Qe xnaqʼtzbʼil in tzaj kyqʼuqbʼaʼn qkʼuʼj
In tzaj ttziyen Dios qa kbʼantel tbʼanel chʼixpubʼil tuʼn toj ambʼil tzul. Toj ambʼil aju, ya mlay ten yajbʼil ex che tzalajel xjal tiʼj kyanqʼibʼil (Salmo 37:11). ¿Tiquʼn jaku tzʼok qeʼ qkʼuʼj kyiʼj yol lu? Tuʼnju in tzaj tqʼamaʼn Biblia jlu: «Ate Dios mya ik tten ik tzaʼn jun xjal; mintiʼ nnikʼan yol» (Números 23:19). Qo xnaqʼtzan kyiʼj junjun tiʼchaq kbʼantel tuʼn Dios.
Kbʼel tnajsaʼn Dios qe xjal nya bʼaʼn
«Qe xjal mya bʼaʼn, maske che chʼiy ik tzaʼn kʼul, ex maske che ok qʼinun, pero a jlu oʼkx kʼajbʼel tuʼn kynaj te jumajx» (SALMO 92:7).
Ik tzeʼn ma tzʼel qnikʼ tiʼj toj xnaqʼtzbʼil ma kyaj, mas in xiʼ nya bʼaʼn toj il. Pero mintiʼ tuʼn qjaw labʼin tiʼj jlu tuʼnju kyaj qʼamaʼn toj 2 Timoteo 3:1 a 5 qa che okel xjal te nya bʼaʼn kyoj «mankbʼil tqʼijlalil». ¿Tiʼ kyxilen qe yol lu? Atz in yolin jlu tiʼj ambʼil jatumel ateʼ nim xjal mintiʼ in che nimen te Dios. Toj chʼintl ambʼil, kbʼel tnajsaʼn Dios qe xjal nya kyaj tuʼn tbʼant chʼixpubʼil kyuʼn toj kyanqʼibʼil. Tibʼajxi jlu, oʼkx che kjel ten xjal kyaj tuʼn kynimen te Dios. Ik tzeʼn in tzaj tqʼamaʼn Salmo 37:29, «qe xjal bʼaʼn ok che etzal tiʼj ju txʼotxʼ, ex ax che tel tuj te jumajx».
Kbʼel najsaʼn Satanás tuʼn Dios
«Aju Dios qʼolte qmojbʼabʼl qibʼ, jurat naj kbʼel pachʼuʼn Satanás [tuʼn]» (ROMANOS 16:20).
Aj tkubʼ najsaʼn Satanás, qe nya bʼaʼn anjel ex qe xjal nya bʼaʼn, ktel mujbʼabʼil twitz Txʼotxʼ. In tzaj ttziyen Dios jlu qe: «Kykyaqil xjal che anqʼil mintiʼtl kyxobʼil» (Miqueas 4:4).
Kʼelel tiʼn Dios yabʼil ex kyimen
«Tzul Dios kyxol xjal [...]. Ex kʼelel t-suʼn [...] taʼl kywitz kykyaqil; ex mintiʼtl kamik, ex mintiʼtl bʼis, ex mintiʼtl oqʼel, ex mintiʼtl kʼixkʼoj» (APOCALIPSIS 21:3, 4).
Kxel tbʼinchaʼn Dios tiʼj tkyaqil nya bʼaʼn o bʼant tuʼn Satanás ex aju il kyaj tqʼoʼn Adán ex Eva qibʼaj. Ax ikx, kʼelel tiʼn nya bʼaʼn in tzaj qiʼj tuʼnju in qo el txalpaj. Tuʼntzunju, ya mlay ten yajbʼil nix yabʼil, axpe ikx, ya mlay qo kyim. Aqeju xjal kʼujlaʼn Dios kyuʼn ex in che nimen te, che anqʼil te jumajx. ¿Jatumel che anqʼil xjal lu?
Kʼokel Txʼotxʼ te jun Paraíso tuʼn Dios
«Ktzalajel aju lugar mintiʼ kynajbʼil xjal tuj, ex aju tzqij txʼotxʼ ktzalajel nimxix ex che jawil poqʼl nim bʼech twitz» (ISAÍAS 35:1).
Aj tel tiʼn Dios tkyaqil nya bʼaʼn, kʼokel Txʼotxʼ te jun Paraíso. Noq jaxku tumel che tel tbʼanel parque ex tzul tqʼoʼn Txʼotxʼ nim wabʼj (Salmo 72:16). Che okel mar, qe lago ex qe nim aʼ te saq ex mlay che tzqij, axpe ikx, bʼalo ya mlay tzʼajbʼen yol tzʼil quʼn. Kjawil kybʼinchaʼn xjal kyja ex che anqʼil toj. Ni jun xjal kʼokel te mebʼa, ni jun kʼikʼex weʼyaj tuʼn ex ni jun kʼanqʼil toj kay (Isaías 65:21, 22).
Che jawil anqʼin kyimni tuʼn Dios
«Ok che jawil anqʼin qe kyimni» (HECHOS 24:15).
¿Tajpe teya tuʼn tok tkeʼyina juntl maj qe toj tjaya ex qe tamiwa o che kyim? Aj tok Txʼotxʼ te jun Paraíso tuʼn Dios, che jawil anqʼin kyimni tuʼn. Noqpe ximana tiʼj tzalajbʼil kbʼel tnaʼna aj tok tkeʼyina juntl maj qe xjal kʼujlaʼn tuʼna. In tzaj tqʼamaʼn Biblia qa e jaw anqʼin kʼwal ex qe matij xjal toj ambʼil ojtxe, ex qa e ten juntl maj kyukʼil toj kyja. Ax ikx, e jaw anqʼin junjun xjal tuʼn Jesús ex nim xjal ok keʼyinte jlu (Lucas 8:49-56; Juan 11:11-14, 38-44).
Bʼalo ax ikx tgana jlu
¡WEʼKTZA!
At nim nya bʼaʼn: Miʼn tzaj bʼaj tkʼuʼja
In nonin Tyol Dios qiʼj tuʼn qex kywitz nya bʼaʼn ex in tzaj tqʼuqbʼaʼn qkʼuʼj.
QE XJEL TIʼJ TYOL DIOS
¿Tiʼ t-xilen aju tuʼn kyjaw anqʼin kyimni?
Jakulo jaw labʼina tiʼjju in tzaj tqʼamaʼn Tyol Dios tiʼj alkyeqe che jawil anqʼin.
QE XNAQʼTZBʼIL NIM KYOKLEN TOJ TYOL DIOS
¿Jatumel ateʼqe kyimni?
In tzaj tqʼamaʼn Tyol Dios qa tzul ambʼil jatumel che kyjawil anqʼin nim xjal, ik tzeʼn bʼaj tiʼj Lázaro.
QE XJEL TIʼJ TYOL DIOS
¿Jatumel jaku kanet qʼuqbʼil qkʼuʼj?
Jaku tzʼonin Biblia tiʼja toj ambʼil jaʼlo ex jaku tzaj tqʼoʼn qʼuqbʼil tkʼuʼja tiʼj ambʼil tzul.
QE XNAQʼTZBʼIL TOJ TYOL DIOS
Qaninxa jun t-xnaqʼtzbʼila tiʼj Biblia
Kʼamonxa jun t-xnaqʼtzbʼila tiʼj Tyol Dios noq kukx tukʼil jun testigo de Jehová.
