Jun xjal bʼaʼn tzʼaqʼunan mintiʼ in tzaj xobʼ te aqʼuntl. Sino tgan tuʼn taqʼunan ex in nonin kyiʼj txqantl, maske nyaxix tgan aju aqʼuntl in bʼant tuʼn.

Maske qgan tuʼn qaqʼunan moqa miʼn, il tiʼj tuʼn tbʼant quʼn. Ax ikx, tbʼanel tuʼn qok te aqʼunal xjal tuʼnju at nim xjal nya kygan tuʼn kyaqʼunan (Eclesiastés 3:13).

«In chin tzalaje aj waqʼunane nim. Tuʼntzunju, mas ngane tuʼn waqʼunane junjun qʼij. Ax ikx, jaku che yolin xjal bʼaʼn tiʼja qa in bʼant tbʼanel taqʼuna» (Reyon).

NABʼIL TOJ TYOL DIOS: «Aju xjal in aqʼnan, at tkambʼabʼl tiʼj jlu» (Proverbios 14:23).

Aʼyeju tbʼanel consej qo yolil tiʼj, che onil tiʼja tuʼn tten tbʼanel t-ximbʼetza tiʼj aqʼuntl.

Bʼinchama taqʼuna toj tumel. Qʼonka twiʼya tiʼj taqʼuna, ik tzeʼn qa in bʼinchana kyiʼj junjun tiʼchaq tjaya, tiʼj tdebera toj escuela moqa toj aqʼuntl. Qa ya ojtzqiʼn tuʼna tzeʼn tuʼn tbʼant jun tiʼ, jyonxa tumel tzeʼn tuʼn tbʼant tuʼna mas tbʼanel moqa mas jun rat. Qa mas tbʼanel in bʼant taqʼuna, mas ktzalajela aj t-xi tbʼinchaʼna.

NABʼIL TOJ TYOL DIOS: «Aju xjal bʼaʼn taqʼunbʼen, ktel kytxlaj qe rey, ex mlay ten kytxlaj qe xjal mintiʼ kyoklen» (Proverbios 22:29).

Ximana kyiʼj txqantl. Aj tbʼant jun taqʼuna, chʼixme tkyaqil maj in nonin kyiʼj txqantl. Jun techel, qa ma txi tbʼinchaʼna tkyaqilju in tzaj qʼamaʼn teya kyuʼn toj tjaya, kʼonila kyiʼj tuʼn miʼn tten nim kyaqʼun.

NABʼIL TOJ TYOL DIOS: «Mas at tzalajbʼil kyeye qa at chʼin ma txi kyqʼoʼne te juntl, ex mya aqeye tuʼn kykʼmonteye chʼin ktzajel qʼoʼn kyeye tuʼn juntl» (Hechos 20:35).

Bʼinchama mas twitzju in tzaj qanin teya. Miʼn kubʼ tbʼinchaʼna oʼkx aju in tzaj qanin teya, sino bʼinchama chʼintl. Iktzun tten kʼokela te tajaw tchwinqlala. Ax tok, mas kaqʼunala, pero nya tuʼnju in nok obligarina sino tuʼnju taja (Mateo 5:41).

NABʼIL TOJ TYOL DIOS: «[Nya] waje tuʼn ttzaj tqʼoʼna jun xtalbʼil weye lajwers, noq oʼkx waje tuʼn ttzaj tqʼoʼna tuʼn tkyaqil tkʼuʼja» (Filemón 14).

Tenx t-ximbʼetza toj tumel. Qa tgana tuʼn taqʼunana, nya a t-xilen jlu qa oʼkx kʼokel bʼaj twiʼya tiʼj aqʼuntl. Sino il tiʼj tuʼn tel tpaʼna ambʼil tuʼn taqʼunana ex tuʼn tojlana.

NABʼIL TOJ TYOL DIOS: «Mas bʼaʼn qa noq chʼin at qe ex in qo anqʼin tuj txubʼtxaj, twitzju tuʼn tten nim at qe ex mintiʼ in qo anqʼin tuj txubʼtxaj; ik tten jlu ik tzaʼn jun xjal taj tzaj ttzyuʼn kyqʼiqʼ tuʼn tqʼabʼ» (Eclesiastés 4:6).