Aj tkubʼ qnajsaʼn til juntl, atz in yolin jlu tiʼj tuʼn miʼn ttzaj qnaʼn jun tiʼ otoq bʼaj ex tuʼn miʼn t-xi qkʼuʼn qʼoj. Noqtzun tuʼnj, nya a t-xilen jlu qa mintiʼ tuʼn tok qqʼoʼn toklen aju otoq bʼaj moqa tuʼn tkubʼ qximen qa mintiʼ jun tiʼ otoq bʼaj.

NABʼIL TOJ TYOL DIOS: «Tzikʼx kyuʼne aju kypaltil junjuntl, kynajsam kyile kyxolxe qa at jun at tyol tiʼj juntl» (Colosenses 3:13).

«Aj in nok tkʼujlaʼna jun xjal, mintiʼ in nok tqʼoʼn twitza tiʼj tpaltil, sino tiʼjju in bʼant tuʼn tuʼn tten tbʼanel tmod» (Aaron).

Qa ma txi qkʼuʼn qʼoj, jaku tzaj yabʼil qiʼj ex mlay ten qximbʼetz toj tumel. Ax ikx, jaku tzaj nya bʼaʼn tiʼj qmejebʼleʼn.

«Jun maj, tzaj tqanin nchmile najsam weye tiʼj jun tiʼ kux choʼn toj wanmiye tuʼn. Kwest ela toj nwitze tuʼn tkubʼ nnajsaʼne til, pero kubʼ nnajsaʼne. Aj nximane tiʼj qa xi tiʼn ambʼil tuʼn tkubʼ nnajsaʼne til, in tzaj nbʼise tuʼn. Noqwit jun rat kubʼ nnajsaʼne til, mintiʼwtlo tzaj nim nya bʼaʼn toj qmejebʼleʼne» (Julia).

XIMANA TIʼJ JLU:

Bʼaʼn tuʼn t-ximana tiʼj jlu aj tbʼant jun tiʼ tuʼn tukʼila, aju in tzaj tbʼisa tuʼn:

• ¿Jun ratpe in tzaj tbʼisa?

• ¿Ilpe tiʼj tuʼn ttzaj tqanin wukʼile najsama weye moqa jaku tzikʼ tnaʼl wuʼne?

JAKU CHE YOLINE TIʼJ JLU:

• ¿Jteʼ ambʼil in xi tiʼn tuʼn tkubʼ qnajsaʼn qil qxolx?

• ¿Tiʼ jaku bʼant quʼn tuʼn tkubʼ qnajsaʼn naj qil?

JUNJUN NABʼIL TE KYEYE

• Aj ttzaj tbʼisa tuʼn tukʼila, miʼn kubʼ tnaʼna qa otoq kubʼ t-ximen tuʼn tbʼant jlu tuʼn.

• Tzʼelx tnikʼa tiʼj tukʼila. Bʼaʼn tuʼn ttzaj tnaʼna qa qkyaqilx in qo el txalpaj nimku maj (Santiago 3:2).

«Mas nya kwest tuʼn tkubʼ qnajsaʼn til qukʼil qa qkabʼil at qpaj, pero qa ma kubʼ qximen qa oʼkx jun at tpaj, kwest tuʼn tkubʼ qnajsaʼn til. Il tiʼj tuʼn tkubʼ qin qibʼ tuʼntzun t-xi qqanin najsam ex tuʼn tkubʼ qnajsaʼn til juntl» (Kimberly).

NABʼIL TOJ TYOL DIOS: «Tzʼok tililx tuʼna tuʼn tbʼant naj ttena tukʼil» (Mateo 5:25).