Jaku ten ikʼbʼil toj kyanmi xjal kyiʼj txqantl noq tuʼnju junxitl kytnam, kyyajil, kykostumbr, kyyol, kyokslabʼil moqa tuʼnju at nim moqa mintiʼxix kypwaq. Ax ikx in ten kyximbʼetz nya toj tumel kyiʼj txqantl noq tuʼnju kyabʼqʼi, kyxnaqʼtzbʼil, tzeʼn che keʼyin moqa tuʼnju mintiʼ in bʼant junjun tiʼchaq kyuʼn. Noqtzun tuʼnj, in kubʼ kyximen xjal lu qa mintiʼ ikʼbʼil toj kyanmi.

¿Atpe teya ikʼbʼil toj tanmi kyiʼj txqantl? Jun rat jaku tzʼel qnikʼ tiʼj qa nya junx kyximbʼetz xjal at kyiʼj txqantl. Pero kwest tuʼn tel qnikʼ tiʼj qa ax ikx qe at maj junxitl qximbʼetz at kyiʼj xjal. Qkyaqilx at maj in ten junxitl qximbʼetz kyiʼj xjal. Tqʼama jun xjal in xnaqʼtzan tiʼj kyanqʼibʼil xjal, aju David Williams tbʼi, qa aj tten t-ximbʼetz jun xjal nya toj tumel tiʼj jun kʼloj xjal, «in kubʼ tyekʼin nya bʼaʼn tmod tukʼil jun kye, maske mintiʼ in nel tnikʼ tiʼj».

Jun techel, in nanqʼin Yovitsa toj jun tnam te sureste te Europa jatumel at jun kʼloj xjal in che el ikʼun kyuʼn txqantl. In tzaj tqʼamaʼn jlu: «Kubʼ nximane qa kykyaqil xjal lu nya bʼaʼn qe. Mintiʼ el nnikʼe tiʼj qa at ikʼbʼil toj wanmiye kyiʼj. Kubʼ nximane jlu: ‹Ax tok nximbʼetze at kyiʼj›».

In kubʼ kyqʼoʼn aj kawil ley tuʼn miʼn kyel ikʼun xjal. Pero mintiʼ in che kambʼan tiʼj. ¿Tiquʼn? Tuʼnju oʼkx in che xqʼuqin ley lu tiʼjju in bʼant kyuʼn xjal ex nya tiʼjju in kubʼ kynaʼn ex in kubʼ kyximen. Atz in chʼiy ikʼbʼil toj kyanmi ex kyximbʼetz xjal. Qa ikju, ¿mlaype kubʼ tiʼj ikʼbʼil quʼn? ¿Atpe jun tumel tuʼn tnaj?