Jun mod in nonin tuʼn kybʼant junjun tiʼ quʼn ik tzeʼn:

• tuʼn qayon tuʼn kybʼant tkyaqil qajbʼil

• tuʼn tkubʼ kyiʼj junjun tiʼ quʼn

• tuʼn tbʼant qaqʼun maske nya qgan

• tuʼn qximen tnejel kyiʼj txqantl

Aʼyeju kʼwaʼl in bʼant kyjakʼun kyibʼ, jaku kubʼ tiʼj jun achbʼil kyuʼn maske bʼaʼn in nela kye. Atzun qe kʼwaʼl mintiʼ in kyjakʼun kyibʼ:

• jaku tzaj kyqʼoj

• jaku tzaj depresión kyiʼj

• jaku bʼant kysichʼin, kykʼan droga ex kykʼan nim qʼeʼn

• jaku txi kywaʼn nim wabʼj

Tzaj tyekʼin jun xnaqʼtzbʼil qa chʼixme kykyaqil kʼwaʼl mintiʼ in kyjakʼun kyibʼ, in tzaj nya bʼaʼn kyiʼj aju at toklen tukʼil pwaq, tukʼil ley ex tiʼj kyxmilal aj kychʼiy. Tuʼn jlu kubʼ t-ximen aj xnaqʼtzal te Universidad te Pensilvania, Angela Duckworth jlu: «Tbʼanel qa in qjakʼun qibʼ».

Qʼamanxa miʼn ex japunx twi tyola

NABʼIL TOJ TYOL DIOS: «Noq oʼkx tuʼn t-xi kymaʼne ok ex qa miʼn» (Mateo 5:37).

At maj in che ok kyqʼoʼn kʼwalbʼaj qe kytat toj malbʼil aj tkubʼ kyjilin kyibʼ moqa aj tbʼant kaprich kyuʼn, axpe ikx qa kywitz xjal ma bʼant kyuʼn. Qa ma txi kyqʼoʼn mambʼaj ambʼil te kʼwaʼl, kbʼel t-ximen qa aj tkubʼ tjilin tibʼ jaku chʼexpaj t-ximbʼetz ttat tuʼn.

Qa ma txi kyqʼamaʼn mambʼaj miʼn ex in japun twi kyyol, kʼelel tnikʼ kʼwaʼl tiʼj jun tbʼanel xnaqʼtzbʼil: qa mlay kambʼet alkyexku tiʼ tuʼn toj tanqʼibʼil. Kubʼ ttzʼibʼin doctor David Walsh jlu: «Kwest tuʼn t-xi qnimen, pero aʼyeju xjal in nel kynikʼ tiʼj jlu in kubʼ kynaʼn qa at tkyaqil kye». Ax ikx tqʼama qa mintiʼ in qo onin «kyiʼj qkʼwaʼl qa ma chex qxnaqʼtzaʼn qa tkyaqil ambʼil tzul qʼoʼn noq alkyexku kyajbʼil kyuʼn xjal». *

Aj t-xi qʼamet miʼn te kʼwaʼl toj ambʼil jaʼlo, yajxitl kʼonil tiʼj tuʼnju mas nya kwest kxel tqʼamaʼn miʼn kyiʼj droga, tuʼn tkubʼ ten moqa tuʼn tkubʼ kuẍe tukʼil jun xjal naʼmxtoq tmojeʼ ex kyiʼj junjuntl tiʼchaq jaku tzaj kyiʼn nya bʼaʼn tiʼj.

 Xnaqʼtzanxa kye qa tkyaqil in tzaj tiʼn bʼaʼn moqa nya bʼaʼn

NABʼIL TOJ TYOL DIOS: «Alkyeju in kuʼx tawaʼn xjal, axtzunju kjawil tchmoʼn» (Gálatas 6:7).

Il tiʼj tuʼn tel tnikʼ kʼwaʼl tiʼj qa noq tiʼxku ma bʼant tuʼn ktzajel tiʼn bʼaʼn moqa nya bʼaʼn tiʼj, tuʼntzunju qa mintiʼ ma tjakʼun tibʼ, jaku tzaj nya bʼaʼn tiʼj. Jun techel, qa tkyaqil maj in tzaj tqʼoj tkʼwaʼla moqa tala tuʼnju nya bʼaʼn in nela jun tiʼ te, mlay ten nim tamiw. Qatzun mintiʼ ma tzaj tqʼoj ex qa ma bʼant tbʼin tukʼil pasens, tuʼn jlu ktel kygan txqantl tuʼn kyten tukʼil. Tzʼonina tiʼj kʼwalbʼaj tuʼn tel tnikʼ tiʼj qa jaku ten tbʼanel tanqʼibʼil qa ma bʼant tjakʼun tibʼ.

Tzʼonina kyiʼj tuʼn tel kynikʼ tiʼj alkyeju mas nim toklen

NABʼIL TOJ TYOL DIOS: Bʼaʼn tuʼn tbʼant «kyskʼone tiʼj alkyeju mas bʼaʼn» (Filipenses 1:10).

Aju tuʼn qjakʼunte qibʼ nya oʼkx in yolin tiʼj tuʼn miʼn qbʼinchante nya bʼaʼn sino ax ikx in yolin tiʼj tuʼn t-xi qbʼinchaʼn aju il tiʼj tuʼn tbʼant quʼn, maske nyaxix qgan moqa mintiʼ in qo tzalaj tuʼn. Tbʼanel tuʼn tel tnikʼ tkʼwaʼla tiʼj alkyeju il tiʼj tuʼn tbʼant tuʼn tnejel, tuʼntzunju qʼamanxa te tuʼn tkubʼ tbʼinchaʼn tnejel aju mas nim toklen. Jun techel, ik tzeʼn tuʼn kybʼant tdeber naʼmxtoq t-xiʼ saqchal.

Qʼonkuya jun tbʼanel techel twitz

NABʼIL TOJ TYOL DIOS: «Ma txi nyekʼune kyeye, ik tzaʼn ma nbʼinchaye kyeye, ikxtzun kyeye tuʼn kybʼinchanteye» (Juan 13:15).

In nok kyqʼoʼn kʼwaʼl kywitz tiʼj tiʼ kymod mambʼaj in kubʼ kyyekʼin qa nya bʼaʼn in nela jun tiʼ, tuʼntzunju tbʼanel tuʼn tkubʼ tyekʼina kywitz qa in tzaj tbʼanel qa ma tjakʼun tibʼa. Xjelinkuya jlu: «¿Tiʼ kbʼantel wuʼne qa ma chin oke toj malbʼil tuʼn nkʼwaʼle tiʼj qa at npasense? ¿Jun rat in tzaj nqʼoje moqa in njakʼun wibʼe?».