A jlu jun mod in nonin qiʼj tuʼn qex kywitz nya bʼaʼn moqa tuʼn miʼn ttzaj bʼaj qkʼuʼj. Qa mas tiʼchaq in nikʼ qiʼj, mas nya kwest in qo ex kywitz. Ik tzeʼn aj tbʼant tbʼet jun kʼwaʼl, nim maj in jaw tzʼaq, ax ikx aj tchʼiy kʼokel weʼ twitz junjun nya bʼaʼn aju kʼonil tiʼj tuʼn tok tnabʼil.

Ateʼ junjun kʼwaʼl in tzaj bʼaj kykʼuʼj qa mintiʼ in bʼant jun tiʼ kyuʼn, aj kyok weʼ twitz jun tiʼ kwest tuʼn kyex twitz moqa aj ttzaj qʼoʼn jun kawbʼil kye. Ateʼ junjuntl ya mintiʼ in kubʼ kybʼinchaʼn jun tiʼ qa nya bʼaʼn in nela. Noqtzun tuʼnj, tbʼanel qa ma tzʼel kynikʼ tiʼj jlu:

• Qa kwest tuʼn tel tkyaqil te tbʼanel (Santiago 3:2).

• Qa qkyaqilx in che ikʼ tiʼchaq kwest toj qanqʼibʼil junjun maj (Eclesiastés 9:11, 12).

• Qa oʼkx jaku tzʼel tkyaqil te tbʼanel qa ma tzaj qʼoʼn kawbʼil qe (Proverbios 9:9).

Qa ma tzikʼx tuʼn tkʼwaʼla, kʼonil tiʼj tuʼn miʼn ttzaj xobʼ aj tok weʼ kywitz nya bʼaʼn toj tanqʼibʼil.

Aj kyel txalpaj

NABʼIL TOJ TYOL DIOS: «Maske kubʼ tzʼaq wuq maj ju xjal tzʼaqlxix, pero in jaw weʼ juntl maj» (Proverbios 24:16).

Tzʼonina tiʼj tkʼwaʼla tuʼn tten tbʼanel t-ximbʼetz kyiʼj tiʼchaq. Jun techel, ¿tiʼ kbʼantel tuʼn qa mintiʼ ma bʼant examen tuʼn? ¿Kbʼelpe t-ximen qa mlayx bʼant tuʼn ex ok tqʼama jlu: «¡Mintiʼx jun tiʼ tbʼanel in bʼant wuʼne!»?

Tzʼonina tiʼj tkʼwaʼla tuʼn t-ximen tiʼj tiʼ jaku bʼant tuʼn tuʼntzun tex kywitz nya bʼaʼn. Iktzun tten mlay tzaj xobʼ aj tok weʼ twitz nya bʼaʼn.

Ex juntl tiʼ, miʼn txi tbʼinchaʼna tiʼj nya bʼaʼn in nok weʼ twitz. Tzʼonina tiʼj tuʼn ax t-xi bʼinchante tiʼj nya bʼaʼn. Jaku txi tqanina te: «¿Tiʼ jaku bʼant tuʼna tuʼn tel tnikʼa tiʼjju in tzaj yekʼin teya toj tja xnaqʼtzbʼil?».

Aj ttzaj jun nya bʼaʼn

NABʼIL TOJ TYOL DIOS: «Mintiʼ bʼaʼn kyuʼne aju tzul te nchiʼj» (Santiago 4:14).

Mintiʼ ojtzqiʼn quʼn tiʼ jaku tzaj toj qanqʼibʼil. Jun rat jaku txi naj pwaq ex qanqʼibʼil. Ik tzeʼn in  tzaj tqʼamaʼn Tyol Dios, «mya tuʼnju kyuw che qelan xjal jaku che kambʼan tiʼj ojqelbʼil, ex mya tuʼnju kyuw kykʼuʼj xjal tuj qʼoj jaku che kambʼan tuj qʼoj, [...] noq minabʼen in tzaj mya bʼaʼn» (Eclesiastés 9:11, 12).

In nel qnikʼe qa in nok tilil tuʼna tuʼn t-xqʼuqina tiʼj tkʼwaʼla tiʼj nya bʼaʼn. Noqtzun tuʼnj, qa ma qo ximenxix tiʼj, mlayx klet tuʼna tiʼj tkyaqil nya bʼaʼn jaku tzaj tiʼj.

Ax tok, maske naʼmx tjapun tabʼqʼi tkʼwaʼla tuʼn tel qʼiʼn taqʼun moqa tuʼn miʼn ttenxix tpwaq, pero bʼalo il tuʼn tex kywitz junjun nya bʼaʼn ik tzeʼn aj tkyim jun toj tja moqa aj t-xi tnajsaʼn tamiwbʼil tukʼil jun xjal. *

Aj ttzaj qʼoʼn junjun consej kye

NABʼIL TOJ TYOL DIOS: «Bʼinxa qe konsej [...]; kyjaʼtzun jaku tzʼok tnabʼla» (Proverbios 19:20).

Mintiʼ in bʼaj yasoʼn jun kʼwaʼl aj ttzaj qʼoʼn jun nabʼil moqa consej te. Noq oʼkx in nonin jlu tiʼj tuʼn tkubʼ tchʼexpuʼn jun nya bʼaʼn tbʼinchbʼen moqa tmod.

Qa ma txi xnaqʼtzet tkʼwaʼla tuʼn t-xi tnimen qe consej, kʼonil tuʼn miʼn ttzaj kʼixkʼoj tiʼja ex tiʼj tkʼwaʼla. «Qa ma txiʼ tbʼinchaʼna tiʼj tkyaqil nya bʼaʼn in bʼant tuʼn tkʼwaʼla, mlayx bʼant tuʼn, chi jun mambʼaj John tbʼi. Kbʼantel jun ex juntl nya bʼaʼn tuʼn ex aya kxel chjonte til moqa kxel tzʼeʼy tiʼj. Tuʼn jlu mlayx tzalaja ex mlayx tzalaj tkʼwaʼla».

¿Alkye tten jaku tzʼonina tiʼj tkʼwaʼla tuʼn t-xi tbʼiʼn qe consej jaku che onin tiʼj? Aj ttzaj qʼoʼn kawbʼil te toj tja xnaqʼtzbʼil moqa toj juntl lugar, miʼn txi tqʼamaʼna te qa nya bʼaʼn aju. Sino qaninxa te:

• «Tiʼ t-xima tiʼj, ¿tiquʼntzulo ma tzaj kawina?».

• «¿Alkye tten jaku bʼant mas bʼaʼn tuʼna?».

• «¿Tiʼ kbʼantel tuʼna qa ma bʼaj jlu tiʼja juntl maj?».

Naʼntza, nya oʼkx che onil kawbʼil moqa consej tiʼj tkʼwaʼla toj ambʼil jaʼlo, sino ax ikx che onil tiʼj aj tchʼiy.