Aj t-xi xnaqʼtzet jun xjal, in nonin tiʼj tuʼn t-xi tbʼinchaʼn qe tbʼanel tiʼchaq toj tanqʼibʼil. ¿In nokpe tilil tuʼna tuʼn kyten tbʼanel tmoda? Qa ikju, axlo ikx in nok tilil tuʼna tuʼn kyten tbʼanel kymod tkʼwala.

Aj in xi yekʼin alkye bʼaʼn ex alkye nya bʼaʼn te jun xjal, ax ikx tbʼanel tzʼaqʼunan, mintiʼ in nok tqʼoʼn twitz tiʼj kyyajil xjal ex in ximen kyiʼj txqantl. Mas nya kwest jaku tzʼela kye kuʼxun tuʼn tten kymod ik tzeʼn jlu.

NABʼIL TOJ TYOL DIOS: «Kyqʼonxe xnaqʼtzbʼil kye kʼwaʼl tuʼn kybʼet tuj bʼe bʼaʼn, oktzun kytijin mlay tzʼel kypaʼn kyibʼ tiʼj» (Proverbios 22:6).

Tbʼanel tuʼn kyxi xnaqʼtzet kʼwal tuʼnju at nim tecnología toj ambʼil jaʼlo. In tzaj tqʼamaʼn jun txubʼaj jlu, aju Karyn tbʼi: «Tuʼnju at tecnología toj ambʼil jaʼlo, jun rat jaku kanet jun nya bʼaʼn kyuʼn qal. Bʼalo ateʼ qtxlaj, pero tojx ambʼil lu jaku tzʼok kyqʼoʼn kywitz tiʼj jun nya bʼaʼn».

NABʼIL TOJ TYOL DIOS: «[Aqeju] ma che chʼiy, [...] nneʼl kynikʼ tiʼj alkyeju bʼaʼn ex alkyeju mya bʼaʼn» (Hebreos 5:14).

Ax ikx nim toklen tuʼn kyten tbʼanel qmod. Jun techel, nim toklen tuʼn t-xi qqʼamaʼn, «najsama» ex «chjonte», ex tuʼn tkubʼ qyekʼin qa in qo ximen kyiʼj txqantl. Ya mintiʼxix in kubʼ kyyekʼin xjal tbʼanel kymod ik tzeʼn jlu toj ambʼil jaʼlo tuʼnju mas tok kywiʼ tiʼj kycelular twitzju tuʼn tok kyqʼoʼn kywiʼ kyiʼj txqantl.

NABʼIL TOJ TYOL DIOS: «Ik tzaʼn kyaje tuʼn kybʼinchante xjal kyeye, ikxtzun kyeye kybʼinchame kye» (Lucas 6:31).

Bʼaʼn tuʼn t-xi tchikʼbʼaʼna kye tkʼwala alkye bʼaʼn ex alkye nya bʼaʼn. In tzaj kyyekʼin junjun xnaqʼtzbʼil qa aj t-xi qʼamaʼn kye kuʼxun kyuʼn kyman qa nya bʼaʼn tuʼn kykubʼ kuẍe tukʼil jun xjal qa naʼmx kykubʼ mojeʼ, mintiʼxix in bʼant jlu kyuʼn.

JUNJUN NABʼIL TE KYEYE: Qa ma tzʼok tbʼiʼna jun tqanil, bʼaʼn tuʼn tajbʼen jlu tuʼna tuʼn tyolina tiʼj qa bʼaʼn moqa nya bʼaʼn. Jun techel, qa ma tzʼok tbʼiʼna jun tqanil tiʼj jun qʼoj, jaku txi tqʼamaʼna jlu: «¡Bʼisbʼajilxix jlu! Tzeʼn teya toj twitz, ¿tiquʼn in bʼant jlu kyuʼn junjun xjal?».

«Tuʼn tjaw kyjyoʼn kʼwal aju mas tbʼanel, tnejel il tiʼj tuʼn tel kynikʼ tiʼj alkye bʼaʼn ex alkye nya bʼaʼn» (Brandon).

Xnaqʼtzanxa tbʼanel mod kye. Ax ikx qe tal kʼwal, jaku txi kyxnaqʼtzan kyibʼ tuʼn kyximen kyiʼj txqantl ex tuʼn t-xi kyqʼamaʼn «najsama» ex «chjonte». In tzaj tqʼamaʼn uʼj Parenting Without Borders (Padres sin fronteras) jlu: «Nim toklen tuʼn tel kynikʼ kʼwal tiʼj qa ateʼ toj jun familia, toj jun escuela ex qa ateʼ kyxol txqantl xjal. ¿Tiquʼn? Tuʼnju kʼonil kyiʼj tuʼn tel kynikʼ tiʼj qa nya aʼye mas nim kyoklen kywitz txqantl ex kʼonil jlu kyiʼj tuʼn kyonin kyiʼj txqantl».

JUNJUN NABʼIL TE KYEYE: Qʼonxa kyaqʼun kʼwal tuʼntzun tel kynikʼ tiʼj qa nim toklen tuʼn kyonin kyiʼj txqantl.

«Qa ma txi kyxnaqʼtzan kyibʼ kykʼwale tuʼn tbʼant junjun kyaqʼun atz ja, mlay che tzaj xobʼ aj kyanqʼin kyjunalx. Ya naqʼli qe tuʼn kyaqʼunan kyjunalx» (Tara).