A TE Jehová atzun Dios qʼol tkyaqil tbʼanel oyaj (Santiago 1:17). Jaku tzʼel qnikʼ tiʼj qa o tzaj tqʼoʼn Jehová nim tiʼchaq qe tiʼj tkyaqilju o bʼant tuʼn. Kubʼ noj twitz kyaʼj tuʼn tukʼil cheʼw ex kubʼ noj twitz Txʼotxʼ tuʼn kyukʼil tbʼanel tzeʼ (Salmo 65:12, 13; 147:7, 8; 148:3, 4).

Toj ambʼil ojtxe xi tqʼoʼn jun aj bʼitzil chjonte te Jehová tiʼj tkyaqilju tbʼinchbʼen, ax ikx kubʼ ttzʼibʼin jun bʼitz te nimsabʼil tbʼi. Aj tjaw tuʼjina bʼitz lu toj Salmo 104, ¿in tnaʼn teya tuʼn t-xi tqʼoʼna chjonte te Jehová ik tzeʼn te aj bʼitzil? Tqʼama jlu: «Ok chin bʼitzale te Qman aju Ndiose akux itzʼx qine» (Salmo 104:33). ¿Tajbʼil teya tuʼn tbʼant axju tuʼna?

Tajbʼil Jehová tuʼn tel qkanoʼn techel in kubʼ tqʼoʼn qwitz tuʼn t-xi qqʼoʼn oyaj. Tuʼntzunju, ajbʼen apóstol Pablo tuʼn, tuʼn tkubʼ ttzʼibʼin kye qeju at nim kypwaq tuʼn miʼn tok qeʼ kykʼuʼj tiʼj kyqʼinumabʼil tuʼn kytzalaj toj kyanqʼibʼil. Il tiʼj tuʼn tok qeʼ kykʼuʼj tiʼj Jehová, aju in tzaj qʼonte tkyaqil tbʼanel oyaj qe. Ax ikx tqʼama Pablo qa il tiʼj tuʼn qbʼinchaʼn xtalbʼil kye txqantl, ik tzeʼn tuʼn t-xi qqʼoʼn jun oyaj ex tuʼn t-xi qqʼoʼn chʼin kye tiʼjju at qe tukʼe tzalajbʼil. Qa ma chex qbʼiʼn qeju yol lu, qo tzalajel tiʼj qchwinqlal toj ambʼil tzul (1 Timoteo 6:17-19). Ik tzeʼn in nel qnikʼ tiʼj, in tzaj tqʼamaʼn Jehová qe tiquʼn il tiʼj tuʼn t-xi qqʼoʼn oyaj.

Tej tkubʼ ttzʼibʼin apóstol Pablo aju tkabʼ uʼj te Corintios tzaj tchikʼbʼaʼn alkye qximbʼetz ktel tuʼn qonin kyiʼj txqantl, tej tqʼama jlu: «Teyle junjun qʼonx jun oyaj ik tzaʼn ma kubʼ t-ximan tuj tanmi; mya tukʼil bʼis tuʼn t-xi tqʼoʼn ex mya lajwers, porque aju xjal in xi tqʼoʼn oyaj tukʼil tzalajbʼil, in tzalaj Dios tiʼj» (2 Corintios 9:7). ¿Alqiʼj in qo onin aj txi qqʼoʼn jun oyaj? Tzaj tqʼamaʼn Pablo qa in qo onin kyiʼj txqantl aj txi qqʼoʼn aju at tajbʼen kye, ax ikx tuʼn jlu jaku qo tzaj tkʼiwlaʼn Jehová (2 Corintios 9:11-14).

Yajxitl, yolin Pablo tiʼjju mas tbʼanel oyaj o tzaj tqʼoʼn Dios qe, tej tqʼama jlu: «Chjonte Dios tuʼnju toyaj maʼxix ma tzaj tqʼoʼn qe, mintiʼ in knet yol quʼn tuʼn t-xi qchikʼbʼaʼn, tuʼnju tbʼanilxix» (2 Corintios 9:15). Kyxol qeju oyaj noq kukx o tzaj tqʼoʼn Jehová qe ateʼ tkyaqil tbʼanel tiʼchaq o tzaj tqʼoʼn qe noq tuʼn Jesús. Mintiʼ in che kanet yol quʼn tuʼn t-xi qchikʼbʼaʼn aju tbʼanel oyaj lu.

¿Alkye tten jaku txi qqʼoʼn chjonte te Jehová ex te Jesús tiʼjju o bʼant ex kbʼantel kyuʼn qiʼj? Jun tten aju qa ma txi qqʼoʼn jun oyaj, ik tzeʼn aj t-xi qqʼoʼn ambʼil, qipumal ex qpwaq tuʼn qajbʼen te Jehová ex tuʼn qonin kyiʼj txqantl tuʼn tel kynikʼ tiʼj. Jaku bʼant jlu quʼn qa at nim tiʼchaq qe moqa noq chʼin (1 Crónicas 22:14; 29:3-5; Lucas 21:1-4).