Aju ja xjal ex qe amiw
Nim xjal kwest tuʼn kyten bʼaʼn kyukʼil txqantl. Qo xnaqʼtzan kyiʼj junjun nabʼil toj Tyol Dios aʼyeju jaku che onin qiʼj tuʼn qten bʼaʼn kyukʼil.
XIMANA KYIʼJ TXQANTL
NABʼIL TOJ TYOL DIOS: «Teyle junjun mya noq oʼkx tuʼn tok tqʼoʼn tkwent tiʼj aju at tajbʼen te, ax ikx tuʼn tok tqʼoʼn tkwent tiʼj aju at tajbʼen kye mastl» (Filipenses 2:4).
TIʼ T-XILEN: Tuʼn qten bʼaʼn kyukʼil txqantl, nya oʼkx tuʼn ttzaj qkʼamoʼn sino ax ikx il tiʼj tuʼn tbʼant qqʼon. Jaku tzaj nya bʼaʼn qxol qa oʼkx in qo ximen qiʼjx. Jun techel, qa in bʼant jlu tuʼn jun xjal bʼalo jaku mlay ten tzʼaqli twitz tchmil moqa t-xuʼjil. Ax ikx mlay che ten tamiw jun xjal qa oʼkx in yolin tiʼjju at te moqa tiʼjju ojtzqiʼn tuʼn. Ik tzeʼn in tzaj tchikʼbʼaʼn uʼj El camino del carácter, mlay tzaj tiʼn tbʼanel te xjal qa oʼkx in ximen tiʼjx.
AJU JAKU BʼANT TUʼNA:
-
Tzʼonina kyiʼj txqantl. Kukx in nonin jun tbʼanel qamiw ex jaku tzʼok qeʼ qkʼuʼj tiʼj. Ik tzeʼn in tzaj kyyekʼin junjun xnaqʼtzbʼil, mintiʼxix in tzaj depresión kyiʼj xjal in che ximen kyiʼj txqantl ex in kynaʼn qa at kyoklen.
-
Tzʼelx tnikʼa tiʼjju in kynaʼn txqantl. A t-xilen jlu tuʼn tel qnikʼ tiʼjju in bʼaj kyiʼj txqantl ex tuʼn tkubʼ qnaʼn aju kʼixkʼoj in che ikʼ toj. Qa ma bʼant jlu tuʼna, mlaylo txi tqʼamaʼna nya bʼaʼn yol, moqa tuʼn t-xi tqʼamaʼna jun tiʼ jaku kynaʼn txqantl nya bʼaʼn tuʼn, aju nim maj toj yaqbʼil jaku txi qʼamet.
Ax ikx, aj tel qnikʼ tiʼjju in kynaʼn txqantl, in nonin tuʼn tok qqʼoʼn toklen aju in bʼant kyuʼn. Jaku tzʼonin mod lu tiʼja tuʼn miʼn tel tikʼuna kyyajil xjal ex tuʼn kyten tamiwa te junxitl tnam ex junxitl kyyajil.
-
Paʼmila ambʼil tuʼn ttena kyukʼil txqantl. Oʼkx jaku che ok qojtzqiʼn txqantl qa ma qo ten kyukʼil. Tuʼn kyten tbʼanel qamiw, il tiʼj tuʼn kukx qyolin kyukʼil. Bʼaʼn tuʼn kyok tbʼiʼna ex tuʼn tel tnikʼa tiʼj nya bʼaʼn in che ikʼ toj. In tzaj tyekʼin jun xnaqʼtzbʼil etz kʼitzqeku qa «aʼyeju xjal kukx in che yolin kyukʼil txqantl, mas in che tzalaj».
JYOʼNKTZA QE TBʼANEL TAMIWA
NABʼIL TOJ TYOL DIOS: «Qa ma txi kyukʼin kyibʼe kyukʼil xjal mya bʼaʼn, ok tzakjel kynabʼle» (1 Corintios 15:33).
TIʼ T-XILEN: Jaku tzaj bʼaʼn moqa nya bʼaʼn qiʼj kyuʼn qamiw. Ax ikx in nel kynikʼ sociólogos tiʼj jlu. Jun techel, in tzaj kyqʼamaʼn qa jaku bʼant tsichʼin jun xjal ex jaku tzʼel tpan tibʼ tiʼj tukʼil qa ateʼ tamiw in bʼant jlu kyuʼn.
AJU JAKU BʼANT TUʼNA: Jyonxa qe tamiwa at tbʼanel kymod ex kybʼinchbʼen aju jaku tzʼel tkanoʼna. Jun techel, ik tzeʼn qe xjal at kynabʼil, bʼaʼn che nimen, bʼaʼn che qʼon oyaj ex tbʼanel kymod.
JUNJUNTL NABʼIL TOJ TYOL DIOS
Keʼyinka qe video tiʼj Tyol Dios aʼyeju o che bʼaj bʼinchaʼn tuʼn tonin kyiʼj mejebʼleʼn, kyiʼj kuʼxun ex kyiʼj kʼwaʼl tuʼntzun kyten bʼaʼn kyukʼil toj kyja.
TUʼN MIʼN T-XI QQʼAMAʼN QE YOL KYUW
«At xjal in kʼixbʼisan tiʼj juntl kyuʼn qe tyol» (PROVERBIOS 12:18).
TUʼN QQʼON OYAJ
«Aju xjal bʼaʼn qʼon oyaj, noq kyjaʼ t-xiʼ jawni» (PROVERBIOS 11:25).
TUʼN T-XI QBʼINCHAʼN IK TZEʼN QAJ TUʼN TOK BʼINCHAʼN QIʼJ
«Kyjaʼtzun tkyaqilju kyajbʼile tuʼn kybʼinchante xjal kyeye, ax ikxtzun kybʼinchame kye» (MATEO 7:12).
