Qa in jaw qnimsan qibʼ, jaku ten qximbʼetz nya toj tumel. Aj tjaw tnimsan tibʼ jun xjal, oʼkx in ximen tiʼjx. In kubʼ t-ximen qa mas nim toklen kywitz txqantl ex in nel tiʼn kyoklen junjuntl. Noq alkyexku jaku bʼaj jlu tiʼj. In tzaj tqʼamaʼn Encyclopædia Britannica jlu: «Nim xjal in kubʼ kyximen qa mas tbʼanel tten kyanqʼibʼil kywitz txqantl, ik tzeʼn kywa, kyxbʼalun, kykostumbr, aju nimen kyuʼn ex junjuntl tiʼchaq». ¿Tiʼ jaku bʼant quʼn tuʼn miʼn qkubʼ sbʼuʼn tuʼn jlu?

«Teyle junjun bʼaʼn tuʼn t-ximan kyiʼj txqantl okslal qa at mas kyoklen twitz» (FILIPENSES 2:3).

¿Tiʼ t-xilen jlu? Tuʼn miʼn tjaw qnimsan qibʼ, il tiʼj tuʼn tkubʼ qin qibʼ. Qa ma kubʼ qin qibʼ, kʼelel qnikʼ tiʼj qa mas nim kyoklen txqantl qwitz toj junxichaq tten. Ni jun tten kyanqʼibʼil xjal mas tbʼanel kywitz txqantl.

Qbʼinx aju bʼaj tiʼj Stefan. Jaw chʼiy toj jun tnam comunista ex ya mintiʼ ten t-ximbʼetz nya toj tumel kyiʼj xjal nya comunista kytnam. Tqʼama Stefan jlu: «Toj nwitze, oʼkx jaku kubʼ tiʼj ikʼbʼil quʼn qa ma kubʼ qximen qa mas nim kyoklen txqantl qwitz. Mintiʼ ojtzqiʼn tkyaqil wuʼne ex jaku tzʼel nkanoʼne junjuntl tiʼchaq kyiʼj txqantl».

Bʼaʼn tuʼn tten t-ximbʼetza toj tumel ex bʼaʼn tuʼn tel tnikʼa tiʼj qa ax ikx teya in nel txalpaja. Qʼonka tilil tuʼn tel tnikʼa tiʼj alkye tbʼanel kymod txqantl at ex mintiʼlo teya tmod lu. Ex miʼn kubʼ t-ximana qa kykyaqil xjal te jun tnam ax kymod at.

Twitzju tuʼn tkubʼ t-ximana nya bʼaʼn tiʼj jun xjal, xjelinkuya jlu:

• ¿Axpe tok nya bʼaʼn aju nya ngane tiʼj xjal lu moqa noq tuʼnju junxitl qe tiʼchaq in bʼant tuʼn ik tzeʼn weye?

• ¿Atpe jun weye npaltil jaku tzʼok tkeʼyin xjal lu?

• ¿Alkye jun tiʼ mas tbʼanel in bʼant tuʼn xjal lu nwitze?

Qa ma txi ttzaqʼweʼna qe xjel lu tukʼil axix tok, jaku kubʼ tiʼj ikʼbʼil tuʼna ex jaku jaw labʼina kyiʼj tbʼanel tmod xjal aju.