1, 2. ¿Tiquʼn in nok tmojbʼaʼn Tyol Dios aju qʼaqʼ tukʼeju in bʼant qyolin?

TOJ abʼqʼi 1871, xi tzyet jun qʼaqʼ kyoj nim kʼul te Wisconsin toj tnam Estados Unidos. Toj chʼin ambʼil kubʼ tpatin 2,000 millón tzeʼ ex e kyim mas te 1,200 xjal tuʼn. ¿Alkye tten tzaj tzyet? Aju nim qʼaqʼ lu bʼaj tuʼnju chʼin qʼaqʼ in netz kyoj tren in che ikʼ toj nim kʼul. A jlu in tzaj tnaʼn qe aju in tzaj tqʼamaʼn taqikʼ Tyol Dios lu: «Chʼin qʼaqʼ in bʼaj tzʼeʼy tiʼj jun witz tuʼn» (Santiago 3:5). ¿Tiquʼn tqʼama aj tzʼibʼil Santiago jlu?

² Ax Santiago in tzaj chikʼbʼante: «Ikytzun qaq’ju’ kse’n q’aq’» (Santiago 3:6, XT). Toj taqikʼ Tyol Dios lu, atz in yolin tiʼj tipumal qaqʼ aju in bʼant qyolin tuʼn. Ik tzeʼn qʼaqʼ jaku tzaj tiʼn nim nya bʼaʼn, ax ikx tukʼe qyol in xi qqʼamaʼn jaku tzaj tiʼn nim nya bʼaʼn kyiʼj txqantl. Axpe ikx in tzaj tqʼamaʼn Tyol Dios qa aju in xi qqʼamaʼn jaku tzʼok te chwinqlal moqa te kamik kye junjuntl (Proverbios 18:21). ¿Ape t-xilen jlu qa mlayx txi qqʼamaʼn jun qyol noq tuʼnju jaku txi qqʼamaʼn jun nya bʼaʼn? Nya. Mlay kyaj qtzaqpiʼn tuʼn tajbʼen qʼaqʼ quʼn noq tuʼnju jaku tzaj tiʼn nya bʼaʼn kyiʼj txqantl. Quʼn aju mas bʼaʼn, bʼaʼn tuʼn tajbʼen quʼn toj tumel. Jun techel, jaku tzʼajbʼen quʼn tuʼn tkubʼ qbʼinchaʼn qwa, tuʼn qmaqʼte, moqa tuʼn qmeqʼ, tuʼn ex tuʼn ttzaj tqʼoʼn spikʼun qe. Ax ikxtzun qe nim toklen tuʼn tok  qxqʼuqin qibʼ aj qyolin, jaku tzʼajbʼen quʼn tuʼn tjaw qnimsaʼn Jehová ex tuʼn qonin kyiʼj txqantl (Salmo 19:14).

3. ¿Tiʼ oxe tiʼchaq jaku tzʼonin qiʼj tuʼn qonin kyiʼj txqantl aj qyolin?

³ O tzaj tqʼoʼn Jehová jun oyaj qe aju tuʼn t-xi qqʼamaʼn kye txqantl aju in kubʼ qximin ex aju in qnaʼn, tuʼn qtziʼ moqa kyuʼn qqʼabʼ. ¿Alkye tten jaku tzʼajbʼen oyaj lu quʼn tuʼn qonin kyiʼj txqantl? (Kjawil uʼjit Santiago 3:9, 10.) Nim toklen tuʼn tel qnikʼ tiʼj alkye ambʼil mas bʼaʼn tuʼn qyolin, tiʼ kxel qqʼamaʼn ex tzeʼn kxel qqʼamaʼn.

4. ¿Toj alkye ambʼil mas bʼaʼn tuʼn miʼn qyolin?

⁴ At junjun maj mas bʼaʼn tuʼn miʼn qyolin. In tzaj tqʼamaʼn Tyol Dios qa «at tqʼijlalil tuʼn mi kyyolin xjal» (Eclesiastés 3:7). Jun techel, mintiʼ in qo qʼajt qa in che yolin junjuntl tuʼnju in kubʼ qyekʼun qa at kyoklen toj qwitz (Job 6:24). Ax ikx mintiʼ in qo yolin kyiʼj junjun tiʼchaq mintiʼ qoklen tiʼj tuʼn t-xi qqʼamaʼn kye txqantl (Proverbios 20:19). Ex qa at jun ma tzʼok tbʼinchaʼn jun nya bʼaʼn qiʼj, il tiʼj tuʼn tajbʼen qnabʼil tuʼn miʼn qjaw kyaqpaj ex tuʼn miʼn txi qqʼamaʼn jun tiʼ (Salmo 4:4).

5. ¿Alkye tten jaku kubʼ qyekʼun te Jehová qa in xi qqʼoʼn chjonte te tuʼnju in bʼant qyolin?

⁵ Noqtzun tuʼnj, ax ikx at jun ambʼil tuʼn t-xi qqʼamaʼn jun tbʼanel qyol (Eclesiastés 3:7). Toj ambʼil aju, jaku jaw qnimsaʼn Jehová, jaku qo onin kyiʼj txqantl, jaku txi qqʼamaʼn aju in qnaʼn ex jaku t-xi qqʼamaʼn kye junjuntl jun tiʼ at tajbʼen qe (Salmo 51:15). Aj qyolin ik tzeʼn jlu, in kubʼ qyekʼun te Jehová qa nimxix in qo tzalaj tuʼnju tzaj tqʼoʼn aju oyaj lu qe. Ax tok, aj ttzaj tqʼoʼn jun tbʼanel qamiw jun oyaj qe qajbʼil tuʼn tajbʼen quʼn toj tumel.

6. ¿Tiquʼn nim toklen tuʼn tjaw qjyoʼn aju ambʼil mas bʼaʼn tuʼn qyolin?

⁶ ¿Tiquʼn nim toklen tuʼn tjaw qjyoʼn aju ambʼil mas bʼaʼn tuʼn qyolin? In tzaj tqʼamaʼn Proverbios 25:11 jlu: «Ok ttzaj qʼmaʼn jun yol at tajbʼen, ik tten jlu ik tzaʼn jun tilbʼilal mansan qʼan pwaq ttxʼotxʼil ex kyok junjun tilbʼilal tiʼj saq pwaq kytxʼotxʼil». ¿Tiʼ t-xilen jlu? Tbʼanel qeju mansan qʼan pwaq kytxʼotxʼil, noqtzun tuʼnj, mas tbʼanel qe qa ateʼ tibʼaj jun laq saq pwaq ttxʼotxʼil. Ax ikxtzun qe, atlo jun qyol tbʼanel jaku txi qqʼamaʼn te juntl. Noqtzun tuʼnj, qa ma jaw qjyoʼn aju ambʼil mas bʼaʼn tuʼn qyolin, jaku qo onin mas kyiʼj txqantl. Qo xnaqʼtzaʼn tiʼj alkye tten jaku bʼant jlu quʼn.

7, 8. ¿Alkye tten el kykanoʼn erman te tnam Japón aju techel tiʼj Jesús?

⁷ Qa ma qo yolin toj jun ambʼil nya bʼaʼn, jakulo mlay tzʼel kynikʼ xjal tiʼjju in xi qqʼamaʼn kye moqa jaku tzʼel kyikʼen aju in xi qqʼamaʼn kye (kjawil uʼjit Proverbios 15:23). Jun techel, tej ttzaj jun kyaqnajnabʼ ex tej tetz mar toj tlugar toj marzo te 2011, kubʼ kynajsaʼn junjun najbʼil toj tnam Japón. Mas te 15,000 xjal e kyim. Nim testigos de Jehová e kyim qe toj kyja ex kyamiw, ex kyajbʼiltoq tuʼn tajbʼen Tyol Dios kyuʼn tuʼn kyonin kyiʼj xjal. Noqtzun tuʼnj, toj ambʼil aju kubʼ kyximen tuʼn miʼn kyyolin tiʼjju tuʼn kyjaw anqʼin kyimni. ¿Tiquʼn? Tuʼnju ojtzqiʼntoq kyuʼn qa nim kyxol qe xjal lu budista qe ex noq chʼin kyojtzqibʼil at tiʼj Tyol Dios. Tuʼntzunju, ok tilil kyuʼn erman tuʼn tok kyqʼuqbʼaʼn kykʼuʼj ex xi kychikʼbʼaʼn kye tiquʼn in tzaj nya bʼaʼn kyiʼj xjal.

 ⁸ Ojtzqiʼntoq tuʼn Jesús alkye ambʼil tuʼn miʼn tyolin ex alkye ambʼil bʼaʼn tuʼn tyolin (Juan 18:33-37; 19:8-11). Jun techel, yon Jesús tiʼj ambʼil mas bʼaʼn tuʼn t-xi t-xnaqʼtzaʼn junjun tiʼchaq kye t-xnaqʼtzbʼen (Juan 16:12). El kykanoʼn erman te Japón aju techel tiʼj Jesús, tuʼnju e yon tiʼj ambʼil mas bʼaʼn tuʼn kyyolin kyukʼil xjal tiʼjju qa che jawil anqʼin kyimni. Tej tikʼ kabʼe abʼqʼi tukʼe qaq xjaw, kyaj kyqʼoʼn aju tal uʼj kye xjal aju tok tbʼi, ¿Jakupe che jaw anqʼin juntl maj kyimni? Nim xjal xi kyiʼn aju tal uʼj ex aju tqanil jaw kyuʼjin toj xi tqʼuqbʼaʼn kykʼuʼj. Ax ikx qe bʼaʼn tuʼn qximen tiʼj kyanqʼibʼil xjal ex tiʼjju in xi kyokslaʼn toj tembʼil jatumel in qo pakbʼan. Iktzun tten kʼelel qnikʼ tiʼj alkye ambʼil mas bʼaʼn tuʼn qyolin kyukʼe.

9. ¿Toj alkye junjuntl tten jaku qo yon tuʼn tkanet aju ambʼil mas bʼaʼn quʼn tuʼn qyolin?

⁹ ¿Toj alkye junjuntl ambʼil jaku qo yon naʼmxtoq txi qqʼamaʼn jun qyol? Ik tzeʼn aj ttzaj tqʼamaʼn jun xjal jun tiʼ qe aju jaku tzaj qqʼoj tuʼn. Mintiʼ tuʼn t-xi qtzaqʼweʼn jun rat naj ex tuʼn t-xi qqʼamaʼn jun qyol nya bʼaʼn, maslo bʼaʼn tuʼn miʼn t-xi qqʼamaʼn jun tiʼ ex tuʼn qximin tiʼj jlu: «¿Junpe nya bʼaʼn jlu? ¿Ilpe tiʼj tuʼn nyoline tukʼil xjal saj qʼamante jlu weye?». Qa nya nim toklen, maslo bʼaʼn qa mintiʼ jun tiʼ xi qqʼamaʼn. Noqtzun tuʼnj, qa il tiʼj tuʼn qyolin tukʼe xjal bʼaʼn tuʼn qyon tzmaxi aj tel qqʼoj (kjawil uʼjit Proverbios 15:28). Moqa qaj tuʼn qonin kyiʼj toj qja aʼyeju nya testigo de Jehová qe tuʼn tok kyojtzqiʼn Jehová. Tuʼntzunju, il tiʼj tuʼn tten qpasens, bʼaʼn tuʼn qximen tiʼjju kxel qqʼamaʼn ex tuʼn qyon tiʼj ambʼil mas bʼaʼn tuʼn qyolin kyukʼil.

10. a) ¿Tiquʼn il tiʼj tuʼn qximen tiʼjju kxel qqʼamaʼn? b) ¿Alkyeqe yol il tiʼj tuʼn kyel qikʼen?

¹⁰ Tuʼnju qyol in xi qqʼamaʼn jaku kynaʼ txqantl bʼaʼn tuʼn moqa nya bʼaʼn. Tuʼntzunju, nim toklen tuʼn qximen tiʼjju kxel qqʼamaʼn (kjawil uʼjit Proverbios 12:18). Ateʼ nim xjal nya bʼaʼn qe ex in che ajbʼen yol kyuʼn tuʼn tkux chyoʼn tiʼj tanmi juntl, ik tzeʼn jun «spad» moqa ik tzeʼn jun «plech» (Salmo 64:3). In nel kykanoʼn aju yol lu kyoj película ex toj televisión. Atzun qeju okslal mintiʼ tuʼn kyajbʼen nya bʼaʼn yol kyuʼn, aʼyeju jaku kux chyoʼn tiʼj tanmi juntl tuʼn, axpe ikx qa noq in qo yaqin. Ax tok bʼaʼn aju tuʼn qyaqin ex jaku qo tzalaj tuʼn. Noqtzun tuʼnj, mintiʼ tuʼn t-xi qqʼamaʼn jun yol nya bʼaʼn moqa tuʼn qxmayin tiʼj juntl noq tuʼn kyjaw tzeʼn txqantl. In tzaj tqʼamaʼn Tyol Dios qa mintiʼ tuʼn kyajbʼen nya bʼaʼn yol quʼn, sino tuʼn kyajbʼen tbʼanel yol quʼn tuʼn qonin kyiʼj txqantl ex tuʼn t-xi qqʼuqbʼaʼn kykʼuʼj (Efesios 4:29, 31).

11. ¿Tiʼ jaku tzʼonin qiʼj tuʼn kyjaw qjyoʼn tbʼanel qyol?

¹¹ Tqʼama Jesús jlu: «Tkyaqilju at tuj tanmi xjal, axtzunju in yolin tiʼj» (Mateo 12:34). A t-xilen jlu qa tukʼeju in xi qqʼamaʼn in kubʼ qyekʼun aju tkuʼx toj  qanmi. Qa axix tok kʼujlaʼn qe xjal quʼn tuʼn tkyaqil qanmi, toj tkyaqil ambʼil che ajbʼel tbʼanel yol quʼn ex che onil kyiʼj.

12. ¿Tiʼ juntl tiʼ kʼonil qiʼj tuʼn tjaw qjyoʼn tbʼanel qyol?

¹² Ax tok attoq te aj kawil Salomón nim tnabʼil, noqtzun tuʼnj, ximenxix kyiʼj qeju tbʼanel yol e kubʼ ttzʼibʼin ex tbʼanel aj tjaw uʼjit (Eclesiastés 12:9, 10). A jlu in tzaj tyekʼun qe qa il tiʼj tuʼn tok tilil quʼn tuʼn kykanet tbʼanel yol quʼn aj qyolin. ¿Tiʼ jaku tzʼonin qiʼj tuʼn kykanet? Jaku che kanet akʼaj yol quʼn qa ma qo uʼjin tiʼj Tyol Dios ex kyiʼj qe quʼj. Ex qa mintiʼ in nel qnikʼ tiʼj jun yol, jaku qo jyon tiʼj tiʼ t-xilen. Ax ikx, jaku tzʼel qkanoʼn aju techel kyaj tqʼoʼn Jesús. Tqʼama Jesús qa otoq tzaj xnaqʼtzaʼn tuʼn Jehová, tuʼn kukx kyajbʼen yol tuʼn te qʼuqbʼil kykʼuʼj xjal in tzaj nya bʼaʼn kyiʼj (Isaías 50:4). Ax ikx nim toklen tuʼn qximen tiʼj tiʼ kbʼel kynaʼn txqantl tuʼnju kxel qqʼamaʼn (Santiago 1:19). Jaku kubʼ qxjelin jlu: ‹Qa ma txi nqʼamaʼne yol lu, ¿tiʼ kʼokel toj twiʼ juntl xjal tuʼn jlu? ¿Tiʼ kbʼel tnaʼn tuʼn jlu?›.

13. ¿Tiquʼn il tiʼj tuʼn qyolin toj jun tumel aju jaku tzʼel nikʼbʼaj tiʼj?

¹³ Nim toklen tuʼn qyolin toj jun tumel aju nya kwest tuʼn tel nikʼbʼaj tiʼj. Tuʼn tel qnikʼ tiʼj, qo ximen tiʼj jlu. In najbʼentoq aju tqʼajqʼajel chun kyuʼn aj Israel te jun techel. Jun kyxol qeju tqʼajqʼajel chun a t-xilentoq tuʼn tok kychmon kyibʼ kykyaqil aj Israel toj jun lugar. Juntl tqʼajqʼajel chun a t-xilentoq tuʼn kyxiʼ soldad qʼojil. Noqpe ximana tiʼ jakutoq bʼaj kyiʼj soldad qa mintiʼ xjaw qʼajt chun toj tumel. Axju jaku bʼaj tukʼilju alkye tten in qo yolin. In tzaj tqʼamaʼn Tyol Dios qa il tiʼj tuʼn qyolin toj jun tten nya kwest tuʼn tel nikʼbʼaj tiʼj. Quʼn qa miʼn, jakulo che el tzpet xjal moqa mlay tzʼel kynikʼ tiʼj qyol. Ax tok, maske in qo yolin toj tumel, il tiʼj tuʼn tok qxqʼuqin qibʼ tuʼn miʼn kyajbʼen yol nya toj tumel quʼn nix tuʼn tkubʼ qyekʼun qa mintiʼ kyoklen txqantl toj qwitz (kjawil uʼjit 1 Corintios 14:8, 9).

14. ¿Alkye yekʼbʼil at qa yolin Jesús toj jun tten aju nya kwest tuʼn tel nikʼbʼaj tiʼj?

¹⁴ Kukx yolin Jesús toj jun tumel nya kwest tuʼn tel nikʼbʼaj tiʼj. Qo ximen tiʼjju chikʼbʼabʼil in jaw quʼjin kyoj capítulo 5 a 7 te uʼj te Mateo. Tej tyolin Jesús, mintiʼ e ajbʼen yol tuʼn aʼyeju mintiʼ in nel nikʼbʼaj kyiʼj moqa nim yol noq tuʼn kyjaw labʼin xjal tiʼj. Ex mintiʼ xi tqʼamaʼn jun yol kye xjal aju jakutoq kubʼ kynaʼn nya bʼaʼn tuʼn. Xi tchikʼbʼaʼn tiʼchaq nim toklen, noqtzun tuʼnj, tukʼil yol nya kwest. Jun techel, xi ttziyen kye t-xnaqʼtzbʼen qa mintiʼtoq tuʼn ttzaj bʼaj kykʼuʼj tiʼjju kxel kywaʼn junjun qʼij. Tuʼntzunju, xi tchikʼbʼaʼn kye qa kukx in xi tqʼoʼn Jehová kywa txkup in che lipan twitz kyaʼj. Xitzun tqanin jlu kye: «¿Myapetzun mas maʼ kyxilene kywitz qe chyuʼj?» (Mateo 6:26). Kyukʼe qeju yol nya kwest lu, xi tqʼuqbʼaʼn kykʼuʼj ex xi tqʼoʼn jun xnaqʼtzbʼil nim toklen kye.

15. ¿Tiquʼn il tiʼj tuʼn qyolin toj jun tbʼanel tten?

¹⁵ Ax ikx nim toklen tuʼn qximen tiʼj alkye tten qo yolil kyukʼe txqantl. Nimxix in che tzalajtoq xjal tuʼn tok kybʼiʼn Jesús tuʼnju attoq tchiylal tyol (Lucas 4:22). Aj qyolin toj tumel, maslo jaku ten kygan xjal tuʼn qok kybʼiʼn ex jaku tzʼok qeʼ kykʼuʼj tiʼjju in xi qqʼamaʼn kye (Proverbios 25:15). Jaku qo yolin kyukʼe junjuntl toj tumel  qa ma che kubʼ qnimen ex qa ma qo ximen kyiʼj. Atzun bʼantju tuʼn Jesús. Jun techel, tej tok tqʼoʼn twitz kyiʼj nimku xjal ok tilil tuʼn, tuʼn kyok tbʼiʼn ex in tzalajtoq tuʼnju xi tqʼoʼn ambʼil kye ex tuʼnju xi tqʼoʼn xnaqʼtzbʼil kye (Marcos 6:34). Axpe ikx tej tok bʼinchen nya bʼaʼn tiʼj kyuʼn xjal mintiʼ aj tqʼoʼn t-xel (1 Pedro 2:23).

16, 17. a) ¿Alkye tten jaku tzʼel qkanoʼn techel kyaj tqʼoʼn Jesús aj qyolin kyukʼil toj qja ex kyukʼil qamiw? (Qʼonka twitza tiʼj tnejel tilbʼilal.) b) ¿Tiʼ tbʼanel tzaj tuʼnju yolin jun txubʼaj toj tumel?

¹⁶ Ax tok kʼujlaʼn qe toj qja quʼn ex qe qamiw, noqtzun tuʼnj, jakulo txi qqʼamaʼn junjun tiʼchaq nya bʼaʼn kye tuʼnju ojtzqiʼnxix kywitz quʼn. Tuʼn jlu, jaku kubʼ qximen qa nya il tiʼj tuʼn tok qxqʼuqin qibʼ tiʼj alkye tten qo yolil kyukʼil. Noqtzun tuʼnj, mintiʼ e ajbʼen nya bʼaʼn yol tuʼn Jesús kyukʼil tamiw. Tej in che yolintoq tiʼj alkye mas nim toklen kyxol, e xi tkawin Jesús toj tumel ex ajbʼen jun tal kʼwaʼl tuʼn, tuʼn tonin kyiʼj tuʼn tchʼixpet aju kyximbʼetz (Marcos 9:33-37). Ax ikx kye ansyan jaku tzʼel kykanoʼn aju techel kyaj tqʼoʼn Jesús tuʼn t-xi kyqʼoʼn kyconsej junjuntl toj tumel (Gálatas 6:1).

¹⁷ Axpe ikx qa ma tzaj tqʼamaʼn jun xjal jun nya bʼaʼn yol qe, jaku kubʼ qyekʼun tbʼanel qmod ex jaku qo yolin tukʼil toj tumel (Proverbios 15:1). Qo ximen tiʼjju bʼaj tiʼj jun txubʼaj aju tjunalx in chʼiysantoq jun tal otoq tzʼokx toj tkuʼxumal. In kubʼtoq tbʼinchaʼn kuʼxin junjun tiʼchaq nya bʼaʼn toj ewaj. Noqtzun tuʼnj, ok tbʼiʼn jun ermana aju nya bʼaʼn in kubʼ tbʼinchaʼn kuʼxin ex tajbʼiltoq tuʼn tonin tiʼj ttxuʼ. Nyatoq tajbʼil ermana tuʼn tkubʼ tnaʼn txubʼaj nya bʼaʼn, xi tqʼamaʼn jlu te: «Bʼisbʼajilxix tuʼnju mintiʼ ma txi t-xnaqʼtzana tala toj tumel». Tej naʼmxtoq txi ttzaqʼweʼn txubʼaj, kubʼ ten ximel ex ok tilil tuʼn, tuʼn min ttzaj tqʼoj. Yajxitl xi ttzaqʼweʼn te ermana tukʼe tbʼanel yol qa kukxtoq in nok tilil tuʼn, tuʼn t-xi t-xnaqʼtzaʼn aju tal. Tuʼn jlu, kukx ok kyamiwen kyibʼ. Ax ikx ok tbʼiʼn kuʼxun aju tqʼama ttxuʼ. Ex el tnikʼ tiʼj qa qʼuqlitoq tkʼuʼj ttxuʼ tiʼj qa kbʼeltoq tchʼexpun tmod. Tuʼntzunju, kyaj ttzaqpiʼn aʼyeju nya bʼaʼn tamiw, jaw aʼ twiʼ ex tej tbʼet ambʼil ajbʼen toj Betel. Aj qyolin kyukʼil qerman, kyukʼil toj qja moqa kyukʼil xjal ojtzqiʼn kywitz quʼn, «tkyaqil maj, atwit tchyaʼl» qyol (Colosenses 4:6).

18. ¿Alkye tten jaku tzʼel qkanoʼn techel kyaj tqʼoʼn Jesús aj qyolin?

¹⁸ Jun tbʼanel oyaj o tzaj tqʼoʼn Jehová qe aju tuʼn t-xi qqʼamaʼn kye junjuntl aju qximbʼetz ex aju in qnaʼn. Tuʼntzunju, qkanoʼmel aju techel kyaj tqʼoʼn Jesús, aj tjaw qjyoʼn alkye ambʼil bʼaʼn tuʼn qyolin, tiʼ kxel qqʼamaʼn ex tzeʼn kxel qqʼamaʼn. Bʼaʼn tuʼn kukx tkubʼ qyekʼun tbʼanel qmod ex che ajbʼenx yol quʼn tuʼn qonin kyiʼj txqantl ex tuʼn ttzalaj Jehová quʼn.