Kyaj kʼwaʼl tuʼn kyonin xjal ma che chʼiy kyiʼj tuʼn kyxi xnaqʼtzet ex tuʼn t-xi qʼet consej kye, ex aʼye mambʼaj at kyoklen tuʼn tbʼant jlu kyuʼn. Noqtzun tuʼnj, ax ikx jaku che onin junjuntl xjal o che chʼiy kyiʼj kʼwaʼl.

Kyoj nimku tnam, mintiʼ in che ten kuʼxun nim ambʼil kyukʼil xjal ma che chʼiy. Che ximane tiʼj jlu:

• In che ten kʼwaʼl nim ambʼil toj tja xnaqʼtzbʼil, jatumel ateʼ mas kʼwaʼl kywitz aj xnaqʼtzal moqa junjuntl xjal o che chʼiy.

• Aj kypon kyja aj tbʼaj twiʼ xnaqʼtzbʼil, mintiʼ jun in ten kyukʼil tuʼnju in che aqʼunan kytat.

• Tzaj tyekʼin jun tqanil qa atz Estados Unidos, in nok kyqʼoʼn kʼwaʼl te 8 a 12 abʼqʼi 6 or kyiʼj yolbʼil moqa kyiʼj kʼuxbʼil. *

In tzaj tqʼamaʼn uʼj Hold On to Your Kids (Miʼn tzʼel tpan tibʼa kyiʼj tkʼwaʼla) jlu: «Ya mintiʼ in nel kykanoʼn kuʼxun kyiʼj kytat, kyiʼj aj xnaqʼtzal moqa kyiʼj junjuntl xjal o che chʼiy, axpe ikx mintiʼ in xi kyqanin kyconsej kye, aju in bʼant kyuʼn jaʼlo in xi kyqanin onbʼil [...] kye junjuntl kuʼxun ax kyabʼqʼi ik tzeʼn kye».

Paʼmila ambʼil tuʼn ttena kyukʼil tkʼwaʼla

NABʼIL TOJ TYOL DIOS: «Kyqʼonxe xnaqʼtzbʼil kye kʼwaʼl tuʼn kybʼet tuj bʼe bʼaʼn, oktzun kytijin mlay tzʼel kypaʼn kyibʼ tiʼj» (Proverbios 22:6).

Atz in che jyon kʼwaʼl onbʼil kyukʼil kytat. In tzaj kyqʼamaʼn junjun xjal at kyojtzqibʼil, qa axpe ikx aj kyokx kʼwaʼl toj kykuʼxumal, mas in nok kyqʼoʼn toklen consej in xi kyqʼoʼn kytat kye twitzju in tzaj kyqʼoʼn kyamiw. Tqʼama aj xnaqʼtzal tiʼj Psicología Laurence Steinberg jlu toj tuʼj You and Your Adolescent (Aju tkʼwaʼla ex aya): «Toj kykuʼxumal ex kyoj tnejel abʼqʼi aj tok kynabʼil, nim maj kukx in che onin tatbʼaj tiʼj kymod ex tiʼjju in bʼant kyuʼn kykʼwaʼl». In tzaj tqʼamaʼntl aj tzʼibʼil jlu: «In nok tqʼoʼn kuʼxun toklen nabʼil in xi tqʼoʼna te maske mintiʼxix in nel tnikʼ tiʼj, ex in xi tbʼiʼn aju in xi tqʼamaʼna te maske nyaxix bʼaʼn in nela toj twitz».

Kukx kʼokel kyqʼoʼn tkʼwaʼla toklena, tuʼntzunju tzʼajbʼen jlu tuʼna. Paʼmila ambʼil tuʼn ttena kyukʼil. Qʼamanxa kye tiʼ t-xima kyiʼj tiʼchaq, xnaqʼtzanxa qe tbʼanel mod kye ex yolina kyukʼil tiʼjju o tzikʼ toj tanqʼibʼila.

 Qaninxa onbʼil kye xjal o che chʼiy ex at kynabʼil

NABʼIL TOJ TYOL DIOS: «Qa ma tzʼok tjunin tibʼa kyukʼil qe xjal at kynabʼl, ktel tnabʼla» (Proverbios 13:20).

¿Ateʼqe xjal jaku che ok te jun tbʼanel techel te tkʼwaʼla o tzʼokx toj tkuʼxumal? ¿Jakupe bʼant jun tiʼ tuʼna tuʼn tten tkʼwaʼla kyukʼil xjal lu? Ax tok, mintiʼ tuʼn t-xi tqʼoʼna toklena te ik tzeʼn tatbʼaj. Noqtzun tuʼnj, jaku tzʼonin tiʼj xnaqʼtzbʼil in xi tqʼoʼna te tkʼwaʼla qa ma che onin xjal tiʼja aʼyeju o che chʼiy ex jaku tzʼok qeʼ tkʼuʼja kyiʼj. In tzaj tqʼamaʼn Tyol Dios qa nim onin tiʼj jun kuʼxun Timoteo tbʼi tej tten tukʼil apóstol Pablo, axpe ikx tej otoq chʼiy, ex tzaj nim tbʼanel te apóstol Pablo tuʼnju ten Timoteo tukʼil (Filipenses 2:20, 22).

Toj ambʼil jaʼlo, nim ja xjal mintiʼ in che ten junx tuʼnju at maj in che anqʼin qe kychman, qe kytiy ex junjuntl toj kyja toj juntl tnam. Qa a jlu in bʼaj kyiʼj toj tjaya, qʼonxa ambʼil kye tkʼwaʼla tuʼn tel kykanoʼn kyiʼj xjal o che chʼiy ex at tbʼanel kymod tuʼntzun tten kymod tkʼwaʼla ik tzeʼn kye.