Tuʼn tok qeʼ kykʼuʼj txqantl tiʼj jun xjal, il tiʼj tuʼn t-xi tbʼinchaʼn qe taqʼun ex tuʼn t-xi tbʼinchaʼn jun rat naj.

Ax ikx qe kʼwaʼl jaku txi kyxnaqʼtzan kyibʼ tuʼn tbʼant aqʼuntl in xi qʼamaʼn kye. In tzaj tqʼamaʼn uʼj Parenting Without Borders (Qe mambʼaj mintiʼ in che weʼ tiʼj jun tiʼ) jlu: «Aj tel jun kʼwaʼl 15 xjaw, ya jaku tzʼonin tiʼj junjun aqʼuntl toj ja, ex aj tjapun twi 18 xjaw, in ten tajbʼil tuʼn tbʼant tuʼnx. Toj junjun lugar, aj kyjapun kʼwaʼl te jweʼ moqa wuq abʼqʼi, in xi tzyet tuʼn kyonin mambʼaj kyiʼj tuʼn tten kygan tuʼn kyonin. Jaku bʼant jun tbʼanel aqʼuntl kyuʼn kʼwaʼl toj ja aj tpon kyabʼqʼi lu».

At nim kuʼxun in che ul meltzʼaj tja kyman qa mintiʼ in che ex kywitz nya bʼaʼn in che ok weʼ twitz aj tkubʼ kyximen tuʼn kyanqʼin kyjunalx. Chʼixme tkyaqil maj, in bʼaj jlu tuʼnju mintiʼ xi xnaqʼtzaʼn kye tzeʼn tuʼn tajbʼen pwaq moqa medi kyuʼn, tuʼn tbʼant kyaqʼun ja moqa junjuntl tiʼ tuʼn tbʼant kyuʼn.

Tuʼntzunju, mas bʼaʼn tuʼn t-xi t-xnaqʼtzaʼna tkʼwaʼla kyiʼj tiʼchaq che bʼantel tuʼn aj tchʼiy. In tzaj tqʼamaʼn uʼj How to Raise an Adult (Tzeʼn tuʼn t-xi xnaqʼtzet tkʼwaʼla tuʼn tok tnabʼil) jlu: «Nyalo taja tuʼn axa txi qʼonte tkyaqil tiʼchaq te tkʼwaʼla ajxi tjapun twi 18 abʼqʼi tuʼntzun t-xi tzyet tuʼn tbʼant t-xqʼuqin tibʼ».

Qʼonxa kyaqʼun toj ja

NABʼIL TOJ TYOL DIOS: «Aju xjal in aqʼnan, at tkambʼabʼl tiʼj jlu» (Proverbios 14:23).

Kyaj kʼwaʼl tuʼn tbʼant tiʼchaq kyuʼn kyukʼil kytat. Tuʼntzunju, miʼn txi tnajsaʼna ambʼil lu ex qʼonxa jun kyaqʼun jaku bʼant ja.

Ateʼ nim mambʼaj in kubʼ kyximen qa tkyaqil qʼij at nim kydeber kʼwaʼl in kyaj qʼoʼn toj tja xnaqʼtzbʼil ex nya kyaj tuʼn tkubʼ kyqʼoʼn mas aqʼuntl kyibʼaj.

Noqtzun tuʼnj, aʼyeju kʼwaʼl in che onin tiʼj aqʼuntl ja jakulo che ok te tbʼanel aj xnaqʼtzal, tuʼnju in xi kyxnaqʼtzan kyibʼ tuʼn t-xi kyiʼn alkyexku aqʼuntl ex tuʼn tbʼant kyuʼn. Ax ikx, in tzaj tqʼamaʼn uʼj Parenting Without Borders jlu: «Qa mintiʼ ma tzʼok qqʼoʼn qwiʼ tiʼj qa kyaj tal kʼwaʼl tuʼn kyonin, tuʼn jlu kbʼel kyximen qa nya nim toklen tuʼn kyonin kyiʼj txqantl [...]. Ax ikx jaku che naqʼet tuʼn tok qʼet tkyaqil tiʼchaq toj kyqʼabʼ».

Ik tzeʼn in tzaj tqʼamaʼn tqanil lu, aj t-xi qʼet kyaqʼun kʼwaʼl ja in xi xnaqʼtzet kye qa nya oʼkx tuʼn tok qʼet tiʼchaq kye ex tuʼn miʼn kyximen oʼkx kyiʼjx. Ax ikx in  nonin kyiʼj tuʼn tel kynikʼ tiʼj qa at jun kyoklen toj ja ex qa il tiʼj tuʼn tbʼant junjun tiʼ kyuʼn.

Onina kyiʼj tkʼwaʼla tuʼn tel kynikʼ tiʼj qa tzul junjun nya bʼaʼn kyiʼj tuʼn kybʼinchbʼen

NABʼIL TOJ TYOL DIOS: «Bʼinxa qe konsej ex nimanxa aju kxel kawinte teya; kyjaʼtzun jaku tzʼok tnabʼla» (Proverbios 19:20).

Aj tbʼant jun tiʼ nya toj tumel tuʼn tkʼwaʼla, miʼn kubʼ tewina til. Jaku tzʼel kynikʼ kʼwaʼl tiʼj qa tzul junjun nya bʼaʼn kyiʼj tuʼn kybʼinchbʼen. Jun techel, qa ma kubʼ kypaʼn jun tiʼ ex nya kye, jakulo txi kyqanin najsam ex jakulo txi kychjoʼn twiʼ aju otoq kubʼ kypaʼn.

Qa ma tzʼel kynikʼ kʼwaʼl tiʼjju in che el txalpaj tiʼj, kbʼantel jlu kyuʼn.

• Che yolil axix tok.

• Mlay tzʼok kyqʼoʼn kypaj txqantl.

• Mlay txi kyqʼamaʼn jun tiʼ noq tuʼn kyex twitz.

• Kbʼantel kyqanin najsam qa il tiʼj.