Aju qxmilal
Nya jun uʼj te qʼanbʼil aju Tyol Dios, noqtzun tuʼnj, in tzaj tqʼamaʼn tzeʼn tuʼn miʼn ttzajxix yabʼil qiʼj. Qo xnaqʼtzan kyiʼj junjun nabʼil toj Tyol Dios jaku che onin qiʼj tuʼn tten tbʼanel qchwinqlal.
XQʼUQINK T-XMILALA
NABʼIL TOJ TYOL DIOS: «Mi jun xjal nneʼl tikʼun t-ximlal, noq oʼkx in tkʼaʼchan ex kwentin tuʼn» (Efesios 5:29).
TIʼ T-XILEN: In nonin nabʼil lu qiʼj tuʼn tok tilil quʼn tuʼn tok qxqʼuqin qchwinqlal. Ateʼ junjun xnaqʼtzbʼil in tzaj kyyekʼin qa at maj in tzaj yabʼil qiʼj tuʼn junjun tiʼ naqʼli qo tiʼj. Tuʼntzunju, qa ma tzʼok qxqʼuqin qibʼ in ten tbʼanel qchwinqlal.
AJU JAKU BʼANT TUʼNA:
-
Tuʼn tok t-xqʼuqina aju in xi twaʼna. Tzʼok tilil tuʼna tuʼn twaʼna tiʼj tbʼanel wabʼj ex tuʼn t-xi tkʼaʼna nim aʼ.
-
Tuʼn tbʼant jun tiʼ tuʼna. Alkyexku tabʼqʼiya, jaku ten tbʼanel tchwinqlala qa ma bʼant junjun tiʼ tuʼna tuʼn tyukchi t-ximlala, maske nya tzʼaqli moqa at jun yabʼil tiʼja aju mintiʼ qʼanbʼil tiʼj. Jaku tzʼonin jun xjal at tojtzqibʼil moqa jun toj tjaya tuʼn tbʼant ejercicio tuʼna, noqtzun tuʼnj, aya kbʼel ximente.
-
Tuʼn tjtana nim ambʼil. Ateʼ nim xjal mintiʼ in che jtan nim ambʼil tuʼnju in najbʼen kyuʼn tuʼn tbʼant junjuntl tiʼchaq. Jaku tzaj kyuw yabʼil kyiʼj qeju ma che naqʼet tuʼn kyjtan chʼin ambʼil. Tuʼntzunju, kbʼel tnaʼna bʼaʼn qa ma jtana nim ambʼil.
TUʼN TEL TIKʼUNA JUNJUN TIʼ
NABʼIL TOJ TYOL DIOS: «Qtxʼjoʼmel tkyaqilju in tzʼilsante qchibʼjal ex in tzʼilsante qanmi» (2 Corintios 7:1).
TIʼ T-XILEN: Ktel tbʼanel t-xmilala qa mintiʼ ma bʼaj ttzʼilsaʼna kyuʼn tiʼchaq ik tzeʼn tabaco, aju o tzaj yabʼil kyiʼj nim xjal tuʼn ex o che kyim.
AJU JAKU BʼANT TUʼNA: Qʼonkuya jun tajlal qʼij tuʼn miʼn tsichʼina, jaku kuʼx ttzʼibʼina toj jun calendario ex qʼamanxa kye qeju ojtzqiʼn qe tuʼna qa jaku che onin tiʼja. Naʼmxtoq tpon qʼij lu, bʼaʼn tuʼn kubʼ tnajsaʼna qe sichʼ ex alkyexku juntl tiʼ at toklen tukʼilju o naqʼeta tiʼj. Ax ikx, miʼn txiʼya kyoj lugar jatumel in che sichʼen xjal.
JUNJUNTL NABʼIL TOJ TYOL DIOS
Qa taja jun Tyol Dios, qaninxa te jun testigo de Jehová najli jatumel in nanqʼina.
TUʼN TTEN QNABʼIL
«Ok tjaw kybʼinchaʼne jun kyjaye, il tiʼj tuʼn tjaw kybʼinchaʼne jun tal maqbʼil tiʼjele twi ja, tuʼntzun miʼn ttzaj kyil qeju ateʼ tuj kyjaye tiʼj tkamik jun xjal qa ma tzaj tzʼaq twi ja» (DEUTERONOMIO 22:8).
TUʼN MIʼN TTZAJ NAJ QQʼOJ
«Aju xjal mya jurat in tzaj tqʼoj, at nim tnabʼl, atzunju xjal jurat in tzaj tqʼoj, mintiʼ tnabʼl» (PROVERBIOS 14:29).
TUʼN MIʼN QWAʼN NIM
«Miʼn tzʼok tukʼin tibʼa [...] kyukʼil qe xjal jawni che waʼn» (PROVERBIOS 23:20).
