Qa mintiʼ ma tzʼok qmojbʼan qibʼ kyukʼil xjal at jun nya bʼaʼn qximbʼetz kyiʼj, jaku chʼiy ikʼbʼil toj qanmi kyiʼj. Ex qa oʼkx ma tzʼok qmojbʼan qibʼ kyukʼil qxjalil, jaku kubʼ qximen qa mas tbʼanel qe tiʼchaq in che bʼant quʼn, ik tzeʼn aju in kubʼ qximen ex aju in kubʼ qnaʼn.

«Kyjaqonktz kyanmiye» (2 CORINTIOS 6:13, TNM).

¿Tiʼ t-xilen jlu? Aj qyolin tiʼj qanmi, atz in qo yolin tiʼjju in kubʼ qnaʼn. Qa in kubʼ qximen qa mas bʼaʼn qe qxjalil, ik tten jlu ik tzeʼn in kubʼ qjupuʼn qanmi. Tuʼn miʼn tbʼaj jlu, bʼaʼn tuʼn tok tilil quʼn tuʼn kyten qamiw junxitl qe qwitz.

Aj tok qojtzqiʼnxix jun xjal, in nel qnikʼ tiʼj tiquʼn junxitl in xi tbʼinchaʼn qe tiʼchaq. Ex aj tok qmojbʼan qibʼ tukʼil xjal lu, in nok qqʼoʼn te qamiw. In nok qqʼoʼn mas toklen ex in nel qnikʼ tiʼj qa in bʼisun moqa in tzalaj.

Qo keʼyin tiʼjju bʼaj tiʼj Nazaré, aju ok tilil tuʼn tuʼn tnaʼj ikʼbʼil toj tanmi kyiʼj xjal te juntl lugar e pon anqʼil toj ttnam. In tzaj tqʼamaʼn jlu: «In ntene kyukʼil xjal lu ex in naqʼunane kyukʼil. Junxitl kymod xjal lu ten wukʼile twitzju otoq tzaj qʼamaʼn weʼye kyuʼn txqantl. Aj tok tamiwen tibʼa kyukʼil xjal te juntl tnam, mintiʼ in ten nya bʼaʼn t-ximbʼetza kyiʼj, in che ok tkʼujlaʼna ex in nok tqʼoʼna kyoklen».

Tzʼok tilil tuʼna tuʼn tyolina kyukʼil xjal junxitl kytnam, junxitl kyyajil ex kyyol. Qʼonka tilil tuʼn tbʼant jlu tuʼna:

•   Qaninxa kye tuʼn kyyolin tiʼj kyanqʼibʼil.

• Qʼonxa txokbʼil kye tuʼn kywaʼn tukʼila.

• Qʼonka twiʼya tiʼjju in tzaj kyqʼamaʼn teya ex ojtzqinka alkye mas nim toklen te kye.

Qa ma tzʼok tilil tuʼna tuʼn tel tnikʼa tiʼjju o tzikʼ kyiʼj, mas che okel tojtzqiʼna ex kchʼexpajel t-ximbʼetza kyiʼj.