¿Tzeʼn kbʼel naj ikʼbʼil te jumajx?
Nim millón xjal o tzʼok tilil kyuʼn tuʼn t-xi kybʼiʼn nabʼil ateʼkux toj Tyol Dios, aqeju ma qo xnaqʼtzan kyiʼj ex o naj ikʼbʼil toj kyanmi. Pero bʼaʼn tuʼn ttzaj qnaʼn qa mlayx bʼant jlu quʼn qjunalx. Qa ikju, ¿atpe jun tiʼ jaku tzʼel qʼinte ikʼbʼil te jumajx?
Jun kawbʼil tzʼaqlixix
Aju o bʼaj in tzaj tyekʼin qa mlay bʼant nim tiʼchaq kyuʼn aj kawil tuʼn tkubʼ naj ikʼbʼil. ¿Ape t-xilen jlu qa mintiʼ jun aj kawil jaku tzʼel qʼinte?
Tuʼn tkubʼ naj ikʼbʼil, il tiʼj tuʼn tbʼant jlu tuʼn jun aj kawil:
-
1. Tuʼn tonin kyiʼj xjal tuʼn tchʼexpaj kyximbʼetz ex aju in kubʼ kynaʼn kyiʼj txqantl.
-
2. Tuʼn tikʼ tnaʼl tiʼchaq quʼn, aju in ten ikʼbʼil toj qanmi kyuʼn.
-
3. Tuʼn kyten nejenel qwitz aʼyeju mintiʼ ikʼbʼil toj kyanmi.
-
4. Tuʼn tonin kyiʼj kykyaqil xjal tuʼn tten mujbʼabʼil kyxol.
In tzaj tqʼamaʼn Xjan Uʼj qa o bʼant jun kawbʼil tuʼn Dios ex che bʼantel chʼixpubʼil lu tuʼn, ex in nok tbʼi te «tkawbʼil Dios» (Lucas 4:43).
Ximana tiʼjju ktzajel tqʼoʼn Tkawbʼil Dios qe.
1. Aju mas tbʼanel xnaqʼtzbʼil
Kʼelel kynikʼ xjal tiʼjju tzʼaqli (ISAÍAS 26:9).
«Oktzun tbʼinchet aju tzʼaqlxix, bʼiʼx kwebʼel qʼoj, che tel xjal tuj tzalajbʼil ex bʼiʼx kqebʼil kykʼuʼj te jumajx» (ISAÍAS 32:17).
¿Tiʼ t-xilen jlu? Kxel tyekʼin Tkawbʼil Dios kye xjal aju mas bʼaʼn. Aj tel qnikʼ tiʼjju bʼaʼn ex tiʼjju nya bʼaʼn moqa tiʼjju tzʼaqli ex aju nya tzʼaqli, in chʼexpaj qximbʼetz kyiʼj txqantl. Kykyaqilx kʼelel kynikʼ tiʼj qa mas tbʼanel tuʼn tok kykʼujlaʼn kykyaqil xjal.
2. Qʼuqbʼil qkʼuʼj
«Kʼelel t-suʼn Dios taʼl kywitz kykyaqil; ex mintiʼtl kamik, ex mintiʼtl bʼis, ex mintiʼtl oqʼel, ex mintiʼtl kʼixkʼoj; porke aqeju at tnejel ma che naj» (APOCALIPSIS 21:4).
¿Tiʼ t-xilen jlu? Kʼelel tiʼn Tkawbʼil Dios tkyaqil kʼixkʼoj o tzaj tuʼn ikʼbʼil. Aqeju xjal o che el ikʼun, ya mlay ten jun tiʼ tuʼn tkubʼ kynaʼn qʼoj.
3. Jun tbʼanel nejenel
«Mlay bʼant kyiʼj xjal noq tuʼnju in tbʼiʼn. Tuj tumelxix kxel tbʼinchaʼn kyiʼj qe xjal mintiʼ kyipun ex kxel tbʼinchaʼn kyiʼj qe mebʼa xjal ateʼ tuj tkyaqil twitz txʼotxʼ» (ISAÍAS 11:3, 4).
¿Tiʼ t-xilen jlu? Tzʼaqli tkawbʼil Jesús ktel, aju aj kawil toj Tkawbʼil Dios, ex junx kyoklen xjal kʼokel tqʼoʼn aj tkawin toj kyaʼj kyibʼaj xjal twitz Txʼotxʼ. Junx kyoklen tnam kʼokel tqʼoʼn Jesús ex kxel kybʼiʼn xjal twitz tkyaqil Txʼotxʼ qe tkawbʼil.
4. Mujbʼabʼil
In nonin Tkawbʼil Dios tuʼn tten junx kyximbʼetz xjal, tuʼn tten kykʼujlabʼil ex tuʼn tten mujbʼabʼil kyxol (FILIPENSES 2:2).
¿Tiʼ t-xilen jlu? Ax tok mujbʼabʼil ktel kyxol xjal che tel tjaqʼ Tkawbʼil Dios. Junx che tel tuʼnju ktel axix tok kʼujlabʼil kyxol.
