In tzaj kyqʼamaʼn hindú qa in tzaj yajbʼil moqa kʼixkʼoj qiʼj tuʼnju in bʼant quʼn jaʼlo moqa tuʼnju o bʼant quʼn toj juntl qanqʼibʼil. Ya mintiʼ in tzaj yajbʼil tiʼj jun xjal aj tjapun bʼaj moksha tuʼn, toj juntl yol, tuʼn miʼn tul itzʼj tiʼj juntl tiʼ. Tuʼn tbʼaj jlu, il tiʼj tuʼn miʼn ttzaj bʼaj tkʼuʼj tiʼj tkyaqilju in tzaj bʼaj kykʼuʼj xjal tiʼj.

In tzaj kyqʼamaʼn qe musulmán qa in tzaj yajbʼil qiʼj tuʼn qok toj malbʼil moqa tuʼn tpaj qil. In tzaj tqʼamaʼn Sayyid Syeed, presidente te Sociedad Islámica de América del Norte, qa aj ttzaj yajbʼil qiʼj, in nonin «tuʼn kukx t-xi qqʼoʼn chjonte te Dios tiʼj tkyaqil tkʼiwlabʼil ex qa il tiʼj tuʼn qonin kyiʼj qeju atx taj kye».

In tzaj tqʼamaʼn kyxnaqʼtzbʼil aj Judiy qa in tzaj yajbʼil qiʼj tuʼn qbʼinchbʼen. Ex ateʼ junjun aj Judiy in tzaj kyqʼamaʼn qa ok che jawil anqʼin xjal ex qa yajxitl kxel qʼoʼn chojbʼil kye tuʼnju ikʼx yajbʼil kyuʼn maske mintiʼtoq kyil. Noqtzun tuʼnj, in tzaj t-xnaqʼtzaʼn judaísmo místico moqa cabalístico aju reencarnación, aju in xi tqʼoʼn ambʼil te xjal tuʼn tul itzʼj elaʼ maj, moqa bʼampo maj, tuʼntzun tchjet til.

In xi kynimen budista qa in qo ul itzʼj jun ex juntl maj, ex qa kukx in tzaj yajbʼil qiʼj tzmaxi aj qtzaqpaj tiʼjju qajbʼil, kyiʼj qbʼinchbʼen ex tiʼjju nya bʼaʼn in qnaʼn. Jaku japun bʼaj nirvana tuʼn jun xjal, toj juntl yol, tuʼn miʼn ttzaj yajbʼil tiʼj aj tten tnabʼil, tbʼanel tbʼinchbʼen ex aj tten tbʼanel t-ximbʼetz.

Ik tzeʼn in tzaj tqʼamaʼn Diccionario de religiones comparadas, in xi kynimen xjal ateʼ kyxol Confucionismo qa in tzaj yajbʼil «tuʼn kypaltil xjal». Ax ikx in tzaj kyqʼamaʼn qa mlay tzaj nim yajbʼil kyiʼj xjal qa ma tzʼok tilil kyuʼn tuʼn miʼn tkubʼ kybʼinchaʼn jun nya bʼaʼn. Noqtzun tuʼnj, in kubʼ kyximen qa chʼixme tkyaqil maj in tzaj yajbʼil qiʼj kyuʼn nya bʼaʼn anjel, aʼyeju at mas kyipumal kywitz xjal. Qa ikju, oʼkx tuʼn tikʼx kyuʼn xjal aju il tiʼj tuʼn tbʼaj kyiʼj tuʼn kyswert.

In tzaj kyqʼamaʼn junjun kʼloj xjal qa in tzaj yajbʼil tuʼn tpaj kyaqʼun chman moqa aj kabʼ. In kubʼ kyximen junjun xjal qa jaku ten kyswert kyuʼn chman moqa jaku tzaj nya bʼaʼn kyiʼj, ex qa mlay tzʼok bʼinchaʼn nya bʼaʼn kyiʼj qa ma bʼant junjun tiʼ kyuʼn. Tuʼntzunju, aj ttzaj yabʼil kyiʼj xjal lu in cheʼx tukʼil jun chman tuʼn ttzaj qʼoʼn junjun qʼanbʼil kye ex tuʼn tbʼant junjuntl tiʼ kyuʼn, tuʼntzun miʼn tok bʼinchaʼn nya bʼaʼn kyiʼj tuʼn juntl chman.

In tzaj kyqʼamaʼn okslal qa in tzaj yajbʼil kyiʼj xjal tuʼn il bʼant tuʼn Adán ex Eva, ik tzeʼn in tzaj tqʼamaʼn uʼj te Génesis. Noqtzun tuʼnj, o ten junxitl kyximbʼetz okslabʼil tiʼj jlu. Jun techel, in xi kynimen junjun católico qa jaku tzikʼx yajbʼil kyuʼn noq tuʼn ttzaj kʼiwlaʼn ky-iglesia moqa tuʼn tklet juntl xjal.