TZEʼN TUʼN MIʼN TTZAJ BʼAJ QKʼUʼJ
Ya miʼn tzaj bʼaj qkʼuʼj
In nonin nabʼil tkuʼx toj Tyol Dios qiʼj tuʼn miʼn ttzaj bʼaj qkʼuʼj. Mlay bʼant tuʼn tel qiʼn tkyaqilju in tzaj bʼaj qkʼuʼj tuʼn, atzunte Dios jaku bʼant tuʼn. O txi tqʼoʼn toklen Jesús tuʼn tonin qiʼj. Toj chʼintl ambʼil, kbʼantel nim tiʼchaq tbʼanel tuʼn Jesús qiʼj, aʼyeju e bʼant tuʼn tej tten twitz Txʼotxʼ. Qo xnaqʼtzan kyiʼj junjun.
KBʼEL TQʼANIN JESÚS QE YABʼ
«E ul qʼiʼn twitz Jesús kykyaqil xjal at kʼixkʼoj kyiʼj ex [...] kykyaqil e bʼanix tuʼn» (MATEO 4:24).
TZUL TQʼOʼN JESÚS QJA EX QWA
«Kjawil kybʼinchaʼn xjal kyja ex ax qe che najal tuj, ex kbʼelex kyawaʼn tqan uva ex ax qe che loʼl tiʼj twitz. Ok tjaw tbʼinchaʼn xjal jun ja, mlay bʼant tuʼn tpon junxitl najal tuj, ex ok tkuʼx tawal xjal, mlay bʼant junxitl tuʼn twaʼn tiʼj» (ISAÍAS 65:21, 22).
CHE ANQʼIL XJAL TOJ TXUBʼTXAJ EX MLAY CHE XOBʼ
«Che tel xjal tuj txubʼtxaj ex che bʼetel tuj tumelxix tuj tqʼijlalil tkawbʼil, okxi tnaj xjaw. Kbʼel tiʼj tkyaqil tuʼn, ex ktzajel qeʼ tkawbʼil ttziʼ jun mar tuʼn tpon bʼaj ttziʼ juntl mar, ex ktzajel qeʼ ttzi nima Éufrates tuʼn tpon bʼaj max ttxaʼnpun txʼotxʼ [...] ex qe aj qʼoj tiʼj kʼokex kyqʼon kyibʼ tjaqʼ tkawbʼil» (SALMO 72:7-9).
KXEL TBʼINCHAʼN JESÚS TIʼJJU NYA TZʼAQLI
«Ktzajel tzʼeʼy tkʼuʼj kyiʼj qe xjal mans, ex che kletel qe xjal mebʼa tuʼn. Che kletel tuʼn tuj kyqʼabʼ qeju in che yajlan kye ex tuj kyqʼabʼ qe bʼyol xjal» (SALMO 72:13, 14).
KʼELEL TIʼN JESÚS YAJBʼIL EX KAMIK
«Mintiʼtl kamik, ex mintiʼtl bʼis, ex mintiʼtl oqʼel, ex mintiʼtl kʼixkʼoj» (APOCALIPSIS 21:4).
