«Noq tuʼn jun xinaq okx il kyxol kykyaqil xjal, ex tuʼnju il tzaj kamik, kyjaʼtzun ilxix tiʼj tuʼn kykyim kykyaqil xjal tuʼnju kykyaqil e bʼinchan il» (ROMANOS 5:12).

A Dios kubʼ bʼinchante qe tnejel xjal, Adán ex Eva. Tzʼaqli kyximbʼetz ex kyxmilal tej kykubʼ tbʼinchaʼn, ex xi tqʼoʼn ambʼil kye tuʼn kyanqʼin toj jardín te Edén. Xitzun tqʼamaʼn Dios kye tuʼn t-xi kyloʼn twitz tkyaqil awal, oʼkx jun mlaytoq txi kyloʼn. Pero kubʼ t-ximen Adán ex Eva tuʼn t-xi kyloʼn twitz tzeʼ ex tuʼn jlu kubʼ kybʼinchaʼn il (Génesis 2:15-17; 3:1-19). Tuʼnju mintiʼ nimen Adán ex Eva te Dios, i etz tlajoʼn toj jardín te Edén. Atxix toj ambʼil aju, kwest ok kyanqʼibʼil. Tej tbʼet ambʼil, e ul qe kykʼwal, ax ikx kye, mintiʼ e tzalaj. Kykyaqilx e tijen ex e kyim (Génesis 3:23; 5:5). Tuʼntzunju, in tzaj yabʼil qiʼj, in qo tijen ex in qo kyim tuʼnju atz tzajni qoʼ tiʼj Adán ex Eva.

«Kykyaqil xjal twitz txʼotxʼ ateʼ tjaqʼ tipumal tajaw il» (1 JUAN 5:19).

El tpan tibʼ jun anjel tiʼj Dios ex atzun ok te Tajaw il (Juan 8:44; Apocalipsis 12:9). Tej tbʼet ambʼil, ok kymojbʼan kyibʼ junjuntl anjel tukʼil Satanás ex e ok te nya bʼaʼn anjel moqa te demonio. In che sbʼun nya bʼaʼn anjel kyiʼj xjal tuʼntzun kyel laqʼeʼ tiʼj Dios ex tuʼn tkubʼ kybʼinchaʼn nya bʼaʼn (Salmo 106:35-38; 1 Timoteo  4:1). In tzalaj Satanás ex qe nya bʼaʼn anjel aj in nok kybʼinchaʼn nya bʼaʼn qiʼj.

«Alkyeju in kuʼx tawaʼn xjal, axtzunju kjawil tchmoʼn» (GÁLATAS 6:7).

At maj in qo ikʼ toj yajbʼil tuʼnju aj il qoʼ ex tuʼnju nya bʼaʼn in nok tbʼinchaʼn Satanás kyiʼj xjal. Pero at maj quʼnx in tzaj qiʼn yajbʼil qiʼj. Qa ma kubʼ qbʼinchaʼn qe tiʼchaq toj tumel, in nonin qiʼj tuʼn qtzalaj. Pero qa ma kubʼ qbʼinchaʼn nya bʼaʼn, in tzaj tiʼn bʼis qiʼj. Jun techel, qa mintiʼ in sbʼun jun mambʼaj, qa aqʼunal xjal ex qa in che ok tkʼujlaʼn qe toj tja, kʼonil kyiʼj tuʼn kytzalaj. Noqtzun tuʼnj, qa in sbʼun kyiʼj txqantl, qa in xi tkʼaʼn nim qʼeʼn ex qa nya taj tuʼn taqʼunan, tzul mebʼayil kyiʼj toj tja. Tuʼntzunju, tbʼanel tuʼn t-xi qbʼiʼn qe consej in tzaj tqʼoʼn Dios tuʼnju taj tuʼn qtzalaj kyiʼj tbʼanel tiʼchaq ik tzeʼn tuʼn qten toj «txubʼtxaj» (Salmo 119:165).

«Tuj mankbʼil tqʼijlalil [...] che ul xjal oʼkx tok kykʼuʼj kyiʼjx, ex oʼkx tok kykʼuʼj tiʼj pwaq, [...] mibʼan che niman tyol kyman, [...] mintiʼ in kyjakʼun kyibʼ, ex mintiʼ chʼin kylastmi kyiʼj xjal, ex nneʼl kyikʼun aju bʼaʼn» (2 TIMOTEO 3:1-5).

Toj ambʼil jaʼlo, nim xjal in kubʼ kyyekʼin kymod ik tzeʼn kyaj qʼamaʼn toj profecía lu ex in tzaj tyekʼin jlu qa in qo anqʼin kyoj «mankbʼil tqʼijlalil». Ax ikx, kyaj qʼamaʼn toj Tyol Dios qa che okel nimaq qʼoj, qa tzul weʼyaj, qe terremoto ex yabʼil (Mateo 24:3, 7, 8; Lucas 21:10, 11). Tuʼn jlu, nim xjal in che ikʼ toj yajbʼil ex in che kyim.