Aju pwaq
Ateʼ nim xjal o che ex twitz junjun nya bʼaʼn at toklen tukʼil pwaq tuʼnju xi kybʼiʼn qe nabʼil ateʼkux toj Tyol Dios.
XIMINKUYA TZEʼN KʼAJBʼEL TPWAQA
NABʼIL TOJ TYOL DIOS: «Aju xjal nej in kubʼ ten ximal tiʼj alkye tuʼn tbʼant tuʼn, bʼaʼn nneʼl te te, atzunju xjal noq t-xoʼn tibʼ tiʼj jun tiʼxti ex mintiʼ in kubʼ ten ximal tiʼj qa bʼaʼn, ktzajel mebʼayil tiʼj» (Proverbios 21:5).
TIʼ T-XILEN: Tuʼn tajbʼen tpwaqa toj tumel, tzʼibʼinkuya jatumel kʼajbʼel ex japunx tuʼna. Naʼntza qa mlay bʼant tzaj tlaqʼoʼna tkyaqilju taja. Tenx tnabʼila aj tajbʼen pwaq tuʼna.
AJU JAKU BʼANT TUʼNA:
-
Bʼinchama ik tzeʼn ma kubʼ ttzʼibʼina. Tzʼibʼinkuya jatumel kʼajbʼel tpwaqa ex nukʼunkuya toj kʼlojin. Yajxitl ximinkuya jteʼ pwaq kxel tnajsaʼna tiʼj junjun kʼloj. Qa kʼajbʼel mas tpwaqa, jaku txi tchjoʼna tukʼil pwaq tiʼj juntl kʼloj. Jun techel, qa ma txi tnajsaʼna nim pwaq tiʼj gasolina te kar, jaku tzʼajbʼen pwaq tuʼna aju otoq tzʼel tpaʼna kyiʼj tiʼchaq nyaxix nim kyoklen, ik tzeʼn tuʼn t-xiʼya waʼl toj jun restaurante.
-
Miʼn tzʼetz tiʼna tchʼexa qa nya il tiʼj. Miʼn tzʼokx tqʼon tibʼa tjaqʼ kʼas. Naʼmxtoq ttzaj tlaqʼoʼna jun tiʼ, tnejel chmonkuya tpwaqa. Qa in najbʼen tarjeta de crédito tuʼna, qʼonka tilil tuʼn tchjet tkʼasa junjun xjaw tuʼntzun miʼn t-xi tchjoʼna interés. Ex qa at tkʼasa, ximinkuya jteʼ pwaq kʼelel tpaʼna tuʼn tchjet ex japunx tuʼna.
In tzaj tqʼamaʼn jun xnaqʼtzbʼil qa mas in xi najset pwaq qa tuʼn tarjeta de crédito in che chjet qe tiʼchaq. Tuʼntzunju, tzʼajbʼen tuʼna toj tumel.
TENX TBʼANEL TMODA
NABʼIL TOJ TYOL DIOS: «Ok tpon tyemp te chʼokbʼil txʼotxʼ aju xjal kyʼaj mintiʼ nnoʼk ten chʼokil, oktzun tpon tqʼijlalil tuʼn tjaw chmet twitz awal kʼokel ten jyolte, pero mlay knet twitz awal tuʼn» (Proverbios 20:4).
TIʼ T-XILEN: Jaku tzaj mebʼayil qiʼj qa kyʼaj qoʼ. Tuʼntzunju tzʼok tilil tuʼna tuʼn taqʼunana ex tuʼn tajbʼen pwaq tuʼna toj tumel, tuʼntzun tten aju at tajbʼen teya toj ambʼil tzul.
AJU JAKU BʼANT TUʼNA:
-
Tzʼoka te aqʼunal xjal. Qa in nok tilil tuʼna ex jaku tzʼok qeʼ kykʼuʼj txqantl tiʼja, maslo nya kwest tuʼn kukx tten taqʼuna. In che tzalaj patrón kyiʼj xjal responsable.
-
Miʼn sbʼuna toj aqʼuntl. Qa ma tzʼok tena sbʼul toj aqʼuntl, nya bʼaʼn kyximbʼetz txqantl ktel tiʼja ex tuʼn jlu kwest jaku kanet juntl taqʼuna.
-
Miʼn pon tkʼuʼja tiʼj nim tiʼchaq. Qa mintiʼ ma ten tbʼanel t-ximbʼetza tiʼj pwaq, jaku tzaj yabʼil tiʼja ex jaku tzaj nya bʼaʼn kyxole kyukʼil txqantl. Naʼntza jlu: nya a pwaq mas nim toklen toj qanqʼibʼil.
JUNJUNTL NABʼIL TOJ TYOL DIOS
Jaku jaw tu’jina Tyol Dios toj Internet toj jw.org aju at toj nim syent yol.
MIʼN TXI TNAJSAʼNA AMBʼIL EX PWAQ KYIʼJ VICIO
«Porke qe kʼal qʼeʼn ex qe jawni che waʼn che okel te mebʼa, ex qe kyʼaj puro ttxʼaqan xbʼalun kʼokel kyiʼj» (PROVERBIOS 23:21).
MIʼN TZAJ BʼAJXIX TKʼUʼJA
«Miʼn bʼaj kykʼuʼje tiʼj kychwinqlale, ti kxel kywaʼne ex qa ti kxel kykʼane; ex miʼn bʼaj kykʼuʼje tiʼj kyximlale, ti kʼokel kyqʼoʼne kyiʼje» (MATEO 6:25).
MIʼN TZAJ TQʼOJA QA AT TIʼCHAQ KYE TXQANTL
«Aju xjal oʼkx tok tkʼuʼj tiʼj qʼinumabʼl ex taj tuʼn tknet jurat naj, mintiʼ bʼaʼn tuʼn qa tzul mebʼayil tibʼaj» (PROVERBIOS 28:22).
Bʼalo ax ikx tgana jlu
JUNJUNTL XNAQʼTZBʼIL
¿Tzeʼn jaku qo anqʼin tukʼil nya nim tiʼchaq?
Jaku tzaj estrés qiʼj aj kyxi naj qe tiʼchaq at qe, pero jaku che onin consej tkuʼx toj Biblia qiʼj tuʼn tel qnikʼ tiʼj tzeʼn jaku qo anqʼin tukʼil nya nim tiʼchaq.
