In tzaj estrés qiʼj aj qok weʼ twitz jun nya bʼaʼn. In xi tsipen qcerebro hormonas toj tkyaqil qxmilal. Tuʼn jlu mas in lipen qanmi, mas jun rat naj jaku bʼet qchkʼel moqa mas chebʼe, mas kwest tuʼn qxewin ex tuʼn jlu in che ok qmúsculo te kyuw. Naʼmxtoq tel qnikʼ tiʼjju in bʼaj, ya otoq bʼant tten qxmilal tuʼn tbʼant jun tiʼ tuʼn. Aj tel estrés qiʼj, ya mintiʼ in kubʼ qnaʼn tkyaqil jlu ex in kyaj qxmilal ik tzeʼn taʼtoq.

At maj bʼaʼn tuʼn ttzaj bʼaj qkʼuʼj aj qok weʼ kywitz nya bʼaʼn. Tkyaqil in tzaj tzyet toj qwiʼ. At maj bʼaʼn tuʼn qximen nim tuʼntzun t-xi qbʼinchaʼn naj jun tiʼ. Ax ikx jaku tzʼonin tuʼn tjapun kywiʼ qxim moqa tuʼn kybʼant tiʼchaq mas toj tumel quʼn. Jun techel, ik tzeʼn aj tbʼant jun examen quʼn, aj ttzaj qanin xjel qe tuʼn ttzaj qʼoʼn jun qaqʼun moqa aj qsaqchan jun rat.

Noqtzun tuʼnj, qa ma tzaj bʼaj qkʼuʼj toj nimku ambʼil ex qa kukx ma bʼaj jlu, jaku tzaj nim nya bʼaʼn qiʼj. Jaku tzaj nya bʼaʼn tiʼj qxmilal, tiʼj qximbʼetz ex tiʼjju in kubʼ qnaʼn. Tuʼn jlu jaku chʼexpaj qmod ex jaku tzʼok qbʼinchan nya bʼaʼn kyiʼj txqantl. Qa at jun xjal kukx in tzaj bʼaj tkʼuʼj, jaku txi tnikʼbʼeʼn moqa jaku txi tbʼinchaʼn nim tiʼchaq jaku tzaj tiʼn nya bʼaʼn tiʼj. Axpe ikx jaku kubʼ tnaʼn nim bʼis, nim siktleʼn ex jaku kubʼ t-ximen tuʼn tkubʼ tbʼyon tibʼ.

Maske junxitl tiʼchaq in tzaj kyiʼj xjal tuʼnju in tzaj bʼaj kykʼuʼj, jaku tzaj junxichaq yabʼil kyiʼj ex tiʼj alkyexku plaj kyxmilal.