Aj tajbʼen txol yol tuʼn qajbʼen te Dios toj Xjan Uʼj, atz in yolin tiʼj qmod in ten tiʼj qanqʼibʼil (Judas 18, 19). Aju xjal mintiʼ in ximen tiʼj Dios in nok qeʼ tkʼuʼj tiʼjx. Atzunju xjal in ten t-ximbʼetz ik tzeʼn te Dios, tkyaqil maj in nok tqʼoʼn kyoklen nabʼil toj Xjan Uʼj (Efesios 5:1).

NABʼIL TOJ TYOL DIOS: «Qa ma tzaj bʼaj tkʼuʼja ok ttzaj yajbʼil tiʼja, myatzun nim tipuna at ikju» (Proverbios 24:10).

TIʼ T-XILEN: Qa in tzaj bʼaj qkʼuʼj mintiʼtl in ten qipumal tuʼn qex kywitz nya bʼaʼn in qo ok weʼ twitz. Pero in ten qipumal tuʼn qʼuqbʼil qkʼuʼj, in tzaj tnaʼn qe qa noq te chʼin ambʼil junjun nya bʼaʼn in qo ok weʼ twitz ex qa aj qok weʼ twitz jun tiʼ kwest jaku tzaj tiʼn jun bʼaʼn qe.

AJU JAKU BʼANT TUʼNA: Tenx tbʼanel t-ximbʼetza tiʼj ambʼil tzul. Bʼinchama aju o kubʼ t-ximana tuʼn tbʼant ex miʼn tzaj bʼaj tkʼuʼja tiʼjju jaku bʼaj moqa tuʼn tayona tiʼj ambʼil mas bʼaʼn. Ax tok, bʼalo noq minabʼen jaku bʼaj jun tiʼ (Eclesiastés 9:11, 12). Pero chʼixme tkyaqil maj mas bʼaʼn in che ela tiʼchaq ik tzeʼn in kubʼ qximen. In najbʼen techel tuʼn Tyol Dios tiʼj jun aqʼunal tiʼj txʼotxʼ tuʼn ttzaj tqʼamaʼn jlu: «Awan kuʼxa tiyaja te prim, ax ikx te qale, porke mintiʼ bʼaʼn tuʼna alkye jaku tzʼel mas bʼaʼn, qa aju in kuʼx awet naj ex qa aju in kuʼx awet yajxi, ex qa kykabʼil jaku che el bʼaʼn» (Eclesiastés 11:6).

NABʼIL TOJ TYOL DIOS: «Qʼontza nnabʼle. [...] Kykyaqil qe tyola axix tok qe» (Salmo 119:144, 160).

 TIʼ T-XILEN: In tzaj tqʼoʼn Tyol Dios tzaqʼwebʼil kyiʼj xjel aju chʼixme qkyaqilx in kubʼ qxjelin. Ik tzeʼn qe jlu:

• ¿Tiquʼn o qo kubʼ bʼinchaʼn?

• ¿Tiquʼn at nim yajbʼil?

• ¿Tiʼ in bʼaj qiʼj aj qkyim?

• ¿Tiʼ kbʼajel qiʼj toj ambʼil tzul?

Nim millón xjal twitz tkyaqil Txʼotxʼ o tzʼel kynikʼ tiʼj tzaqʼwebʼil in tzaj tqʼoʼn Xjan Uʼj kyiʼj xjel lu ex kyiʼj junjuntl ex jaʼlo mas in che tzalaj.

AJU JAKU BʼANT TUʼNA: In qo txokine tiʼja tuʼn tok tqʼoʼn twitza tiʼj tiʼ in tzaj t-xnaqʼtzaʼn Tyol Dios. Qʼamanxa te jun testigo de Jehová tuʼn tonin tiʼja tuʼn tel tnikʼa tiʼj. Ax ikx jaku tzʼokxa toj qtembʼile te Internet jw.org moqa jaku txiʼya toj jun qchmabʼile. Noq kukx tuʼn qokx ex mintiʼ in jaw chmet pwaq.

TUʼN TEL QNIKʼ TIʼJ QA AT TAJBʼEN DIOS QE

«At tzalajbʼil kye qeju nneʼl kynikʼ tiʼj qa at tajbʼen Dios kye» (MATEO 5:3).

TUʼN TOK QOJTZQIʼN DIOS AJU IN YOLIN XJAN UʼJ TIʼJ

«Tuʼntzun kyjyon tiʼj Dios, [...] tuʼn tknet kyuʼn, ax tok ate Dios mya najchaq taʼ ttxlaj junjun qe» (HECHOS 17:27).

TUʼN QUʼJIN TIʼJ TYOL DIOS EX TUʼN QXIMEN TIʼJ

«At tzalajbʼil teju xjal [...] in tzalaj tiʼj tley Qman Dios, ex kukx in ximan tiʼj qʼijl ex qonikʼan. [...] Tkyaqilju in tbʼinchaʼn bʼaʼn nneʼla» (SALMO 1:1-3).