Qa oʼkx in nok bʼaj qwitz tiʼj qa junxitl aju in bʼant kyuʼn txqantl, jaku che ok qqʼoʼn jlu te nya bʼaʼn. Axpe ikx, jaku kubʼ qximen qa mas chʼin kyoklen xjal lu qwitz. Qa ma ten qximbʼetz ik tzeʼn jlu, kwest kʼelel toj qwitz tuʼn tkubʼ qnaʼn aju in kubʼ kynaʼn txqantl, toj juntl yol, tuʼn tel qnikʼ kyiʼj. Tuʼn jlu, jaku ten qximbʼetz nya toj tumel kyiʼj txqantl.

«Che tzalajxe kyukʼil qeju in che tzalaj; che oqʼe kyukʼil qeju in che oqʼ» (ROMANOS 12:15).

¿Tiʼ t-xilen jlu? Jaku txi qʼamet nabʼil lu toj chʼin yol: tuʼn tel qnikʼ kyiʼj txqantl. Tuʼn tbʼant quʼn, bʼaʼn tuʼn tkubʼ qnaʼn aju in bʼaj kyiʼj.

Aj tel qnikʼ kyiʼj txqantl, in nel qnikʼ tiʼj qa axju in bʼaj kyiʼj ik tzeʼn qe. Ax ikx, in nel qnikʼ tiʼj qa axju in kubʼ kynaʼn ik tzeʼn qe ex chʼixmi axju in bʼant kyuʼn ik tzeʼn qe. Aj tel qnikʼ kyiʼj txqantl, in nonin jlu qiʼj tuʼn tkubʼ qximen qa ik qoʼ ik tzeʼn jun ja xjal ex noq jaxku tumel tzajni qoʼ. Qa mas ma tzʼok tilil quʼn tuʼn tel qnikʼ tiʼj qa aʼyex tiʼchaq in che bʼant quʼn ik tzeʼn kye txqantl, mas ktel qximbʼetz toj tumel.

Qa ma tzʼel qnikʼ kyiʼj txqantl, kʼonil jlu qiʼj tuʼn tok qqʼoʼn kyoklen. Ten nya bʼaʼn t-ximbʼetz Anne-Marie te Senegal tiʼj jun kʼloj xjal, aqeju mintiʼ ok qʼoʼn kyoklen kyuʼn txqantl. In tzaj tqʼamaʼn tzeʼn onin tiʼj tej tel tnikʼ kyiʼj xjal lu: «Tej tok nkeʼyine jniʼ bʼis in che ikʼ xjal lu toj, kubʼ nximane tiʼtzun jaku kubʼ nnaʼne noqwit aʼyine in che ikʼ tojju nya bʼaʼn in che ikʼ toj. Eltzun nnikʼe tiʼj qa nya mas nim woklene at ik tzeʼn kye ex mintiʼ jun tiʼ otoq bʼant wuʼne tuʼn woke te jun xjal nim toklen». Tuʼntzunju, qa ma tzʼok tilil quʼn tuʼn tel qnikʼ tiʼj nya bʼaʼn in che ikʼ xjal toj, kʼelel qnikʼ kyiʼj ex mlay qo yolin nya bʼaʼn kyiʼj.

Qʼonka tilil tuʼn miʼn tok tkeʼyina oʼkx qeju tiʼchaq junxitl in bʼant kyuʼn txqantl ex ximana kyiʼj tiʼchaq in bʼant tuʼna ik tzeʼn kye. Jun techel, ximana tiʼj tiʼ in kynaʼn xjal lu kyoj ambʼil lu:

• Aj kywaʼn kyukʼil toj kyja.

• Aj tex bʼaj jun qʼij kyaqʼun ex otoq che sikt.

• Aj kyten kyukʼil kyamiw.

• Aj kybʼin kyiʼj bʼitz kygan.

Atzun jaʼlo, ximana tiʼj qa aya jun kyxol. Xjelinkuya jlu:

• ¿Tiʼ jaku bʼant wuʼne qa mintiʼ in nok qʼoʼn woklene kyuʼn txqantl?

• ¿Tiʼ jaku kubʼ nnaʼne qa ma che ok ten txqantl yolil nya bʼaʼn wiʼje ex mintiʼ ojtzqiʼn nwitze kyuʼn?

• Noqwit atine kyxol, ¿tzeʼn kymod txqantl waje tuʼn tten wukʼile?