KYE MEJEBʼLEʼN
3 Kyqʼonke kyoklene kyxolxe
¿TIʼ T-XILEN?
Aqe mejebʼleʼn in nok kyqʼoʼn kyoklen kyxolx, in che ximen tiʼj kyukʼil, axpe ikx qa mintiʼ in mojeʼ twi kyyol. In tzaj tqʼamaʼn uʼj Diez claves para transformar tu matrimonio jlu: «Aqeju mejebʼleʼn in bʼant jlu kyuʼn, mintiʼxix in nok kyqʼoʼn toklen kyyol moqa kyximbʼetz. Tuʼntzunju, in che yolin tiʼjju nya bʼaʼn in tzaj kyxol. Ax ikx, in nok kyqʼoʼn kywiʼ tiʼj kyyol ex in kubʼ kyximen alkye mas bʼaʼn te kye».
NABʼIL TOJ TYOL DIOS: «Aju xjal at tkʼujlalil [...] mya noq oʼkx tiʼjx tok tkʼuʼj» (1 Corintios 13:4, 5).
«In nok nqʼoʼne toklen nxuʼjile aj nximane tiʼj tuʼntzun miʼn tkubʼ nbʼinchaʼne jun tiʼ jaku tzaj tiʼn nya bʼaʼn tiʼj ex tiʼj qmejebʼleʼne» (Micah).
¿TIQUʼN NIM TOKLEN?
Qa mintiʼ respeto kyoj mejebʼleʼn, jaku che yolin nya bʼaʼn tiʼj kyukʼil, jaku che xmayin tiʼj moqa jaku txi kyqʼamaʼn jun tiʼ aju jaku kux choʼn toj tanmi juntl. In tzaj kyqʼamaʼn xjal at kyojtzqibʼil qa atzun jun yekʼbʼil tiʼj qa jaku tzʼel kypan kyibʼ mejebʼleʼn.
«Ya mlay tzʼok qeʼ tkʼuʼj t-xuʼjila tiʼja qa ma txi tqʼamaʼna nya bʼaʼn yol te, qa in xmayina tiʼj ex qa ma tzʼel tiʼna toklen» (Brian).
¿TIʼ JAKU BʼANT TUʼNA?
XIMANA TIʼJ JLU:
Ximana tiʼj tzeʼn in xi yolina te tukʼila ex alkye tmoda kubʼ tyekʼina tukʼil toj seman xkyaj. Yajxitl, tzaqʼwentza qe xjel lu:
-
¿Jteʼ maj xi tqʼamaʼna jun yol nya toj tumel te tukʼila ex jteʼ maj xi tqʼamaʼna jun tbʼanel yol te?
-
¿Tzeʼn kubʼ tyekʼina qa ok t-respetarina?
JAKU CHE YOLINE TIʼJ JLU:
-
¿Tzeʼn jaku kubʼ qyekʼin tukʼil qyol ex qbʼinchbʼen qa in nok qrespetarin qibʼ?
-
¿Tzeʼn jaku kubʼ qyekʼin tukʼil qyol ex qbʼinchbʼen qa mintiʼ in nok qrespetarin qibʼ?
JUNJUN NABʼIL TE KYEYE
-
Bʼaʼn tuʼn tkubʼ ttzʼibʼin teyele junjun kyeye oxe tumel tzeʼn kyaje tuʼn tok qʼoʼn kyoklene tuʼn kyukʼile. Yajxitl, kyqʼonxe aju ma bʼaj kytzʼibʼine te kyukʼile ex kyqʼonke tilil tuʼn t-xi kybʼinchaʼne.
-
Tzʼibʼinkuxa qe tbʼanel tmod tukʼila toj jun uʼj ex qʼamanxa te qa in tzalaja tiʼj.
«In kubʼ nximane qa in nok nqʼoʼne toklen nchmile tukʼil nbʼinchbʼene ex waje tuʼn ttzalaj. Nya il tiʼj tuʼn tbʼant nim tiʼchaq tuʼna tuʼn tok tqʼoʼna toklen tukʼila» (Megan).
Mas nim toklen tuʼn tkubʼ tnaʼn tukʼila qa in nok t-respetarina ex nya oʼkx tuʼn tkubʼ t-ximana.
NABʼIL TOJ TYOL DIOS: «Qʼaqʼanx kykʼuʼje tiʼj juntl, kybʼinchame xtalbʼil, miʼn jaw kyniman kyibʼe, che oke mans, ten kypasense» (Colosenses 3:12).
