Aju in kubʼ qnaʼn
In yolin Tyol Dios tiʼjju nya bʼaʼn in kubʼ qnaʼn aju il tiʼj tuʼn qjakʼunte qibʼ tiʼj, ax ikx tiʼjju tbʼanel in kubʼ qnaʼn aju il tiʼj tuʼn kukx tbʼant quʼn.
AJU QʼOJ
NABʼIL TOJ TYOL DIOS: «Mas bʼaʼn qa mya jurat in qo jaw qʼojl twitzju tuʼn qok kyuw qkʼuʼj» (Proverbios 16:32).
TIʼ T-XILEN: Tbʼanelxix tuʼn tbʼant qjakʼunte qibʼ tiʼjju in kubʼ qnaʼn. Maske at tiquʼn tuʼn ttzaj qqʼoj, qa mintiʼ ma qjakʼunte qibʼ, jaku tzaj nim nya bʼaʼn tuʼn. O tzʼel nikʼbʼaj tiʼj, qa ma txi tqʼoʼn jun xjal ambʼil te qʼoj, jaku bʼant jun tiʼ tuʼn moqa jaku txi tqʼamaʼn jun yol aju yajxitl jaku tzaj tbʼis tuʼn.
AJU JAKU BʼANT TUʼNA: Kbʼel tiʼja tuʼn qʼoj qa mintiʼ ma tzʼok tilil tuʼn tkubʼ tiʼj tuʼna. In kubʼ kyximen junjun xjal qa in kubʼ kyyekʼin kyipumal aj ttzaj kyqʼoj, pero nya ikju, tuʼnju in kubʼ kyyekʼin qa mintiʼ kyipumal. In tzaj tqʼamaʼn Tyol Dios jlu: «Aju xjal mintiʼ in tjakʼunte tibʼ, ik tten ik tzaʼn jun tnam mintiʼ muro tok tiʼj ex at tuj xobʼajil» (Proverbios 25:28). Qa ma tzʼok tbʼiʼna tkyaqil tqanil tiʼjju in bʼaj, kʼonil tuʼn miʼn ttzaj tqʼoja. «Tuʼnju at tnabʼl xjal mya jurat in jaw qʼojl» (Proverbios 19:11). Qa ma tzʼok tbʼina aju tzul kyqʼamaʼn txqantl tiʼjju xbʼaj, ok kʼonil tiʼja tuʼn telxix tnikʼa tiʼj ex tuʼn miʼn tjaw kyaqpaja.
TUʼN QQʼON CHJONTE
NABʼIL TOJ TYOL DIOS: «Kyqʼonxe chjonte» (Colosenses 3:15).
TIʼ T-XILEN: Ateʼ junjun in tzaj kyqʼamaʼn qa oʼkx qe xjal bʼaʼn che qʼon chjonte jaku che tzalaj. Axpe ikx qeju o txi naj nim tiʼchaq kye in tzaj kyqʼamaʼn qa ax tok jlu. In tzaj kyqʼamaʼn qa o che ex twitz nya bʼaʼn, ex in kynaʼn bʼaʼn tuʼnju in xi kyqʼoʼn chjonte tiʼjju at kye ex mintiʼ in nok kyqʼoʼn kywiʼ kyiʼj tiʼchaq o txi naj kye.
AJU JAKU BʼANT TUʼNA: Tzʼibʼinkuya junjun qʼij alkyeqe tiʼchaq in xi tqʼoʼna chjonte kyiʼj. Maske nya matij qe, aʼyeju bʼalo in kubʼ qximen qa nya nim kyoklen, ik tzeʼn aj qsqix, aj qyolin tukʼil jun xjal kʼujlaʼn quʼn moqa tiʼj juntl qiʼj qanqʼibʼil. Kbʼel tnaʼna bʼaʼn qa ma tzʼok tilil tuʼna tuʼn tbʼant jlu.
Jun tiʼ jaku tzʼonin tiʼja aju qa ma txi tqʼoʼna chjonte kye toj tjaya ex kye tamiwa. Ximana tiʼj alkyeqe tiʼchaq in bʼant kyuʼn aju in nok tqʼoʼna toklen ex qʼamanxa kye aj tyolina kyukʼil, toj jun uʼj, toj jun correo ex qa toj jun mensaje. Tuʼn jlu, kchʼiyil tamiwbʼila kyukʼil ex kbʼel tnaʼna tzalajbʼil in tzaj tqʼoʼn qe aj tbʼant tbʼanel tiʼchaq quʼn kyiʼj txqantl (Hechos 20:35).
JUNJUNTL NABʼIL TOJ TYOL DIOS
Jaku kutz tiʼna audio tiʼj Tyol Dios toj español, at toj jw.org toj 40 yol.
MIʼN WULINA MOQA ILINA
«Aju xjal in tzaj jyonte qʼoj junx taʼ jlu ik tzaʼn nneʼtz pax jun aʼ ex nim in naj tuʼn; mas bʼaʼn tuʼn tel oqa naʼnxtoq t-xiʼ qʼoj tuj tilil» (PROVERBIOS 17:14).
MIʼN BʼAJ TKʼUʼJA TIʼJJU KBʼAJEL TOJ AMBʼIL TZUL
«Miʼn bʼaj kykʼuʼje tiʼj ju te nchiʼj, porke aju te nchiʼj texte tbʼis ktzajel. Aju nnikʼx quʼn tuj jun qʼij, akuxju» (MATEO 6:34).
XIMANA NAʼMXTOQ TBʼANT JUN TIʼ TUʼNA
«Aju tnabʼla bʼaʼn ex tojtzqibʼla che okel te kolil tiʼja» (PROVERBIOS 2:11).
Bʼalo ax ikx tgana jlu
¡WEʼKTZA!
¿Tiʼ jaku bʼant quʼn tuʼn miʼn ttzaj bʼaj qkʼuʼj?
Xnaqʼtzana kyiʼj junjun nabʼil jaku che onin tiʼja tuʼn miʼn ttzaj bʼajxix tkʼuʼja.
