KYE MEJEBʼLEʼN
1 Japunx twi kyyole
¿TIʼ T-XILEN?
Qa in kubʼ kyximen mejebʼleʼn tuʼn tjapun twi kyyol xi kytziyen tej kykubʼ mojeʼ, in nonin jlu kyiʼj tuʼn miʼn tkubʼ kyximen tuʼn tel kypan kyibʼ. Ex tuʼn jlu mas in nok qeʼ kykʼuʼj tiʼj kyukʼil. Kykabʼil in kubʼ kyximen qa kukx che tel junx maske in che ok weʼ twitz alkyexku nya bʼaʼn.
Ateʼ junjun mejebʼleʼn in che ten junx noq tuʼnju in tzaj qʼamaʼn kye kyuʼn toj kyja ex kyamiw. Noqtzun tuʼnj, mas tbʼanel qa ma japun twi kyyol tuʼnju at kʼujlabʼil kyxol ex tuʼnju in nok kyqʼoʼn kyoklen.
NABʼIL TOJ TYOL DIOS: «Miʼn kyaj tkolin [chmilbʼaj] t-xuʼjil» (1 Corintios 7:11).
«Qa ma ximana tiʼj tyola xi ttziyena, in nonin tiʼja tuʼn miʼn ttzaj naj tqʼoja. Ax ikx in nonin tiʼja tuʼn tkubʼ tnajsaʼna til tukʼila ex tuʼn t-xi tqanina najsam. Ex aj qok weʼ twitz nya bʼaʼn, mintiʼ in kubʼ qximen tuʼn tel qpan qibʼ, sino in nok tilil quʼn tuʼn qex twitz» (Micah).
¿TIQUʼN NIM TOKLEN?
Qa mintiʼ ma che ximen mejebʼleʼn tiʼj kyyol xi kytziyen, aj kyok weʼ twitz nya bʼaʼn, jun rat jaku kubʼ kyximen qa nya a kyukʼil tuʼn tkanet ex jaku txi kyjyoʼn tumel tzeʼn tuʼn tel kypan kyibʼ.
«Aj in che kubʼ mojeʼ xjal, ax ikx in kubʼ kyximen qa jaku tzʼel kypan kyibʼ. Qa ma ten t-ximbʼetza ik tzeʼn jlu aj tkubʼ mojeʼya, jaku txi qqʼamaʼn qa mintiʼ in ximana tiʼj tyola in xi ttziyena» (Jean).
¿TIʼ JAKU BʼANT TUʼNA?
XIMANA TIʼJ JLU:
¿Tiʼ tmoda in kubʼ tyekʼina aj ttzaj jun nya bʼaʼn kyxole?
-
¿In kubʼpe t-ximana qa maswitlo bʼaʼn noqwit mintiʼ kubʼ mojeʼya?
-
¿In nokpe tena ximel tiʼj tzeʼnwtlo tanqʼibʼila at noqwit kubʼ mojeʼya tukʼil juntl xjal?
-
¿In xipe tqʼamaʼna qe yol ik tzeʼn «kjel nkolina» moqa «kxel njyoʼne juntl wukʼile, aju mas kʼujlaʼn qine tuʼn»?
Qa ik t-ximbʼetza ik tzeʼn jun kyxol qeju xjel ma che tzaj qʼamaʼn, bʼaʼn tuʼn t-xi tjyoʼna tumel tzeʼn jaku japun twi tyola.
JAKU CHE YOLINE TIʼJ JLU:
-
¿Mintiʼpe in nok qqʼoʼn toklen qyol xi qtziyen? Qa ikju, ¿tiquʼn?
-
¿Tiʼ jaku bʼant quʼn tuʼn qximen tiʼj qyol xi qtziyen?
JUNJUN NABʼIL TE KYEYE
-
Bʼaʼn tuʼn tkubʼ ttzʼibʼina junjun yol tuʼn t-xi tqʼamaʼna te tukʼila qa kʼujlaʼn tuʼna.
-
Qʼonka jun tfoto t-xuʼjila moqa tchmila jatumel in naqʼunana.
-
Llamarinxa tukʼila tkyaqil qʼij qa nya junx in che aqʼunane moqa mlay che tene junx toj qʼij aju.
NABʼIL TOJ TYOL DIOS: «Aju ok tmojbʼaʼn Dios, miʼn tzʼel tpaʼn xjal» (Mateo 19:6).
