Tuʼn tok qeʼ kykʼuʼj txqantl tiʼja, nim toklen tuʼn kyjapun kawbʼil tuʼna, tuʼn tjapun kywi tyola ex tuʼn t-xi tqʼamaʼna axix tok. Iktzun tten jaku tzʼok qeʼ kykʼuʼj ttata tiʼja, qe tamiwa ex tpatrona.

Tuʼn ttzaj qʼoʼn mas tzaqpibʼil teya, nim toklen tuʼn tkubʼ tyekʼina qa jaku tzʼok qeʼ kykʼuʼj txqantl tiʼja.

«Jaku tzʼok qeʼ kykʼuʼj ttata tiʼja qa ma tzʼoka te responsable ex qa ma ten tbʼanel tmoda toj tkyaqil ambʼil, ex nya oʼkx aj ttena kyukʼil» (Sarahi).

NABʼIL TOJ TYOL DIOS: «Tzikʼwit kywitze kyiʼjxe» (2 Corintios 13:5).

Aqeju consej qo yolil kyiʼj, che onil tiʼja tuʼn tok qeʼ kykʼuʼj ttata juntl maj tiʼja moqa tuʼn tok qeʼ mas kykʼuʼj tiʼja.

Yolina tiʼj ax tok yol. Qa ma yolina tiʼj nya ax tok yol, mlay tzʼok qeʼ kykʼuʼj xjal tiʼja. Qatzun ma yolina tukʼil axix tok, mas aj tel txalpaja, kʼokel qeʼ kykʼuʼj xjal tiʼja.

«Nya kwest tuʼn t-xi tqʼamaʼna ax tok yol qa bʼaʼn taʼ tkyaqil, pero qa ma txi tqʼamaʼna ax tok yol maske jaku tzaj nya bʼaʼn tiʼja, in nonin jlu tuʼn tok qeʼ kykʼuʼj txqantl tiʼja» (Caiman).

NABʼIL TOJ TYOL DIOS: «Qajbʼile tuʼn qbʼinchanteye aju bʼaʼn tuj tkyaqil» (Hebreos 13:18).

Tzʼoka te responsable. In tzaj tqʼamaʼn jun tajlal xnaqʼtzbʼil bʼant Estados Unidos, qa tiʼj 100 xjal, 78 kyqʼama qa nim toklen tuʼn tok jun xjal te responsable tuʼntzun tkanet jun taqʼun. Qa ma tzʼoka te responsable, kʼonil tiʼja aj tchʼiya.

«In nel kynikʼ ntate tiʼj qa in xi nbʼinchaʼne waqʼune ex mintiʼ in tzaj kyqʼamaʼn weye nimku maj. Ex mas in nok qeʼ kykʼuʼj wiʼje qa responsable qine» (Sarah).

NABʼIL TOJ TYOL DIOS: «Qʼuql nkʼuʼje tiʼj qa kxel tnimana nyole, ex bʼaʼn wuʼne mas ok tbʼinchaʼya twitzju ma txi nmaʼne teya» (Filemón 21).

Ten tpasensa. Mas jun rat jaku tzʼel qnikʼ tiʼj qa otoq chʼexpaj tzeʼn keʼyin jun xjal twitzju tuʼn tel qnikʼ tiʼj qa otoq tzʼok tnabʼil.

«Kxel tiʼn ambʼil tuʼn tok qeʼ kykʼuʼj ttata tiʼja ex junjuntl xjal. Noqtzun tuʼnj, qa mas ma tzʼoka te responsable, mas kʼokel qeʼ kykʼuʼj tiʼja» (Brandon).

NABʼIL TOJ TYOL DIOS: «Ten kypasense» (Colosenses 3:12).