Aju yol kawin, atz in yolin tiʼj tuʼn t-xi yekʼit kybʼe kʼwal, tuʼn t-xi qʼet xnaqʼtzbʼil kye ex tuʼn t-xi jikumet tiʼj jun nya bʼaʼn kymod. Chʼixme tkyaqil maj in bʼant jlu tuʼn kyxi onit tuʼn tel kynikʼ tiʼj alkye bʼaʼn ex alkye nya bʼaʼn.

Toj ambʼil jaʼlo, ateʼ junjun mambʼaj mintiʼ in xi kykawin kykʼwal tuʼnju in kubʼ kyximen qa jaku tzʼok kybʼinchaʼn nya bʼaʼn kyiʼj. Noqtzun tuʼnj, aqeju tbʼanel mambʼaj in chex kykawin kykʼwal ex in xi kyxnaqʼtzaʼn kye tuʼn tbʼant kybʼin.

«Il tiʼj tuʼn tkubʼ qʼet junjun kawbʼil kyibʼaj kʼwal tuʼntzun tok kynabʼil aj kychʼiy. Qa mintiʼ ma bʼant jlu, jaku che ok ik tzeʼn jun bark mintiʼ ttimón, jaku chex toj jun bʼe nya bʼaʼn ex jaku tzaj nya bʼaʼn kyiʼj» (Pamela).

Kawinxa qe tkʼwala. Qa mintiʼ ma bʼin tkʼwala teya, qʼamanxa te qa kbʼel tqʼoʼna tkastiw. Noqtzun tuʼnj, qa bʼaʼn niman teya, qʼamanxa te qa in tzalaja tiʼj.

«Tuʼnju mintiʼ in che nimen kʼwal kye kytat toj ambʼil jaʼlo, in xi nqʼamaʼne tbʼanel yol kye wale qa in che nimen weye. Iktzun tten, nya kwest in nela kye aj tkubʼ nqʼoʼne kykastiw» (Christine).

NABʼIL TOJ TYOL DIOS: «Porke alkyeju in kuʼx tawaʼn xjal, axtzunju kjawil tchmoʼn» (Gálatas 6:7).

Tenx tnabʼila. Aj t-xi tkawina tkʼwala, ximana tiʼj tabʼqʼi, tiʼjju jaku tzʼel tnikʼ tiʼj ex tiʼjju otoq kubʼ tbʼinchaʼn. Aj tkubʼ qʼoʼn tkastiw jun kʼwal, chʼixme tkyaqil maj in bʼant jlu tuʼnju otoq kubʼ tbʼinchaʼn jun nya bʼaʼn. Qa ma bʼant jlu, mas jaku tzʼonin tiʼj. Jun techel, qa mintiʼ ma txi tbʼiʼn tkʼwala qe kawbʼil otoq kubʼ tqʼoʼna tiʼjju tuʼn tajbʼen celular tuʼn, bʼalo jaku txi tqʼamaʼna te tuʼn miʼn tajbʼen tuʼn toj jun ambʼil. Noqtzun tuʼnj, miʼn tzʼok tqʼoʼna jun nya bʼaʼn nya nim toklen te jun matij nya bʼaʼn.

«In nok tilil wuʼne tuʼn tel nnikʼe tiʼj qa mintiʼ ma nimen wale weye moqa noq in nel tzpet. Junxitl te aju tuʼn txi nkawine tuʼnju at jun nya bʼaʼn tmod twitzju tuʼn t-xi wonine qa ma tzʼel tzpet» (Wendell).

NABʼIL TOJ TYOL DIOS: «Aqeye mambʼaj, miʼn tzʼok kyikʼleʼne kykʼwaʼle, tuʼntzun miʼn tbʼaj kykʼuʼj» (Colosenses 3:21).

Bʼaʼn tuʼn tkubʼ tyekʼina tkʼujlabʼila. Qa ma chex tkawina qe tkʼwala tukʼil kʼujlabʼil, kʼelel kynikʼ tiʼj ex mlay kubʼ kybʼinchan juntl maj aju ma che el txalpaj tiʼj.

«Aj tel txalpaj qkʼwale, in xi qqʼamaʼne te qa in qo tzalaje tiʼjju tbʼanel otoq bʼant tuʼn. Ax ikx in xi qqʼamaʼne te qa mlay tzʼok te jun nya bʼaʼn xjal tuʼnju otoq bʼant tuʼn, sino jaku chʼexpaj ex qa jaku qo onine tiʼj» (Daniel).

NABʼIL TOJ TYOL DIOS: «Aju xjal at tkʼujlalil at tpasens ex in tzʼeʼy tkʼuʼj tiʼj tukʼil» (1 Corintios 13:4).