«Tzikʼx kyuʼne aju kypaltil junjuntl, kynajsam kyile kyxolxe qa at jun at tyol tiʼj juntl» (COLOSENSES 3:13).

Tuʼnju qkyaqilx aj il qoʼ, bʼalo jaku tzʼok qbʼinchaʼn jun tiʼ nya toj tumel tiʼj juntl xjal moqa jaku tzʼok bʼinchaʼn jun tiʼ nya toj tumel qiʼj. Tuʼntzunju, nim toklen tuʼn tkubʼ qnajsaʼn qil qxolx. Aj tkubʼ qnajsaʼn kyil txqantl, mintiʼ in ten nya bʼaʼn qximbʼetz tiʼj xjal in nok tbʼinchaʼn nya bʼaʼn qiʼj. Mintiʼ in naj qqʼoʼn t-xel nya bʼaʼn ex nya kukx in tzaj qnaʼn til (Romanos 12:17). ¿Yajtzun qa nim nya bʼaʼn otoq tzʼok bʼinchaʼn qiʼj ex mintiʼ in nikʼ tnaʼl quʼn? Qa ikju, bʼaʼn tuʼn qyolin tukʼil xjal ex tuʼn t-xi qqʼamaʼn te toj tumel tiʼ in kubʼ qnaʼn. Qo jyol tumel tzeʼn jaku kyaj nya bʼaʼn toj ttxolil tuʼn miʼn t-xiʼ toj il ex tuʼn tten mujbʼabʼil qxol juntl maj (Romanos 12:18).

«Miʼn jaw kyniman kyibʼe, [...] teyle junjun bʼaʼn tuʼn t-ximan kyiʼj txqantl okslal qa at mas kyoklen twitz» (FILIPENSES 2:3).

Jaku che tzalaj txqantl aj kyten qukʼil qa mintiʼ in jaw qnimsan qibʼ ex qa in nok qqʼoʼn kyoklen. Kʼelel kynikʼ tiʼj qa ateʼ tbʼanel qmod, qa in qo ximen kyiʼj ex qa mlay kubʼ qximen tuʼn tok qbʼinchaʼn jun nya bʼaʼn kyiʼj. Qa ma kubʼ qximen qa mas nim qoklen kywitz txqantl ex qa oʼkx qaj tuʼn t-xi bʼinchet aju qe qajbʼil, mlay tzʼonin jlu tuʼn tten  mujbʼabʼil qxol, sino oʼkx tzul tiʼn qʼoj. Ex mlay che ok laqʼeʼ txqantl qtxlaj ex mlay che ten nim qamiw, axpe ikx, bʼalo mlay kanet jun.

«Mintiʼ in tkeʼyin Dios aju kyxilen xjal, noq oʼkx in tzalaj kyiʼj xjal at tchi Dios kye tuj tkyaqil nasyon» (HECHOS 10:34, 35).

Ax kyoklen xjal toj twitz Dios maske junxitl kytnam, kyyol, kycolor ex qa at kypwaq moqa mintiʼ. «Junx xjal tbʼincha Dios te kyiyjil kykyaqil xjal tuʼn kyten tuj tkyaqil twitz txʼotxʼ» (Hechos 17:26). A jlu in tzaj tyekʼin qa qkyaqilx qitzʼin qibʼ. Qa ma kubʼ qyekʼin tbʼanel qmod kyukʼil kykyaqil ex qa ma tzʼok qqʼoʼn kyoklen, jaku qo tzalaj, jaku che tzalaj txqantl ex ktzalajel Dios qiʼj.

«Che oke mans» (COLOSENSES 3:12).

Qa ma qo ok te mans ex qa mintiʼ in tzaj naj qqʼoj, jaku che tzalaj txqantl aj kyten qukʼil ex jaku tzaj kyqʼamaʼn noq alkyexku tiʼ qe, axpe ikx jaku qo tzaj kawin kyuʼn tuʼnju ojtzqiʼn kyuʼn qa mlay tzaj qqʼoj. ¿Yajtzun qa at jun xjal ma tzaj tqʼoj qiʼj? Qa ma txi qtzaqʼweʼn te toj tumel, kʼonil tiʼj tuʼn miʼn ttzaj mas tqʼoj. In tzaj tqʼamaʼn Proverbios 15:1 jlu: «Aju tzaqʼwebʼl te yol tukʼil kʼujlalil, bʼiʼx in weʼ qʼoj tuʼn, atzunju tzaqʼwebʼl tukʼil ilbʼil, mas in tzaj qʼoj tuʼn».

«Mas at tzalajbʼil kyeye qa at chʼin ma txi kyqʼoʼne te juntl, ex mya aqeye tuʼn kykʼmonteye chʼin ktzajel qʼoʼn kyeye tuʼn juntl» (HECHOS 20:35).

Ateʼ nim xjal oʼkx in che ximen kyiʼjx ex kyaj tuʼn tten mas tiʼchaq kye. Pero qa bʼaʼn qo bʼinchan xtalbʼil kyiʼj txqantl, kbʼel qnaʼn nim tzalajbʼil (Lucas 6:38). Mas in che tzalaj qeju bʼaʼn che bʼinchan xtalbʼil tuʼnju mas in che ximen kyiʼj txqantl kywitz qeju tiʼchaq at kye. Tuʼn jlu, bʼaʼn che qʼon chjonte ex in kubʼ kyyekʼin aj kybʼinchan txqantl xtalbʼil kyiʼj (Colosenses 3:15). Bʼaʼn tuʼn tkubʼ t-xjelina jlu: «¿Alqukʼil waje tuʼn ntene? ¿Wajpeye tuʼn ntene tukʼil jun xjal oʼkx in ximen tiʼjx ex mibʼan qʼon chjonte? ¿Moqa waje tuʼn ntene tukʼilju bʼaʼn bʼinchan xtalbʼil ex bʼaʼn qʼon chjonte?». Aju mas nim toklen, bʼaʼn tuʼn tkubʼ qyekʼin qmod kyukʼil txqantl ik tzeʼn qaj tuʼn tkubʼ kyyekʼin qiʼj (Mateo 7:12).