lugar jlu tuʼn qxiʼ visitarilte.

Nimtoq in qo tzalaje tej qpone kyukʼil qe xjal te Nepal tuʼnju at tbʼanel kymod. Yajxitl, ax ikx o visitarine kyiʼj kʼloj okslal toj tnam Bangladesh. Maske niqayin taʼ ttxlaj tnam Nepal, noqtzun tuʼnj, junxitl. At nimaq tiʼchaq o qo ok weʼye twitz toj pakbʼabʼil. Tej tikʼ jweʼ abʼqʼi, tzaj qʼamaʼntl qeye tuʼn qmeltzʼaje toj tnam Japón, atz jatumel in qo tzalaje tuʼn qvisitarine kyiʼj kʼloj okslal toj ambʼil jaʼlo.

Nim o tzʼel nnikʼe tiʼj Jehová tej wajbʼene toj tnam Japón, Nepal ex Bangladesh. Aʼyeju xjal in che anqʼin kyoj tnam lu junxitl kyiyjil, moqa kyyajil, kymod ex kykostumbr. Junxichaq tmod teyele junjun xjal. Noqtzun tuʼnj, o tzʼok nqʼoʼn nwitze tiʼj qa jaku tzʼonin Jehová, qa jaku tzʼok t-xqʼuqin ex qa jaku txi tkʼamoʼn noq alkyexku xjal.

At nim tiquʼn in xi nqʼoʼne chjonte te Jehová. Tuʼnju o tzaj tqʼoʼn ambʼil weye tuʼn tel nnikʼe tiʼj ex tuʼn wajbʼene te, ax ikx o tzaj tqʼoʼn jun tbʼanel nchmile okslal. Ax ikx, o tzʼonin Jehová wiʼje tuʼn tjaw njyoʼne alkye mas bʼaʼn. Noq tuʼn tonbʼil Jehová, at juntl maj tbʼanel wamiwbʼile tukʼe ntxuʼye ex kyukʼe toj njaye. Nimxix in xi nqʼoʼne chjonte tuʼnju ma kanet mujbʼabʼil wuʼne tukʼe Dios ex tukʼe ntxuʼye.