Nim maj in ten nya bʼaʼn kyximbʼetz xjal tuʼnju in nok kybʼiʼn nya ax tok tqanil. Jun techel:

• In kubʼ kyximen junjun patrón qa mlay bʼant tkyaqil aqʼuntl kyuʼn xuʼj moqa qya, ik tzeʼn tuʼn kyaqʼunan tiʼj computadora moqa tiʼj kyaqʼun científico.

• Toj siglo V ex XV, xi qʼamaʼn nya ax tok yol kyiʼj xjal judiy atz Europa, tuʼnju kubʼ kyximen xjal qa aʼye e kux qʼonte veneno kyoj xoch noq tuʼn ttzaj jun yabʼil. Tej tten kykawbʼil nazi, ax ikx xi qʼamaʼn nya ax tok yol kyiʼj aj Judiy, tuʼnju xi qʼamaʼn qa kyuʼn tzaj mebʼayil moqa prowil atz Alemania. Kyuʼn jlu, i el ikʼun aj Judiy. Axpe ikx in bʼaj jlu toj ambʼil jaʼlo.

• Nim xjal in kubʼ kyximen qa kykyaqil qeju nya tzʼaqli kyxmilal, noq in che bʼisun ex in che qʼojin.

Aqeju xjal in xi kynimen qe yol lu, in nok qeʼ kykʼuʼj tiʼj qa ax tok aju in kubʼ kyximen, qatzun at jun xjal nya ax t-ximbʼetz ik tzeʼn kye, in nok kyqʼoʼn te mintiʼ tnabʼil.

Nya toj tumel qa mintiʼ tojtzqibʼil jun xjal (PROVERBIOS 19:2, TNM).

¿Tiʼ t-xilen jlu? In tzaj tyekʼin qa jaku qo el tzpet qa mintiʼ ojtzqiʼn tkyaqil ax tok quʼn. Qa oʼkx ma txi qnimen aju in tzaj qʼamaʼn qe ex nya tuʼnju in nok qkeʼyin, ktel nya bʼaʼn qximbʼetz kyiʼj txqantl.

Aj tok qojtzqiʼn jun xjal, mlay txi qnimen qe nya ax tok yol in tzaj qʼamaʼn tiʼj. Ex aj tel qnikʼ tiʼj qa nya ax tok aju otoq tzaj qʼamaʼn qe tiʼj jun kʼloj xjal, bʼalo jaku kubʼ qximen qa nya ax tok aju otoq tzaj qʼamaʼn qe tiʼj juntl kʼloj xjal.

• Miʼn kubʼ t-ximana nya bʼaʼn kyiʼj kykyaqil. Qa nya bʼaʼn tmod jun xjal, nya a t-xilen jlu qa kykyaqil kʼloj xjal at nya bʼaʼn kymod.

• Tzʼelx tnikʼa tiʼj qa mintiʼ ojtzqiʼn tkyaqil tqanil tuʼna kyiʼj txqantl.

• Che ajbʼenx tqanil tuʼna, aqeju jaku tzʼok qeʼ tkʼuʼja tiʼj aj t-xi tnimana jun tiʼ.