Jun tbʼanel traducción tiʼj Tyol Dios
«Aju tyol Dios itzʼte.» (HEBREOS 4:12)
BʼITZ: 37 EX 43
1. a) ¿Tiʼ taqʼun Adán xi tqʼoʼn Jehová? b) Tuʼnju in bʼant kyyolin tmajen Jehová, ¿alkye tten in najbʼen oyaj lu kyuʼn?
O TZAJ tqʼoʼn Jehová jun tbʼanel oyaj qe, aju tuʼn tbʼant qyolin. Toj Tbʼanel Najbʼil, xi tqʼamaʼn Jehová te Adán tuʼn tok tqʼoʼn kybʼi kykyaqil txkup. Ex tuʼnju in bʼanttoq tyolin Adán jaw tjyoʼn jun tbʼanel tbʼi teyele junjun txkup (Génesis 2:19, 20). Atxix toj ambʼil aju, in najbʼen aju oyaj lu kyuʼn tmajen Jehová tuʼn tjaw kynimsaʼn tbʼi ex tuʼn kyyolin tiʼj kyukʼil txqantl. Toj ambʼil jaʼlo, in najbʼen aju oyaj lu quʼn tuʼn kykubʼ qʼet Tyol Dios kyoj txqantl yol ex tuʼn qonin kyiʼj xjal tuʼn tok kyojtzqiʼn Jehová.
2. a) ¿Alkye oxe kyximbʼetz erman kubʼ kyximen tuʼn tjapun kyuʼn tej kyaqʼunan tiʼj Traducción del Nuevo Mundo? b) ¿Tiʼ qo xnaqʼtzal tiʼj toj xnaqʼtzbʼil lu?
2 At nim mil Tyol Dios o kubʼ qʼet kyoj txqantl yol, ex ateʼ junjun mas tzʼaqliqe kywitz junjuntl. Aʼyeju erman e aqʼunan tiʼj Traducción del Nuevo Mundo kyajbʼiltoq tuʼn tbʼant jun traducción tzʼaqlixix kyuʼn. Tuʼntzun aju, kubʼ kyximen tuʼn tjapun oxe kyxim. Tnejel, tuʼn tjaw nimset tbʼi Dios ex tuʼn tkux qʼet nim maj tbʼi toj ik tzeʼn tkuʼx kyoj tnejel ojtxi uʼj. Ik tzeʼn in tzaj tqʼmaʼn taqikʼ Tyol Dios lu: «Tuʼntzunju, che naʼne Dios kyjalu: Qman Dios ata toj kyaʼj, tzʼokwit tbʼiya te xjan» (Mateo 6:9, TNM). Tkabʼ, qa jakutoq bʼant tuʼn tkubʼ traducirit teyele junjun yol. Qatzun mlay bʼant, jakutoq kubʼ traducirit aju t-xilen yol. Ex aju toxin, tuʼn kyajbʼen yol nya kwest tuʼn kyjaw uʼjit ex tuʼn tel nikʼbʼaj kyiʼj (kjawil uʼjit Nehemías 8:8, 12). * (Qʼonka twitza tiʼj tqanil t-xe t-xaq uʼj.) O tzʼok tilel kyuʼn testigos de Jehová tuʼn kyjapun qeju oxe ximbʼetz lu kyuʼn tej tkubʼ kyqʼoʼn Traducción del Nuevo Mundo kyoj mas te 130 yol. Toj xnaqʼtzbʼil lu kʼelel qnikʼ tiʼj alkye tten o che japun qeju ximbʼetz lu tej tbʼaj bʼinchaʼn chʼintl aju Traducción del Nuevo Mundo etz toj inglés toj 2013. Ax ikx kʼelel qnikʼ tiʼj qa axju o bʼant kyuʼn junjuntl traductor tej tkubʼ kyqʼoʼn Tyol Dios kyoj txqantl yol.
JUN XJAN UʼJ IN JAW TNIMSAʼN TBʼI DIOS
3, 4. a) ¿Jatumel tkuʼx tbʼi Dios toj yol hebreo? b) ¿Tiʼ o bʼant kyuʼn qeju xjal in kubʼ kyqʼoʼn Tyol Dios kyoj txqantl yol?
3 Toj yol hebreo, aju tbʼi Dios in kubʼ tzʼibʼet tukʼe kyaje letra. Aju bʼibʼaj lu tkuʼx nim maj kyoj qeju ojtxe uʼj e kubʼ tzʼibʼin toj yol hebreo, ik tzeʼn qeju Uʼj e kanet toj mar Muerto. Ax ikx tkuʼx kyoj junjun copia tiʼj Septuaginta aʼyeju e kubʼ tzʼibʼin tojlo abʼqʼi 200 tej naʼmxtoq tul itzʼj Jesús ex tojlo abʼqʼi 100 tiʼjxi tkyimlen Jesús. Nim xjal in che jaw labʼin aj tok kyqʼoʼn kywitz tiʼj qa nim maj tkuʼx tbʼi Dios kyoj qeju ojtxe uʼj.
Nim xjal in che jaw labʼin aj tok kyqʼoʼn kywitz tiʼj qa nim maj tkuʼx tbʼi Dios kyoj qeju ojtxe uʼj
4 Tuʼn jlu in nel qnikʼ tiʼj qa il tiʼj tuʼn tkux qʼet tbʼi Dios toj Xjan Uʼj. Noqtzun tuʼnj, nim qeju o kubʼ kyqʼoʼn Tyol Dios kyoj txqantl yol o jatz kyiʼn toj. Jun techel, toj 1901 etz aju Tyol Dios tok tbʼi American Standard Version tkuʼxtoq tbʼi Dios toj. Ex toj 1950 etz aju Traducción del Nuevo Mundo de las Escrituras Griegas Cristianas toj yol inglés, ax ikx tkuʼxtoq tbʼi Dios toj. Toj abʼqʼi 1952 etz qʼamaʼn qa otoq bʼaj bʼinchaʼn chʼintl Tyol Dios tok tbʼi American Standard Version, noqtzun tuʼnj, otoq jatz qʼiʼn tbʼi Dios toj. ¿Tiquʼn? Tuʼnju toj kywitz qeju traductor e kubʼ traducirinte nyatoq bʼaʼn tuʼn tajbʼen kyuʼn. Ex nim traducción toj inglés ex kyoj junjuntl yol ax ikx o jatz kyiʼn.
5. ¿Tiquʼn nim toklen tuʼn tkux qʼet tbʼi Dios toj Xjan Uʼj?
5 Aj tkubʼ tqʼoʼn jun xjal jun uʼj toj juntl yol, il tiʼj tuʼn tok tojtzqiʼn alkye t-xim xjal bʼinchal uʼj ex tuʼn t-ximen tiʼj lu aj tkubʼ ttraducirin. A Jehová aju Bʼinchal Xjan Uʼj. Nim taqikʼ Tyol Dios in tzaj kyyekʼun qa nim toklen tbʼi Dios toj twitz ex tajbʼil tuʼn tok kyojtzqiʼn xjal ex tuʼn tjaw kynimsaʼn (Éxodo 3:15 * Qʼonka twitza tiʼj tqanil t-xe t-xaq uʼj; Salmo 83:18, TNM; 148:13, TNM; Isaías 42:8; 43:10, TNM; Juan 17:4; Hechos 15:14, TNM). Tuʼntzun jlu, nim toklen tuʼn tkux qʼet tbʼi Dios kyoj qeju Tyol Dios in che kubʼ qʼet kyoj txqantl yol. Ax Jehová qʼamante tuʼn tkux qʼet nim mil maj aju tbʼi kyoj qeju ojtxe uʼj (kjawil uʼjit Éxodo 6:2, 3). Aj tjatz kyiʼn qeju in che kubʼ qʼonte Tyol Dios kyoj txqantl yol, in kubʼ kyyekʼun qa nya nim toklen Jehová toj kywitz.
6. ¿Tiquʼn kux qʼet qaq maj mastl tbʼi Dios toj Tyol Dios kubʼ bʼinchaʼn chʼintl toj 2013 toj inglés?
6 Toj ambʼil jaʼlo, at mas yekʼbʼil tiʼj qa il tiʼj tuʼn tkux qʼet tbʼi Dios toj Xjan Uʼj. Toj Tyol Dios bʼaj bʼinchaʼn chʼintl toj 2013 tiʼj Traducción del Nuevo Mundo toj inglés tkuʼx 7,216 maj tbʼi Dios toj, a t-xilen jlu, qa ma kux qʼet qaq maj mastl tbʼi Dios toj twitzju etz tnejel. Jweʼ kyxol qeju qaq maj lu kux qʼet toj 1 Samuel 2:25, 6:3, 10:26 ex 23:14, 16. ¿Tiquʼn? Tuʼnju tkuʼx tbʼi Dios kyoj qeju taqikʼ Tyol Dios lu kyoj qeju Uʼj e kanet toj mar Muerto, aʼyeju kʼitzqeku tkubʼlen qʼoʼn tuʼntzun tok kyqʼoʼn kywitz xjal tiʼj. * (Qʼonka twitza tiʼj tqanil t-xe t-xaq uʼj.) Aju tqaqin maj jatumel kux qʼoʼn tbʼi Dios, atz kux qʼoʼn toj Jueces 19:18. E kux qʼet qeju qaq maj lu tzmaxi tej kybʼaj xnaqʼtzet-xix nim ojtxe uʼj.
7, 8. ¿Tiʼ t-xilen aju tbʼi Jehová?
7 Nim toklen toj kywitz qeju okslal axix tok tuʼn telxix kynikʼ tiʼj tiʼ t-xilen aju tbʼi Dios. Aju bʼibʼaj lu a t-xilen «A in Nok te Tkyaqil». * (Qʼonka twitza tiʼj tqanil t-xe t-xaq uʼj.) Toj ambʼil ojtxe, aʼyeju quʼj in tzajtoq kychikʼbʼaʼn aju t-xilen bʼibʼaj lu tukʼeju taqikʼ Tyol Dios te Éxodo 3:14, ik tzeʼn in tzaj tqʼamaʼn Traducción del Nuevo Mundo toj jun tqanil t-xe t-xaq uʼj: «Ok chin okele teju in kubʼ nximane tuʼn woke». Aju Traducción del Nuevo Mundo te1984 toj inglés tzaj tchikʼbʼaʼn qa in nok Jehová teju in kubʼ t-ximen tuʼn tjapun kywiʼ tyol e kyaj ttziyen. * (Qʼonka twitza tiʼj tqanil t-xe t-xaq uʼj.) Aju Traducción del Nuevo Mundo bʼaj bʼinchaʼn chʼintl toj 2013 in tzaj tchikʼbʼaʼn jlu: «Qa aju tbʼi Dios nya oʼkx t-xilen tuʼn tkubʼ t-ximen tuʼn tok teju il tiʼj tuʼn tjapun kywiʼ t-ximbʼetz. Ax ikx a t-xilen tbʼi qa in bʼant tuʼn, tuʼn tok moqa tuʼn tajbʼen tbʼinchbʼen tuʼn te tkyaqilju in bʼaj t-ximen tuʼn tjapun tajbʼil». (Ax ikx qʼonka twitza tiʼj uʼj Jun onbʼil tuʼn qxnaqʼtzan tiʼj Tyol Dios, t-xaq 5.)
8 ¿Alkye tten in bʼant tuʼn Jehová tuʼn kyok tbʼinchbʼen ik tzeʼn in kubʼ t-ximen? Ajbʼen Noé tuʼn Jehová tuʼn tkubʼ tbʼinchaʼn jun ark ex ajbʼen Bezalel tuʼn, tuʼn tok te jun tbʼanel aqʼunal. Ax ikx ajbʼen Gedeón tuʼn, tuʼn tok te jun tbʼanel aj qʼoj ex ajbʼen apóstol Pablo tuʼn, tuʼn tten tipumal tuʼn t-xi pakbʼal kyoj junjuntl tnam. Nim toklen aju t-xilen tbʼi Dios kye qeju tmajen. Tuʼntzun jlu, aʼyeju erman e aqʼunan tiʼj Traducción del Nuevo Mundo kux kyqʼoʼn tbʼi Dios jatumel il tiʼj tuʼn tkux qʼet.
9. ¿Tiquʼn tajbʼil Kʼloj Xjal Qʼil Twitz Aqʼuntl tuʼn tkubʼ qʼet Tyol Dios kyoj nim yol?
9 Nim Tyol Dios in che kubʼ qʼet kyoj txqantl yol mintiʼ in kux kyqʼoʼn tbʼi Dios toj. Te t-xel in kux kyqʼoʼn «Qman» moqa tbʼi jun dios ojtzqiʼn kyuʼn xjal jatumel najli qe. Atzun jun tbʼanel tiquʼn tajbʼil Kʼloj Xjal Qʼil Twitz Aqʼuntl tuʼn tten jun Tyol Dios toj kyyol kykyaqil xjal aju in jaw tnimsaʼn tbʼi Dios (kjawil uʼjit Malaquías 3:16, qʼonka twitza tiʼj tqanil t-xe t-xaq uʼj). * Toj ambʼil jaʼlo, aju Traducción del Nuevo Mundo ya in jaw tnimsaʼn tbʼi Dios kyoj mas te 130 yol.
JUN TRADUCCIÓN TZʼAQLI EX NYA KWEST TUʼN TEL QNIKʼ TIʼJ
10, 11. ¿Alkye junjun tiʼ o che ok weʼ qeju in kubʼ kyqʼoʼn kyoj txqantl yol aju Traducción del Nuevo Mundo toj inglés?
10 O che ok weʼ qeju o kubʼ kyqʼoʼn aju Traducción del Nuevo Mundo te inglés kyoj txqantl yol kywitz junju nya bʼaʼn. Jun techel, toj Eclesiastés 9:10 ex kyoj junjuntl taqikʼ Tyol Dios, aju Tyol Dios etz toj inglés toj 1984 ajbʼen aju yol Seol tuʼn, aju tzajni toj yol hebreo. Ax ikx in najbʼen kyuʼn junjuntl Xjan Uʼj toj inglés. Noqtzun tuʼnj, toj nim yol mintiʼ in kanet aju yol lu kyoj pujbʼil yol ex mintiʼ ojtzqiʼn kyuʼn xjal. Tuʼn jlu, xi qʼoʼn ambʼil tuʼn tkubʼ qʼet aju yol «Muqbʼil» moqa «Jul» te t-xel yol Seol tzajni toj yol hebreo ex te t-xel yol Hades tzajni toj yol griego. Aju traducción lu, tzʼaqli ex nya kwest tuʼn tel nikʼbʼaj tiʼj.
11 Aju yol «alma» toj yol hebreo ex griego atzun juntl yol kwest tuʼn tkubʼ qʼet kyoj txqantl yol. Kyoj qeju yol lu, aju yol alma in nikʼx toj kywiʼ xjal ik tzeʼn jun tiʼ in nex toj qxmilal aj qkyim moqa axpe ikx jun spant, moqa labʼ. Tuʼn miʼn tikʼx aju ximbʼetz lu toj kywiʼ, xi qʼoʼn ambʼil tuʼn tkubʼ traducirit yol alma toj junxichaq tten, ik tzeʼn qeju yol ateʼ ttxlaj. Toj apéndice te Biblia con referencias in tzaj tchikʼbʼaʼn aʼyeju junxichaq tten in najbʼen aju yol alma toj Tyol Dios. Tuʼn tel qnikʼ kyiʼj qeju taqikʼ Tyol Dios, o kubʼ qʼoʼn jun tqanil t-xe t-xaq uʼj kyiʼj qeju yol hebreo ex griego toj Tyol Dios o bʼaj bʼinchaʼn chʼintl.
Aʼyeju erman e aqʼunan tiʼj e kubʼ kyxnaqʼtzaʼn nim xjel xi kysamaʼn traductor tiʼj Tyol Dios twitz tkyaqil Txʼotxʼ
12. ¿Alkye junjuntl chʼixpubʼil bʼant toj Tyol Dios bʼaj bʼinchaʼn chʼintl toj 2013?
12 Aʼyeju xjel i eʼx kyqanin traductor tiʼj Tyol Dios kyoj junjuntl yol tzaj kyyekʼun qa at mas plaj toj Tyol Dios toj inglés aju nya bʼaʼn jakutoq tzʼel nikʼbʼaj tiʼj. Tuʼntzunju, kubʼ t-ximen Kʼloj Xjal Qʼil Twitz Aqʼuntl toj septiembre te 2007 tuʼn tkubʼ bʼinchaʼn chʼintl aju Traducción del Nuevo Mundo toj inglés. Aʼyeju erman e aqʼunan tiʼj e kubʼ kyxnaqʼtzaʼn nim xjel xi kysamaʼn traductor tiʼj Tyol Dios twitz tkyaqil Txʼotxʼ. E kubʼ kyqʼoʼn yol in che ajbʼen kyuʼn xjal toj ambʼil jaʼlo te kyxel qeju ojtxe yol. Ok tilil kyuʼn erman tuʼn tten jun traducción tzʼaqli ex nya kwest tuʼn tel nikʼbʼaj tiʼj. Ik tzeʼn in nel qnikʼ tiʼj, aju aqʼuntl bʼant kyuʼn erman kʼitzqeku tuʼn tkubʼ qʼet Tyol Dios kyoj txqantl yol onin tuʼn tel mas bʼaʼn aju Tyol Dios toj inglés (Proverbios 27:17).
NIMXIX IN XI KYQʼOʼN ERMAN CHJONTE
13. ¿Tiʼ in kubʼ kynaʼn qeju in che uʼjin tiʼj Tyol Dios aju bʼaj bʼinchaʼn chʼintl toj 2013?
13 ¿Tiʼ kubʼ kynaʼn erman tej t-xi qʼoʼn Tyol Dios kye aju bʼaj bʼinchaʼn chʼintl toj 2013 toj inglés? Nim mil kyxol qeju erman lu o txi kysamaʼn jun uʼj toj kytxuylal ninja qʼil twitz aqʼuntl toj Brooklyn (Nueva York) te qʼobʼil chjonte. Tzaj tqʼamaʼn jun ermana qa aju Tyol Dios ik tten toj twitz ik tzeʼn jun kax nojni tukʼe tbʼanel abʼj. Toj twitz ermana lu, aju Tyol Dios lu nya kwest tuʼn tjaw uʼjet ex tuʼn tel nikʼbʼaj tiʼj. Akux in uʼjin ermana tiʼj, in kubʼ tnaʼn ik tzeʼn in xnaqʼtzaʼn kyiʼj tbʼanel abʼj ex in jaw labʼin kyiʼj tuʼnju in che qoptzʼaj, junxichaq tten bʼinchabʼin kye, kycoloril ex aju tbʼanel che keʼyin. Aʼyeju yol nya kwest in che ajbʼen toj Tyol Dios lu, o tzʼonin tiʼj ermana tuʼn tel mas tnikʼ tiʼj Dios. Aj tjaw tuʼjin ermana, in nok Jehová toj twitz ik tzeʼn jun tatbʼaj in tzaj tchleʼn ex in tzaj yolin te tukʼil kʼujlabʼil.
14, 15. ¿Tiʼ in kynaʼn qeju erman at aju Traducción del Nuevo Mundo tojx kyyol?
14 Aʼyeju erman mintiʼ in bʼant kyyolin toj inglés ax ikx kye nimxix in che tzalaj tuʼnju at aju Traducción del Nuevo Mundo tojx kyyol. Jun tij xjal toj tnam Bulgaria tqʼama qa toj nimku abʼqʼi otoq jaw tuʼjin Tyol Dios, noqtzun tuʼnj, nix jun maj otoq jaw tuʼjin jun traducción nya kwest tuʼn tel nikʼbʼaj tiʼj ex aju in pon toj tanmi. Jun ermana te tnam Albania tqʼama qa aju Tyol Dios at toj yol albanés tbʼanel tzeʼn in jaw uʼjit. Ex tqʼamatl jlu: «¡Jun tbʼanel qoklen aj tok qbʼiʼn Jehová in tzaj yolin tojx qyol!».
15 Toj nim tnam, noq junjun xjal jaku ten jun Tyol Dios kyukʼe, tuʼnju wiʼyil kywiʼ moqa kwest tuʼn kykanet. Ju techel, toj tnam Ruanda, nim xjal in che xnaqʼtzantoq kyukʼil erman mintiʼtoq in che chʼiy toj kyokslabʼil tuʼnju mintiʼtoq jun Tyol Dios at kyukʼe. Aju Tyol Dios in kʼayintoq jun iglesia tiʼj tojx tnam lu wiʼyilxix twiʼ ex kwest tuʼn tel nikʼbʼaj tiʼj. Tej tetz aju Traducción del Nuevo Mundo tojx kyyol, jun ja xjal kyukʼe kyaje kykʼwaʼl xi kyqʼoʼn chjonte te Jehová ex te majen in bʼant taqʼun. Toj ambʼil ojtxe mintiʼtoq kypwaq tuʼn ttzaj laqʼet jun Tyol Dios teyele junjun, noqtzun tuʼnj, toj ambʼil jaʼlo teyele junjun at jun Tyol Dios tukʼe. Tuʼn tkubʼ kyyekʼun te Jehová qa in che tzalaj tiʼj, in che uʼjin tiʼj Tyol Dios tkyaqil qʼij.
16, 17. a) ¿Tiʼ tajbʼil Jehová kye kykyaqil tmajen? b) ¿Tiʼ qajbʼil tuʼn tbʼant quʼn?
16 Aju Traducción del Nuevo Mundo o bʼaj bʼinchaʼn chʼintl, kʼeletz kyoj txqantl yol toj ambʼil tzul. Ok kʼokel tilil tuʼn Satanás tuʼn miʼn tetz, noqtzun tuʼnj, tajbʼil Jehová tuʼn tjaw kyuʼjin kykyaqil tmajen aju tqanil tkuʼx toj Tyol, toj jun yol in nel qnikʼ tiʼj ex nya kwest (kjawil uʼjit Isaías 30:21). Toj chʼintl ambʼil, «kykyaqil xjal twitz txʼotxʼ kʼelel kynikʼ tiʼj Qman» (Isaías 11:9).
17 Che ajbʼenx toj tumel tkyaqil oyaj in tzaj tqʼoʼn Jehová qe, ik tzeʼn aju traducción lu aju in jaw tnimsaʼn tbʼi. Qbʼinx tkyaqil qʼij aju in tzaj tqʼamaʼn Jehová qe toj Tyol. Ex kukx che tzajel tbʼiʼn qnaʼj Dios. Qa kukx in qo yolin tukʼe Jehová, mas kʼokel qojtzqiʼn ex mas kʼokel qkʼujlaʼn (Juan 17:3).
«¡Jun tbʼanel qoklen aj tok qbʼiʼn Jehová in tzaj yolin tojx qyol!»
^ taqik' 2 Qʼonka twitza tiʼj xnaqʼtzbʼil «Cómo escoger una buena traducción de la Biblia», toj uʼj La Atalaya te 1 te mayo te 2008.
^ taqik' 5 Toj jun tqanil t-xeʼ t-xaq uʼj te Éxodo 3:15, toj Aju Xjan Tuʼjil Tyol Dios, in tzaj qʼamaʼn jlu: «Qman. Aju yol Qman, atzun ma tzʼok te t-xel ju yol Jehová. Atzun jun tbʼi Dios in ajbʼen tuj yol ebrey tuj Ojtxi Tuʼjil».
^ taqik' 6 Aʼyeju Uʼj e kanet toj mar Muerto mas te 1,000 abʼqʼi mas ojtxi qe twitzju uʼj ajbʼen toj yol hebreo tej kubʼ bʼinchet Traducción del Nuevo Mundo.
^ taqik' 7 At junjun xjal at kyojtzqibʼil ax in tzaj kychikʼbʼaʼn ik tzeʼn jlu, noqtzun tuʼnj, nya kykyaqil.
^ taqik' 7 Qʼonka twitza tiʼj apéndice 1A toj Biblia con referencias, t-xaq 1559 aju tok tbʼi, «El nombre divino en las Escrituras Hebreas».
^ taqik' 9 Malaquías 3:16 (TNM): «Toj ambʼil aju, aʼyeju in che nimen twitz Jehová e yolin kyxolx, teyele te junjun tukʼe tukʼil ex atzun te Jehová kukx ok tqʼoʼn twiʼ kyiʼj ex e tzaj tbʼiʼn. Ex kubʼ tzʼibʼin jun uʼj twitz tuʼn ttzaj naʼn kybʼi qeju in che nimen te Jehová ex kye qeju in che ximen tiʼj tbʼi».
Bʼalo ax ikx tgana jlu
AʼYEJU XJEL MAS IN CHE TZAJ QANIN
¿Tzʼaqlipe taʼ Traducción del Nuevo Mundo?
¿Tiquʼn junxitl Traducción del Nuevo Mundo kywitz txqantl Tuʼjil Tyol Dios?
